Madumduman Mo Bala?

Nasapwan mo bala ang ulihi nga mga guwa sang Ang Lalantawan nga may mapuslanon nga kabilihanan sa imo? Nian ngaa indi tilawan ang imo memorya paagi sa masunod:

▫ Ano ang pangunang katuyuan sang pagpang-ayo ni Jesus? Naglaragway ini, para sa kalig-unan sang dakung kadam-an sang katulad-karnero nga katawhan karon, nga ang mga makalampuwas sa Armagedon pagaayuhon pagkatapos sang Armagedon. (Isaias 33:24; 35:5, 6)—12/15, pahina 12.

▫ Ngaa kinahanglan naton ang dalayon nga pahanumdom: “Magpadayon sing malig-on sa pangamuyo”? (Roma 12:12) Ang mga pag-ipit kag mga salabton sa kabuhi mahimo nga magapabug-at sa aton kon kaisa amo kon ngaa malipat kita sa pagpangamuyo. Ukon mahimo kita madaug sang mga problema, nagadula sang aton kalipay sa paglaum sa Ginharian, nagauntat sa pagpangamuyo. Busa, kinahanglan naton ang mga pahanumdom nga nagapalig-on sa aton nga mangamuyo kag sa sining paagi nagasuod sing labi kay Jehova.—12/15, pahina 14.

▫ Ano ang nagapamatuod nga ang Anaw sang adlaw ni Noe nagbilin sing dimapanas nga epekto sa tawhanon nga rasa? Ginabulubanta nga kapin sa 500 ka leyenda sa Anaw ang ginsugid sang kapin sa 250 ka tribo kag katawhan. Makita ang mga pagkaanggid sa tanan sining leyenda.—1/15, pahina 5.

▫ Paano ang dimatuod nga mga manalagna karon kaangay sadto anay sang panahon ni Jeremias? Ang dimatuod nga mga manalagna karon nagaangkon nga nagatiglawas sa Dios, apang ginakawatan nila ang mga pulong sang Dios paagi sa pagbantala sang mga butang nga nagapahilayo sang hunahuna sang mga tawo sa kon ano gid ang ginasiling sang Biblia. Matuod ini labi na may kaangtanan sa pagpanudlo sang Ginharian. (Jeremias 23:30)—2/1, pahina 4.

▫ Ano ang kinahanglan kon ang isa ginbawtismuhan sa ngalan sang balaan nga espiritu? Nagakinahanglan ini nga ang isa nga ginbawtismuhan determinado nga makigkooperar sa espiritu, nga wala sing ginahimo sa pag-upang sang pagpanghikot sini sa tunga sang katawhan ni Jehova. Gani, dapat sia magakooperar sa matutom kag mainandamon nga ulipon kag sa kahimusan sang mga gulang sa kongregasyon. (Hebreo 13:7, 17; 1 Pedro 5:1-4)—2/1, pahina 18.

▫ Ngaa ang pagsimba sa mga larawan makatalagam sa sumilimba? Ginapakita sang Biblia nga ang mga larawan kalangil-aran kay Jehova nga Dios kag indi makabulig sa mga nagasimba sa ila nga magsuod sa Dios. (Deuteronomio 7:25; Salmo 115:4-8) ‘Ginbulag [ni Satanas nga Yawa] ang painoino’ sang mga tawo amo kon ngaa ang kamatuoran ‘wala nagaiwag.’ (2 Corinto 4:4) Gani kon nagasimba sa isa ka larawan, ang isa aktuwal nga nagahimo sang mga interes sang mga demonyo. (1 Corinto 10:19, 20)—2/15, pahina 6-7.

▫ Ngaa ang mga karnero ginkabig nga hamili nga pagkabutang sang panahon sang Biblia? Ang de-lana isa ka bag-o nga pagkabutang kag sarang magamit sa paghimo sing panapton para sa pamilya ukon sarang mabaligya. Ang mga sungay sang kanding nga lalaki gingamit sa pagsenyales sang Paghinugyaw kag sarang magamit sa pagpatunog sing paandam ukon sa pagdirekta sang mga maniobra sa inaway. Sanglit ang mga karnero amo ang isa sang matinlo nga mga sapat nga sarang makaon sang mga Israelinhon, ang isa ka panong sang karnero nagapasalig sing suplay sang kalan-on, kag nag-aman ini sing regular nga suplay sang gatas para imnon ukon para himuon nga keso.—3/1, pahina 24-5.

▫ Ano ang ginapangabay sang mga nagahigugma sa Dios kon mangamuyo sila nga magkari ang Ginharian sang Dios? (Mateo 6:10) Ginapangabay nila nga ang langitnon nga Ginharian sang Dios magapanghikot paagi sa paglaglag sa hinimu sang tawo nga mga sistema sang gobierno, nga napaslawan sa pagtuman sang ila panaad nga paluntaron ang paghidait kag kalig-unan. (Daniel 2:44)—3/15, pahina 6.

▫ Sin-o ang mga Apolohista, kag gintudlo bala nila ang Trinidad? Ang mga apolohista amo ang mga lider sang iglesia nga nagkabuhi sadtong ulihi nga bahin sang ikaduhang siglo.Nagsulat sila agod pangapinan ang Cristianismo nga nahibaluan nila batok sa mga pilosopiya nga lapnag sa Roma. Wala sing isa sa ila ang nagatudlo sing Trinidad.—4/1, pahina 24-9.

▫ Si Zacarias bala, nga amay ni Juan Bautista, nangin bungol kag apa, subong sang daw ginapakita sang Lucas 1: 62? Si Gabriel nagsiling nga ang panghambal ni Zacarias maapektuhan, indi ang iya palamatin-an. (Lucas 1:18-20) Ang Lucas 1:64 nagasiling: “Ang iya baba nagtikab sa gilayon kag ang iya dila nagtugak kag nakahambal sia.” Talupangda, wala diri sing ginasambit nga ang iya palamatin-an naapektuhan. Ang pagsambit sing ‘sinyas’ sa Lucas 1:62 mahimo nagakahulugan nga gingamit ang pila ka pagkumpas agod matigayon ang desisyon ni Zacarias.—4/1, pahina 31.