Mga Danyag Gikan sa Ginsaad nga Duta
Nag-aman Sia Para sa Israel sa Sinai
HANDURAWA ang minilyon—mga lalaki, mga babayi, kag kabataan—nga nagapakadto sa “daku kag makakulugmat nga kahanayakan, diin may mga man-ug nga dalitan kag mga iwiiwi kag duta nga kigas nga wala sing tubig”!
Yadtong mga pulong sang Dios nga makita sa Deuteronomio 8:15 nagapatalupangod kon daw ano ka makahaladlok nga paglakbay ang naghulat sa mga Israelinhon sang magguwa sila sa Egipto kag nagmartsa pakadto sa kahanayakan sang Sinai. Ang isa ka daku nga problema amo: Sin-o ang magaaman sing bastante nga pagkaon kag tubig?
Ang mga Israelinhon mga ulipon anay sa duog sang Nilo, apang wala sila paggutuma. Ang mga laragway sa pader sa dumaan nga mga lulubngan nagalaragway sing mga ubas, mga melon, kag iban pa nga prutas, subong man mga isda kag mga manok nga sarang makaon. Daw ano kasibu, nian, ang reklamo sa kahanayakan: “Sin-o bala ang magapakaon sa amon sing karne? Nadumduman namon ang isda nga ginakaon namon nga walay bayad sa Egipto, ang mga atimon, ang mga sandiya, ang mga bawang, ang mga sebuyas, kag ang ahos!”—Numeros 11:4, 5; 20:5.
Sang makatabok ang mga Israelinhon sa Dagat nga Mapula, indi nagdugay nga nahangpan nila dayon ang kahimtangan sang Sinai. Wala sila mag-agi sa ginaagyan sang mga negosyante nga alagyan sa aminhan kundi nagliko sila pakadto sa trayanggulo nga peninsula. Sang makalakat na sila sing 80 kilometros sa kahanayakan, ang ila pagkinahanglan sa tubig nangin hilingagawon gid. Indi nila mainum ang tubig nga nakit-an nila, kay mapait ini kag mahimo nga may dala nga mga balatian. “Ano bala ang amon imnun?” singgit nila. Nagpahilabot ang Dios, ginpatam-is niya ang tubig.—Exodo 15:22-25.
Tan-awa ang katay sang mga kamelyo sa ibabaw. Mahangpan mo ang problema kon paano ang Israel makapadayon sa paglakbay sa kahanayakan pakadto sa Bukid Sinai. Paano sila makakita pa sing bastante nga tubig—kag kalan-on—para sa ila kaugalingon subong man sa mga panong kag kahayupan nga dapat nila buhion?—Exodo 12:38.
Nagpadayon pa sila pakadto sa bagatnan kag nakakita sila sing makapabugnaw nga tubig kag kalan-on sa Elim. (Exodo 15:27) Apang, indi ina ang ila kaladtuan. Manugpakadto sila sa “bukid sang matuod nga Dios,” ang Bukid Sinai. (Exodo 3:1; 18:5; 19:2; 24:12-18) Siento-beinte kilometros ang kalayuon sini—mga kilometro sang batsehon, kigas nga duta.
Samtang nagpadayon sa paglakat ang daku nga guban pakadto sa Bukid Sinai, nagpalapit sila—kag mahimo gid nagdulog—sa daku nga oasis nga nakilal-an subong Feiran. Ang diutay nga bahin sini kit-anon sa laragway sa pihak nga pahina.a Yari ini sa tunga sang kahanayakan, pakadto sa Dagat nga Mapula (Gulpo sang Suez). Daw ano nga paumpaw ang nasapwan nila didto!
Samtang ang kahanayakan sang Sinai mahimo nga nagabagay sa laragway sang “daku kag makakulugmat nga kahanayakan,” ang mga Israelinhon nasilungan sang daku nga mga palma kag iban pa nga kakahuyan sa oasis sang Feiran. Nakakita sila didto sing bugana nga matam-is nga dates, nga ila makaon, kag sing suplay nga ila madala.
Ini tanan nangin posible bangod sang tubig sa idalom duta nga nagabulwak sa kadaygan sang Feiran. Handurawa kon ano ang imo batyagon kon ikaw yara sa kahanayakan sa desyerto kag sa hinali nakakita ikaw sing lab-as nga tubig nga mainum! Ginapakita sini nga bisan sa Sinai may yara mga duog nga diin may tubig nga makuha. Kon kaisa kinahanglan nga magkutkot sing madalom nga bubon. Nian kinahanglan ang pagpangabudlay sa pagsag-ub sing mga balde ukon tibod nga puno sing importante nga pluido, labi na kon ang mga panong kag kahayupan kinahanglan paimnun. Tubtob karon ang mga Bedouin nga taga-Sinai nagakadto sa mga bubon diin makasag-ub sila sing tubig para sa ila kaugalingon kag sa ila mga kamelyo.—Ipaanggid ang Genesis 24:11-20; 26:18-22.
Huo, walay sapayan sang mga okasyon nga nagkumod sila bangod sang daw wala sing solusyon nga kakulangan, ang mga Israelinhon nakakita sing tubig kag kalan-on. Kon kaisa gin-aman ini sang Dios sa isa ka milagruso nga paagi. (Exodo 16:11-18, 31; 17:2-6) Sa iban nga mga tion gintuytuyan niya sila padulong sa “isa ka duog nga palahuwayan” diin ang ila matuod nga mga kinahanglanon ginbusog sang kinaugali nga mga suplay. (Numeros 10:33-36) Sa tanan nga tion, ginpatalupangod niya sa ila ang kabuganaan nga naghulat sa mga matutom sa Ginsaad nga Duta.—Deuteronomio 11:10-15.
[Footnote]
a Ang mas daku nga laragway sini makita sa 1992 Calendar of Jehovah’s Witnesses.
[Ginkuhaan sang Laragway sa pahina 24]
Pictorial Archive (Near Eastern History) Est.
[Ginkuhaan sang Laragway sa pahina 24]
Pictorial Archive (Near Eastern History) Est.
[Ginkuhaan sang Laragway sa pahina 24, 25]
Pictorial Archive (Near Eastern History) Est.
[Ginkuhaan sang Laragway sa pahina 25]
Pictorial Archive (Near Eastern History) Est.