Kon Paano ang Pagtuo Makabulig sa Masakiton

ANG kasaysayan tuhoy sa milagruso nga mga pagpang-ayo sa Biblia nagapasalig sa aton nga ang Dios nabalaka nahanungod sa aton kaayuhan, kag nagapakita ini sang iya gahom sa pagpang-ayo. Sanglit ining milagruso nga mga pagpang-ayo naghimaya sa Dios kag nagdala sing daku nga kalipay, makatarunganon ang mamangkot, Nagapanghikot bala gihapon ang dulot tuhoy sa pagpang-ayo paagi sa balaan nga espiritu?

Indi ang sabat sa sinang pamangkot—kag mahimo makibot ang iban sa rason. Natuman na sang milagruso nga mga pagpang-ayo sadtong nahaunang siglo ang katuyuan sini. Ang The Illustrated Bible Dictionary nagsiling sing husto: “Ang katuyuan sang pagpang-ayo nga mga milagro relihioso, indi medikal.” Ano ang iban sang relihiosong katuyuan sadtong mga milagro?

Una, ang pagpang-ayo nga mga milagro ni Jesus gingamit sa pagpakilala sa iya subong ang Mesias. Kag sang napatay na sia, nagbulig ini sa pagpamatuod nga ang pagpakamaayo sang Dios yara sa bag-ong Cristianong kongregasyon. (Mateo 11:2-6; Hebreo 2:3,4) Dugang pa, nagpakita ini nga ang saad sang Dios nga ayuhon ang katawhan sa bag-ong kalibutan matuman. Nagapalig-on ini sang aton pagtuo nga magaabot gid ang tion nga “ang pumuluyo indi magsiling: ‘Nagamasakit ako.’ Ang katawhan nga nagapuyo sa iya patawaron sang ila kalautan.” (Isaias 33:24) Sang natuman ining nahaunang-siglo nga mga katuyuan, ang mga milagro wala na ginkinahanglan.

Talalupangdon nga ang nahaunang-siglo nga mga disipulo mismo ni Jesus may mga sablag nga wala gin-ayo sing milagruso. Dugang ini nga pamatuod nga ang milagruso nga pagpang-ayo ni Jesus kag sang mga apostoles gindesinyo sa pagtudlo sing importante nga mga kamatuoran, indi sa paghatag sing serbisyo mediko. Sang nagrekomendar sing bulong sa masunson nga pagmasakit ni Timoteo, ginpanugda ni Pablo ang alak subong bulong, indi ang pagpang-ayo paagi sa pagtuo. Si Pablo, nga naghimo sing mga milagro sang pagpang-ayo, wala mabulong sa “ungon sa unod” nga masunson ‘nagpintas’ sa iya.—2 Corinto 12:7; 1 Timoteo 5:23.

Sang napatay ang mga apostoles, ang dulot sang pagpang-ayo nagtaliwan. Ginpakita mismo ni Pablo nga mahanabo ini. Nagapaanggid sang Cristianong kongregasyon sa isa ka bata, si Pablo nagsiling: “Sang ako bata pa, naghambal ako subong sang bata, naghunahuna ako subong sang bata, nagbais ako subong sang bata; sang hamtong na ako, ginsikway ko ang binata nga mga butang.” Ang punto sang iya ilustrasyon amo nga ang milagruso nga mga dulot sang espiritu bahin anay sang pagkabata sang Cristianong kongregasyon. Mga “binata nga mga butang” ini. Gani, nagsiling sia: “Magauntat sila [milagruso nga mga buhat].”—1 Corinto 13:8-11.

Makabulig Bala ang Pagtuo Kon Kita Magmasakit?

Walay sapayan, bisan pa wala kita nagasalig sa pagpang-ayo paagi sa pagtuo, nagakaigo gid nga mangamuyo kita sa Dios sing bulig kon kita magmasakit. Kag wala sing malain nga ang iban magapangamuyo tungod sa aton. Apang ang mga pangamuyo dapat nga realistiko kag nahisanto sa kabubut-on sang Dios. (1 Juan 5:14, 15) Ang Biblia wala nagasugo sa aton nga magpangamuyo para sa pagpang-ayo paagi sa pagtuo.a Sa baylo, nagapangamuyo kita para sa mahigugmaon nga pagsakdag ni Jehova sa tion sang mga pagtilaw nga tuga sang balatian.

Ginapakita sang Biblia kon ano ang mahimo nga ipangamuyo sang mga matutom kon nagamasakit sang nagsiling ini: “Sakdagon sia ni Jehova sa higdaan sang pag-antos; ginabayluhan mo ang bug-os niya nga higdaan sa iya pagbalatian.” (Salmo 41:3) Ang pagpamalandong sa Pulong sang Dios makabulig sa mga nagaantos sing emosyonal nga balatian. Ang salmista nagsulat: “Ang imo mahigugmaon nga kalulo, O Jehova, nagpatindog sa akon. Sa kadam-an sang akon mga hunahuna sa sulod nakon, ang imo mga paglipay nagapasadya sang akon kalag.”—Salmo 94:18, 19; tan-awa man ang 63:6-8.

Dugang pa, kinahanglan naton ipakita ang maayo nga igbalatyag tuhoy sa kapagros, kag ang Biblia nagalaygay sa aton nahanungod sini. Mas maayo ang magkabuhi suno sa mga prinsipio sang Biblia sang sa mag-abuso sa druga, manigarilyo, magpahubog, ukon magkaon sing sobra kag nian kon magbalatian tungod sini, magaliso sa pagpang-ayo paagi sa pagtuo bangod sang pagkawalaymahimo. Ang pagpangamuyo para sa milagro kon magmasakit ang isa indi tal-us para sa maalamon nga paggawi sa paglikaw sang mahimo malikawan nga balatian, subong sang pagkaon sing masustansia nga kalan-on kon matigayon ini ukon pagpabulong kon diin mahimo.

Ang Pulong sang Dios nagapalig-on man sa aton nga palambuon ang maayong mga panimuot sa hunahuna nga mapuslanon sa aton pisikal nga kapagros. Ang tulun-an sang Mga Hulubaton nagalaygay: “Ang malinong nga tagipusuon amo ang kabuhi sang unod, apang ang kahisa amo ang pagkagabuk sang mga tul-an.” “Ang tagipusuon nga malipayon maayo nga bulong, apang ang espiritu nga buong nagapamala sang mga tul-an.” (Hulubaton 14:30; 17:22) Ang pagpangamuyo nga palambuon sang balaan nga espiritu ang kalinong kag kasadya sa aton may mapuslanon lamang nga epekto sa aton pisikal nga kapagros.—Filipos 4:6, 7.

Kamusta ang Pagpang-ayo Paagi sa Pagtuo?

Sa pagkamatuod, bisan pa ang isa magakabuhi sing maayo subong sang ginapahanugot sang iya kahimtangan, ang balatian nagaabot gihapon. Ano nian? May malain bala sa pagkadto sa isa ka faith healer sa paglaum nga magaayo? Huo, may malain. Ang modernong mga faith healer kis-a lang nagapang-ayo nga wala sing bayad. Kag ang pagbayad sa isa ka faith heal­er nga mahimo kuntani magamit ang kuwarta sa pagpabulong magaresulta sing daku nga bili sa aton. Isa pa, ngaa ihatag mo ang imo kuwarta sa mga tawo nga nagahingalit sa pagkamapinatihon sang mga tawo?

Ang iban mahimo magapangatarungan: ‘Sa pagkamatuod, ang pagpang-ayo paagi sa pagtuo mahimo nga may kabilihanan kon bisan ang diutay lamang nga nagakadto sa “mga manugpang-ayo” nagaayo.’ Apang balaisan kon bala ang mga faith healer nagaayo gid sa isa sing permanente. Ang The Encyclopædia Britannica nagasiling: “Ang pananalawsaw suno sa pat-od na nga mga paagi ginhimo sa madamong wala mahibalui nga mga rason sa pagpang-ayo paagi sa pagtuo.”

Bisan pa ang iban daw nag-ayo, indi ini pamatuod sang pagpanghikot sang balaan nga espiritu. Sa Sermon sa Bukid, si Jesus nagsiling: “Madamo ang magasiling sa akon sadtong adlaw, ‘Ginuo, Ginuo, wala bala kami magpanagna sa imo ngalan, kag sa imo ngalan magsubol sang mga yawa, kag sa imo ngalan maghimo sing madamo nga buhat nga gamhanan?’ Kag nian pahayagan ko sila: Wala gid ako makakilala sa inyo! Palayo sa akon, kamo nga mga manugbuhat sang kalautan.” (Mateo 7:22, 23) Nagsiling man si Jesus nga ang iban, bisan nga wala ginakahamut-an sang Dios, nagaganyat sing igtalupangod paagi sa mga tanda: “Kay magalutaw ang dimatuod nga mga Cristo kag dimatuod nga mga manalagna kag magapakita sila sing dalagkung talandaan kag kalatingalahan agod nga mapatalang, kon mahimo, bisan ang mga pinili.” (Mateo 24:24) Sa pagkamatuod, ang modernong mga faith healer sarang malakip sa aplikasyon sinang mga tinaga, upod ang ila dramatiko nga mga presentasyon, pirme nga pagpangayo sing kuwarta, kag ginaangkon nga milagruso nga mga pagpang-ayo.

Wala nila ginasunod ang tikang ni Jesus. Sin-o, nian, ang ginasunod nila? Si apostol Pablo nagasugid sa aton sang nagsiling sia: “Si Satanas nagapakamanugtunda sang kapawa. Gani indi katingalahan nga kon ang iya mga alagad man nagapakamanug-alagad sang pagkamatarong. Ang ila katapusan mangin suno sa ila mga buhat.” (2 Corinto 11:14, 15) Kon ang mga faith healer wala nagahimo sang mga pagpang-ayo nga ginaangkon nila, nian mga manugdaya sila, nagasunod sang banas ni Satanas, nga “manugdaya sang bug-os nga kalibutan.” (Bugna 12:9) Apang kamusta kon, sa diutay nga hitabo, nagapang-ayo sila? Indi bala kita dapat maghinakop nga ang ila “gamhanan nga mga buhat” ginhimo sa gahom ni Satanas kag sang iya mga demonyo? Huo, amo gid sina!

Ang Tion sang Matuod nga Pagpang-ayo

Ang milagruso nga pagpang-ayo ni Jesus ginhimo paagi sa bulig sang balaan nga espiritu sang Dios. Ginpakita sini ang iya katuyuan nga lubaron ang tanan nga problema sa lawas sang tawo sa iya sibu nga tion. Si Jehova nagasaad sang ‘pagbulong sa mga pungsod.’ (Bugna 22:2) Kag indi lamang niya ayuhon ang mga balatian kundi dulaon niya ang kamatayon. Ginapaathag ni Juan nga si Jesus nagkari “agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Daw ano ka makaalayaw nga pagpang-ayo! Himuon liwat ni Jesus ang mga pagpang-ayo kaangay sang ginarekord sa Biblia apang sa mas masangkad nga kasangkaron. Bisan ang mga patay pagabanhawon niya! (Juan 5:28, 29) San-o ini matabo?

Sa bag-ong kalibutan sang Dios, diin, suno sa tanan nga pamatuod, malapit na. Inang bag-ong kalibutan, nga pagaabiabihon pagkatapos dulaon sing dayon ang kalautan sining sistema sang mga butang, mangin tunay nga pagpakamaayo para sa matarong sing tagipusuon nga katawhan. Mangin kalibutan ini nga wala sing pag-antos. “Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisud ukon paghibi ukon kasakit pa. Kay ang nahaunang mga butang nagtaliwan.” (Bugna 21:4) Kabaliskaran gid sa makita naton karon sa palibot naton!

Busa, tuhoy sa mga balatian, mangamuyo sa Dios sing pagsakdag. Kag nagamasakit man ukon wala, tun-i kon paano ang dayon nga kabuhi nga wala sing balatian mangin posible gid. Palig-una ang imo pagtuo sa sining masaligan nga saad sang Dios paagi sa pagtuon sa madamong pagpatuhoy sa sini sa Biblia. Tun-i kon paano ang katuyuan sang Dios nahanungod sini malapit na matuman suno sa iya orasan. Indi magpangduhaduha, kay ang Pulong sang Dios nagapasalig sa aton: “Ginlamon niya sing dayon ang kamatayon, kag pahiran sang Soberanong Ginuong si Jehova ang luha sang tanan nilang nawong.”—Isaias 25:8.

[Footnote]

[Laragway sa pahina 7]

Ang milagruso nga mga pagpang-ayo ni Jesus nagtuman sang mga katuyuan sini

[Laragway sa pahina 8]

Suliton kag pamuaron ni Jesus ang mga milagro sa pagpang-ayo