‘Milagruso nga Pagpang-ayo’ Karon​—Naghalin Bala Ini sa Dios?

SA PILA ka pungsod, kinaandan na lang nga makakita sing mga deboto nga nagakadto sa ginakabig nila nga sagrado nga mga duog sang pagsimba kag madamo ang nagasiling nga nag-ayo sila sa ila “indi mabulong” nga mga balatian. Sa iban nga pungsod, ginasiling sang mga albularyo nga mapaayo nila ang mga tawo paagi sa di-kinaandan nga mga gahom. Kag sa iban naman nga mga lugar, ginahiwat ang mga relihioso nga pagtilipon sa diin ang mga lupog ukon piang nagatumbo gikan sa ila wheelchair ukon ginahaboy ang ila mga saklay kag nagasiling nga nag-ayo sila.

Ang mga nagapang-ayo, nga kalabanan miembro sang nagkalainlain nga relihion, pirme nagasumbunganay nga ang iban nga relihion mga apostata, butig, ukon pagano. Gani ang pamangkot amo, Nagamilagro bala ang Dios paagi sa nagkalainlain kag nagailinaway nga mga relihion? Ang Biblia nagsiling: “Ang Dios isa ka Dios, indi sang kagamo, kundi sang paghidait.” (1 Corinto 14:33) Gani, ini bala nga ‘milagruso nga mga pagpang-ayo’ naghalin gid sa Dios? Ang pila sa nagapang-ayo nagapangangkon nga ginahimo nila ini paagi sa gahom ni Jesus. Binagbinagon naton karon kon paano nagpang-ayo si Jesus sang una.

Kon Paano Nagpang-ayo si Jesus

Tuhay gid ang paagi ni Jesus sa pagpang-ayo kon ipaanggid sa mga nagapang-ayo karon. Halimbawa, gin-ayo ni Jesus ang tanan nga nagpangayo sa iya sing bulig. Wala sia nagpili sing pila lang ka tawo gikan sa kadam-an agod ayuhon kag papaulion ang iban nga wala naayo. Bug-os man ang mga pagpang-ayo ni Jesus kag sa kalabanan nga sitwasyon nagaayo ini sa gilayon. Nagsiling ang Biblia: “Ang bug-os nga kadam-an nagatinguha sa pagtandog sa iya, bangod ang gahom nagagua sa iya kag nagaayo sa ila tanan.”​—Lucas 6:19.

Kabaliskaran sa mga faith healer karon, nga sa masami nagabasol sa mga may balatian nga kulang sila sing pagtuo amo nga wala sila nag-ayo, gin-ayo ni Jesus bisan ang mga wala pa magtuo sa iya. Halimbawa, gin-ayo ni Jesus ang isa ka bulag bisan pa nga wala sia nangayo sing bulig kay Jesus. Sang ulihi, ginpamangkot sia ni Jesus: “Nagatuo ka bala sa Anak sang tawo?” Ang tawo nagsabat: “Sin-o sia, Ginuo, agod magtuo ako sa iya?” Nagsiling si Jesus sa iya: “Sia amo ang nagapakighambal sa imo karon.”​—Juan 9:1-7, 35-38.

Mahimo mamangkot ka, ‘Kon indi na kinahanglan ang pagtuo agod ayuhon ni Jesus, ngaa masami nagasiling si Jesus sa iya ginpang-ayo: “Ang imo pagtuo nag-ayo sa imo”?’ (Lucas 8:48; 17:19; 18:42) Paagi sa pagsiling sini, ginpatalupangod ni Jesus nga ang mga nag-ayo amo ang mga napahulag sang ila pagtuo agod pangitaon sia, samtang ang mga tawo nga wala nagpalapit sa iya wala gin-ayo. Ang mga masakiton wala nag-ayo bangod sang ila pagtuo, kundi paagi sa gahom sang Dios. Nagsiling ang Biblia tuhoy kay Jesus: “Sia ginhaplasan sang Dios sing balaan nga espiritu kag gahom, kag naglibot sia sa kadutaan nga nagahimo sang maayo kag nagapang-ayo sa tanan nga ginapabudlayan sang Yawa; bangod ang Dios kaupod niya.”​—Binuhatan 10:38.

Ang kalabanan nga mga pagpang-ayo karon nagapanukot sing kuarta. Ang mga faith healer nakilal-an nga maayo sa pagpangolekta sing kuarta. Ang isa sini sa ila ginreport nga nakatipon sing mga kuatro bilyones ka pesos sa isa ka tuig sa bug-os kalibutan sini nga pagpanghikot. Ang mga organisasyon sang simbahan nakakuwarta man sa mga nagakadto sa sagrado kuno nga mga lugar agod mag-ayo. Sa kabaliskaran, wala nanukot si Jesus sa mga tawo nga ginpang-ayo niya. May tion pa gani nga sia ang nagpakaon sa ila. (Mateo 15:30-38) Sang ginsugo ni Jesus ang iya mga disipulo nga magwali, ginsilingan niya sila: “Ayuha ang mga masakiton, banhawa ang mga patay, ayuha ang mga aruon, tabuga ang mga demonyo. Nagbaton kamo nga wala sing bayad, ihatag ninyo nga wala sing bayad.” (Mateo 10:8) Ngaa tuhay gid ang pagpang-ayo ni Jesus sangsa mga nagapang-ayo subong?

Kay Sin-o Naghalin Ini nga “Pagpang-ayo”?

Sa sulod sang mga tinuig, ang pila ka mga doktor, manugpanalawsaw, kag iban pa nga nakaeskwela tuhoy sa medisina, nag-usisa sa pangangkon sang relihioso nga mga manugbulong. Ano ang ila natukiban? Suno sa Daily Telegraph sang London, ang isa ka doktor sa Inglaterra nga 20 na ka tuig nga nangusisa sa sini nga pagpamulong nagsiling: “Ang report tuhoy sa mga nagapangangkon nga nagapang-ayo sa milagruso nga paagi, wala gid sing bisan isa ka medikal nga ebidensia.” Apang madamo nga tawo ang nagapati nga nag-ayo sila paagi sa gahom sang mga butang nga ginapanag-iyahan sang mga santos, sagrado kuno nga mga duog, ukon relihioso nga mga manugbulong. Nalimbungan bala sila?

Sa iya bantog nga Sermon sa Bukid, nagsiling si Jesus nga ang relihioso nga mga impostor magasiling sa iya: “Ginuo, Ginuo, wala bala kami . . . naghimo sang madamong gamhanan nga mga buhat sa imo ngalan?” Apang sabton niya sila: “Wala gid ako makakilala sa inyo! Palayo sa akon, kamo nga mga manugbuhat sang pagkamalinapason.” (Mateo 7:22, 23) Tuhoy sa ginasiling sang mga manugbulong nga ginhalinan sang ila gahom, si apostol Pablo nagpaandam: “Ang presensia sang isa nga malinapason nahisuno sa pagpanghikot ni Satanas nga may tagsa ka gamhanan nga buhat kag butig nga mga tanda kag mga kalatingalahan kag may tagsa ka di-matarong nga pagpangdaya.”​—2 Tesalonica 2:9, 10.

Dugang pa, ang “mga pagpang-ayo” nga naangot sa relihioso nga mga butang, idolo, kag mga imahen wala maghalin sa Dios. Ngaa? Bangod maathag nga nagsugo ang Pulong sang Dios: “Palagyo kamo gikan sa idolatriya,” kag “Magbantay kamo batok sa mga idolo.” (1 Corinto 10:14; 1 Juan 5:21) Ini nga “mga pagpang-ayo” amo ang isa sa mga paagi sang Yawa agod mapahilayo ang mga tawo sa matuod nga pagsimba. Nagsiling ang Biblia: “Si Satanas mismo padayon nga nagahimo sang iya kaugalingon nga anghel sang kapawa.”​—2 Corinto 11:14.

Kon Ngaa Nagpang-ayo si Jesus kag ang mga Apostoles

Ang matuod nga milagruso nga mga pagpang-ayo nga narekord sa Cristianong Griegong Kasulatan nagpamatuod nga si Jesus kag ang mga apostoles ginpadala sang Dios. (Juan 3:2; Hebreo 2:3, 4) Ginsakdag man sang pagpang-ayo ni Jesus ang mensahe nga iya ginbantala: “Naglibot sia sa bug-os nga Galilea, nga nagapanudlo sa ila mga sinagoga kag nagabantala sang maayong balita sang ginharian kag nagapang-ayo sang tanan nga sahi sang balatian.” (Mateo 4:23) Ang gamhanan nga mga hinimuan ni Jesus, nga nagalakip indi lamang sa pagpang-ayo sang balatian kundi pagpakaon man sa kadam-an, pagkontrol sang paniempo, kag pagbanhaw pa gani, nagapakita kon ano ang iya pagahimuon para sa matinumanon nga katawhan sa iya paggahom sa Ginharian. Maayo gid ini nga balita!

Ining gamhanan nga mga buhat, ukon dulot sang espiritu maathag nga nauntat na sang napatay si Jesus kag ang mga apostoles, kag ang mga ginpasahan nila sini nga mga dulot. Si apostol Pablo nagsulat: “Bisan pa may mga dulot nga pagpanagna, madula ini; bisan pa may [milagruso nga] paghambal sing lainlain nga hambal, magauntat ini; bisan pa may dulot nga ihibalo [nga ginpahayag sang Dios], madula ini.” (1 Corinto 13:8) Ngaa? Bangod ang katuyuan sini, nga amo ang pagpakilala kay Jesus subong ginsaad nga Mesias kag sa pagpamatuod nga ginkahamut-an sang Dios ang Cristianong kongregasyon natapos na. Ining gamhanan nga mga binuhatan, nga nagalakip sa pagpang-ayo, indi na kinahanglan subong; amo nga ‘nadula na ini.’

Apang ang mga milagruso nga pagpang-ayo ni Jesus may importante nga mensahe sa aton karon. Kon talupangdon naton kag tuuhan ang mga panudlo ni Jesus tuhoy sa Ginharian sang Dios, malauman naton nga magaabot ang tion nga matuman ang tagna sang Dios sa espirituwal kag pisikal nga paagi, ini nagasiling: “Ang pumuluyo indi magsiling, ‘Nagamasakit ako.’”​—Isaias 33:24; 35:5, 6; Bugna 21:4.