Pagpangisda sing mga Tawo sa Tugob-Globo nga Kadagatan

“Kay kon nagawali ako sang maayong balita, wala ako sing ipabugal, kay ginakinahanglan gid nga magwali ako. Kailo ako kon indi ko pag-iwali ang maayong balita!”—1 CORINTO 9:16.

1, 2. (a) Sin-o gid ang nakahimo sang hangkat nga ginhatag sa 1 Corinto 9:​16, kag ngaa amo sina ang imo sabat? (b) Anong salabton ang ginbaton sang mga Saksi ni Jehova?

SIN-O sa sining ika-20 ka siglo ang tunay nga nakahimo sang hangkat nga ginhatag sang pinamulong ni Pablo sa ibabaw? Sin-o ang minilyon sa kalibutan nga naglakat sa pagpangisda sing mga lalaki kag mga babayi nga “mahunahunaon sa ila espirituwal nga kinahanglanon”? (Mateo 5:3) Sin-o ang nabutang sa katalagman nga mabilanggo kag mapatay, kag nga nag-antos sa madamong kadutaan bangod sang pagtuman sang sugo ni Cristo sa Mateo 24:14?

² Ang rekord nagasabat: Mga Saksi ni Jehova. Sang nagligad nga tuig lamang kapin sa apat ka milyon ka Saksi ang nagpamalaybalay nga ‘nagawali sang maayong balita’ sa 211 ka pungsod kag teritoryo kag sa kapin sa 200 ka hambal. Indi ini pinili lamang nga grupo sang ginhanas nga mga misyonero. Indi, ang tanan nga mga Saksi ni Jehova nagabatyag sang salabton nga magbantala kag magpanudlo sa balaybalay kag sa tanan nga nagakaigo nga okasyon. Ngaa nabatyagan nila ang kinahanglanon nga ipaambit ang ila pagtuluuhan sa iban? Bangod ginakilala nila nga ang ihibalo nagadala sing salabton.—Ezequiel 33:8, 9; Roma 10:14, 15; 1 Corinto 9:16, 17.

Pagpangisda sing mga Tawo, Isa ka Tugob-globo nga Hangkat

3. Daw ano kasangkad ang hilikuton sa pagpangisda?

³ Ining dakung hilikuton sa pagpangisda indi limitado, kon hambalon pa, sa pila ka suba ukon linaw ukon bisan sa isa ka dagat. Indi, subong sang ginsugo ni Jesus, himuon ini sa “tanan nga kapungsuran.” (Marcos 13:10) Antes magkayab sa iya Amay, ginsugo ni Jesus ang iya mga disipulo: “Busa lakat kamo kag himuon nga mga disipulo ang tanan nga kapungsuran, nga nagabawtismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila sa pagtuman sang tanan nga ginsugo ko sa inyo. Kag, yari karon! ako kaupod ninyo sa tanan nga adlaw tubtob sa konklusion sang sistema sang mga butang.”—Mateo 28:19, 20.

4. (a) Ano ang mahimo nga nagpakibot sa unang Judiyong mga sumulunod ni Jesus? (b) Paano ginatamod sang mga Saksi ni Jehova ang kasangkaron sang ila pagbantala nga hilikuton?

⁴ Para sa Judiyong mga sumulunod ni Jesus, makakilibot ina nga sugo. Ginasugo niya ang iya Judiyong mga disipulo nga magakadto sila karon sa “dimatinlo” nga mga Gentil sang tanan nga kapungsuran kag tudluan sila. Nagkinahanglan ini sing pila ka pagbalhin para sa ila agod mahangpan ang epekto kag magpanghikot sa sinang asaynment. (Binuhatan 10:9-35) Apang wala sing tal-us; ginsilingan sila ni Jesus sa isa ka parabola nga “ang latagon amo ang kalibutan.” Busa, ginatamod karon sang mga Saksi ni Jehova ang bug-os nga kalibutan subong ang lugar nga palangisdaan nila. Wala sing “20-kilometros” ukon “teritoryo nga kadagatan” nga nagalatid sang ginsugo sa ila sang Dios. Kinahanglan kon kaisa ang paghantop sa mga lugar nga wala sing kahilwayan sa relihion. Apang, nagapangisda sila nga may pagkahilingagawon. Ngaa? Bangod ang mga hitabo sa kalibutan kag ang katumanan sang tagna sang Biblia nagapakita nga yari na kita sa ulihi nga bahin sang tugob-globo nga hilikuton sa pagpangisda.—Mateo 13:38; Lucas 21:28-33.

Pag-uswag sa Tugob-globo nga Hilikuton sa Pagpangisda

5. Anong sahi sang mga tawo ang nagsabat sa tugob-globo nga hilikuton sa pagpangisda?

⁵ Ang kalabanan sa hinaplas nga mga manunubli sang Ginharian “ginpangisda” gikan sa mga pungsod antes sang 1935, gani ang ila kabug-usan nga kadamuon halos nakompleto na. Gani, labi na kutob sang 1935, ang mga Saksi ni Jehova nangita sa mga mapainubuson nga tawo nga mahimo malaragway subong “mga malulo” nga “magapanag-iya sang duta.” (Salmo 37:11, 29) Mga tawo sila nga “nagapanghayhay kag nagabakho sa tanan nga kalangil-aran nga ginhimo.” Nagapanghikot sila pabor sa paggahom sang Ginharian sang Dios antes ang “dakung kapipit-an” magapapas sang malaut kag malain nga sistema ni Satanas kag ang iya mga sumilimba idap-ong sa “horno nga may kalayo” sa katapusan nga kalaglagan.—Ezequiel 9:4; Mateo 13:47-50; 24:21.

6, 7. (a) Anong mga tikang ang ginhimo sang 1943 may kaangtanan sa pagbantala nga hilikuton? (b) Ano ang nangin mga resulta?

⁶ Ang tugob-globo nga hilikuton sa pagpangisda madinalag-on bala sa karon? Pahambala ang mga katunayan. Sadto anay sang 1943, ang Inaway Kalibutanon II nagadabdab pa gihapon, apang nakita sang matutom nga hinaplas nga mga kauturan sa bug-os kalibutan nga ulong-talatapan sang mga Saksi ni Jehova sa Brooklyn, New York, nga ang dakung bug-os globo nga pagpangisda dapat himuon. Gani, anong mga tikang ang ginhimo?a—Bugna 12:16, 17.

⁷ Sang 1943 ang Watchtower Society nagpasad sing eskwelahan para sa mga misyonero nga ginatawag Gilead (sa Hebreo, “Tumpok nga Saksi”; Genesis 31:47, 48) nga nagsugod sa paghanas sa isa ka gatos ka misyonero kada anum ka bulan agod ipadala sila subong simbuliko nga mga mangingisda sa bug-os nga duta. Sadto anay, may yara lamang 126,329 ka Saksi nga aktibo nga nagapangisda sing mga tawo sa 54 ka kadutaan. Sa sulod sang napulo ka tuig inang kadamuon naglumpat sa 519,982 ka Saksi sa 143 ka kadutaan! Sa pagkamatuod, ang Eskwelahan Gilead nagapatubas sing walay kahadlok nga mga mangingisda nga lalaki kag babayi, nga handa sa pagkadto sa mga kultura sa luwas kag sa pagpasibu sa bag-ong palangisdaan. Subong resulta, linibo ka bunayag sing tagipusuon nga tawo ang nagsabat. Ang mga misyonero, kag ang lokal nga mga Saksi nga kaupod nila nga nagapangabudlay, nagpasad sing sadsaran para sa makatilingala nga pag-uswag nga nagakahanabo karon.

8, 9. (a) Anong mga halimbawa ang mahimo mahatag tuhoy sa talalupangdon nga hilikuton sa pagmisyonero? (b) Paano nakita sang mga misyonero ang tumalagsahon nga pag-uswag sa ila mga latagon? (Tan-awa man ang 1992 Yearbook of Jehovah’s Witnesses.)

⁸ Madamong matutom nga beterano gikan sa unang mga klase sang Gilead ang nagaalagad gihapon sa ila mga asaynment sa luwas, bisan pa nga sa karon kapin na sa 70 ukon 80 ka tuig ang ila edad. Ang isa ka halimbawa nga nagalarawan sa madamo sa ila amo ang 82-anyos nga si Eric Britten kag ang iya asawa, nga si Christina, nga naggradwar sa ika-15 nga klase sang Gilead sang 1950 kag nagaalagad gihapon sa Brazil. Sang nagkadto sila sa Brazil, wala pa 3,000 ang Saksi sa sinang pungsod. Karon kapin na sa 300,000! Sa pagkamatuod, ang ‘diutay nangin mabakod nga pungsod’ sa Brazil bangod ang pagpangisda nangin mapatubason.—Isaias 60:22.

⁹ Kag ano ang masiling naton nahanungod sa mga misyonero sa Aprika? Ang kalabanan nakapasibu sa tuhay katama nga kultura kag nakatuon nga higugmaon ang mga Aprikano. Tipiko amo ang mag-utod nga si John kag si Eric Cooke kag ang ila mga asawa, si Kathleen kag si Myrtle, nga nagaalagad karon sa Bagatnan nga Aprika. Sanday John kag Eric naggradwar sa ikawalo nga klase sang 1947. Nag-alagad sila sa Angola, Zimbabwe, Mozambique, kag Bagatnan nga Aprika. Ang iban nga mga misyonero napatay sa Aprika bangod sang balatian, kag ang iban bangod sang inaway kag paghingabot, subong nanday Alan Battey kag Arthur Lawson, nga napatay sa sibil nga inaway sining karon lang sa Liberia. Apang, ang kadagatan sa Aprika napamatud-an nga mapatubason katama. May yara na karon kapin sa 400,000 ka Saksi nga nalapta sa sinang malapad nga kontinente.

Ang Tanan May Bahin

10. Ngaa kag sa anong paagi ang mga payunir nagahimo sing dalayawon nga hilikuton?

¹⁰ Apang, dapat kilalahon nga bisan pa ang dumuluong nga mga misyonero nagadamo sing linibo, ang lokal nga mga manugbantala kag mga payunirb nangin minilyon. Ginahimo nila ang kalabanan sang pagbantala nga hilikuton sa bug-os nga duta. Sang 1991 may promedyo nga kapin sa 550,000 ka payunir kag nagalakbay nga mga ministro. Daw ano ka makalilipay ina nga kadamuon kon hunahunaon naton ang ginahimo nga pinasahi nga panikasog sining tanan nga matutom nga mga Saksi agod makigbahin sa dakung hilikuton sa pagpangisda, nagapromedyo sing halin sa 60 tubtob 140 ka oras sang pagbantala kada bulan. Ginahimo ini sang madamo nga may dakung personal nga sakripisyo kag gasto. Apang ngaa? Bangod ginahigugma nila si Jehova nga ila Dios upod sang ila bug-os nga tagipusuon, hunahuna, kalag, kag kusog, kag ginahigugma nila ang ila mga isigkatawo subong sang ila kaugalingon.—Mateo 22:37-39.

11. Anong pat-od nga pamatuod nga ang espiritu ni Jehova nagapanghikot sa tunga sang iya katawhan?

¹¹ Ano ang masiling naton tuhoy sa kapin sa tatlo kag tunga pa ka milyon ka Saksi nga wala nagaalagad sing bug-os tion apang nagahatag sing 100 porsiento sa pag-alagad kay Jehova, suno sa ila mga kahimtangan? Ang iban mga asawa, mga iloy nga nagaatipan sang magagmay nga kabataan, nga nagahinguyang sang iban sang ila hamili nga tion sa tugob-globo nga hilikuton sa pagpangisda. Madamo ang mga bana ukon mga amay nga may bug-os tion nga palamugnan; apang, nagapain sila sing tion sa talipuspusan sang semana kag sa gab-i sa pagtudlo sang kamatuoran sa mga estranghero. Nian yara ang dakung kadam-an sang diminyo nga mga lalaki kag mga babayi kag mga pamatan-on nga nagapakigbahin sa pagbantala kag nagarekomendar sang kamatuoran paagi sa ila paggawi. Anong iban pa nga relihion nga may kapin sa apat ka milyon ka wala ginabayaran nga boluntaryo nga nagabantala kada bulan sang maayong balita tuhoy sa paggahom sang Ginharian sang Dios? Pat-od gid nga nagapamatuod ini sang pagpanghikot sang espiritu ni Jehova!—Salmo 68:11; Binuhatan 2:16-18; ipaanggid ang Zacarias 4:6.

Mga Rason nga Nagaamot sa Pagtubo

12. Ngaa kag sa anong kadamuon ang mga tawo nagasabat sa kamatuoran?

¹² Ining masangkad nga pagbantala nga hilikuton nagadala sing talalupangdon nga mga resulta kada tuig. Sang 1991 kapin sa 300,000 ka bag-ong Saksi ang ginbawtismuhan paagi sa bug-os nga pagtum-oy sa tubig. Katumbas ina sa kapin sa 3,000 ka kongregasyon nga may 100 ka Saksi ang tagsa! Paano ini tanan natigayon? Dumdumon naton ang ginsiling ni Jesus: “Walay tawo nga makakari sa akon kon indi sia pagbuyukon sang Amay nga nagpadala sa akon . . . Nasulat na sa Mga Manalagna, ‘Kag tudluan sila tanan ni Jehova.’ Ang tagsatagsa nga nakapamati kag nakatuon sa Amay nagakari sa akon.” Busa, indi lamang paagi sa tawhanon nga panikasog nga ang isa nagasabat sa tugob-globo nga pagpangisda. Nahantop ni Jehova ang kahimtangan sang tagipusuon kag nagabuyok sang iya kaugalingon sa mga takus.—Juan 6:44, 45; Mateo 10:11-13; Binuhatan 13:48.

13, 14. Anong maayong panimuot ang ginpakita sang madamong Saksi?

¹³ Ang mga mangingisda nga tawo amo ang mga ahente, walay sapayan, nga ginagamit ni Jehova sa pagbuyok sang mga tawo sa iya. Busa, importante ang ila panimuot sa tawo kag sa teritoryo nga ginapangisdaan nila. Daw ano ka makapalig-on makita nga ang kalabanan nagadumdom sang pinamulong ni Pablo sa mga taga-Galacia: “Gani dili kita magpakaluya sa paghimo sing maayo, kay sa nagakaigo nga dag-on magaani kita kon indi kita pagpunawon.”—Galacia 6:9.

¹⁴ Madamong matutom nga Saksi ang dekada na nga nagabantala, samtang nagabantay sing maayo sa mga hitabo sa kalibutan. Nakita nila ang pagbangon kag pagkapukan sang Nasismo, Pasismo, kag iban pa nga totalitaryan nga mga sistema. Nasaksihan sang iban ang madamong inaway nga natabo sugod sang 1914. Nakita nila ang mga lider sang kalibutan nga nagbutang sang ila paglaum sa Liga de Nasyones kag nian sa Nasyones Unidas. Nakita nila ang hilikuton ni Jehova nga gindumili kag sang ulihi ginhimo nga legal sa madamong kadutaan. Sa sini tanan, ang mga Saksi ni Jehova wala mag-untat sa paghimo sing maayo, lakip ang pag-alagad subong mga mangingisda sing mga tawo. Daw ano ka tumalagsahon nga rekord sang integridad!—Mateo 24:13.

15. (a) Ano ang aton bulig sa pagpasibu sa mga kinahanglanon sa aton bug-os kalibutan nga hilikuton? (b) Paano ining mga publikasyon nakabulig sa imo asaynment?

¹⁵ May iban pa nga rason nga nakaamot sa sining bug-os kalibutan nga pagtubo. Ang isa amo ang mapasibusibuon nga panimuot sang mga mangingisda sing mga tawo sa mga kinahanglanon sang teritoryo. Bangod sang pagsaylo sang mga tawo nga lainlain sing kultura, relihion, kag hambal, ginpasangkad sang mga Saksi ni Jehova ang ila paghangop sa sining nanuhaytuhay nga mga pagtamod. Kag ang bug-os kalibutan nga kongregasyon nakabulig sing daku paagi sa paghanda sing mga Biblia kag literatura sa Biblia sa kapin sa 200 ka hambal. Ang New World Translation of the Holy Scriptures, sing bug-os ukon sing bahin, yara karon sa 13 ka hambal, lakip sa Czech kag Slovak. Ang brosyur nga Agoma ang Kabuhi sa Duta sing Dayon! matigayon karon sa 198 ka hambal, halin sa Albaniano tubtob sa Zulu, nga naimprinta sa 72 milyones ka kopya. Ang libro nga Ang Pinakabantog nga Tawo nga Nagkabuhi matigayon sa 69 ka hambal. Ang Mankind’s Search for God, nga ginbalhag sa 29 ka hambal, nagahatag sing paghangop sa ginhalinan kag pagtuluuhan sang dalagku nga relihiosong sistema sa kalibutan kag napamatud-an nga isa ka pinasahi nga bulig sa bug-os globo nga pagpangisda.

16. Paano ang iban nagsabat sa mga kinahanglanon sa iban nga kadutaan?

¹⁶ Ano pa ang nagpauswag sang tugob-globo nga hilikuton sa pagpangisda? Linibo ang handa sa pagsabat sa ‘Macedonianhon nga pagtawag.’ Subong nga si Pablo handa sa pagsaylo halin sa Asia Minor pakadto sa Macedonia sa Europa, sa panawagan sang Dios, madamong Saksi ang nagsaylo sa mga kadutaan kag mga teritoryo diin may daku pa nga pagkinahanglan para sa mga manugbantala sang Ginharian, subong man para sa mga gulang kag ministeryal nga mga alagad. Nangin kaangay sila sang literal nga mga mangingisda nga nakakita sang ila lokal nga kadagatan nga napangisdaan sing maayo kag nagsaylo sa kadagatan diin mas diutay ang sakayan kag madamo ang isda.—Binuhatan 16:9-12; Lucas 5:4-10.

17. Ano ang aton halimbawa tuhoy sadtong nagsabat sa ‘Macedonianhon nga pagtawag’?

¹⁷ Ang ulihi nga mga klase sang eskwelahan sang pagmisyonero sa Gilead naglakip sang mga estudyante halin sa lainlain nga pungsod sa Europa nga nakatuon sing Ingles kag nian nagtanyag sang ila kaugalingon nga mag-alagad sa iban nga kadutaan kag mga kultura. Sa kaanggid, paagi sa Ministerial Training School, madamong diminyo nga utod nga lalaki ang ginhatagan sing duha ka bulan nga tul-id nga paghanas kag nian ginpadala sa iban nga mga pungsod sa pagpabakud sang mga kongregasyon kag mga sirkito. Ang iban nga pinasahi nga pangisdaan amo ang mga teritoryo nga ginbuksan karon sa Nasidlangan nga Europa kag sa mga republika anay sang Sobyet.—Ipaanggid ang Roma 15:20, 21.

18. (a) Ngaa ang mga payunir masunson nga epektibo nga mga ministro? (b) Paano sila makabulig sa iban sa kongregasyon?

¹⁸ Ang dugang nga bulig sa bug-os kalibutan nga hilikuton sa pagpangisda amo ang Pioneer Service School nga ginatambungan sang mga regular payunir. Paagi sa duha ka semana sang tul-id nga pagtuptop sa publikasyon nga Nagasiga Subong mga Sulo sa Kalibutan, nga ginhanda para sa mga payunir lamang, ginpauswag nila ang ila ikasarang sa pagministeryo samtang ginabinagbinag nila ang mga topiko subong sang “Pagpadayon sang Dalanon sang Gugma,” “Sunda si Jesus Subong Huaran,” kag “Pagpauswag sa Arte sa Pagpanudlo.” Daku gid ang pagpasalamat sang mga kongregasyon nga matigayon ining mga grupo sang sangkol nga mga mangingisda sa balaybalay nga makahanas sa madamo sa sining dakung hilikuton sa pagpangisda!—Mateo 5:14-16; Filipos 2:15; 2 Timoteo 2:1, 2.

Magauswag Bala Kita?

19. Kaangay ni apostol Pablo, paano naton mapauswag ang aton ministeryo?

¹⁹ Kaangay ni Pablo, luyag naton ang positibo, nagatan-aw sa unahan nga panimuot. (Filipos 3:13, 14) Nagpasibu sia sa tanan nga sahi sang tawo kag kahimtangan. Nakahibalo sia kon paano makakita sing butang nga maugyunan kag kon paano mangatarungan sa sadsaran sang lokal nga mga panimuot kag kultura. Makasugod kita sing mga pagtuon sa Biblia paagi sa pagkamangin alisto sa reaksion sang mga tagbalay sa mensahe sang Ginharian kag nian pagpasibu sang aton presentasyon sa mga kinahanglanon sang tawo. Paagi sa aton lainlain nga mga bulig sa pagtuon sa Biblia, matanyag naton ang isa nga nagakaigo sa panimuot sang indibiduwal. Ang aton pagkamapasibusibuon kag pagkaalisto importante man nga mga rason sa mapatubason nga pagpangisda.—Binuhatan 17:1-4, 22-28, 34; 1 Corinto 9:19-23.

20. (a) Ngaa ang aton pagpangisda nga hilikuton importante gid sa karon? (b) Ano ang aton indibiduwal nga salabton karon?

²⁰ Ngaa ining pinasahi nga hilikuton sa pagpangisda importante gid sa karon? Bangod gikan sa mga tagna sa Biblia nga ginpakita sa mga hitabo nga natabo na kag nagakatabo pa, maathag nga ang bug-os kalibutan nga sistema ni Satanas nagapadulong sa makamamatay nga putukputukan. Gani, ano ang dapat naton himuon nga mga Saksi ni Jehova? Ang tatlo ka artikulo nga gintun-an sa sining magasin nagpadaku sang aton salabton nga mangin mapisan kag makugi sa aton pagpangisda sa aton bahin sa tugob-globo nga kadagatan. May malig-on kita nga pasalig gikan sa Biblia nga indi pagkalimtan ni Jehova ang aton mapisan nga pagpangisda. Si Pablo nagsiling: “Ang Dios indi dimatarong nga malimot sang inyo binuhatan kag sang gugma nga ginpakita ninyo tungod sa iya ngalan, nga nag-alagad kamo sa mgaa balaan kag nagaalagad pa. Kag ginahandum namon nga ang tagsa sa inyo magpakita sang amo man nga kaukod sa pagtigayon sang kabug-usan sang paglaum tubtob sa katapusan.”—Hebreo 6:10-12.

[Mga footnote]

Madumduman Mo Bala?

◻ Ngaa ginatamod sang mga Saksi ni Jehova ang bug-os nga kalibutan subong ang lugar para pangisdaan nila?

◻ Ano ang pagpakamaayo sang eskwelahan sang pagmisyonero sang Gilead sa pagpangisda nga hilikuton?

◻ Anong mga rason ang nakaamot sa kadalag-an sang mga Saksi ni Jehova?

◻ Paano kita sing indibiduwal makauswag sa aton Cristianong ministeryo?

[Tsart sa pahina 24]

MGA RESULTA SANG INTERNASYONAL NGA PAGPANGISDA

Tuig Kadutaan Mga Saksi

1939 61 71,509

1943 54 126,329

1953 143 519,982

1973 208 1,758,429

1983 205 2,652,323

1991 211 4,278,820

[Laragway sa pahina 25]

Ang pagpanaksi nga hilikuton ginahimo gihapon sang mga mangingisda sa Galilea