Ginadaug sang Paglaum ang Pagluya sang Buot!

SA Webster’s Ninth New Collegiate Dictionary, ang desperado ukon pagluya sang buot nagakahulugan sing “bug-os nga pagkadula sing paglaum.” Maathag kon amo, nga agod madaug naton ang pagluya sang buot, kinahanglan naton ang paglaum!

Ang isa ka makaluluoy nga indibiduwal nga napilitan sa pagpuyo sa sidewalk indi bug-os nga maluyahan sing buot kon may paglaum sia. Ang paglaum makahatag pa gani sa mga ginapung-awan sing kaisog kag kusog sa pagbatas. Apang ang paglaum dapat masaligan! Ano ang kahulugan sini?

Ang Sadsaran sang Paglaum

Binagbinaga ang natabo kay Sara, ang asawa sang patriarka nga si Abraham. Sa edad nga halos 90 anyos, baw-as gihapon sia kag madugay na nadulaan sing paglaum nga makabata pa sia. Apang, sang ang iya bana 99 anyos, ginsulit ni Jehova ang isa ka saad nga nahatag na niya sang nagligad nga mga tinuig—si Abraham makatigayon gid sing “binhi,” ukon manunubli. Nahibaluan ni Abraham nga isa ini ka masaligan nga saad. Handurawa ang daku nga kalipay ni Sara sang, sa milagruso nga paagi, natabo ang makalilipay nga butang, kag ginbun-ag niya si Isaac! (Genesis 12:2,3; 17:1-4, 19; 21:2) Ang pagsalig ni Abraham sa Dios wala magsala, subong ginpaathag ni apostol Pablo: “Bangod sang saad sang Dios [si Abraham] wala magduhaduha sing dimatinuuhon, kundi nagbaskog sia paagi sa iya pagtuo, nga nagahimaya sa Dios.”—Roma 4:20.

Sang nagsulat sia sa mga Judiyo nga nangin mga Cristiano sang iya adlaw, nangatarungan si Pablo nga masaligan nila ang kaluwasan nga ginasaad sang Dios paagi kay Jesus bangod sang duha ka malig-on nga rason. Ginapatuhuyan ang saad sang Dios kay Abraham kag ang Iya balaan nga sumpa, ang apostol nangatarungan: “Ang mga tawo nagasumpa sa daku pa sa ila, kag sa tagsa ka kasuayon nila ang sumpa katapusan sa pagpalig-on. Gani sang buot ang Dios magpakita sing maathag pa sa mga manunubli sang saad sang pagkadimabalhinon sang iya katuyuan, nagpatunga sia nga may sumpa, agod nga paagi sa duha ka butang nga dimabalhinon, nga sa sini indi mahimo nga ang Dios magbutig, kita nga nagpalagyo sa pagdangop may mapag-on nga pagpabaskog sa pagdakop sang paglaum nga ginabutang sa aton atubang.” (Hebreo 6:16-18) Huo, ang mga saad sang Dios matuod kag masaligan. Si Jehova labing gamhanan kag may tumalagsahon nga ikasarang sa pagpasalig sang katumanan sang iya kaugalingon nga pulong.

Paglaum—“Malig-on kag Dimationg”

Si Pablo nagsulat nga ang Cristianong paglaum “malig-on kag dimationg.” (Hebreo 6:19) Nahibaluan ni Pablo kon sa diin napasad ang iya paglaum. Sia nagapaathag: ‘Ini [ang paglaum] nagasulod tubtob sa sulod sang kumbong.’ Ano ang kahulugan sini? Maathag nga ginpatuhuyan ni Pablo ang dumaan nga templo sa Jerusalem. Sa sulod sini may yara Labing Balaan nga bahin, nga ginapain sang kumbong gikan sa nabilin nga bahin sang tinukod. (Exodo 26:31, 33; Mateo 27:51) Sa pagkamatuod, ang literal nga templo sa Jerusalem madugay na nalaglag. Gani, sa karon, ano ang katumbas sining Labing Balaan?

Amo ang langit gid, nga sa diin ang Dios nagalingkod sa trono! Ginpaathag ini ni Pablo sang nagsiling sia nga si Jesus sa tapos sang iya pagkayab “nagsulod, indi sa balaan nga duog nga ginhimo sang mga kamut [sa templo sa Jerusalem], nga kaangay sang matuod, kundi sa langit gid, karon sa pagpahayag sa atubangan sang Dios tungod sa aton.” (Hebreo 9:24) Gani ang Cristianong paglaum, nga nagabulig sa aton sa pagpakig-away batok sa pagluya sang buot, nasandig indi sa tawhanon nga mga politiko kundi sa isa ka langitnon nga kahimusan. Nagasandig ini sa Isa nga gintangdo sang Dios, si Jesucristo, nga naghatag sang iya kabuhi subong gawad para sa aton mga sala kag karon nagapahayag sa atubangan sang Dios tungod sa aton. (1 Juan 2:​1, 2) Dugang pa, subong ginapakita pirme sa mga kolumna sining magasin, ini gihapon nga si Jesus amo ang isa nga gintangdo sang Dios sa paggahom subong Hari sang langitnon nga Ginharian sang Dios kag nagahari na sugod sang 1914. Sa indi madugay dulaon sining langitnon nga Ginharian ang mga butang nga nagapaluya sang buot sang madamo.

Paglaum—“Angkla sang Kalag”

Agod kombinsihon ang iya mga bumalasa nga ang kaluwasan nga ila ginalauman paagi kay Jesus may malig-on nga sadsaran, naggamit si Pablo sing paanggid. ‘Aton ining paglaum,’ paathag niya, ‘subong nga angkla sang kalag.’—Hebreo 6:19.

Ang mga angkla kilala sang mga manuglakbay kaangay ni Pablo. Ang dumaan nga mga angkla daw pareho lang sang sa karon, sa masami human sa salsalon nga may duha ka daw ngipon nga mga punta agod magdulot sa letso sang dagat. Sang nagapakadto sa Roma sang mga tuig 58 C.E., ang barko nga ginsakyan ni Pablo diutayan lang magbara. Apang samtang nagaamat-amat panabaw ang barko, ‘ginhulog [sang mga marino] ang apat ka angkla sa olin.’ Bangod sadtong mga angkla, ang barko wala maguba sang bagyo.—Binuhatan 27:29, 39, 40, 44.

Ano, nian, ang dapat mo himuon agod ang imo paglaum mangin subong kapag-on sa angkla kag malandas mo ang kabudlayan sa pangabuhi, balatian sa pisikal ukon emosyon, ukon ang bisan ano nga “mga bagyo” nga magaabot sa imo dalanon? Una, pasaliga ang imo kaugalingon nga ang mga saad sang Biblia masaligan. “Pat-ura ang tanan nga mga butang.” (1 Tesalonica 5:21) Halimbawa, sa masunod nga tion nga makighambal sa imo ang mga Saksi ni Jehova, pamatii ang ila ginahambal. Kon talagsa lang sila nagaduaw sa inyo ginapuy-an, pangitaa sila sa pinakamalapit nga Kingdom Hall. Indi ikaw pagpiliton nga magbuylog sa ila, kundi agdahon ikaw nga batunon ang isa ka walay bayad nga pagtuon sa Biblia, nga dumalahan sa duog kag sa oras nga kombenyente para sa imo.

Ina nga pagtuon magapasalig sa imo nga ang Dios “manugpadya sa mga hanuot nga nagapangita sa iya.” (Hebreo 11:6) Matun-an mo nga sa indi madugay dulaon sang Ginharian sang Dios sa idalom sang Hari, nga si Cristo Jesus, ang kalautan kag mga pagkadialangay nga nagapaluya sang buot sang madamo gid karon. Sa idalom sina nga Ginharian, ining duta ipasag-uli sa paraiso, kag hatagan sang Dios sing dayon nga kabuhi ang tanan nga nagahigugma sa iya. (Salmo 37:29; Bugna 21:4) Daw ano ka mahimayaon nga paglaum!

Basaha sing maayo ang Biblia agod tan-awon nga matuod ining paglaum. Dayon palambua ang isa ka suod kag personal nga kaangtanan sa Dios, agod mangin abyan ka niya subong ni Abraham anay. (Santiago 2:23) Sanglit si Jehova amo ang “Manugpamati sang pangamuyo,” sugiri sia sang imo mga kabalaka. Kon ang imo pagpalapit sinsero, ang imo pangamuyo magabulig sa imo sa paghaw-as sang imo mga lulan kag daugon ang imo kaluya sang buot. Mahimo pa gani nga ang espiritu sang Dios magabukas sang dalan agod bag-uhon ang kahimtangan nga nagatublag sa imo.—Salmo 55:22; 65:2; 1 Juan 5:14, 15.

“Hupti sing Malig-on”!

Sa tapos marekomendar sa iya mga masigkadisipulo nga ‘pat-uron ang tanan nga mga butang,’ si Pablo nagdugang: “Hupti sing malig-on ang maayo.” (1 Tesalonica 5:21) Ang isa ka paagi sa paghimo sini amo ang pagpakig-upod sa mga tawo nga nagahupot man sing malig-on sang Cristianong paglaum. Ang maalam nga hari nga si Solomon nagpaandam: “Sia nga nagalakat upod sa maalam nga mga tawo mangin maalam, apang sia nga nagapakig-angot sa mga buangbuang magalain.” (Hulubaton 13:20) Indi pagtuguti ang walay kabangdanan nga kaugot ukon pagbatyag sing kasaw-a nga magpugong sa imo nga tinguhaan ang maayong pagpakig-upod. Halimbawa, may mga tawo sa tunga sang mga Saksi ni Jehova nga sang una wala sing paglaum. Apang ang ila pagtuon sa Biblia, upod ang makalilipay nga pagpakig-upod sa mga masigkatumuluo, nagapalig-on sang ila kaangtanan kay Jehova kag nagahatag sa ila sing masaligan kag tulad-angkla nga paglaum. Ginadaug gid bala sini ang pagluya sang buot? Huo sa pagkamatuod.

Binagbinaga ang kaso ni Annmarie nga nagluya ang buot bangod ginapintasan sia sang iya bana. “Namat-od ako nga utdon ang akon kabuhi,” paathag niya, “apang bangod sa pila ka rason namat-od ako nga mangamuyo anay sa Dios. Madumduman ko nga nagsiling ako, ‘Ngaa indi mo ako mabuligan? Naglaum ako sa imo sa madugay na nga tion, apang wala mo ako pagbuligi.’ Gintapos ko ang akon pangamuyo nga nagahunahuna nga wala sing katuyuan ang kabuhi, gani maayo pa nga mapatay na lang ako. Sadto nga tinion may nanuktok sa ganhaan. Namat-od ako nga indi yadto pagsapakon, nagalaum nga kon sin-o man ang yadto didto malakat sia sa ulihi.

“Ang panuktok nagpadayon, kag ginsabaran ako. Ginpahiran ko ang akon mga luha kag naglakat agod tan-awon kon sin-o ang didto sa ganhaan, nagalaum nga mapalakat ko sia dayon kag madayon ko ang akon plano. Apang,” siling ni Annmarie, “salamat kay Jehova, lain ang natabo, kay sang ginbuksan ko ang ganhaan, duha ka babayi ang nakita ko nga nagatindog didto. Matuod, naglibog gid ang akon ulo, kag wala ko gid mahangpi ang ila ginpanghambal. Apang gintanyagan nila ako sing libro nga nagapaathag nga ang kabuhi may katuyuan. Amo gid ini ang akon kinahanglanon agod mapukaw liwat ang akon interes sa kabuhi.” Ang iya mga dumuluaw naghimos sing regular nga pagtuon sa Biblia upod sa iya. Natun-an ni Annmarie nga mangin abyan sang Dios. Kag naghatag man ini sa iya sing katuyuan sa kabuhi. Karon nagabulig sia sa iban sa pagpalambo sing pagsalig sa Dios.

Ayhan naglaum ka nga madula ang pagluya sang buot nga wala mahangpi kon ano ang tanan nga nadalahig. Apang kon nakapangamuyo ka sing: “Magkari ang imo ginharian. Paghimuon ang imo kabubut-on, subong sang sa langit, amo man sa duta,” nian ginpangamuyo mo ang pagkari sang Ginharian sang Dios sa idalom ni Jesucristo, nga magadula sang mga butang nga nagapaluya sang buot sang matarong sing tagipusuon nga katawhan. (Mateo 6:10) Ang imo personal nga pagtuon sa Biblia kag regular nga pagpakig-upod sa iban nga may amo man sini nga pagsalig magapalig-on sang imo pagpanguyapot sa paglaum nga magkari ang Ginharian ni Jehova kag magadala sing Paraiso sa aton duta. (1 Timoteo 6:12, 19) Ining mahimayaon nga paglaum amo ang ginapahibalo sining magasin sa tagsa ka guwa sini. Batuna ang paglaum sing tinagipusuon agod awayon ang pagluya sang buot. Sa pagkamatuod, ang paglaum “wala nagadul-ong sa kapaslawan.”—Roma 5:5.

[Laragway sa pahina 7]

Ang pagtuon sa Biblia nagahatag sa aton sing paglaum nga nagapanghikot subong “angkla sang kalag”