Sikwaya ang Kalibutanon nga mga Pantasya, Pangitaa ang mga Katunayan sang Ginharian

“Padayon nga pangitaa anay ninyo ang ginharian kag ang iya pagkamatarong, kag tanan ini nga butang idugang sa inyo.”—MATEO 6:33.

1. Anong paandam ang ginahatag sang Pulong sang Dios nahanungod sa malaragwayon nga tagipusuon, kag ano ang isa sang pangunang paagi nga nagadaya ini sa aton?

“LABAW sa tanan nga pagabantayan, bantayi ang inyo tagipusuon, kay sa sini nagaguwa ang mga ilig sang kabuhi.” (Hulubaton 4:23) Ngaa kinahanglan nga ihatag sang maalam nga si Hari Solomon ini nga paandam? Bangod “ang tagipusuon malimbungon labaw sa tanan nga butang kag lakas gid kadunot.” (Jeremias 17:9) Ang isa sang pangunang paagi nga ang aton malaragwayon nga tagipusuon nagalimbong sa aton amo ang pagpaduyog sa aton sa kalibutanon nga mga pantasya. Apang ano ang mga pantasya? Dimatuod ini nga mga imahinasyon, mga dalamguhanon, walay pulos nga pamensaron. Kon ining mga dalamguhanon mangin kalibutanon nga mga pantasya, wala lamang ini nagausik sang tion kundi nagahalit man sing daku. Gani, dapat naton ini sikwayon sing bug-os. Sa katunayan, kon ginadumtan naton ang pagkamalinapason kaangay kay Jesus, bantayan naton ang aton tagipusuon batok sa pagpaduyog sa kalibutanon nga mga pantasya.—Hebreo 1:8, 9.

2. Ano ang kalibutanon nga mga pantasya, kag ngaa dapat naton ini sikwayon?

² Apang ano ang kalibutanon nga mga pantasya? Mga pantasya ini nga kinaiya sining kalibutan nga yara sa gahom ni Satanas. Nahanungod sini, si apostol Juan nagsulat: “Ang tanan nga yara sa kalibutan—ang kailigbon sang unod kag ang kailigbon sang mga mata kag ang bugal sang kabuhi—indi iya sang Amay, kundi iya sang kalibutan.” (1 Juan 2:16; 5:19) Ngaa dapat sikwayon sang mga Cristiano ang kalibutanon nga mga pantasya? Bangod inang mga pantasya nagapukaw sang makagod nga mga handum sa hunahuna kag tagipusuon. Ang pagdalamguhanon sa paghimo sing malain isa gid ka pag-ensayo sa hunahuna sa kon ano gid ang aktuwal nga himuon sang isa ka tawo. Si disipulo Santiago nagapaandam sa aton: “Ang tagsa ka tawo ginasulay kon ginabuyok sia kag ginahaylo sang iya kaugalingon nga kailigbon. Nian ang kailigbon, kon nakapanamkon, nagapanganak sing sala; kag ang sala, kon maggulang, nagapamunga sing kamatayon.”—Santiago 1:14, 15.

Nagapaandam nga mga Halimbawa

3. Ang natabo kay sin-o ang nagahatag sing pangunang nagapaandam nga halimbawa sang pagkamahaliton sang makagod nga mga pantasya?

³ Binagbinagon naton ang mga halimbawa nga nagapakita kon ngaa ang kalibutanon nga mga pantasya dapat sikwayon. Ang halimbawa ni Satanas nga Yawa amo ang pangunang halimbawa sang halit nga magaresulta gikan sa pagpaduyog sa makagod nga mga pantasya. Gintugutan niya ang mga balatyagon sang pagpaimportante sa kaugalingon nga magtubo sa iya tagipusuon tubtob sa punto nga ginkaibugan niya ang pinasahi nga posisyon ni Jehova subong ang Soberano sa Uniberso kag naluyag simbahon. (Lucas 4:5-8) Dimatuod bala nga pantasya? Amo gid! Mapamatud-an ina sing dimapangduhaduhaan kon si Satanas pagagapuson sa isa ka libo ka tuig kag labi na kon itagbong sia sa “linaw nga kalayo,” ang ikaduhang kamatayon.—Bugna 20:1-3, 10.

4. Paano ginlimbungan ni Satanas si Eva?

⁴ May isa pa kita ka halimbawa sa natabo sa naunang babayi, si Eva. Sa panikasog ni Satanas nga matuman ang iya ambisyon, ginsulay niya si Eva paagi sa pagpresentar sa iya hunahuna sang pantasya nga kon magkaon sia sang ginadumilian nga bunga, indi sia mapatay kundi mangin kaangay sang Dios, nga nakahibalo sang maayo kag malain. Dimatuod, makagod bala ina nga pantasya? Amo gid, subong sang makita naton gikan sa pagtagudili ni Jehova kay Eva kag sa iya bana, nga si Adan, sang gin-usisa kag ginpamatbatan sila. Subong resulta, nawasi nila ang kinamatarong nga mabuhi sa Paraiso para sa ila kaugalingon kag para sa tanan nila nga dihimpit nga kaanakan.—Genesis 3:1-19; Roma 5:12.

5. Ano ang nagpahanabo sang pagkapukan sang pila ka angheliko nga mga anak sang Dios, kag upod ang anong resulta sa ila?

⁵ May yara man kita nagapaandam nga halimbawa sang pila ka angheliko nga mga anak sang Dios. (Genesis 6:1-4) Sa baylo nga maayawan sa mga pagpakamaayo nga gin-agom nila sa langitnon nga presensia ni Jehova, nagpantasya sila nahanungod sa kababayin-an sa duta kag kon daw ano kaayo kon maghulid sila sa ila. Bangod sang paghimo sining mga pantasya, ang dimatinumanon nga mga anghel yara karon sa espirituwal nga kadudulman sang Tartaro, nga nagahulat sang ila kalaglagan sa katapusan sang Isa ka Libo ka Tuig nga Paggahom ni Jesucristo.—2 Pedro 2:⁠4; Judas 6; Bugna 20:10.

Sikwaya ang Kalibutanon nga mga Pantasya

6, 7. Ngaa ang kalibutanon nga mga pantasya nahanungod sa materyal nga mga manggad makahalalit kag malimbungon?

⁶ Binagbinagon naton karon ang isa sang labing kinaandan kag makatalagam nga mga pantasya nga ginapadaku ni Satanas. Paagi sa tanan nga dagway sang media, ginasulay kita nga magpaduyog sa kalibutanon nga mga pantasya. Ginatuga ini sa masami sang paghandum sang manggad. Wala sing malain sa pagpanag-iya sing manggad. Ang diosnon nga si Abraham, si Job, kag si Hari David manggaranon katama, apang wala sila maghandum sing sobra sang materyal nga mga manggad. Ang materyalistiko nga mga pantasya nagapahulag sa mga tawo sa pagtrabaho sing lakas sing tinuig agod makatigayon sing manggad. Ina nga mga pantasya nagpahulag man sa ila sa pagpaduyog sa tanan nga sahi sang sugal, subong sang pagtaya sa mga kabayo kag pagbakal sing mga tiket sa loterya. Indi naton paglingawon ang bisan anong sayop nga panghunahuna nahanungod sa manggad. Kon nagahunahuna kita nga ang materyal nga mga manggad nagahatag sing kalig-unan, binagbinaga ining matinuuron nga hulubaton: “Ang manggad walay kapuslanan sa adlaw sang kasingkal, apang ang pagkamatarong nagaluwas sa kamatayon.” (Hulubaton 11:4) Sa pagkamatuod, ang materyal nga manggad indi kinahanglanon sa paglampuwas sa “dakung kapipit-an.”—Mateo 24:21; Bugna 7:9, 14.

⁷ Ang materyal nga manggad mahapos nga makadaya sa aton. Amo sina kon ngaa ginasugiran kita: “Ang pagkabutang sang manggaranon amo ang banwa nga mabakud, kag subong sang kuta nga mataas sa iya painoino.” (Hulubaton 18:11) Huo, “sa iya painoino” lamang, kay ang materyal nga manggad diutay nga pangamlig lamang ang mahatag sa tion sang dimapunggan nga implasyon, pagkalusod sa ekonomiya, kagamo sa politika, ukon ilisipon na ang kabuhi nga balatian. Si Jesucristo nagpaandam batok sa kabuangan sang pagbutang sang aton pagsalig sa materyal nga mga manggad. (Lucas 12:13-21) Yara man ang nagapaandam nga mga pulong ni apostol Pablo: “Ang gugma sa kuwarta amo ang gamot sang tanan nga kalainan, kag paagi sa sining mainit nga handum ang iban nagtalang gikan sa pagtuo kag nagsuntok sang ila mga tagipusuon sing madamong kasakitan.”—1 Timoteo 6:10.

8. Daw ano ka lapnag ang kalibutanon nga mga pantasya nahanungod sa sekso, kag anong mga katalagman ang ginahatag sini?

⁸ Ang iban nga mga pantasya may kaangtanan sa nagalapas sa kasuguan nga sekso. Kon tubtob diin ang makasasala nga tawhanon nga kinaugali maluyag sa pagpaduyog sa seksuwal nga mga pantasya sarang makita gikan sa pagkapopular sang pamuyayaw nga matigayon paagi sa pagdayal sa mga numero sang telepono kag sa pagpamati sa binastos nga mga mensahe. Sa Estados Unidos, ang dial-a-porn isa ka multibilyon-dolyares nga negosyo. Kon tugutan naton ang aton hunahuna nga magpainoino sang malaw-ay nga sekso, indi bala kita mangin mga salimpapaw, nagapakitakita lamang nga matinlo nga mga Cristiano? Kag wala bala sing katalagman nga inang mga pantasya mahimo magdul-ong sa imoral nga paghulid? Natabo ini kag nagresulta sa pagdisfellowship sa iban gikan sa Cristianong kongregasyon bangod sang pagpakighilawas ukon pagpanglahi. Bangod sang ginsiling ni Jesus sa Mateo 5:27, 28, indi bala tanan nga padayon nga nagapaduyog sa sinang mga pantasya nakapanglahi sa ila tagipusuon?

9. Anong maalamon nga laygay ang ginahatag sang Kasulatan agod paandaman kita batok sa kalibutanon nga mga pantasya?

⁹ Agod batuan ang huyog sang aton makasasala nga tagipusuon sa pagpaduyog sa sinang mga pantasya, kinahanglan naton dumdumon ang paandam ni Pablo: “Walay tinuga nga indi hayag sa atubangan [sang Dios], kundi ang tanan hublas kag dayag sa mga mata niya nga hatagan ta sing husay.” (Hebreo 4:13) Luyag naton pirme nga mangin kaangay ni Moises, nga “padayon nga nagatan-aw sa Iya nga dimakita.” (Hebreo 11:27) Huo, dapat naton pirme silingan ang aton kaugalingon nga ang kalibutanon nga mga pantasya dikalahamut-an kay Jehova kag magahalit lamang sa aton kaugalingon. Dapat kita mabalaka nahanungod sa pagpalambo sang tanan nga bunga sang espiritu sang Dios, labi na sang pagpugong sa kaugalingon, kay indi naton malikawan ang katunayan nga kon magsab-ug kita sa unod, magaani kita sing kaduluntan gikan sa unod.—Galacia 5:22, 23; 6:7, 8.

Ang mga Katunayan sang Ginharian

10, 11. (a) Anong mga katunayan ang nagapamatuod sang katunayan sang Manunuga? (b) Ano ang pamatuod nga ang Biblia amo gid ang Pulong sang Dios? (c) Ano ang pamatuod nahanungod sa katunayan sang Hari sang Ginharian sang Dios?

¹⁰ Ang labing maayo nga paagi sa pagsikway sa kalibutanon nga mga pantasya amo pirme ang pagpangita sang mga katunayan sang Ginharian. Ang mga katunayan sang Ginharian nga ginapatubas sang Dios kabaliskaran sa kalibutanon nga mga pantasya. Ang Dios bala isa ka katunayan? Indi mapangduhaduhaan ang iya pagluntad. Ang kitaon nga pagpanuga nagapamatuod sa sinang katunayan. (Roma 1:20) Ginapahanumdom sa aton ang ginsiling sang nagligad nga kapin sa isa ka gatos ka tuig sa libro nga The Divine Plan of the Ages, nga ginbalhag sang Watch Tower Society. Ini nagasiling: “Sia nga makatan-aw sa kalangitan paagi sa teleskopyo, ukon bisan paagi sa iya kinaugali nga mata lamang, kag makakita didto sang kadakuon sang tinuga, ang simetriya sini, katahom, kahim-ong, harmoniya kag pagkananuhaytuhay, apang nagapangduhaduha nga ang Manunuga sini superyor gid sa kaalam kag gahom, ukon nagahunahuna sa makadali nga inang kahim-ong natabuan lamang, nga wala sing Manunuga, sa sina man nga kasangkaron nawasi ukon napasapayanan ang pangatarungan agod makabig sing nagakaigo sa pagtawag sang Biblia sa iya, isa ka buang (isa nga wala nagasapak ukon kulang sing pangatarungan).”—Salmo 14:1.

¹¹ Natun-an naton ang tanan nahanungod sa Ginharian sa Balaan nga Biblia. Ang Biblia bala amo gid sa katunayan ang nasulat nga Pulong sang Dios? Amo gid, subong sang makita sa paghilisantuanay sini, sa pagkasibu sa siensia, kag sa gahom sini sa pagbalhin sang kabuhi sang tawo kag labi na sa pagtuman sa mga tagna sini.a Kamusta ang Hari sang Ginharian sang Dios, si Jesucristo? Nagluntad gid bala sia? Ang kasaysayan sang Ebanghelyo kag ang inspirado sang Dios nga mga sulat sang Cristianong Griegong Kasulatan maathag nga nagapamatuod sa pagkamaragtason ni Jesucristo. Tuhoy sa pagkamaragtason ni Jesus, yara man ang pamatuod sang Judiyong Talmud, nga nagapatuhoy sa iya subong isa ka tawo. Yara man ang Judiyo kag Romanong mga istoryador sang nahaunang siglo C.E.

12, 13. Anong mga katunayan ang nagapamatuod sa katunayan sang Ginharian sang Dios?

¹² Kamusta ang katunayan sang Ginharian mismo? Wala gid ini pagsapaka sang Cristiandad, subong sang ginpakita sa sining reklamo sang isa ka kilala nga Presbyterio: “Kapin na sa katloan ka tuig nga wala ako makabati sa isa ka ministro nga nagapaathag sa iya katawhan sang katunayan sang Ginharian para sa ila.” Apang, ang pagpakabalaan sa ngalan ni Jehova paagi sa Ginharian amo ang tema sang iya Pulong. Ang Dios mismo naghimo sang nahaunang saad sa Ginharian, nga nagasiling: “Butangan ko sing kaawayon sa tunga mo kag sang babayi kag sa tunga sang imo kaliwat kag sang iya kaliwat. Sia magadugmok sang imo ulo kag dugmukon mo ang iya tikod.” (Genesis 3:15) Ang Ginharian ginlandungan sang pungsod sang Israel, labi na sang panahon sang paggahom ni Hari Solomon. (Salmo 72) Dugang pa, ang Ginharian amo ang tema sang pagbantala ni Jesus. (Mateo 4:17) Ginhatag niya ini sa iya madamo nga ilustrasyon, subong sa Mateo kapitulo 13. Ginsugo ni Jesus sa aton nga ipangamuyo ang Ginharian kag pirme anay ini pangitaon. (Mateo 6:9, 10, 33) Sa katunayan, ang Ginharian sang Dios ginsambit sing mga 150 ka beses sa Cristianong Griegong Kasulatan.

¹³ Ang Ginharian isa ka matuod nga gobierno, nga may gahom kag awtoridad, kag himuon sini ang tanan nga makatarunganon nga pagpaabot. May mga kasuguan ini, nga makita sa Biblia. Ginhimo na sang Ginharian ang madamong butang nga katunayan. May matutom nga mga sakop ini—kapin sa 4,000,000 ka Saksi ni Jehova. Sa 211 ka kadutaan nagabantala sila sang maayong balita sang Ginharian sang Dios, bilang katumanan sang Mateo 24:14. Sa ila 1991 nga tuig sa pag-alagad, naghinguyang sila sing 951,870,021 ka oras nga nagabantala sang mensahe sang Ginharian. Ining hilikuton nagapatubas sing kitaon, mapinadayunon nga mga resulta samtang ang kadam-an nagatuon sang “putli nga hambal” sang kamatuoran sang Biblia.—Sofonias 3:9.

Pagpangita sang mga Katunayan sang Ginharian

14. Paano naton mapabakud ang aton apresasyon para sa katunayan sang Ginharian?

¹⁴ Paano, nian, naton pangitaon ang mga katunayan sang Ginharian? Ang aton paglaum dapat napasad sing malig-on sa makusog nga kombiksion. Ang ginsaad sang Dios nga bag-ong kalibutan dapat mangin matuod sa aton. (2 Pedro 3:13) Kag dapat kita magtuo sa saad nga “pahiran [sang Dios] ang tagsa ka luha sa mga mata [naton], kag wala na sing kamatayon, ukon kalisud ukon paghibi ukon kasakit pa.” (Bugna 21:4) Paano kita makapat-od nga indi ini pantasya? Pat-od ini nga matuman sa gintalana nga tion sang Dios, kay imposible para sa iya ang magbutig. (Tito 1:1, 2; Hebreo 6:18) Kinahanglan nga pamalandungan naton ina nga mga saad. Ang paghanduraw sang aton kaugalingon sa bag-ong kalibutan sang Dios kag pag-agom sang mga kabulahanan sini indi isa ka dimatuod nga pantasya kundi nagahatag sing pamatuod sang pagtuo. Subong sang paglaragway ni Pablo, “ang pagtuo amo ang kasiguruhan sang mga butang nga ginalauman, ang pagpamatuod sang mga katunayan nga indi makita.” (Hebreo 11:1) Pabakuron naton ang aton pagtuo paagi sa tayuyon nga pagkaon sa Pulong sang Dios kag Cristianong mga publikasyon nga magabulig sa aton sa paghangop kag sa pag-aplikar sini. Kag kon dugang nga tion ang ginahinguyang naton sa pagsugid sa iban nahanungod sa Ginharian, sa pormal kag dipormal, dugang pa gid nga ginapabakod naton ang aton pagtuo kag ginapasanag ang aton paglaum sa sini.

15. Ano ang aton obligasyon nahanungod sa Cristianong ministeryo?

¹⁵ Kinahanglan man nga mangabudlay kita nahisanto sa mga katunayan sang Ginharian paagi sa pagpauswag sang kalidad sang aton ministeryo. Sanglit madamo pa ang hilimuon, paano naton ini himuon? (Mateo 9:37, 38) Matuod ang hulubaton nga ang isa indi gid tuman ka tigulang sa pagtuon. Bisan kon pila ka tuig na kita nga nagapakigbahin sa pagpanaksi nga hilikuton, sarang kita mag-uswag. Paagi sa labi nga pagkaepektibo sa paggamit sang Pulong sang Dios, labi pa nga mabuligan naton ang iban sa pagpamati sa tingog sang Hari, si Jesucristo. (Ipaanggid ang Juan 10:16.) Kon ginabinagbinag naton nga ang walay katapusan nga mga destinasyon sang tawo nadalahig, dapat luyag naton tuptupan ang aton teritoryo sing maid-id agod hatagan sila sing sulitsulit nga kahigayunan sa pagpakita kon diin sila nagatindog, kon bala subong “mga karnero” ukon subong “mga kanding.” (Mateo 25:31-46) Sa pagkamatuod, nagakahulugan ina sang paghupot sing maayo nga rekord tuhoy sa mga balay nga wala sing tawo kag labi na tuhoy sa mga interesado sa mensahe sang Ginharian.

Padayon nga Pangitaa ang Ginharian

16. Sin-o ang nagpahamtang sing maayong halimbawa sa pagpangita sang mga katunayan sang Ginharian, kag paano nila ‘ginaagaw’ ang Ginharian?

¹⁶ Kinahanglan ang hanuot nga panikasog agod padayon nga pangitaon ang mga katunayan sang Ginharian. Wala bala kita ginapalig-on sang makugi nga halimbawa sang nabilin nga hinaplas nga mga Cristiano? Mga dekada na sila nga padayon nga nagapangita sang katunayan sang Ginharian. Ini nga pagpangita ginlaragway sa pinamulong ni Jesus: “Kutob sa mga adlaw ni Juan Bautista tubtob karon ang ginharian sang langit amo ang tulumuron nga ginahimud-usan sang tawo, kag ang nagahimud-os sa sini nagaagaw sini.” (Mateo 11:12) Ang panghunahuna diri indi ang tuhoy sa mga kaaway nga nagaagaw sang Ginharian. Sa baylo, nagapatuhoy ini sa hilikuton sang mga magabaton sang Ginharian. Ang isa ka eskolar sang Biblia nagsiling: “Ginlaragway sa sining paagi ang malangkagon, dimapamatukan nga panikasog kag paghimud-os sa nagahilapit nga Mesianikong ginharian.” Ang mga hinaplas nanikasog sing daku sa paghimo sang Ginharian nga ila kaugalingon. Kinahanglan man ang kaanggid ka lakas nga panikasog sa “iban nga mga karnero” agod makalipikar sila subong dutan-on nga mga sakop sang langitnon nga Ginharian sang Dios.—Juan 10:16.

17. Ano ang madangatan sang mga nagapangita sang kalibutanon nga mga pantasya?

¹⁷ Sa pagkamatuod, nagakabuhi kita sa pinasahi nga panag-on sang kahigayunan. Ang mga nagapangita sang kalibutanon nga mga pantasya magabugtaw sa dili madugay sa mapintas nga katunayan. Ang ila madangatan ginlaragway sing maayo sa sining mga pulong: “Subong sang gutom nga tawo nga nagadamgo nga nagakaon sia, kag nagamata sia nga ang iya kalag wala sing sulud; ukon subong sang nauhaw nga tawo nga nagadamgo nga nagainom sia kag nagamata sia nga ginapunaw kag ang iya kalag may kauhaw.” (Isaias 29:8) Sing pat-od, ang mga pantasya sang kalibutan indi gid magapaayaw kag magapahalipay kay bisan sin-o.

18. Bangod sang katunayan sang Ginharian, anong dalanon ang dapat naton pangitaon, upod ang anong palaabuton?

¹⁸ Ang Ginharian ni Jehova isa ka katunayan. Aktibo ini nga nagagahom, samtang ining malaut nga sistema sang mga butang nagaatubang sing nagahilapit, permanente nga kalaglagan. Busa, dumduma ang laygay ni Pablo: “Gani nian indi kita magtulog subong sang iban, kundi magpulaw kita kag magbut-anan.” (1 Tesalonica 5:6) Kabay nga huptan naton ang aton mga tagipusuon kag mga hunahuna nga nahugod sa mga katunayan sang Ginharian kag busa magaagom sang dayon nga mga kabulahanan. Kag kabay nga pamatian naton ang Hari sinang Ginharian nga nagasiling sa aton: “Kari kamo, mga ginpakamaayo sang akon Amay, panublia ninyo ang ginharian nga gin-aman sa inyo kutob pa sang pagtukod sang kalibutan.”—Mateo 25:⁠34

[Footnote]

Paano Mo Sabton?

◻ Ano ang kalibutanon nga mga pantasya, kag ngaa dapat naton ini sikwayon?

◻ Anong mga halimbawa ang nagapakita sang kabuangan sang pagpaduyog sa kalibutanon nga mga pantasya?

◻ Anong mga katunayan ang nagapamatuod sang katunayan sang Manunuga, sang iya nasulat nga Pulong, ni Jesucristo, kag sang iya Ginharian?

◻ Paano naton mapabakud ang aton pagtuo sa mga katunayan sang Ginharian?

[Laragway sa pahina 15]

Sa masami ang kabangdanan sang kalibutanon nga mga pantasya amo ang paghandum sang materyal nga manggad

[Laragway sa pahina 16]

Ang pagbantala sang maayong balita amo ang isa ka paagi sa pagpangita sang mga katunayan sang Ginharian

[Laragway sa pahina 17]

Ginapangita mo bala ang mga katunayan sang Ginharian paagi sa makugi nga pagtuon sang Pulong sang Dios?