Aprikano nga mga Badbad sang Biblia
Ang pinakaunang mga badbad sang bug-os nga Biblia sa Aprikano nga pamulong ginhimo sa Egipto. Nakilal-an subong Coptic nga mga bersion, ginapatihan nga may petsa ini nga halin sa ikatlo ukon ikap-at nga siglo C.E. Pagligad sang mga tatlo ka siglo, ang Biblia ginbadbad sa Etiopianhon.
Ang ginatos ka wala masulat nga pamulong nga ginapamulong sa bagatnan sang Etiopia kag Sahara naghulat sa pag-abot sang mga misyonero sang ika-19 nga siglo. Sang 1857 ang importante nga dag-on nalab-ot sang natapos ni Robert Moffat ang isa ka badbad sang Biblia sa Tswana, isa ka pamulong sang nabagatnan nga Aprika. Gin-imprinta man niya ang mga seksion sini sa isa ka de-mano nga imprintahan. Amo ini ang nahaunang kompleto nga Biblia nga gin-imprinta sa Aprika kag amo man ang nahaunang kompleto nga badbad sa wala anay masulat nga Aprikano nga pamulong. Sing makawiwili, gingamit ni Moffat ang balaan nga ngalan nga Yehova sa iya badbad. Sa 1872 nga bersion nga ginbalhag sang British and Foreign Bible Society, ang ngalan nga Yehova gingamit sa pangunang mga pinamulong nga ginpamulong ni Jesus subong sang narekord sa Mateo 4:10 kag Marcos 12:29, 30.
Sang 1990 ang bilog nga Biblia ginbadbad sa 119 ka Aprikano nga pamulong, kag may mga bahin sini nga matigayon sa 434 pa ka pamulong.