Report sang mga Manugbantala sang Ginharian

Ang mga Karnero ni Jesus Nagapamati sa Iya Tingog

SAMTANG ang pagbantala nga hilikuton nagasangkad sa tanan nga bahin sang duta, si Jehova paagi sa iya mga anghel nagatuytoy sa iya mga alagad pakadto sa mga katulad-karnero. Nabatian nila ang tingog ni Jesus kag natun-an nga alagaron sia nga ginatan-aw ang kabuhi nga walay katapusan. Si Jesus nagsiling sa Juan 10:27, 28: “Ang akon mga karnero nagapamati sang akon tingog, kag nakilala ko sila, kag nagasunod sila sa akon. Kag nagahatag ako sa ila sing kabuhi nga walay katapusan.” Talupangda kon paano ang mga bunayag sing tagipusuon sa Madagascar nagpamati sa tingog ni Jesus.

Ginhatagan sang isa ka Saksi ni Jehova sing mga kopya sang mga libro nga Mahimu Ka Mabuhi sing Dayon sa Paraiso nga Duta kag Your Youth—Getting the Best Out of It ang manugbulong nga nagtan-aw sa iya nagamasakit nga amay.

Ang doktor isa ka Protestante kag nagapamatok gid katama sa mga Saksi, apang ginbasa niya ang libro kag gintan-aw ang mga kasulatan sa iya mismo Biblia. Ang iya asawa, nga isa ka Katoliko kag isa man ka doktor, nagbasa sang Youth nga libro sa madamong beses bangod nagsiling sia nga daw ginsulat gid ini para sa iya. Ang pasad-sa-Biblia nga paathag sang Sosiedad tuhoy sa importansia sang 1914 naghaylo sa ila. Ginpakig-angutan sang bana ang Saksi nga naghatag sa iya sang mga libro. Ginhatagan sia sang Saksi sing Life—How Did It Get Here? By Evolution or by Creation? kag naghimos nga duawon sia kag ang iya asawa agod masabat ang ila mga pamangkot. Sang ginduaw niya sila, nasugdan niya ang isa ka regular nga pagtuon sa Biblia upod sa mag-asawa kag sa ila tatlo ka kabataan. Ang pag-uswag sa paghangop sa Biblia madasig.

Pagkatapos sang una nga pagduaw, ang bug-os nga pamilya nagsugod sa pagtambong sa mga miting sa Kingdom Hall kag wala madugay pagkatapos sadto nagpalista sa Teokratikong Eskwelahan sa Pagministro. Ang batasan sang mga kabataan nag-uswag sing daku. Gikan sa ila pagtuon sa Biblia, natun-an nila nga ang pagsaulog sang mga kaadlawan kag iban pa nga relihiosong selebrasyon indi Cristiano; gani, nag-untat sila sa pagsaulog sini. Ang bana nagdumili sa paghatag sang iya dugo sa isa ka paryente, bisan pa nga ang topiko wala pa mahambalan sa pagtuon sa Biblia. Sang ulihi ang iya uniporme sa karate nadula sa iya aparador; ginpadala niya ini sa sastre agod ipaliwat para sa iya mga kabataan. Gintutdan niya ang tanan niya nga mga magasin kag mga libro nahanungod sa horoskopo. Pagligad lamang sang tatlo ka bulan nga pagtuon, ang bana kag ang iya asawa naghalin sa ila mga simbahan kag nagpabutyag sang ila handum nga makigbahin sa pagbantala nga hilikuton. Bawtismado na sila karon.

◻ Isa ka babayi sa Thailand ang nagapangita sang kamatuoran. Bisan isa ka Budhista, indi gid sia debotado sa iya relihion bangod sang nakita niya nga tuman nga pagkasalimpapaw kag kakagod. Isa pa, may yara lainlain nga mga kinabatasan nga wala niya maluyagan. Natak-an na sia sini tanan.

Nian, ang isa ka kaingod nagrekomendar nga tilawan niya ang mga Cristiano kag gindala sia sa isa ka Pentecostal nga simbahan. Apang, sa tion sang serbisyo, daku gid ang handum sang babayi nga maglakat kag magpauli bangod sang gahod, kay ang tanan nagapangadi nga may mabaskog nga tingog. Amo yadto ang katapusan nga tion nga nagkadto sia sa sadto nga simbahan.

Sang ulihi, gintilawan niya ang iglesia Katolika Romana. Apang, pagkatapos nakasimba sing madamong beses, nakita niya liwat ang pagkasalimpapaw kag kakagod, subong man ang maluho nga estilo sang pagkabuhi sang pari. Naugot gid sia kag nag-untat sa pagkadto didto. Namangkot ang pari kon ngaa naghalin sia. Sang mahibaluan niya ang rason, nagsiling sia sa mayagutaon nga paagi: “Kon luyag mo magbuylog sa estrikto gid nga mga tawo, magkadto ka sa mga Saksi ni Jehova.” Namangkot sia: “Diin sila?” Ang pari nagsabat: “Malapit sila sa opisina sang tubig.” Sang madason nga adlaw ginpangita niya sila apang napaslawan sia. Walay sapayan, pirme niya ginahunahuna ang mga Saksi ni Jehova.

Isa ka adlaw nabatian niya ang isa sang iya mga kaingod nga mayagutaon nga nagsiling sa isa pa: “Sa dili madugay mangin isa ikaw ka Saksi ni Jehova!” Pagkabati niya sina, ang babayi nagdalidali pakadto sa kaingod kag namangkot: “May mga Saksi ni Jehova bala diri sa palibot?” “Huo,” ang sabat. “Ang iban magakadto dugaydugay sa mga kaingod nga nagabantala sa balay kag balay. Makilala mo sila bangod sang ila matinlo kag mahipid nga pamayo.” Pagkabati niya sina nagdalagan sia agod pangitaon sila. Primero wala niya sila makita, apang sang nagalakat na pauli sa iya balay, nakita niya ang duha ka mahipid mamayo nga babayi nga may ginasugilanon. Nagpalapit sia kag namangkot kon bala mga Saksi ni Jehova sila. Sang magsiling sila nga huo, nakiluoy sia: “Kadto kamo palihug sa akon balay. Luyag ko kamo masugilanon.”

Isa ka pagtuon sa Biblia ang ginsugdan, kag walay sapayan sang pagpamatok kag pagyaguta gikan sa mga katapo sang pamilya, ining babayi nagsugod sa pagtambong sa mga miting kag sa pagpanaksi sa iya mga paryente.

Kilala gid ni Jesus ang iya mga karnero kag ginatipon niya sila pasulod sa iya organisasyon para makalampuwas pakadto sa iya bag-ong kalibutan sang pagkamatarong.