Sin-o ang May Kahamuot sang Dios?

LUYAG naton tanan nga maluyagan sang aton mga kaupdanan. Para sa isa ka Cristiano ang mas makusog nga handum amo ang mahamut-an sang Dios. Tuhoy kay Jehova nga Dios, ginasiling sa Salmo 84:11: “Kahamuot kag himaya amo ang ginahatag niya. Si Jehova mismo indi magadumili sang bisan ano nga maayo para sa mga nagalakat sing walay sala.” Sang matawo si Jesus, ang malipayon nga singgit sang langitnon nga mga anghel nagsaad sing “paghidait sa duta para sa mga tawo nga ginakahamut-an niya!”—Lucas 2:14, Moffatt.

Apang sin-o ang ginakahamut-an sang Dios? Ang mga talaksan sang Dios pareho bala sa tawo? Sing halangpunon, indi, subong sang ginpakita sang ginhambalan sa nagligad nga artikulo. Sa katunayan, sanglit ang mga Cristiano ginalaygayan nga ‘magmanug-ilog sang Dios,’ dapat mamangkot ang tagsatagsa sa aton, Nagapakita bala ako sing kahamuot sa mga tawo nga ginakahamut-an sang Dios, ukon nahuyog bala ako sa pagsunod sa kalibutanon nga mga talaksan sa akon paghukom sa mga tawo? (Efeso 5:1) Agod matigayon ang kahamuot kag pag-ugyon ni Jehova, dapat kita maghalong sa pagtan-aw sang mga butang gikan sa iya pagtamod.

Ang Mas Mataas nga Talaksan sang Dios

“Ang Dios walay ginapasulabi,” siling ni apostol Pedro, “apang sa tagsa ka pungsod ang nagakahadlok sa iya kag nagahimo sing katarungan kalahamut-an sa iya.” Dugang pa, si apostol Pablo nagpamatuod nga ang Dios ‘naghimo sang tagsa ka pungsod sang mga tawo.’ (Binuhatan 10:34, 35; 17:26) Busa, rasonable gid ang maghinakop nga ang tanan nga mga tawo palareho sa itululok sang Dios walay sapayan sang ila pisikal nga mga kinaiya. Bangod sina, indi nagakabagay sa isa ka Cristiano nga mahamuot sing dinagakaigo sa iban bangod lamang naghalin sia sa isa ka partikular nga rehiyon ukon sa isa ka duag sang panit ukon sa isa ka rasa. Sa baylo, mas maayo nga sundon niya ang iya Huwaran, si Jesucristo, nga tuhoy sa iya bisan ang mga kaaway nagbaton nga wala sia nagpakita sing pagpasulabi.—Mateo 22:16.

Ang ekspresyon nga “panit-kadalom” ginagamit kon kaisa sa paglaragway sa butang nga manabaw ukon indi importante. Ang duag sang panit amo lang sina; daw panit lamang kadalom. Ang duag sang panit sang isa ka tawo wala gid nagapabanaag sang iya personalidad ukon nasulod nga mga kinaiya. Tuhoy sa pagpili kon sin-o ang pakig-updan, pakigsaluhan, ukon kumustahon, indi kita dapat magtan-aw sa duag sang panit lamang. Dumduma, ang dalaga nga nag-inspirar sang isa sang pinakamatahom kag pinakaromantiko nga binalaybay nga ginsulat nagsiling tuhoy sa iya kaugalingon: “Maitom ako, apang maayuayo, . . . Maitom ako, bangod nga ginbatok ako sang adlaw.” (Ambahanon ni Solomon 1:5, 6) Ang rasa ukon duag indi ang sadsaran sang pagpakita sing kahamuot. Mas importante kon ang isa nagakahadlok sa Dios kag nagahimo sing pagkamatarong.

Ano ang panghunahuna sang Dios nahanungod sa pagpanag-iya sing materyal nga manggad? Sa tanan nga mga tawo nga ginahigugma kag ginakahamut-an sang Dios, ang iya Anak, nga si Jesucristo, amo ang pinakapanguna. Apang, sang yari sa duta, si Jesus “wala gid sing ulunlan sang iya ulo.” (Mateo 8:20) Wala sia sing lote, mga balay, mga kaumhan, mga hamungang kahoy, ukon mga kasapatan. Apang, ginpadunggan sia ni Jehova kag ginbayaw sia sa isa ka posisyon nga labaw kay bisan sin-o sa uniberso luwas sa Dios mismo.—Filipos 2:9.

Si Jesucristo ginkahamut-an sang Dios bangod manggaranon sia indi sa materyal nga mga butang kundi sa maayong mga buhat. (Ipaanggid ang 1 Timoteo 6:17, 18.) Ginlaygayan niya ang iya mga sumulunod: “Dili kamo magtipon sa inyo kaugalingon sing mga bahandi sa duta, diin ang sipit kag ang tuktok nagapapas kag diin ang mga makawat nagaguhab kag nagapangawat. Kundi, magtipon kamo sa inyo kaugalingon sing mga bahandi sa langit, diin walay sipit kag tuktok nga nagapapas, kag diin ang mga makawat indi magguhab kag magpangawat.” (Mateo 6:19, 20) Busa, sa baylo nga pakitaan sing kahamuot ang mga manggaranon lamang sa mga butang sining kalibutan, ang mga Cristiano indi magahukom pasad sa kalibutanon nga mga pagkabutang. Pangitaon nila ang mga manggaranon sa Dios walay sapayan nga manggaranon man ukon imol sila sa materyal nga paagi. Indi pagkalimti nga ‘ginpili sang Dios ang mga imol sining kalibutan nga magmanggaranon sa pagtuo kag mga manunubli sang Ginharian.’ (Santiago 2:5) Kon ginahuptan mo ang pagtamod sang Dios, indi ka gid mahulog sa kinaandan nga batasan sang pagpabor ukon pagtinguha nga makuha ang kahamuot sang manggaranon sa materyal.

Tuhoy sa edukasyon, maathag nga ginapakita sang Biblia nga ang Dios nagalaygay sa aton nga pangitaon ang ihibalo kag kaalam kag nga si Jesucristo amo ang pinakadakung manunudlo nga naglakat sa duta. (Hulubaton 4:7; Mateo 7:29; Juan 7:46) Apang indi kalibutanon nga kaalam ukon edukasyon ang nagapahamuot sa Dios. Sa kabaliskaran, si Pablo nagasugid sa aton nga “indi madamong maalam sa undanon nga paagi ang gintawag, . . . kundi ginpili sang Dios ang buangbuang sang kalibutan sa pagpakahuya sang maalam.”—1 Corinto 1:26, 27.

Ginakahamut-an sang Dios yadtong edukado, indi sa sekular nga mga butang nga ginatudlo sa mga eskwelahan sang mataas nga pagtulun-an, kundi sa “putli nga hambal” sang kamatuoran subong sang masapwan sa iya Pulong, ang Biblia. (Sofonias 3:9) Sa katunayan, si Jehova mismo nagatudlo sa iya katawhan sa karon paagi sa programa sang edukasyon nga may kasangkaron tubtob sa mga ukbong sang duta. Subong sang gintagna ni manalagna Isaias, ang katawhan sang tanan nga kapungsuran nagasabat paagi sa pagsiling: “Magataklad kita sa bukid ni Jehova, sa balay sang Dios ni Jacob; kag tudluan niya kita sang iya mga dalanon, kag magalakat kita sa iya mga banas.” Busa, sa baylo nga padakuon ang sekular nga edukasyon, ginapangita sang mga Cristiano yadtong nagapamatuod paagi sa ila mga pulong kag mga buhat nga sila tunay nga “mga tawo nga tinudluan ni Jehova.” Paagi sina, matigayon nila ang ‘bugana nga paghidait’ nga ginahatag sang Dios.—Isaias 2:3; 54:13.

Matigayon Naton ang Kahamuot sang Dios

Huo, ang mga talaksan sang Dios sa pagpakita sing kahamuot sa iban tuhay katama gikan sa mga talaksan sang tawo. Apang, dapat kita manikasog nga magpatuytoy sa iya mga dalanon kon luyag naton matigayon ang kahamuot sa iya mga mata. Nagakahulugan ina nga dapat kita magtuon sa pagtamod sa iban gikan sa punto-de-vista sang Dios kag indi paagi sa tawhanon nga mga talaksan, kay basi maimpluwensiahan ini sang kakagod kag pagkamaynadampigan. Paano naton ina mahimo?

Si Jehova nga Dios nagausisa sang tagipusuon sang tawo kag nagakahamuot sa mga tawo nga nagapakita sing mga kinaiya subong sang gugma, pagkaayo, pagkalulo, kag pagbatas. Dapat man naton ini himuon. (1 Samuel 16:​7; Galacia 5:22, 23) Kinahanglan naton tan-awon ang nasulod nga tawo, tubtob sa masarangan naton subong mga tawo, kag indi sa duag sang iya panit ukon etniko nga ginhalinan. Sa baylo nga pangitaon yadtong manggaranon sa materyal nga mga butang, mas maayo nga dumdumon naton ang pagtamod sang Dios sa mga manggad kag manikasog nga “magmanggaranon sa maayong mga buhat, magmaalwan kag magmahinatagon.” (1 Timoteo 6:18) Agod matigayon ang kahamuot sang Dios, dapat kita magpadayon sa pagpangita sang sibu nga ihibalo sang Dios kag sang iya Anak, si Jesucristo, nga gintudluan sing maayo sa putli nga hambal sang kamatuoran. (Juan 17:3, 17) Paagi sini, kita mangin sa tunga man sadtong ginakahamut-an sang Dios.