Ang mga Pagpakamaayo sang Edukasyon sa Gilead Naglapnag sa Bug-os nga Kalibutan

ANG edukasyon sa sining daan nga kalibutan may limitado lamang nga kabilihanan. Sanglit pasad ini sa kalabanan sa tawhanon nga mga ideya sa baylo nga sa kamatuoran sang Dios, wala ini nagahatag sing matuod nga katuyuan sa kabuhi. Apang tuhay ang Eskwelahan sa Gilead. Sa iya introduksion nga komento sa gradwasyon sang ika-93 nga klase sang Gilead, ginpakita ni Theodore Jaracz sang Nagadumala nga Hubon nga ining eskwelahan nagahatag sing edukasyon nga may matuod nga kabilihanan. Subong sang ginasiling sang Salmo 119:160, “ang kabilihanan sang pulong [sang Dios] amo ang kamatuoran.” Busa makakulunyag gid nga halos 6,000 ka tumalambong ang namati sa programa sang gradwasyon sang Septiembre 13, 1992.

Ang nahaunang pamulongpulong sang aga, nga ginhatag ni Lon Schilling sang Watchtower Farms Committee, natig-uluhan sing “Padayon nga Dauga ang Kalibutan kag ang Gumalahom Sini.” Si Brother Schilling naghugod sa Bugna 12:11 kag nagpaathag nga ang bersikulo nagapakita sing tatlo ka paagi sa pagdaug: (1) paagi sa dugo sang Kordero, (2) paagi sa pagpanaksi, kag (3) paagi sa masinakripisyuhon sa kaugalingon nga espiritu. Ginpahanumdom niya sa mga estudyante nga madamo sa mga alagad ni Jehova ang nagpakita sina nga espiritu kag nag-atubang pa gani sang kamatayon sing kinabubut-on agod matipigan ang ila katutom kag integridad.

“Amligi ang Ginsalig sa Inyo” amo ang tema nga ginhatag ni John E.Barr sang Nagadumala nga Hubon. Sa iya duna nga mapagsik nga panghambal, ginpaanggid niya ang pagsaligay sa ulot ni Jehova kag sang iya mga alagad sa pagsaligay nga nagatubo sa isa ka maayo nga pag-asawahay. Nagagamit sang mga punto sa 2 Timoteo 1:12, 13, ginlaygayan niya ang mga estudyante nga amligan ang ginsalig sa ila paagi sa pagpakamahal sa “huwaran sang maayong mga pulong” sa Biblia. Ginpadaku niya ang paghimo sang personal nga pagtuon nga isa ka importante nga bahin sang adlaw-adlaw nga iskedyul kag malulo nga naglaygay sa mga estudyante nga indi gid pagtugutan ang ila mga komento sa mga miting nga mangin kinaandan na lamang nga butang kundi pirme himuon ini nga makahulugan.

Si William Van De Wall sang Service Department Committee ang naghatag sang masunod nga pamulongpulong, “Ipakita ang Mahigugmaon nga Kabalaka sa Katulad-Karnero nga mga Tawo.” Ginpamangkot niya ang mga estudyante kon ano ang pangitaon nila sa isa ka doktor sang pamilya kag ginlaygayan sila nga palambuon ang amo man nga kahanuklog, kaawa, kag kaluoy nga ginapakabahandi nila.

Si Daniel Sydlik sang Nagadumala nga Hubon nagpamulongpulong sing makapulukaw sa tema nga “Ang Tanan nga Butang Posible sa Dios.” Ginpahanumdom niya sa mga estudyante nga ginkadlawan nanday Abraham kag Sara ang daw imposible nga manganak sila sing anak nga lalaki sa ila katigulangon. Madamo sa mga saad sang Dios ang daw imposible sa punto-de-vista sang tawo; apang subong sang ginpamangkot sang anghel kay Abraham, “may butang bala nga tuman ka dikinaandan kay Jehova?” (Genesis 18:14) Ginlaygayan ni Brother Sydlik ang mga estudyante nga ipakita ang pagtuo sa ikasarang sang Dios sa paghimo sang imposible, wala gid nagatugot sang pagtuo nga madula ukon mationg, bisan ano man nga pagtilaw ang ila masugata.

Ang mga Instruktor Naghatag sing Laygay

Ang duha ka instruktor sang Gilead amo ang masunod nga namulongpulong. Una, si Jack D.Redford nagpamulongpulong sa tema nga “Paghimo sing Maayo nga Ngalan sa Dios.” Ang nagahimo sa ngalan nga maayo ukon malain, pangatarungan niya, amo ang tawo nga nagadala sini. Ginpaanggid niya ang mga ngalan nanday Adan, Nimrod, Jesebel, Saul, kag Judas sa mga ngalan nanday Noe, Abraham, Rut, Pablo, kag Timoteo. Ang tagsa ka ngalan nagadala sing madamo nga kaanggid bangod sang dalanon sang kabuhi sang nagadala sini. Ginpamangkot niya ang mga estudyante kon ano nga sahi sang ngalan may yara sila 10, 100, ukon 1,000 ka tuig kutob karon—isa nga nag-untat ukon isa nga palareklamo ukon isa nga matutom nga misyonero? Magkonsentrar sa mga solusyon kag mga tulumuron sa baylo nga sa mga problema, laygay niya sa ila.

“Daw Ano Kaayo Ginabantayan Ninyo ang Inyo Pagtuo?” amo ang nagapahunahuna nga tema nga ginhatag ni Ulysses V.Glass. Ginpaanggid niya ang makusog nga pagtuo sa isa ka maayo nga compass nga pirme nagatudlo sa husto nga dalan. Ang compass sa isa ka awto mahimo maapektuhan sang iban nga magnetiko nga mga latagon luwas sa duta, kag ina nga mga latagon kinahanglan batuan. Sa kaanggid, ining daan nga kalibutan nagahatag sing madamong impluwensia nga makapahuyang ukon makapaluya sang aton pagtuo kon pabay-an naton. Samtang ginpaandaman niya ang klase batok sina nga mga impluwensia, gindayaw man sila ni Broth­er ­Glass bangod sang ila pagkasensitibo sa mga panimuot kag mga balatyagon sang iban.

Ang katapusan nga pamulongpulong sang aga ginhatag ni Albert D. Schroeder, katapo sang Nagadumala nga Hubon. Ginpalig-on niya ang mga estudyante nga “Huptan ang Espiritu sang Pagmisyonero” nagadayaw sa ila tungod sang pagpakita sing espiritu sang pagmisyonero nga ginpakita man sang nahaunang klase sang 1943, sang nag-alagad sia subong registrar para sa eskwelahan. Nagsiling sia nga mahunahunaon sila sa tawo, kinaugali nga mga manugwali, nga maluyag tuytuyan sang espiritu sang Dios. Padayon nga palambua ina nga espiritu, nagagamit sing maayo sang New World Translation sa personal nga pagtuon, laygay niya. Naghinakop sia paagi sa bersikulo-por-bersikulo nga paghinun-anon sang Salmo 24 subong halimbawa.

Masunod, ang mga estudyante sang Gilead nangin mga gradwado sang Gilead! Gindaho sa ila ang ila mga diploma samtang ang ila misyonero nga mga asaynment ginabasa sing mabaskog, nga ginapalakpakan sang tumalambong.

Sang hapon, si Calvin Chyke sang Factory Committee nagdumala sang Pagtinuon sa Lalantawan. Nagsunod ang isa ka makalilipay nga programa sang mga estudyante, nga nagtandog sang mga eksperiensia sang mga estudyante sa latagon sa sulod sang lima ka bulan nga kurso kag ginpakita man ang mga slide sang pila ka pungsod diin gintangdo sila. Dugang pa, isa ka gulang-gulang nga mag-asawa ang gin-interbyu, kag ginsugid nila ang kaalam kag eksperiensia nga naagom nila sa madamong tinuig subong mga misyonero. Ang hapon natapos paagi sa isa ka suno-sa-tion nga drama nga natig-uluhan Indi Kamo Magtalang Ukon Magtiawtiaw sa Dios.

Ang tumalambong nasadyahan, nakunyag nga makita kon ano ang mahimo sang edukasyon sa kamatuoran sang Dios kag nalipay sa paghibalo nga ang mga benepisyo sina nga edukasyon padayon nga mabatyagan sa bug-os nga kalibutan. Samtang ining 48 ka misyonero manugpakadto sa ila mga asaynment, madamong pangamuyo ang nagaupod sa ila, nagapabutyag sing tinagipusuon nga paglaum kag pagsalig nga ining mga matutom mangin pagpakamaayo sa katawhan sang Dios bisan diin sila magkadto.

[Kahon sa pahina 19]

Mga Estadistika sang Klase:

Kadamuon sang mga pungsod nga gintiglawas: 7

Kadamuon sang mga pungsod nga gintangduan: 18

Kadamuon sang mga estudyante: 48

Kadamuon sang mag-asawa: 24

Promedyo nga edad: 32.8

Promedyo nga mga tuig sa kamatuoran: 15.3

Promedyo nga mga tuig sa bug-os tion nga ministeryo: 10.4

[Kahon sa pahina 20]

MGA GRADWADO SA EKSTENSION NGA KLASE SANG GILEAD

Sang Hunyo 21, 1992, isa ka grupo sang 24 ka misyonero ang naggradwar gikan sa ikaapat nga klase sang Gilead Extension School sa Selters/Taunus, Alemanya. Ang klase, nga ginatapuan sang 11 ka mag-asawa kag 2 ka dalaga halin sa pito ka pungsod, nagapromedyo sing 32 anyos ang edad, 14 ka tuig kutob sang nabawtismuhan, kag 8.5 ka tuig sang pag-alagad sa bug-os tion nga hilikuton sa pag-ebanghelyo. Kapin sa 2,000 ang nagtambong sa gradwasyon.

Ginbuksan ni Brother Jaracz ang programa sing paghinun-anon sa Hulubaton 11:24, nga nagasiling: “May yara nga nagasabwag kag nagadugang pa.” Nagsiling sia nga ang mga estudyante igasabwag kag pat-od nga magadugang.

Ang makapalig-on nga makasulatanhon nga mga pamulongpulong ginhatag ni Richard Kelsey, manughituhog sang Aleman nga Komite sang Sanga; ni Wolfgang Gruppe sang Service Department; ni Werner Rudtke kag ni Edmund Anstadt, mga katapo man sang Komite sang Sanga; kag sang duha ka instruktor, sanday Dietrich Förster kag Lothar Kaemmer. Si Albert Schroeder sang Nagadumala nga Hubon naghatag sing makawiwili nga diskurso nga natig-uluhan “Magpadayon nga Mangin mga Manugpangita sing Espirituwal nga mga Hiyas.” Ang putukputukan sang programa amo ang paghatag sing asaynment pakadto sa 11 ka pungsod sang Aprika, Sentral Amerika, kag Nasidlangan nga Europa, pagkatapos sini ang isa ka gradwado nagbasa sing sulat halin sa klase para sa Nagadumala nga Hubon nga nagapabutyag sing tinagipusuon nga apresasyon.

[Laragway sa pahina 18]

Ika-93 nga Naggradwar nga Klase sang Watchtower Bible School of Gilead

Sa listahan sa ubos, ang mga raya ginnumeruhan halin sa una pa likod, kag ang mga ngalan nalista halin sa wala pa tuo sa tagsa ka raya.

(1) Hitesman, C.; West, P.; Evans, D.; Hipps, M.; Simonelli, N.; Wood, S.; Corkle, M.; Flores, C.; Thomas, J. (2) Jones, M.; Nissinen, J.; Sponenberg, M.; Zachary, K.; Ravn, G.; Backman, M.; Wettergren, A.; Evans, D.; Flores, R.; Caporale, G. (3) Simonelli, N.; Rechsteiner, M.; Rechsteiner, M.; Ruiz-Esparza, L.; Gerbig, B.; Simpson, C.; Zanewich, C.; Zachary, B.; Ricketts, L.; (4) Simpson, J.; Backman, J.; Corkle, G.; Gerbig, M.; Ricketts, B.; Bagger-Hansen, L.; Jones, A.; Zanewich, K.; Ravn, J.; Hipps, C. (5) Sponenberg, S.; Hitesman, A.; Caporale, L.; Ruiz-Esparza, S.; Thomas, R.; Bagger-Hansen, B.; Wood, M.; West, M.; Wettergren, C.; Nissinen, E.