Pagkalipay sa Aton Dungganon nga Manunuga

“Magkalipay ang Israel sa iya dungganon nga Magbubuhat, ang mga anak sang Sion​—⁠magkalipay sila sa ila Hari.”​—⁠SALMO 149:⁠2.

1. Walay sapayan sang pagsinggit sing “kahilwayan sa katapusan,” ano ang matuod nga kahimtangan sang katawhan?

ANG kalibutan karon ginapaantos sang “mga kasakit.” Amo ina ang mga pulong nga gingamit ni Jesus sa iya tagna tuhoy sa “katapusan sang sistema sang mga butang,” ang malaglagon nga dag-on nga nagsugod sa unang inaway kalibutanon sang 1914. (Mateo 24:​3-8) Madamo nga politiko ang wala sing makita kundi kadudulman sa palaabuton. Walay sapayan sang pagsinggit sing “kahilwayan sa katapusan” sa Sidlangan nga Europa, ang isa ka presidente anay sa sadto nga duog nagsumaryo sang kahimtangan sang magsiling sia: “Ang pag-awas sang populasyon kag ang green­house effect, ang mga buslot sa ­ozone kag AIDS, ang peligro sang nuklear nga terorismo kag ang nagasangkad nga kal-ang sa ulot sang manggaranon nga aminhan kag imol nga bagatnan, ang peligro sang tiggulutom, ang pagdiutay sang bio­sphere kag mineral nga manggad sang planeta, ang pagsangkad sang katilingban nga impluwensiado sang telebisyon kag ang nagadaku nga peligro sang mga inaway sa ulot sang mga rehiyon​—⁠ini tanan, upod sa iban pa nga mga kabangdanan, nagarepresentar sing isa ka kabilugan nga katalagman sa katawhan.” Wala sing tawhanon nga gahom ang makadula sining peligro sang malaglagon nga kalalat-an.​—⁠Jeremias 10:⁠23.

2. Sin-o ang may permanente nga solusyon sa mga problema sang katawhan, kag ano nga tikang ang nahimo na niya?

² Apang, malipay kita nga ang aton Dungganon nga Manunuga may permanente nga solusyon. Sa tagna ni Jesus “ang katapusan sang sistema sang mga butang” ginaangot sa iya dikitaon nga “presensia.” (Mateo 24:​3, 37-39) Sa pagtuga sa “bag-ong mga langit,” ginpalingkod ni Jehova si Jesus sa iya trono subong Mesianikong Hari, ang matagnaon nga pamatuod nga nagapakita nga ining maragtason nga hitabo natabo sa mga langit sang tuig 1914.⁠a (2 Pedro 3:13) Subong kaupod nga manuggahom sang Soberanong Ginuong Jehova, ginsugo karon si Jesus nga hukman ang mga pungsod kag painon ang mahagop, tulad-karnero nga katawhan sang duta gikan sa mga batinggilan nga tulad-kanding. Ang didiosnon nga “mga kanding” ginatandaan para sa “walay katapusan nga pagkautod” kag “ang mga karnero” para sa walay katapusan nga kabuhi sa dutan-on nga bahin sang Ginharian.​—⁠Mateo 25:​31-34, 46.

3. Ano ang rason sang matuod nga mga Cristiano sa pagkalipay?

³ Ang nagkalabilin sang espirituwal nga Israel sa duta, nga ginabuylugan karon sang dakung kadam-an sining matinumanon nga mga karnero, may rason gid nga magkalipay kay Jehova, ang Hari nga dayon, samtang ginadala niya ang iya dungganon nga mga katuyuan sa isa ka talipuspusan paagi sa Ginharian sang iya Anak. Makasiling sila: “Magakalipay ako sing daku kay Jehova. Ang akon kalag magamalipayon sa akon Dios. Kay ginpanaptan niya ako sing mga panapton sang kaluwasan . . . Subong nga ang duta nagapatubo sang iya salingsing, kag subong nga ang katamnan nagapatubo sang mga butang nga ginatanum sa iya, sa amo ang Soberanong Ginuong Jehova magapatubo sang pagkamatarong kag pagdayaw sa atubangan sang tanan nga pungsod.” (Isaias 61:​10, 11) Ining ‘pagtubo’ kitaon gid sa minilyon nga ginatipon karon gikan sa mga pungsod agod mag-amba sing kadayawan kay Jehova.

‘Pagpadali Sini’

4, 5. (a) Paano gintagna ang pagtipon sa katawhan sang Dios? (b) Ano ang talalupangdon nga pag-uswag sa 1992 nga tuig sang pag-alagad?

⁴ Ang pagtipon nagadasig samtang nagapakari ang katapusan sang sistema ni Satanas. Ang aton Dungganon nga Manunuga nagasiling: “Ang imo katawhan man mangin matarong tanan . . . , Ang sanga sang akon tinanum, ang binuhatan sang akon mga kamot, agod nga himayaon ako. Ang diutay mangin isa ka libo, kag ang diutay mangin mabakod nga pungsod. Ako gid, si Jehova, magapadali sini sa iya tion.” (Isaias 60:​21, 22) Ining pagpadali makatilingala nga ginapakita sa 1992 nga Report sa Pag-alagad sang mga Saksi ni Jehova sa Bug-os nga Kalibutan, nga ginbalhag sa pahina 12 tubtob 15 sining magasin.

⁵ Ang talalupangdon sa sining report amo ang bag-ong kataason nga 4,472,787 ka manugwali sang Ginharian, pagdugang sing 193,967​—⁠4.5 porsiento nga labaw sa nagligad nga tuig. Ang kataason nga 301,002 nga nabawtismuhan sang 1992 nagapakita man sang kamatuoran nga madamo ang nagabaton sang kamatuoran sang Biblia. Nagakalipay gid kita nga sa sining “adlaw sang kadudulman kag kasubo, . . . may katawhan nga madamo kag makusog,” nga, kaangay sang guban sang mga apan, nagapasangkad sang pagpanaksi sa Ginharian “tubtob sa ukbong sang duta”! (Joel 2:​2, 25; Binuhatan 1:⁠8) Gikan sa madamo sing nieve nga Alaska​—⁠diin ang eroplano sang Watch Tower Society kapin sa 50 ka beses nga nagbalikbalik sa nalikupan sing nieve nga mga teritoryo⁠—​tubtob sa nagatagiti nga mga desyerto sang Mali kag Burkina Faso kag sa nalapta nga kapuluan sang Micronesia, ang mga alagad ni Jehova nagasilak subong “kapawa sang mga pungsod, agod nga [sia] mangin kaluwasan tubtob sa ukbong sang duta.”​—⁠Isaias 49:⁠6.

6, 7. Anong wala paabuta nga pagbag-o sang kahimtangan ang nasaksihan sang nagligad nga mga tinuig, kag ano ang reaksion sa sini sang mga alagad ni Jehova?

⁶ Si Jehova nangin kaangay sang isa ka kuta kag isa ka mabakod nga torre sa pag-amlig kag sa pagsakdag sa iya katawhan. Sa madamo nga bahin sang duta, kinahanglan nga batason sang mga Saksi ni Jehova ang mga dekada sang mapintas nga pagpamigos kag paghingabot. (Salmo 37:​39, 40; 61:​3, 4) Apang sining karon lang, subong nga daw milagro, ang mga pagdumili kag mga balagbag ginkuha sa mga 21 ka kadutaan, amo kon ngaa sa karon ang katawhan sang Dios hilway nga makabantala nga ang aton Dungganon nga Manunuga naghimo kay Cristo subong Hari sa ibabaw sang duta.​—⁠Salmo 2:​6-12.

⁷ Ginagamit bala sing maayo sang katawhan ni Jehova ang ila bag-o matigayon nga kahilwayan? Tan-awa sa tsart ang mga pag-uswag sa Bulgaria, Romania, kag sa anay Unyon Sobyet sa Sidlangan nga Europa kag sa Angola, Benin, kag Mozambique sa Aprika. Sa Zaire man, ang pag-uswag talalupangdon gid. Upod ang kalipay sa ila tagipusuon, ang aton nahilway nga kauturan nagasabat sa panawag: “Magpasalamat kay Jehova, O kamo nga katawhan, kay maayo sia . . . , sa Taghimo sing dalagku nga mga katingalahan: kay ang iya mahigugmaon nga kalulo nagapadayon tubtob sa walay katubtuban.” (Salmo 136:​1, 4) Ining mga pasalamat ginapabutyag paagi sa makugi nga pag-alagad sa pagtipon sa iban pa nga tulad-karnero nga katawhan sa bahin sang Ginharian.

8. Paano ang bag-o nga mga dumalayaw ni Jehova “nagalupad subong sang panganod” sa Sidlangan nga Europa? sa Aprika?

⁸ Sang nagligad nga tig-ilinit sa Europa, ang mga kombension sang katawhan ni Jehova sa anay Komunista nga kadutaan nakatigayon sing makatilingala nga tumalambong. Ang kapin pa ka makatilingala amo ang kadamuon sang nabawtismuhan, subong ginapakita sang kaupod nga tsart. Sing kaanggid, sa Togo, Aprika, ang pagdumili ginkuha sang Disiembre 10, 1991. Pagligad lamang sang duha ka bulan, may mga kombension nga ginhiwat. Kon ipaanggid sa binulan nga promedyo sang 6,443 ka manugbantala sa latagon, ang tumalambong sa sining kombension nagtimbuok tubtob sa 25,467, upod ang 556 nga nabawtismuhan​—⁠9.6 porsiento sang kadamuon sang mga manugbantala. Subong ginalaragway sang Isaias 60:​8, ang bag-o nga mga dumalayaw ni Jehova “nagalupad subong sang panganod, kag subong sang mga tukmo sa ila mga talambuan” sa mga kongregasyon sang katawhan ni Jehova.

9. Anong mga aman ang nahimo agod nga ang mga Cristiano sa bag-o lang nahilway nga mga pungsod ‘makakaon kag mabusog’?

⁹ Ang pagkagutom sa espirituwal nga pagkaon sa Sidlangan nga Europa kag sa Aprika ginabusog man. Ang mga pabrika sang Watch Tower Society sa Alemanya, Italya, kag Bagatnan nga Aprika paagisod nga nagpadala sing mga trak sang mga literatura, sa pila ka pamulong, sa gutom sa espirituwal nga mga pungsod. Sang una, madamo sa mga Saksi ang nagaambitay sa mga magasin nga nalukot na bangod sang pagpasahay, apang karon nagabaton sila sing bugana nga espirituwal nga pagkaon. Nagakalipay sila sa pag-ambit sa katumanan sang tagna: “Magakaon kamo sa kabugana kag mabusog, kag magadayaw sang ngalan ni Jehova nga inyo Dios, nga nagahisayo sing makatilingala sa inyo.”​—⁠Joel 2:⁠26.

Pag-atipan sa Dugang Pa nga Pagsangkad

10. Bangod sang madamo nga nagtambong sa Memoryal, anong imbitasyon ang ginatanyag sa tanan nga mga interesado?

¹⁰ Makatilingala matuod ang bug-os kalibutan nga kadamuon sang nagtambong sa Memoryal sang kamatayon ni Jesus, 11,431,171, isa ka pagdugang sing 781,013, ukon 7.3 porsiento nga labaw sa nagligad nga tuig. Ginaabiabi kamo tanan nga mga bag-uhan! Daw ano katahom kon ina tanan nga bag-uhan nga mga interesado magtuon sing Biblia upod sa isa sang mga Saksi ni Jehova! (Tan-awa ang Isaias 48:17.) Ginapakita sang Tuigan nga Report sang Pag-alagad nga 4,278,086 sining mga pagtuon ang ginadumalahan kada bulan, isa ka maayo nga pag-uswag sing 8.4 porsiento. Apang, madamo pa ang makatuon kon luyag nila. Ang mga Saksi ni Jehova malipay sa pagduaw sing regular sa mga interesado agod magdumala sing walay bayad nga pagtuon sa Biblia sa puluy-an, sa amo ginabuligan sila nga maglakat sing malig-on sa dalanon padulong sa walay katapusan nga kabuhi. (Juan 3:​16, 36) Ngaa indi mangabay sina nga pagtuon? Kag dumduma, ang isa ka mainit nga pag-abiabi pirme nagahulat sa imo sa Kingdom Hall!​—⁠Salmo 122:1; Roma 15:⁠7.

11, 12. (a) Ano ang mga problema sa pila ka kadutaan? (b) Sa anong paagi may “pagkaalangay” sa ulot sang manggaranon kag imol nga mga kadutaan?

¹¹ Ang mga kongregasyon nga may matahom nga mga Kingdom Hall ginpakamaayo sing bugana. Ang kahimtangan tuhay sa kadutaan diin ang matutom nga mga Saksi nagbatas sa madamo nga tuig sa idalom sang pagdumili, patago nga nagatipon sa diutay nga mga grupo. Sa madamo sina nga mga duog, hilway na sila karon apang pila lamang ang mga Kingdom Hall. Sa isa ka pungsod sa Aprika, halimbawa, tatlo lamang ang Kingdom Hall para sa 93 ka kongregasyon. Gani masami nga ginahiwat ang mga miting sa daku nga bakante nga mga lote. Mahimo nga tubtob sa 450 ang regular nga nagatambong sa mga miting sang kongregasyon nga may 150 ka katapo.

¹² Sa Sidlangan nga Europa masami nga mabudlay makabakal sing propiedad ukon magpatindog, apang may pag-uswag na karon. Ang dedikasyon sang isa ka matahom nga bag-ong pasilidad sang sanga naiskedyul para sa Nobiembre 28, 1992 sa Poland. Ang maalwan nga mga amot para sa bug-os kalibutan nga hilikuton sang mga Saksi ni Jehova ginagamit sa pagpatindog sing mga tilipunan kag iban pa nga mga pasilidad. Sa amo, may “pagkaalangay” nga nagakatabo kay ang kaalwan sang kauturan nga nagaamot sang ila materyal nga “sobra” nagabulig sa pag-aman para sa espirituwal nga mga kinahanglanon sang mga kongregasyon sa imol nga kadutaan.​—⁠2 Corinto 8:​13, 14.

Isa ka Bilyon ka Oras!

13. Pila ka oras ang nahinguyang sa pagbantala kag sa pagpanudlo sang 1992, kag kay sin-o mga panikasog ang ginapakita sa sini nga kadamuon?

¹³ Ano ang himuon mo sa isa ka bilyon ka oras? Magamit sang tanan nga makatigayon sing kabuhi nga walay katapusan inang madamo nga oras, kag kapin pa, sa mabungahon, makaalayaw nga pag-alagad kay Jehova. Apang handurawa nga idasok ang subong sina kadamo nga oras sa isa ka tuig! Amo sina ang nahimo sang katawhan ni Jehova sang 1992. Sa pagtingob sang indibiduwal nga mga report sang tanan nga manugbantala sang Ginharian, masapwan naton nga isa ka bag-ong kataason sang 1,024,910,434 ka oras ang nahinguyang sa labing maayo nga paagi nga sarang magamitan sang oras​—⁠pagdayaw sa aton Dungganon nga Manunuga, “nagapanudlo . . . sa dayag kag sa pamalaybalay.” (Binuhatan 20:20) Sa promedyo, 4,289,865 ka Saksi ang nagreport kada bulan. Naghalin sila sa tanan nga kahimtangan sang pangabuhi. Ang iban limitado sa tion nga ila mahinguyang para sa hilikuton sang Ginharian. Nagalakip ini sa mga ulo sang pamilya, nga dapat mag-aman para sa panimalay; sa mga tigulang; kag sa madamo nga may mga problema sa lawas; subong man sa kabataan nga nagaeskwela pa. Apang, ang report nga nahimo sang tagsatagsa isa ka bilidhon nga tanda sang gugma kay Jehova.​—⁠Ipaanggid ang Lucas 21:​2-4.

14. Paano ang mga pamatan-on ‘nagadumdom sa ila Dungganon nga Manunuga’?

¹⁴ Ang isa ka kaliwatan sang mga pamatan-on nagadaku sa pag-alagad kay Jehova, kag makalilipay nga ang kalabanan sa ila nagaaplikar sang mga pulong ni Solomon sa Manugwali 12:1: “Dumduma, karon, ang imo Dungganon nga Manunuga sa mga adlaw sang imo pagkapamatan-on.” Nagahugod sila sa ila pagtuon sa eskwelahan, kag ginahanas man sang ila debotado nga mga ginikanan sa espirituwal nga mga butang. Makalilipay nga makita ang madamo sang mga tin-edyer nga nagatindog sa nagligad nga mga kombension agod magpabawtismo. Makalilipay man mahibaluan nga madamo, paagi sa pagtuon sing bokasyonal nga trabaho ukon kalantip, ang nagahimo sing praktikal nga paghanda agod makapayunir paggradwar nila sa eskwelahan. Sa amo, masupurtahan nila ang ila kaugalingon, subong sang ginhimo ni apostol Pablo sa tion kag tion paagi sa paghimo sing mga tolda.​—⁠Binuhatan 18:​1-4.

15, 16. Paano ang mga payunir kag ang iban pa nga bug-os tion nga mga alagad nakabulig sa pag-uswag sang hilikuton sang Ginharian, kag ano nga pagpakamaayo ang naagom sang pila sa ila?

¹⁵ Daw ano ka daku nga bulig ang ginahatag sang mga payunir kag sang iban pa nga bug-os tion nga mga alagad sa pag-uswag sang hilikuton sang Ginharian! Ang hubon sang mga payunir nagdugang tubtob sa kataason nga 931,521 sining nagligad nga tuig. Samtang nagabantala sila adlaw-adlaw sa mga pamalay kag nagadumala sing mga pagtuon sa Biblia sa mga puluy-an sang mga tawo, nangin epektibo gid sila sa pagpaathag sang mga Kasulatan. Dugang pa, madamo ang nangin kalipikado sa pag-eskwela sa duha-ka-semana nga Eskwelahan sang Payunir nga Pag-alagad, nga nagabulig sa ila sa pagpauswag sing daku pa nga ikasarang kag kalipay sa paghimo sang hilikuton sang Dios.

¹⁶ Ang tagsa sining matutom nga mga payunir makaugyon sa mga pulong sang Isaias 50:4: “Ang Soberanong Ginuong Jehova gid naghatag sa akon sing dila sang mga tinudluan, agod nga makahibalo ako magsabat sa ginalapyo.” Madamo nga indibiduwal karon ang natak-an na sa malaut nga kalibutan sa palibot nila apang nakatigayon sila sing kaumpawan sa pulong nga ginhambal sang aton matutom nga mga payunir.​—⁠Ipaanggid ang Hulubaton 15:23; Ezequiel 9:⁠4.

Isa ka Daku nga Programa sa Pagpatindog

17. Dugang sa espirituwal nga pagpatindog, anong materyal nga pagpatindog ang nasaksihan sining nagligad nga mga tinuig?

¹⁷ Ang espirituwal nga kabuganaan sang mga Saksi ni Jehova sa bug-os nga kalibutan nagakinahanglan man sing materyal nga pag-uswag. Nangin kinahanglanon nga padakuon ang mga imprintahan, mga opisina, kag mga puluy-an Bethel kag magpatindog sing mga Kingdom Hall. Gani kinahanglan nga ang mga Saksi ni Jehova mangin mga manunukod sa pisikal nga paagi. Kaanggid nga pagpatindog ang natabo sang adlaw ni Hari Solomon. Ginpatindog ni Solomon ang templo para sa pagsimba kay Jehova suno sa “plano arkitektural . . . nga ginbugna sa iya,” kay ginhatag ini ni Jehova sa iya amay, nga si Hari David. (1 Cronica 28:​11, 12) Sa amo, wala lamang napalig-on ni Solomon ang iya mga manugpalamati paagi sa bilidhon nga mga pulong sang kaalam kundi gindumalahan man niya ang materyal nga pagtukod nga may katahom nga wala matupungi sang sekular nga kalibutan.​—⁠1 Hari 6:1; 9:​15, 17-19.

18, 19. (a) Anong nagauswag sing madasig nga mga proyekto sa pagpatindog ang ginahimo sang organisasyon ni Jehova? (b) Paano ang espiritu ni Jehova nangin dayag sa materyal subong man sa espirituwal nga pagpatindog?

¹⁸ Sa karon, ang mga Saksi ni Jehova wala nagapatindog paagi sa mga plano arkitektural nga ginbugna sang Dios, apang may espiritu sila sang Dios. Subong sang sa mga adlaw sang Israel, nagapahulag ini sa ila sa pagpatindog sa isa ka paagi nga nagapatingala sa katawhan sang kalibutan. (Zacarias 4:⁠6) Ang tion malip-ot na. Ang mga Kingdom Hall kag iban pa nga mga tinukod kinahanglanon sa walay langan. Sa iban nga mga pungsod kinaandan ang madasig napatindog nga mga Kingdom Hall. Sa nagligad nga 10 ka tuig, halimbawa, ang Canada nagreport nga 306 ka tilipunan ang napatindog, ang tagsa sini nahuman nga wala pa sa duha ka adlaw. Bangod sang madasig nga pag-uswag sang hilikuton ni Jehova sa bug-os nga kalibutan, 43 tanan ka bag-o nga tinukod sang sanga ukon mga sugpon sang sanga ang ginatukod karon ukon ginaplano. Dugang pa, malapit na mahuman sa Brook­lyn ang 30-andana nga residensial nga tinukod para sa mga isa ka libo ka boluntaryo sang Beth­el. Sa New York ­State man, sa Pat­terson, ang isa ka sentro sang pagtuon sa Biblia, ang pinakadaku nga proyekto sang Watch Tower Society halin sang una, ginapatindog nga abanse sa iskedyul.

¹⁹ Ining mga proyekto nagapadayon nga may pagkapulido kag kalidad sang trabaho nga nagapatingala sa hanas nga mga kompanya sa konstruksion sang kalibutan. Ngaa? Bangod sang daku nga amot nga ginahatag sang dedikado nga mga Saksi ni Jehova. Ang iya espiritu nagapahulag sa ila indi lamang sa paghatag sing materyal nga supurta kundi sa paghatag man sang ila tion kag kusog sing bug-os tagipusuon. Ang hanas kag debotado nga mga manugpangabudlay nagapanong sa mga duog nga ginapatindugan. Wala sing mga welga, kag wala sing pagligoy sa trabaho. Ang espiritu ni Jehova amo ang nagapahulag, subong nga ginpahulag sini anay ang mga manunukod sang tabernakulo sang panahon ni Moises kag ang mga nagpatindog sang templo sang mga adlaw ni Solomon. Ang espirituwalidad amo ang talalupangdon nga kinaiya nga ginakinahanglan sa sining mga manugpangabudlay.​—⁠Ipaanggid ang Exodo 35:​30-35; 36:​1-3; 39:​42, 43; 1 Hari 6:​11-14.

20. (a) Tubtob sa anong kasangkaron ibantala pa ang maayong balita? (b) Anong makalilipay nga paglaum ang nagahulat sa katawhan ni Jehova?

²⁰ Ginpadayon ni Solomon ang iya programa sa pagpatindog sa tapos mahuman ang templo. (2 Cronica 8:​1-6) Kon sa anong kasangkaron magauswag pa ang pagpanaksi sa karon​—⁠kag sa amo man nga tion ang pagpatindog sing mga tilipunan kag iban pa nga mga pasilidad⁠—​wala kita makahibalo. Apang, nahibaluan naton nga kon ining maayong balita sang Ginharian mabantala na tubtob sa kasangkaron nga ginasugo ni Jehova, nian ang katapusan, ang “dakung kapipit-an,” magaabot. (Mateo 24:​14, 21) Sa isa ka kalibutan nga wala na ginalaglag sang makagod nga mga tawo, ang kahimusan ni Jehova nga “bag-ong mga langit kag bag-ong duta” magadala nian sing madamo nga pagpakamaayo sa katawhan. Kabay busa nga kita ‘magkasadya kag magkalipay sing dayon sa ginatuga sang Dios,’ ginahatag ang tanan nga kadayawan sa aton Dungganon nga Manunuga!​—⁠Isaias 65:​17-19, 21, 25.

[Footnote]

Mapaathag Mo Bala?

◻ Ano ang aton mga rason sa pagkalipay sa aton Dungganon nga Manunuga?

◻ Ano nga mga pag-uswag ang ginreport sang 1992 nga tuig sang pag-alagad?

◻ Sa mga pungsod diin ang pagpanaksi ginadumilian anay, anong bugana nga mga pagpakamaayo ang ginreport?

◻ Paano ang mga pamatan-on kag mga payunir nakabulig sa pag-uswag sa organisasyon ni Jehova?

◻ Paano ang katawhan ni Jehova nangin masako sa materyal subong man sa espirituwal nga mga hilikuton sa pagpatindog?

[Kahon sa pahina 17]

Sang nagligad nga tuig kapin sa isa ka bilyon ka oras ang nahinguyang sa pagbantala kag pagpanudlo nga hilikuton

[Tsart sa pahina 12-15]

REPORT SA 1992 NGA TUIG SANG PAG-ALAGAD SANG MGA SAKSI NI JEHOVA SA BUG-OS NGA KALIBUTAN

(See bound volume)

[Piktyur sa pahina 10]

Ang linibolibo ka kandidato sa bawtismo sang nagligad nga tuig nagapamatuod sa pagpakamaayo ni Jehova sa pagbantala kag pagpanudlo nga hilikuton

[Piktyur sa pahina 16]

Madamo nga pamatan-on ang ‘nagadumdom sa ila Dungganon nga Manunuga’