Mga Pamangkot Gikan sa mga Bumalasa
Ano ang salabton sang mga Cristiano sa pagpalantang sang paghigko sa aton palibot—duta, dagat, kag hangin?
Subong mga Saksi ni Jehova, nagakabalaka gid kita sa madamong ekolohiko nga mga problema nga nagaapektar karon sa aton dutan-on nga puluy-an. Sing kapin pa sa kalabanan nga mga tawo, ginaapresyar naton nga ang duta gintuga nga mangin putli, matinlo nga puluy-an para sa himpit nga pamilya sang tawo. (Genesis 1:31; 2:15-17; Isaias 45:18) Nagpasalig man sa aton ang Dios nga iya “laglagon ang mga nagalaglag sang duta.” (Bugna 11:18) Sa amo husto lamang nga maghimo sing balanse, rasonable nga mga panikasog agod indi na pagdugangan pa ang paghigko sa aton globo nga ginahimo gihapon sang tawo. Apang, talupangda ang tinaga nga “rasonable.” Nagakaigo man sing Makasulatanhon nga mag-andam kita batok sa sobra nga kabalaka sa ekolohiko nga mga hulusayon kag mga buhat.
Bisan ang normal nga tawo nga nagakabuhi nagapatubas sing mga higko. Halimbawa, ang pagtanum, pagproseso, kag pagkaon sing mga kalan-on masami nga nagapatubas sing higko, bisan pa ang kalabanan sini nagakadunot. (Salmo 1:4; Lucas 3:17) Ang sinugba nga isda nga ginluto sang binanhaw nga si Jesus para sa iya mga disipulo mahimo gid nga nagresulta sa aso, abo, kag sa basura nga mga bukog sang isda. (Juan 21:9-13) Apang ang may kabuhi ukon wala kabuhi nga mga sistema ukon mga siklo sang duta gindesinyo sa pag-atipan sina.
Indi dapat pagkalipatan sang katawhan sang Dios ang mga butang tuhoy sa ekolohiya. May mga tikang anay nga ginpatuman si Jehova sa iya dumaan nga katawhan kon paano ihaboy ang mga higko, mga tikang nga maayo sa ekolohiya kag sa katinluan. (Deuteronomio 23:9-14) Kag sanglit nahibaluan naton ang pagtamod niya sa mga nagalaglag sang duta, indi naton dapat pagpasipakpakan ang mga butang nga mahimo naton agod mahuptan nga matinlo ang palibot. Mapakita naton ini paagi sa nagakaigo nga paghaboy sa mga basura ukon mga higko, labi na ang makahililo nga mga butang. Nagakooperar kita sa mga panikasog sa pagsiklo liwat, kag may dugang pa kita nga rason sa paghimo sini kon ginapatuman ini ni Cesar. (Roma 13:1, 5) Ang iban nga mga indibiduwal nagakalipay sa paghimo sing dugang pa nga tikang, subong sang pagpili sa paggamit sing nagakadunot nga mga produkto sa baylo sang mga butang nga magadugang sa mga bukid sang basura sa duta kag sa idalom sang kadagatan.
Apang, isa ka personal nga desisyon kon tubtob sa anong kasangkaron himuon ini sang isa ka Cristiano luwas kon ginapatuman ini sang kasuguan. Ang mga balita maathag nga nagapakita nga ang dihimpit nga mga tawo madali nga mahulog sa tugalbong sang pagpasobra. Ang laygay ni Jesus nagakaigo gid: “Mag-untat sa paghukom agod indi kamo paghukman . . . Ngaa, nian, ginamulalong mo ang puling nga yara sa mata sang imo utod, apang wala mo pagsapaka ang balayanon nga yara sa imo kaugalingon nga mata?” (Mateo 7:1, 3) Ang pagtanda sini mahimo makabulig sa aton agod indi malipatan ang iban pa importante nga mga butang.
Ang manalagna nga si Jeremias nagsulat: “Nahibaluan ko, O Jehova, nga ang dalanon sang tawo indi natungod sa iya. Indi natungod sa tawo nga nagalakat bisan ang pagtuytoy sang iya tikang.” (Jeremias 10:23) Ang pagsikway sa sining prinsipio nagdala sa katawhan sa “makahalanguyos nga mga tion nga mabudlay pakigbagayan,” subong ginapatalupangod sa 2 Timoteo 3:1-5. Kag ang ginparekord sang Dios sa Bugna 11:18 nagapamatuod nga ang mga panikasog sang tawo sa pagdula sang daku nga mga problema sang duta sa ekolohiya, lakip ang polusyon, indi magmadinalag-on. Mahimo nga may pila ka pag-uswag sa iban nga mga duog, apang ang lamang nga dayon nga solusyon nagakinahanglan sing pagpasilabot sang Dios.
Bangod sining rason ginakonsentrar naton ang mga panikasog kag manggad sa solusyon sang Dios, sa baylo nga tinguhaan nga pakanayon ang hapaw nga mga sintoma. Sa sini ginasunod naton ang huwaran ni Jesus, nga naghinguyang sang daku nga bahin sang iya ministeryo sa ‘pagpanaksi sa kamatuoran.’ (Juan 18:37) Sa baylo nga pakan-on ang kalibutan ukon buhinan ang lapnag nga mga balatian sa katilingban—lakip ang polusyon—gintudlo ni Jesus ang bug-os nga solusyon sa mga problema nga nagapaantos sa katawhan.—Juan 6:10-15; 18:36.
Samtang ang gugma sa mga isigkatawo nagapahulag sa aton nga likawan ang paghigko sa duta, atmospera, ukon tubig, padayon kita nga nagapanaksi sa kamatuoran. Nagalakip ini sang pagtudlo sa katawhan nga iaplikar ang kamatuoran sang Biblia kag sa amo malikawan nila ang pagpierdi sa ila lawas paagi sa sigarilyo, sobra nga alkohol, ukon makahalalit nga mga droga. Samtang minilyon ka bag-uhan ang nangin mga disipulo, natun-an nila ang pamatasan sang pagkatinlo kag pagkamapatugsilingon sa iban. Gani ang pagbantala nga hilikuton nakahatag sing literal nga bulig sa pagbuhin sang kabilugan nga problema sa polusyon karon. Apang kapin pa ka importante, nagatinguha ang Cristianong mga disipulo nga bag-uhon ang ila personalidad kag pamatasan karon agod mangin bagay sila sa matinlo nga Paraiso nga duta nga sa dili madugay iaman sang Dios para sa iya matuod nga mga sumilimba.