Pagsapo sing Maayo nga Solusyon

ANG Pulong sang Dios, ang Biblia, nagahambal tuhoy sa tion nga malubad na sang langitnon nga panguluhan sang Dios ang tanan nga problema sang katawhan, nga nagalakip karon sang problema sa polusyon bangod sa mga awto. Makahatag bala ining Mesianikong Ginharian, nga gintudlo sa madamo nga ipangamuyo, sing maayong solusyon paagi sa paghimo sing awto nga wala gid sing polusyon? Ukon matigayon bala ang maayong solusyon paagi sa pagdula sa tanan nga salakyan sa duta? Sanglit ang Biblia wala nagahatag sa aton sing pat-od nga sabat, wala kita sing mahimo kundi maghulat lamang kag tan-awon ang matabo.​—⁠Mateo 6:​9, 10.

Apang amo ini ang mapat-od naton: Indi pagtugutan sang panguluhan sang Dios ang polusyon nga palaw-ayon ang katahom sang tinuga sa napasag-uli nga Paraiso nga paluntaron sang Ginharian.​—⁠Isaias 35:​1, 2, 7; 65:​17-25.

Sanglit ang mga tawo nga nagasunod sa Pulong sang Dios ginahanas na para sa kabuhi sa isa ka bag-ong kalibutan nga wala sing polusyon, ano ang ginabatyag nila tuhoy sa paggamit sing mga awto karon? Ang Awake! sang Hunyo 22, 1987, nagbinagbinag sang tema nga, “Ano ang Nagakatabo sa Aton Kagulangan?” Ginreport sini nga ang iban nga mga sientipiko nagapati nga may kaangtanan ang mga pol­lutant sa hangin nga nagahalin sa aso sang salakyan kag ang nagatagumatayon nga mga kagulangan. Bangod sini nagsulat ang isa ka nagakabalaka nga bumalasa sa Watchtower Society nga nagapamangkot kon bala bangod sining katunayan nagakaigo para sa mga Cristiano ang magmaneho sing mga awto. Nagpalibog sia kon bala ang paghimo sini mangin pagpakita sing dipagtahod sa mga tinuga ni Jehova.

Ang iya sulat ginsabat, sa bahin, subong sang masunod: “Matutom nga ginasunod sang mga Saksi ni Jehova ang mga regulasyon para sa palibot nga ginapatuman sang mga awtoridad sang gobierno agod buhinan ang polusyon. (Roma 13:​1, 7; Tito 3:⁠1) Yara sa indibiduwal kon bala maghimo sia sing mga tikang nga labaw sa ginapatuman sang gobierno. Kon ang isa mamat-od nga indi na magmaneho sing awto, desisyon niya ina. Apang, ginpakita sang artikulo sa Awake! kon ano ang ginabatyag sang iban nga mga tawo, ­paagi sa pagsiling sa pahina 8: ‘Madamo ang nagahimo sing praktikal nga mga tikang agod buhinan ang polusyon sa hangin tubtob sa makatarunganon nga mahimo nila. Mahinay sila kon magpadalagan, ginabuhinan ang paglakbay, nagaangkas sa iban, nagagamit sing walay tingga nga gasolina, kag nagatuman sang mga regulasyon batok sa polusyon nga ginapatuman sang gobierno.’ ”

Cristianong Pagkabalanse

Ini nga sabat nagpakita sing Cristianong pagkabalanse. Dapat dumdumon nga indi lamang mga awto ang nagatuga sing polusyon. Ang mga eroplano kag mga tren​—⁠sa katunayan, ang kalabanan nga modernong porma sang transportasyon⁠—​nagatuga man sini. Apang ini nga mga porma sang transportasyon wala ginhimo sa tuyo nga magtuga sing polusyon. Ang polusyon isa ka lamita nga epekto, makapasubo apang bangod sang limitado nga ihibalo kag dihimpit nga mga panimuot.

Ginpaathag sang Ang Lalantawan sang Enero 1, 1993, pahina 31, ini nga butang, nga nagasiling: “Subong mga Saksi ni Jehova, nagakabalaka gid kita sa madamong ekolohiko nga mga problema nga nagaapektar karon sa aton dutan-on nga puluy-an. Sing kapin pa sa kalabanan nga mga tawo, ginaapresyar naton nga ang duta gintuga nga mangin putli, matinlo nga puluy-an para sa himpit nga pamilya sang tawo. (Genesis 1:31; 2:​15-17; Isaias 45:18) . . . Sa amo husto lamang nga maghimo sing balanse, rasonable nga mga panikasog agod indi na pagdugangan pa ang paghigko sa aton globo nga ginahimo gihapon sang tawo. Apang, talupangda ang tinaga nga ‘rasonable.’ . . . Indi dapat pagkalipatan sang katawhan sang Dios ang mga butang tuhoy sa ekolohiya. May mga tikang anay nga ginpatuman si Jehova sa iya dumaan nga katawhan kon paano ihaboy ang mga higko, mga tikang nga maayo sa ekolohiya kag sa katinluan. (Deuteronomio 23:​9-14) Kag sanglit nahibaluan naton ang pagtamod niya sa mga nagalaglag sang duta, indi naton dapat pagpasipakpakan ang mga butang nga mahimo naton agod mahuptan nga matinlo ang palibot. . . . Apang, isa ka personal nga desisyon kon tubtob sa anong kasangkaron himuon ini sang isa ka Cristiano luwas kon ginapatuman ini sang kasuguan. . . . Ang dihimpit nga mga tawo madali nga mahulog sa tugalbong sang pagpasobra. . . . Ang mga panikasog sang tawo sa pagdula sang daku nga mga problema sang duta sa ekolohiya, lakip ang polusyon, indi magmadinalag-on. Mahimo nga may pila ka pag-uswag sa iban nga mga duog, apang ang lamang nga dayon nga solusyon nagakinahanglan sing pagpasilabot sang Dios. Bangod sining rason ginakonsentrar naton ang mga panikasog kag manggad sa solusyon sang Dios, sa baylo nga tinguhaan nga pakanayon ang hapaw nga mga sintoma.”

Balanse ang mga Cristiano samtang ginatuman nila ang mga prinsipio sang Biblia, ginatandaan ang sugo sang Dios nga nabaton nila nga ibantala ang mensahe sang Ginharian sang Dios sa bug-os nga kalibutan. (Mateo 24:14) Wala na sing kapin pa ka importante ukon kapin ka hilingagawon! Kon ang modernong paagi sang transportasyon kag komunikasyon makabulig sa mga Cristiano sa pagtuman sining obligasyon, may rason gid sila nga gamiton ini. Sa amo man nga tion, ginalikawan nila ang dinagakaigo ukon hungod nga pagtuga sing polusyon. Sa amo, matinlo ang ila konsiensia sa atubangan sang tawo kag sang Dios.

Gani bisan pa indi naton karon mahibaluan kon paano gid sa ulihi malubad ang problema sa polusyon kag awto, nahibaluan naton nga malubad gid ini. Sa katunayan, ang maayo nga solusyon malapit na.

[Kahon sa pahina 9]

Paglubad sa Polusyon

• Paglakat ukon pagbisikleta kon mahimo

• Pag-angkasanay

• Regular nga pagpaserbisyo sa mga salakyan

• Pagpili sa matinlo nga gatong

• Paglikaw sa dikinahanglanon nga paglakbay

• Haganhagan apang dalayon nga kadasigon sa pagmaneho

• Paggamit sing pampubliko nga transportasyon kon mahimo kag kon nagakaigo

• Pagpatay sa makina sa baylo nga pabay-an ini nga nagaandar kon nagadulog ang salakyan sa malawig nga tion