“Daw Indi Gid Kami Makahambalanay Lamang!”
SI Michael, nga isa ka abogado, dapat nga mangin isa ka mapagsik nga komunikador. Kinahanglan ini sa iya trabaho. Apang pagligad sang 16 ka tuig nga pag-asawahay, napilitan si Michael sa pagbaton nga sang pagpauli niya sa iya asawa, nga si Adrian, ang iya kalantip sa pagpakighambal daw wala na. “Nagareklamuhay, nagabasulay, nagapabatibatiay,” hinumdom ni Michael, “pirme lang kami nagakamog ni Adrian, kag sa banta ko indi namon yadto maagwanta. Nagpalibog ako kon bala amo sadto ang pag-asawahay, ang walay untat nga pagreklamuhay kag pagpainitay. Kon mangin amo sadto ang amon kabuhi tubtob san-o, indi na ako—wala ako nagalahog. Indi ko maagwanta ang 20, 30, 40 ka tuig sang amo sadto nga sahi sang walay untat nga pagpainitay kag tension.”
Indi tumalagsahon kay Michael kag kay Adrian ang subong sini nga mga sentimiento. Nagakatabo ini sa madamo nga mag-asawa nga wala sing nahimo sa ila relasyon kundi ang mag-away, mag-untat sa pag-away kag dayon mag-away naman liwat. Ang pinakasimple nga mga paghambalanay nagadul-ong sa pagsinggitanay. “Makabati” sila sing mga butang nga wala ginahambal. Nagahambal sila sing mga butang nga wala ginahungod. Nagaatakehay sila kag nagasumbunganay, dayon indi magsapakay nga malain ang buot sa isa kag isa. Wala sila nagabulagay, apang indi gid sila “isa ka unod.” (Genesis 2:24) Ang ila relasyon wala sing pasingadtuan. Ang pag-isol magakahulugan sing pagbulagay; ang pag-abante magakahulugan sing pag-enkwentrohanay. Agod malikawan ang kasakit sang duha ka butang, nagahalong na lang sila nga indi masaklaw ang isa kag isa sa ila.
Ang subong sina nga mga mag-asawa kinahanglan ‘magtigayon sing malantipon nga tuytoy’ sa ila pag-asawahay. (Hulubaton 1:5) Ini nga tuytoy sarang matigayon sa Pulong sang Dios, ang Biblia. Ang ikaduha nga sulat ni Pablo kay Timoteo nagapalig-on nga ang Biblia “mapuslanon para sa pagpanudlo, sa pagsabdong, sa paghusay sang mga butang.” (2 Timoteo 3:16) Amo sini ang nagakatabo kon tuhoy sa pagkay-o sang diperensia sa komunikasyon sang mag-asawa, subong sang makita pa naton.