Madinalag-on nga Paglandas sa Alkoholismo

“Sa tion sang trabaho, sa mga alas dies sang aga, nagasugod ako sa paghunahuna sa pag-inom. Pagkaalas dose nagaguwa ako agod makainom sing isa ukon duha ka baso. Pagkaalas tres nagapalangurog ang akon kalawasan. Ginakalangkagan ko ang oras nga matapos na ang trabaho agod makainom ako liwat. Sa masami nagainom ako sing pila pa bag-o magpauli. Pagkaalas siete daw mainom uli ako. Nagainom ako, nga nagakatulugan sa bangko, nagapangihi sa akon delargo, kag basa sa akon ihi tubtob sa aga. Himua ini kag pamuara ini sa 7 ka adlaw sa isa ka semana; pamuara ina sa 52 ka semana sa isa ka tuig; pamuara ina sa 29 ka tuig.”

INI nga tawo isa ka alkoholiko. Wala sia nagaisahanon. Minilyon sa bug-os nga kalibutan ang nagapakigsumpong sa sining makamamatay nga kahimtangan nga, suno kay Dr. Vernon E. Johnson, “nagadalahig sa bug-os nga pagkatawo: sa pisikal, mental, sikolohiko, kag espirituwal.”⁠a

Madamong eksperto ang nagasiling nga ang alkoholismo indi mahimo mabulong kundi mahimo ini matapna paagi sa isa ka programa sang bug-os kabuhi nga paglikaw sa alkohol. Makatarunganon ini nga kinahanglanon, kay ang alkohol indi kinahanglanon sa kabuhi. Sa katunayan, ang sayop nga paggamit sing alkohol wala nagapahamuot sa Dios. (1 Corinto 6:​9, 10) Maayo pa ang magsulod sa bag-ong kalibutan sang Dios nga gindingutan sing alkohol sangsa magpadala sa handum para sa sini kag mawasi ang kabuhi nga walay katapusan.​—⁠Mateo 5:​29, 30. pagpanginpadlos​—⁠kag pagpabilin nga hilway⁠—​gikan sa pag-abuso sa alkohol masami nga isa ka makabalang-aw nga hangkat. (Ipaanggid ang Roma 7:​21-24.) Ano ang makabulig? Ihatag namon ang pila ka direkta nga laygay. Bisan pa wala ikaw nagainom sing alkohol, ini nga laygay impormatibo kag makabulig sa imo sa pagbulig sa pila ka abyan ukon himata nga nagapakigsumpong sa alkoholismo.

Isa ka Bunayag nga Pag-usisa sa Imo Kaugalingon

Ang isa sang pinakadaku nga sablag nga pagalandason amo ang pagpanghiwala sa kamatuoran nga ikaw isa ka alkoholiko. Ang pagpanghiwala isa ka dagway sang pagkadibunayag. Pagpangatarungan ini nga may katuyuan: amligan ang imo kahilwayan sa pag-inom. ‘Indi ako amo sina kalain,’ mahimo ipangatarungan mo. ‘May pamilya pa ako. May obra pa ako.’ Sing labing importante, may alkohol pa gihapon ikaw.

Ang pagpanghiwala mahimo magapugong sa imo sa pagpamati sa mga abyan nga luyag magbulig sa imo. Napanilagan ni Rob­ert nga ang ikaduha nga amay sang iya asawa may dimaayo nga batasan sa pag-inom kag dimatinahuron nga paggawi. “Pagligad sang pila ka adlaw, ginsukmaan ko sia,” siling ni Rob­ert, “ginpamangkot sia kon nagapati sia nga ang iya pag-inom may epekto sa iya paggawi.” Ang resulta? “Nasumalang ko ang bug-os nga pagpanghiwala, kag ang mga komento subong sang, ‘Wala ka sing pamatuod’ kag, ‘Wala ka makahibalo kon ano ang ginabatyag ko.’ ”

Kon ginsugilanon ka sang isa ka katapo sang pamilya ukon isa ka abyan nga nabalaka sa imo pag-inom, usisaa kag bunayag nga pamangkuta ang imo kaugalingon. (Hulubaton 8:33) Mahimo bala ikaw mabuhi nga wala sing alkohol sa bug-os nga semana, sa bug-os nga bulan, ukon sa mga pila ka bulan? Kon indi, ngaa indi? Indi mangin kaangay sang tawo nga nagadaya sang iya kaugalingon paagi sa sayop nga pangatarungan. Si Santiago nagasiling: “Kaangay sia sa tawo nga nagatan-aw sang iya kinaugali nga nawong sa salaming. Ginatan-aw niya ang iya kaugalingon, kag nagahalin kag sa gilayon nalimot kon ano nga sahi sang tawo sia.”​—⁠Santiago 1:​22-25.

Bisan sa tapos magsugod ang pag-ayo, dapat gihapon ikaw mag-andam sa pagpanghiwala. Ang libro nga Willpower’s Not Enough nagapaathag: “Ang bag-o lang nagalikaw sa alkohol nga tawo mahimo magapati sing sayop nga bangod nauntat niya ang iya pag-inom sa makadali​—⁠ayhan sa una nga tion⁠—​nag-ayo na sia.” Amo ini ang pinakamakusog nga bahin sang nagiyan nga panghunahuna, kag amo ini ang unang tikang nga masulay liwat. Agod imo mabatuan ina nga pagpanghiwala, indi ka dapat mag-isahanon.

Mangayo sing Bulig

Nakahibalo nga indi niya maaway ang alkoholismo sing isahanon, isa ka tawo nga tawgon naton si Leo ang nangayo sing propesyunal nga bulig. Pagkatapos sang isa ka dag-on sang maid-id nga pagbulong, yara na sia sa dalan nga mag-ayo. Nagapati si Leo nga ang balor sang eksperto nga bulig dapat hatagan sing pinasahi nga patugsiling.⁠b Kon ina nga bulig matigayon sing lokal, mahimo ka mamat-od nga himuslan ini.

Apang, dapat mo mahibaluan nga may kapin pa sa pag-ayo sangsa paglikaw lamang sa alkohol. Sa ubos sang alkoholismo mahimo nga may mas madalom pa nga mga hulusayon nga kinahanglan atubangon mo. Ang indi pagsapak sa sini mahimo nga makatalagam. Si Dr. Char­lotte Davis Kasl nagsulat: “Nainterbyu ko ang mga tawo nga nakapabulong bangod sang sayop nga paggamit sang makapagiyan nga mga butang sing tubtob sa katorse ka beses bangod ang pangunang mga problema sang pag-abuso, pagsalig, kag pagpatumbaya wala mabulong.”

Napamatud-an ini ni Dennis. “Isa ako ka alkoholiko nga wala nagakahubog nga madamo gihapon sing mga problema,” sulat niya. “Indi bastante ang mag-untat sa pag-inom. Dapat ko tan-awon ang akon nagligad, usisaon ang mga leksion sang akon pagkabata, hangpon kon paano ini nag-apektar sa akon, kag himuon ang pila ka pagbalhin sa akon paggawi.”

Sa kaanggid, dapat tan-awon sing maayo ni Leo ang iya kaugalingon agod mag-ayo. “Isa ako ka maimon gid kag masingki nga tawo,” siling niya. “Nagabulubalhin ako sa ulot sang manubo nga pagtahod sa kaugalingon kag paghanduraw sing kabantugan.” Gin-aplikar ni Leo ang laygay sang Biblia sa Efeso 4:22: “Ubaha ninyo ang daan nga personalidad nga iya sang inyo una nga paggawi.” Huo, ang “inyo una nga paggawi” may makusog nga impluwensia sa inyo personalidad. Subong nga ang plaster nagasunod sa dihunan, ang imo personalidad sa bahin gindihon man sang imo una nga paggawi. Kon ang malain nga paggawi makuha, ano ang mabilin? Personalidad nga gindihon ayhan sa sulod sang madamong tinuig nga panag-on. Busa, ang pag-ayo dapat maglakip sang pagbalhin sang daan nga personalidad nga iya sang imo una nga paggawi.

Magpasad sing Kaangtanan sa Dios

Ang pag-ayo ni Leo nagkinahanglan man sang pagpalambo sing personal nga kaangtanan upod sa Dios. “Ang pagtuon nga magsalig kay Jehova sing bug-os nagbalhin sang akon panimuot, paggawi, kag pagtamod,” siling niya.

Apang, nagakaigo ang mag-andam. Ang bisan anong kaangtanan​—⁠sa mga tawo ukon upod sa Dios⁠—​nagakinahanglan sing pagkatampad, pagkabunayag, kag pagsalig. Amo gid ini ang mga kinaiya nga ginakaon sang alkoholismo. Mahimo ini mapalambo, apang nagakinahanglan ini sing tion.

Subong alkoholiko, ayhan wala mo mahibaluan kon kaangay sang ano batyagon ang suod nga kaangtanan. Ayhan wala mo pa ini maagihi. Gani magpailob. Indi magpadasudaso sa sining tikang, nagapaabot nga ang kaangtanan sa Dios magamateryalisar subong awtomatiko nga resulta sang paglikaw sa alkohol. Manikasog nga hangpon ang Dios kag ang iya mga kinaiya. Mamalandong sing tayuyon, ayhan nagabasa sing maayo sang mga salmo sa Biblia nga nagapabutyag sing tudok, mainapresyahon nga mga balatyagon tuhoy kay Jehova kag sa iya mga dalanon.⁠c

“Gahom nga Labaw sa Kinaandan”

Ang masinaligon, makompiansahon nga kaangtanan upod sa Dios mahimo nga may makusog nga impluwensia sa imo. Si Jehova magasakdag sang imo mga panikasog sa pag-ayo. (Ipaanggid ang Salmo 51:​10-12; 145:14.) Mahimo ikaw makapalapit sa iya sa hanuot nga pangamuyo bisan san-o, nagasalig nga hatagan niya ikaw sing “gahom nga labaw sa kinaandan.”​—⁠2 Corinto 4:7; Filipos 4:​6, 7.

Nahibaluan sang Manunuga ang imo pagkahuman sing labi pa sangsa kay bisan sin-o. (Salmo 103:14) Ang tawhanon nga mga manuglaygay, nga nagasalig sa tawhanon nga mga kaalam, mahimo makabulig; apang labi pa gid nga makabulig sa imo ang Manunuga sang tawo sa sining pagpakig-away! (Isaias 41:10; 48:​17, 18) Nag-aman sia sing mahigugmaon nga pagsakdag sa sulod sang Cristianong kongregasyon.

Isa ka Suporta nga Sistema

Ang hamtong sa espirituwal nga mga gulang sa Cristianong kongregasyon mahimo nga mangin isa ka dakung ginhalinan sang bulig. Ang pila sa ila mahimo nga lantip sa patag sang medisina ukon kapagros sang hunahuna, apang nahibaluan nila kag nagasalig sila sa Pulong kag mga prinsipio sang Dios. Mapamatud-an sila nga “subong sang palalipdan sa hangin kag palanaguan sa unos, subong sang mga ilig sang tubig sa duog nga kigas, subong sang landong sang daku nga igang sa duta nga makalalapyo.” (Isaias 32:⁠2) Himusli ang ila bulig.⁠d

Sa pagkamatuod, inang Cristianong mga gulang, upod sang iban pa nga mga katapo kag mga abyan sang pamilya, indi magataming sa imo gikan sa mga resulta sang imo kaugalingon nga mga buhat. Ang publikasyon nga Coming Off Drink nagapaathag: “Ang ital-ital nga ingrediente sang pagbulong amo ang pagsukma sa mga alkoholiko sang makahalalit nga mga resulta sang pagkagiyan kag pagpapanabat sa ila bangod sang ila mismo pagginawi.” Gani mangin malulo sila apang prangka, magapalig-on sa imo sa pag-atubang sang kamatuoran kag sa pagsunod sa bisan anong pagbulong kag paggawi nga kinahanglanon agod magamadinalag-on ka batok sa alkoholismo.

Ang Pag-ayo Responsabilidad Mo

Samtang nagabenepisyo ikaw sa suporta sang iban, dapat mo mahibaluan nga wala sing tawo ukon espiritu ang makapilit sang imo pag-ayo. Hilway ikaw sa pagpili sang imo paggawi. Sa ulihi ang imo pag-ayo imo responsabilidad. (Ipaanggid ang Genesis 4:7; Deuteronomio 30:​19, 20; Filipos 2:12.) Batuna ina nga responsabilidad, kag si Jehova magapakamaayo sa imo. Ginapasalig kita sa 1 Corinto 10:13: “Walay pagsulay nga nakaabot sa inyo nga indi masarangan sang tawo. Apang ang Dios matutom, kag indi magtugot nga sulayon kamo labaw sa inyo masarangan, kundi kaupod sang pagsulay magahatag man sing lulutsan agod nga makasarang kamo sa pagbatas.” Busa, magkalipay​—⁠mahimo mo malandas sing madinalag-on ang alkoholismo.

[Mga footnote]

[Kahon sa pahina 24]

Ayhan nagaantos ikaw sing pagpaubos kag kasubo nga dulot sang ­alkoholismo. Kon amo, indi madulaan sing paglaum. Matigayon ang bulig.

[Kahon sa pahina 26]

KON MASULAY KA LIWAT

“Ang paghanda kon matabo nga masulay ka liwat sa pag-inom kaanggid sa paghanda kon matabo nga may sunog,” siling sang libro nga Willpower’s Not Enough. “Wala ini nagakahulugan nga ginapaabot mo ang sunog kundi nga handa ikaw sa paghimo sing responsable nga buhat kon matabo ini.” Kon masulay ka liwat:

□ Mangamuyo kay Jehova. Makasalig ka nga nahangpan niya ang imo problema kag luyag niya makabulig.​—⁠Salmo 103:14; Isaias 41:⁠10.

□ Magtu-ad sa isa ka Cristianong gulang, nakapamat-od antes kon sin-o ang sugilanunon mo kon magabangon ang kinahanglanon. Mangin bunayag sa kon ano ang natabo, kag mamati sing maayo sa iya Makasulatanhon nga laygay.

□ Mag-andam nga indi madulaan sing paglaum. Ang pagkangil-ad sa kaugalingon magapahilapit lamang sa imo sa bug-os nga pagbalik, gani tamda sing nagakaigo ang imo sayop. Wala ini nagakahulugan nga bangod napierde ka sa isa ka enkwentro napierde ka na sa inaway. Kon ang isa ka manugdalagan sa mara­thon madasma, wala sia nagabalik sa panugod; nagatindog sia kag nagapadayon sa palumba. Amo man ini ang himua sa imo pag-ayo. Nagadalagan gihapon ikaw. Ang mga senemana, binulan, ukon tinuig nga paglikaw sa alkohol yara gihapon.

[Piktyur sa pahina 25]

Batui ang pagpanghiwala paagi sa pag-usisa, tampad nga pagpamangkot sa imo kaugalingon