Ang Problema nga Pagtuon sa Paghulat

ANG pagtuon sa paghulat sa mga butang nga luyag naton ayhan amo ang isa sang pinakamabudlay nga leksion nga kinahanglan naton batunon nga mga tawo. Ang magagmay nga kabataan kinaugali na nga dimapailubon. Ano man ang makita sang ila mata, luyag nila, kag luyag nila ini karon gid! Apang subong sang nahibal-an mo gikan sa eksperiensia, isa ka katunayan sa kabuhi nga indi tanan nga maluyagan mahimo maagom. Bisan tuhoy sa makatarunganon nga mga luyag, dapat kita magtuon sa paghulat sa nagakaigo nga tion nga mapaayawan ini. Madamo ang nakatuon sini nga leksion; ang iban wala gid makatuon.

Ang mga tawo nga luyag makatigayon sing kahamuot sang Dios may partikular nga mga rason sa pagtuon nga maghulat. Si Jeremias, ang alagad ni Jehova antes sang panahon sang mga Cristiano, nagpadaku sini: “Maayo nga ang tawo maghulat, bisan sing hipos, sang pagluwas ni Jehova.” Sang ulihi, ang Cristianong disipulo nga si Santiago nagsiling: “Busa, mga kauturan, magpailob kamo tubtob sa presensia sang Ginuo.”​—⁠Panalabiton 3:26; Santiago 5:⁠7.

Si Jehova may yara kaugalingon nga orasan para sa pagtapos sang balaan nga mga katuyuan. Kon indi kita makahulat tubtob sa iya natalana nga tion sa paghimo sing pila ka butang, mangin dinaayawan kag dikontento kita, nga magapugong sang kasadya. Kon wala sing kasadya ang alagad sang Dios magaluya sa espirituwal, subong sang ginsiling ni Nehemias sa iya mga kasimanwa: “Ang kasadya sa GINUO amo ang inyo kusog.”​—⁠Nehemias 8:​10, The New English Bible.

Ang Kaalam sang Pagtuon sa Paghulat

Isa ka kinaugali nga handum sang diminyo nga mga tawo ang magminyo kag sang wala sing anak nga mga mag-asawa ang magpamilya. Dugang pa, wala sing malain sa paghandum nga mapaayawan ang nagakaigo nga materyal nga mga kinahanglanon ukon mga luyag. Walay sapayan, bangod sang pagpati nga ang mga adlaw sining sistema sang mga butang matapos sa dili madugay kag nga sa nagapakari nga bag-ong sistema ‘humlaron [sang Dios] ang iya kamot kag busgon ang handum sang tagsa ka butang nga buhi,’ madamong mga Cristiano ang namat-od sa paghulat nga mabusog ang pila sining mga handum sa mas nagakaigo nga tion.​—⁠Salmo 145:⁠16.

Apang, ang mga tawo nga wala sining malig-on sing sadsaran nga Cristianong paglaum, indi makakita sing rason sa pagpaisol. Bangod kulang sing pagtuo kay Jehova, nga sa iya nagagikan “ang tagsa ka maayong hatag kag ang tagsa ka dulot nga himpit,” ginapangduhaduhaan nila ang kaalam sang paghulat sa palaabuton nga ginapangduhaduhaan nila nga magaabot pa. Nagakabuhi sila sa pilosopiya: “Magkaon kita kag mag-inom, kay buwas mapatay kita.”​—⁠Santiago 1:17; 1 Corinto 15:32; Isaias 22:⁠13.

Sa nagatin-ad nga mga pungsod ang kalibutan sang pasayod nagahingalit sa maathag nga huyog sa gilayon nga pagpaayaw sa kaugalingon. Ang mga tawo ginapalig-on nga pagustuhan ang ila kaugalingon. Ginapapati kita sang komersio nga ang modernong mga kasulhayan kinahanglanon gid. Ngaa abi indi ini tigayunon, pangatarungan sini, labi na kon ginapaposible sang mga credit card, hulugan, kag “buy now​—⁠pay later” nga mga padugi nga matigayon mo ini tanan kag matigayon ini karon gid? Isa pa, ‘Takus ka sa labing maayo; magmabuot ka sa imo kaugalingon! Dumduma, aguma ini karon ukon ayhan indi na gid!’ Amo ang ginasiling sang popular nga mga islogan.

Samtang, tignapulo ka minilyon ka tawo sa imol nga mga pungsod ang nagapangabuhi sing hawothawot​—⁠ayhan sing kubos pa. May iban pa bala nga butang nga nagapatalupangod sang pagkadihimpit kag pagkadimakatarunganon sang mga sistema sa politika kag ekonomiya sang tawo?

Ang kaalam sa pagtuon sa paghulat makita bangod ang minilyon ka tawo nga indi makahulat​—⁠ukon sa dimagkubos wala sing nakita nga rason sa paghulat⁠—​ang nalubong sa utang bangod sa pagpaayaw sa gilayon nga mga luyag. Ang wala ginapaabot nga mga sirkunstansia, subong sang balatian ukon pagkawalay palamugnan, mahimo magkahulugan sing kapahamakan. Ang Aleman nga pamantalaan nga Frankfurter Allgemeine Zeitung nagpaathag kon ngaa isa ka milyon ka tawo kuno sa Alemanya ang wala sing puluy-an: “Sa kinaandan, ang pagkawalay puluy-an masami ginaunahan sang pagkawalay palamugnan ukon sobra nga kautangan.”

Bangod indi makabayad, masubo nga nadula sang madamo sinang makaluluoy nga mga indibiduwal ang ila puluy-an kag mga pagkabutang. Sa masami, ang dugang nga kahuol nagadala sing tension sa pamilya. Ang mahuyang nga mga pag-asawahay nagakabungkag. Ang mga pag-atake sang kapung-aw kag iban pa nga mga balatian nangin kinaandan na. Sa bahin sang mga Cristiano, ang espirituwalidad mahimo nga mahalitan, nga nagadul-ong sa sayop nga panghunahuna kag dinagakaigo nga paggawi. Ang mga tawo nga nagsugod paagi sa dimaalamon nga paghandum sang tanan nga butang halos nawad-an sang ulihi.

Para sa Madamo, Isa ka Bag-ong Hangkat

Gin-athag ni Jesus nga dapat kita mag-andam nga ang “mga kabalaka sining sistema sang mga butang kag ang malimbungon nga gahom sang manggad kag ang kaibog sa iban nga mga butang [wala] nagasulod kag nagalumos sang pulong.” (Marcos 4:19) Dapat naton pirme dumdumon nga wala sing politikal nga sistema ang madinalag-on nga nakadula sang mga kabalaka, lakip ang pang-ekonomiya, nga ginpamulong ni Jesus.

Ang Komunismo nga ginsikway karon sang mga kapungsuran sa Sidlangan nga Europa nagtinguha sa pag-alangay sang mga butang paagi sa kontrolado sang Estado nga ekonomiya. Kabaliskaran sa sistema sang hilway nga pagnegosyo, ang nagligad nga mga sistema naghatag sa mga indibiduwal sa sadtong kadutaan sing pila ka kalig-unan sa pangabuhi nga masunson nga wala mahatag sang kapitalismo. Apang, ang mga kabalaka nga ginpamulong ni Jesus nagluntad sa dagway sang mga kakulangan sing mga butang nga direkta nga nagapaayaw sa tawhanon nga mga luyag kag pagbuhin sa personal nga kahilwayan.

Sa karon, madamo sa sadtong mga pungsod ang nagapakilala sang market economies nga nasandig sa kahigayunan sang mga konsumidor sa pagbakal kag sang mga manugpatikang sa pagbaligya, busa nagahatag sa ila mga banwahanon sing bag-o nga hangkat. Ang isa ka balita sining karon lang nagsiling: “Ang pagkawalay hinalung-ong ginaupdan sang handum nga malab-ot sa gilayon ang talaksan sa pagkonsumo sang katundan.” Agod matigayon ini “madamo nga tawo sa bag-ong Länder sa sidlangan nga Alemanya ang naanod sa alimpulos sang kautangan.” Ang report nagadugang: “Pagkatapos sang naunang daku nga kasadya bangod sang bag-ong mga kahilwayan sa ekonomiya ang kahadlok kag pagkawalay paglaum nagalapnag karon.” Ang sistema nga komunismo nangin kapitalismo, apang nagapabilin gihapon ang kabalaka.

Ang daku pa nga kahilwayan sa politika kag ekonomiya nagbukas sing bag-ong mga posibilidad para sa ikaayo sang ekonomiya. Gani, madamong indibiduwal ang mahimo masulay nga binagbinagon sing maayo ang ideya tuhoy sa pagsugod sing kaugalingon nila nga negosyo ukon pagsaylo sa iban nga pungsod nga may mas maayo nga mga kahigayunan sa pagpamugon.

Ang mga desisyon kaangay sini personal nga butang. Indi malain para sa isa ka Cristiano ang handumon nga mag-uswag ang iya pangabuhi. Ayhan ginapahulag sia sang handum nga maatipan ang iya pamilya, nakahibalo nga “kon ang bisan sin-o wala nagasakdag sang iya mga himata, labi na gid sang iya kaugalingon nga panimalay, napanghiwala niya ang pagtuo kag malain pa sa tawo nga wala sing pagtuo.”​—⁠1 Timoteo 5:⁠8.

Busa, dinagakaigo nga mulayon ang desisyon sang iban. Sa amo man nga tion, dapat dumdumon sang mga Cristiano nga indi maalamon ang magtinguha nga pahaganhaganon ang mga problema sa pangabuhi paagi sa sobra nga pagpangutang nga mahimo magsiod sa ila. Sayop man ang magtinguha nga pahaganhaganon ang mga problema sa pangabuhi sa paagi nga mapatumbayaan ang espirituwal nga mga obligasyon kag mga kaayuhan.

Pagtuon Gikan sa Iban

Mga tinuig pagkatapos sang Inaway Kalibutanon II, linibolibo ka Aleman ang nag-emigrar halin sa nahalitan sing daku sang inaway nga Europa pakadto sa iban nga mga pungsod, ilabi na sa Aus­tra­lia kag Can­a­da. Busa napauswag sang madamo ang ila pangabuhi, apang wala sing isa sa ila ang bug-os nga nakalikaw sa mga kabalaka sa pangabuhi nga ginpamulong ni Jesus. Ang paglubad sa mga problema sa pangabuhi kon kaisa nagtuga sing bag-ong mga problema​—⁠kahidlaw, bag-o nga hambal, pagkaanad sa bag-o nga kalan-on, tuhay nga mga kinabatasan, pagpakigbagay sa bag-ong mga abyan, ukon paglandas sa magkatuhay nga mga panimuot.

Ang iban sining mga emigrante mga Saksi ni Jehova. Sing dalayawon, ang kalabanan sa ila nagdumili sa pagtugot sa mga problema nga pinasahi sa pag-emigrar nga maglumos sang ila espirituwalidad. Apang may mga eksepsion. Ang iban nangin biktima sang malimbungon nga gahom sang manggad. Ang ila teokratikong pag-uswag wala magdungan sa pag-ayoayo sang ila pangabuhi.

Pat-od gid nga nagailustrar ini sang kaalam sang pag-usisa sing maayo sang aton kahimtangan antes maghimo sing ayhan dimaalamon nga mga desisyon. Ang materyalistiko nga mga huyog magapahinay sa aton sa indi na gid maliwat pa nga hilikuton sang paghimo sing disipulo nga gintangdo sa mga Cristiano nga himuon. Matuod ini bisan diin man kita nagapuyo, kay wala sing pungsod nga ang mga banwahanon sini hilway sa mga kabalaka sang pangabuhi.

Pakig-away sang Maayong Pag-away

Si Pablo naglaygay kay Timoteo: “Tinguhaa ang pagkamatarong, diosnon nga debosyon, pagtuo, gugma, pagbatas, pagkalulo. Pakig-away sang maayong pag-away sang pagtuo, panguyat sing hugot sa kabuhi nga walay katapusan nga sa sini gintawag ka.” Sa mga Cristiano sa Corinto sia nagsiling: “Magpakalig-on kamo, nga dimationg, nga nagabugana gihapon sa buluhaton sang Ginuo.”​—⁠1 Timoteo 6:​11, 12; 1 Corinto 15:⁠58.

Ang pagsunod sining maayo nga laygay amo ang labing maayo nga paagi sa pagbato sa materyalismo sing madinalag-on, kag madamo gid matuod ang hilimuon sang isa ka Cristiano! Sa iban nga mga pungsod diin pila lamang ang mga manugbantala sang Ginharian, madamo nga katawhan ang may limitado lamang nga paagi sa paghibalo sang kamatuoran. Si Jesus sibu nga nagtagna: “Ang alanyon bugana, apang pila lamang ang mga mangangani.”​—⁠Mateo 9:⁠37.

Sa baylo nga tugutan ang mga kabalaka sa pangabuhi sa sining mga pungsod nga mag-upang sa ila gikan sa espirituwal nga hilikuton karon, ginahimuslan sang mga Saksi ni Jehova ang kahimtangan paagi sa paggamit sing bug-os sang karon nga mga kahigayunan. Kon umalagi nga wala sing palamugnan, madamo sa ila ang nagapasangkad sang ila pagbantala nga hilikuton. Ang ila pag-alagad, luwas nga nagapabaskog sang pagsinggit sing kadayawan kay Jehova, nagahatag sa ila sing kalipay nga kinahanglanon agod malandas ang ila mismo mga problema sa pangabuhi.

Ginahatagan sining mga Saksi sing prioridad ang pagbantala nga hilikuton kag ginabutang sa ikaduha nga lugar ang mga kapigaduhon sa pangabuhi, nga nagapakita sa bug-os kalibutan nga paghiliutod nga nagasalig sila sing bug-os kay Jehova sa pag-atipan sa ila. Ang iya saad amo: “Padayon, nian, nga pangitaa anay ang ginharian kag ang iya pagkamatarong, kag ining tanan iban pa nga butang idugang sa inyo.”​—⁠Mateo 6:⁠33.

Sugod sang napasag-uli ang matuod nga pagsimba sang 1919, wala pagtuguti ni Jehova ang iya katawhan nga magluya. Gin-amligan niya sila sa daku nga paghingabot kag sa iban nga mga lugar sa mga dekada sang tago nga pagpanghikot. Ang mga Saksi ni Jehova determinado nga ang napaslawan sang Yawa nga matigayon paagi sa paghingabot, indi niya mahimo paagi sa mas malimbungon nga siod sang materyalismo!

Pagtuon sa Paghulat sa Tanan nga Bahin

Ang malapad nga mga Kingdom Hall, malahalon nga mga kasangkapan sa tunog, mga Assembly Hall, kag matahom nga mga puluy-an Bethel nagadala sing himaya sa Dios kag nagahatag sing hipos nga panaksi nga ginapakamaayo niya ang iya katawhan. Ang mga Saksi ni Jehova sa mga pungsod diin ang hilikuton madugay na nga gindumilian mahimo magabatyag nga sa sining bahin madamo sila sing himuon agod malab-ot ang talaksan sang iban nga mga pungsod. Apang ang pinakaimportante gid amo nga padayon sila nga nagauswag sa espirituwal. Ang nagguwa nga mga tanda sang pagpakamaayo sang Dios sa materyal nga paagi magasunod sa natalana nga tion.

Ang dedikado nga mga alagad ni Jehova dapat magmabinantayon, kay basi sa pagtinguha sang personal nga mga kaayuhan, ayhan magabatyag sila nga indi nila luyag nga dingutan pa ang ila kaugalingon sang materyal nga mga butang. Ang paghandum sing kaumpawan gikan sa ekonomiko kag sosyal nga indi pag-alalangay halangpunon, apang wala ginakalimtan sang katawhan ni Jehova nga ang tanan nga mga alagad sang Dios nagahandum sing kaumpawan. Ang bulag nagahandum nga makakita liwat, ang nagamasakit sing malala nagahandum nga mapasag-uli sa maayong panglawas, ang napung-awan nagahandum nga may masanag nga palaabuton, kag ang namatyan nagahandum nga makita liwat ang ila napatay nga mga hinigug⁠ma.

Bangod sang mga sirkunstansia, ang tagsa ka Cristiano sa pila ka bahin napilitan sa paghulat sa bag-ong kalibutan ni Jehova sa paglubad sang iya mga problema. Nagapahulag ini sa aton nga pamangkuton ang kaugalingon, ‘Kon may pagkaon ako kag panapton, indi bala dapat nga mangin kontento ako sa sining mga butang kag mangin handa nga maghulat sing kaumpawan gikan sa mga problema sa pangabuhi?’​—⁠1 Timoteo 6:⁠8.

Ang mga Cristiano nga nagasalig sing bug-os kay Jehova makasalig nga kon handa lamang sila sa paghulat, ang ila tanan nga maayong mga handum kag mga kinahanglanon paayawan sa dili madugay. Wala sing isa ang magahulat sa walay pulos. Ginasulit namon ang mga pinamulong ni Pablo: “Magpakalig-on kamo, nga dimationg, nga nagabugana gihapon sa buluhaton sang Ginuo, sa nahibaluan ninyo nga ang inyo pagpangabudlay indi walay pulos sa Ginuo.”​—⁠1 Corinto 15:⁠58.

Gani isa gid bala ka daku nga problema ang pagtuon sa paghulat?

[Piktyur sa pahina 10]

Ang pagtuon sa paghulat mahimo magluwas sang imo kabuhi