Ang mga Buhat sa Pagluwas ni Jehova Karon
INI ang ginasiling sang Biblia sa aton tuhoy kay Jehova: “Madamo ang kapipit-an sang matarong, apang si Jehova nagaluwas sa iya sa sini tanan sa ila” kag, “si Jehova makahibalo magluwas sang mga tawo nga may diosnon nga debosyon sa mga pagsulay.”—Salmo 34:19; 2 Pedro 2:9.
Paano ginabuligan ni Jehova ang iya katawhan kon yara sila sa kapipit-an? Indi paagi sa milagruso nga pagbaliskad sa mga kusog sang kinaugali ukon paagi sa iban pa nga labaw sa kinaugali nga buhat, subong sang ginahunahuna sang madamo nga mga tawo nga dapat himuon niya, kundi paagi sa isa pa ka kusog nga wala mahangpi sing bug-os sang kalabanan nga mga tawo—ang gugma. Huo, ginahigugma ni Jehova ang iya katawhan, kag ginpalambo niya sa tunga nila ang tuman kabakod nga gugma para sa isa kag isa amo nga mahimo niya para sa ila ang butang nga daw halos milagruso.—1 Juan 4:10-12, 21.
Ang iban mahimo mangatarungan nga sa tion sang emerhensia, ang kinahanglan amo ang pagkaon, bulong, kag kasangkapan—indi ang gugma. Matuod, ang pagkaon, bulong, kag kasangkapan importante. Apang, si apostol Pablo nangatarungan sa sining paagi: “Kon may akon ako sang bug-os nga pagtuo sa bagay nga makahalin sang mga bukid, apang walay gugma, wala ako sing kapuslanan. Kag kon ipanghatag ko ang tanan ko nga pagkabutang, kag kon itugyan ko ang akon lawas, agod makapabugal ako, apang wala sing gugma, wala ini sing kapuslanan sa akon.”—1 Corinto 13:2, 3.
Masunson kita makabasa tuhoy sa materyal nga mga bulig nga nagakaladunot ukon ginakaon sang mga ilaga sa mga pier samtang ang mga tawo nga nagakinahanglan nagakalamatay bangod sa balatian kag sa gutom. Ukon sing malain pa, ina nga bulig mahimo nga magatupa sa kamot sang makagod kag wala sing konsiensia nga mga tawo nga personal nga nagaganar gikan sa sini. Busa, isa ka butang ang paghimo sa mga suplay nga matigayon, apang tuhay naman ang pagtatap nga makabenepisyo gikan sa sini ang yadtong mga nasit-an. Daku ang mahimo sang matuod nga gugma kag pag-ulikid.
Gugma nga Nagapanghikot
Sang Septiembre 1992, si Bagyo Iniki nagbunal sa isla sang Kauai sa Hawaii, nga may populasyon nga 55,000. May hangin nga nagadasig sing 210 kilometros por ora kag nagabaskog tubtob sa 260 kilometros por ora, 2 ka tawo ang napatay sini kag 98 ang nasamaran, 75 porsiento sang kabalayan ang naguba, kag 8,000 ka tawo ang nadulaan sing puluy-an, kag mga $1 bilyones ang nahalit sini. Nagapuyo man sa sining diutay nga isla ang mga 800 ka Saksi ni Jehova sa anom ka kongregasyon. Kamusta sila?
Antes pa nagbunal si Iniki, ang mga gulang sang kongregasyon, sa panuytoy sang nagalakbay nga manugtatap, nakig-angot na sa tanan nga mga katapo sang kongregasyon agod pat-uron nga luwas sila kag malig-on, nakahanda sa mabangis nga pagwaswas sang bagyo. Yadtong mahigugmaon nga pag-atipan nakabulig agod malikawan ang grabe nga kasamaran ukon kamatayon sa tunga sang mga Saksi.—Ipaangid ang Isaias 32:1, 2.
Bisan pa nautod ang komunikasyon kag transportasyon, ang tatlo ka tiglawas sang sanga talatapan sang Watch Tower Bible and Tract Society sa Honolulu amo ang pila sa nauna nga nag-abot pagkatapos sang bagyo, nga ginhatagan sing pinasahi nga pahanugot sang Civil Defense nga maglupad pa Kauai. Sa gilayon, nakig-angot sila sa lokal nga mga Saksi kag, pagkaaga, nakigsapol agod planuhon ang paagi sa pagbulig. Gintukod ang relief committee agod hibaluon ang mga kinahanglanon kag agod tigayunon ang kinahanglanon nga mga materyalis paagi sa sanga talatapan sa Honolulu. Nagpangabudlay sa walay untat, gindumalahan nila ang hilikuton sa pagdala sing mga suplay sa mga nagakinahanglan kag sa pagtinlo kag pagkay-o sang mga balay nga nagkalaguba.
Ang mga Saksi sa iban nga mga isla maabtik nga nagbulig sa ila mga kauturan. Sa gilayon nga nabuksan ang erport sa Kauai, 70 ka Saksi ang nag-inabot sa pagbulig. Ang bulig nga nagabalor sing $100,000, nga nagalakip sa mga generator, kalan, suga, kag pagkaon, ginpadala. Gingamit nga bodega ang isa sa mga Kingdom Hall sa isla; apang, may kahangawa nga basi pangawaton ini. Nian nag-abot ang pila ka trak sang Army sa Kingdom Hall, kag nangabay ang mga tsuper kon mahimo nila maparking ang ila mga trak didto. Ang mga soldado nga ginbutang sa pagbantay sa mga trak naglubad man sang problema nga basi makawat ang mga suplay nga bulig.
Gindala sang mga kauturan ang mga generator sa balay-balay, gin-paandar ini sa duha ukon tatlo ka oras sa tagsa ka balay agod buligan ang mga tawo nga magamit ang ila mga freezer. Ginpadala ang mga grupo sang mga kauturan sa lainlain nga mga balay agod magbulig paninlo kag pangay-o sang guba. Sang nagtrabaho sila sa balay sang isa ka utod nga babayi nga ang bana mapintas nga nagapamatok sa iya sang una, natandog gid ang bana nga ang ginhimo lang niya amo ang magtan-aw kag maghibi. Ang isa ka bisita halin sa mainland nga nakakita sa isa pa ka grupo sang mga Saksi nga nagatrabaho ang nagdayaw sing daku sa ila paggawi kag organisasyon nga ginpalapitan niya sila kag ginpamangkot kon ano ang naghimo sa ila nga tuhay gid. Sang ginpaathag sa iya sang isa ka utod nga bangod ini sang ila gugma sa Dios kag sa ila masigka-Cristiano, ang tawo nagsabat: “Paano ko makilala ang Dios?” (Mateo 22:37-40) Nian nagsiling pa sia: “Tuman gid sa inyo ka organisado nga ayhan mahimos ninyo nga may isa nga magahulat na sa akon pagbalik ko sa Florida!”
Sa kabilugan, ang mga Saksi ni Jehova nagbulig sa pagtinlo kag sa pagkay-o sa 295 ka puluy-an sa Kauai. Tuhoy sini, 207 ang nagkinahanglan sing diutay nga pagkay-o, apang 54 ang nahalitan sing daku, kag 19 ang bug-os nga naguba. Lakip man sa ila hilikuton amo ang pagduaw sa tagsa ka nakilal-an nga Saksi sa isla agod pat-uron nga ang kada isa naatipan. Sang gindul-ong ang mga suplay sa isa ka utod nga babayi, ang isa ka Budhista nga kaingod nagsiling nga wala sia sing nakuha bisan isa ka bilog nga tsa gikan sa iya grupo. Ang isa pa ka babayi, nga ang iya balay gintinluan sang isa ka grupo sang mga Saksi, nagsiling: “Madugay na kamo nagaduaw sa akon balay, kag ginakabig ko kamo nga maayong mga kaingod, apang ini nga pagpakita sing gugma sa isigkatawo nagapakita sa akon kon ano gid ang inyo organisasyon. Salamat sa inyo kapisan.”
Luwas sa pag-atipan sa materyal nga mga kinahanglanon sang tanan nila nga mga masigka-Cristiano, yadtong nagadumala sa pagbulig nabalaka man sa ila espirituwal nga kaayuhan. Wala pa duha ka adlaw pagkatapos sang bagyo, ang pila ka kongregasyon naghiwat na sang ila mga miting. Sa gilayon, ang magagmay nga mga grupo sa pagtinuon sa libro nagtipon liwat. Napulo ka sangkol nga mga gulang gikan sa iban nga mga isla ang nagkari sa Kauai sa pagbulig sa lokal nga mga gulang agod maduaw ang tagsa ka Saksi sa pulo. Pagkadason nga Domingo, ang tanan nga anom ka kongregasyon naghiwat sing Pagtinuon sa Lalantawan, sing 30-ka-minuto nga pamulongpulong sang isa ka katapo sang Relief Committee tuhoy sa mga paagi sa pagbulig, kag sing nagahinakop nga 30-ka-minuto nga pamulongpulong sang isa ka katapo sang Komite sang Sanga nga nagkari gikan sa Honolulu para sa sining katuyuan. Ang report sang isa ka nakasaksi nagasiling: “Ang tanan nalugpayan bangod sang maayong panuytoy nga nahatag kag nagbatyag nga handa sa espirituwal sa pag-atubang sa ila iban pa nga mga problema. Madamo sa tumalambong ang naghibi sang nagahingapos ang programa, kag wala untat ang palakpak.”
Bug-os Kalibutan nga Paghiliutod
Ina nga gugma kag pag-ulikid amo ang tanda sang katawhan ni Jehova sa bug-os nga kalibutan. Sang maglabay sa Western Samoa si Bagyo Val mga isa ka tuig antes, daku nga halit ang nahimo sini, apang ang mga Saksi ni Jehova sa iban nga mga bahin sang kalibutan maabtik nga nagbulig sa ila mga kauturan didto. Sang ulihi, sang ang gobierno naghatag sing pundo para sa tanan nga mga relihion—lakip sa mga Saksi ni Jehova—sa pagkay-o sang ila mga tinukod kag mga palibot, gin-uli ini sang mga Saksi upod ang isa ka sulat nga nagasiling nga ang tanan nila nga guba nakay-o na, kag ang pundo mahimo magamit sa pagkay-o sa pila ka tinukod sang gobierno. Ang ila ginhimo ginbalita sa isa ka lokal nga pamantalaan. Sang mabasa ini, ang isa ka opisyal sang gobierno nagsiling nga nagbatyag sia sing kahuya tuhoy sa iya mismo iglesia bangod ginbaton nila ang kuwarta gikan sa gobierno bisan pa nga may paseguro ang tanan nila nga mga tinukod nga naguba sang bagyo.
Sa kaanggid, sang Septiembre 1992, sang ang Ouvèze River sa bagatnan-sidlangan sang Pransya nagbaha kag naghapay sa Vaison-la-Romaine kag 15 ka palibot nga komunidad, ang mga Saksi gilayon nga nagbulig. Sa sina nga gab-i, ang baha nagkutol sa 40 ka kabuhi, nagguba sa 400 ka puluy-an, kag naghalit sa ginatos pa nga iban, kag nagbilin sa linibo ka pamilya nga wala sing tubig ukon koryente. Sing temprano pa pagkaaga, ang mga Saksi gikan sa lokal nga mga kongregasyon amo ang una nga nagkari sa pagbulig sa mga biktima sang baha. Yadtong nagakinahanglan sing pasilungan mahigugmaon nga ginsapopo sang Saksi nga mga pamilya sa rehiyon. Ginatos ka Saksi gikan sa malayo kag malapit ang naghatag sing bulig. Gintukod ang isa ka relief committee sa kaingod nga siudad sang Orange agod ihituhog ang mga panikasog sang apat ka grupo sang mga boluntaryo, nga nanguha sang lunang kag naninlo sang kabalayan, nanglaba sang madamong lunangon nga mga panapton, kag nagluto kag nangdul-ong sing pagkaon kag tubig nga mainom sa apektado nga mga lugar. Nagboluntaryo pa gani sila nga tinluan ang lokal nga eskwelahan kag ang pila ka tinukod sang munisipyo. Ang ila walay kakapoy nga panikasog ginpasalamatan sang ila mga kauturan kag sang mga tawo man sa komunidad.
Sa madamo pa nga tion kag lugar, ang mga Saksi ni Jehova nag-antos sing mga kalamidad, subong sang baha, bagyo, kag linog, subong kay bisan sin-o. Nakahangop nga resulta ini sang dimapaktan ukon dimatapna nga mga kahimtangan, wala nila ginabasol ang Dios ukon si bisan sin-o. (Manugwali 9:11) Sa baylo, nagasalig sila nga ang nagasakripisyo sa kaugalingon nga gugma sang ila mga masigkatumuluo magabulig sa ila bisan ano man ka grabe nga mga sirkunstansia ang mahimo mahanabo sa ila. Inang mahigugmaon nga mga buhat resulta sang pagtuo nga ginaambitan nila. Si disipulo Santiago nagapaathag: “Kon ang utod nga lalaki ukon babayi hubo kag nakulangan sing kalan-on adlaw-adlaw, kag ang isa sa inyo nagasiling sa ila: ‘Lakat kamo sa paghidait, magpainit-init kag magkalabusog,’ apang wala ninyo sila paghatagi sang mga butang nga kinahanglan sang ila lawas, ano bala ang kapuslanan sini? Amo man ang pagtuo, kon wala binuhatan, patay sa iya kaugalingon.”—Santiago 2:15-17.
Ang Tuburan sang Matuod nga Pangamlig
Sa baylo nga magpaabot sing mga milagro sa dagway sang pila ka sahi sang balaan nga pagpasilabot, ang mga Saksi ni Jehova nakahibalo nga ang pangamlig masapwan sa ila bug-os kalibutan nga Cristianong paghiliutod. Sa katunayan, ang mahimo sang paghiliutod sa panahon sang kasisit-an halos isa ka milagro. Ginadumdom nila ang pinamulong ni Jesus sa Mateo 17:20: “Kon kamo may pagtuo subong sa lamigas sang mustasa, magasiling kamo sa sining bukid, ‘Saylo didto,’ kag ini magasaylo, kag wala gid sing dimahimo ninyo.” Huo, ang katulad-bukid nga mga sablag madula kon ang matuod nga Cristianong pagtuo, ginaupdan sing gugma, magapanghikot.
Ang katawhan ni Jehova sa bug-os nga kalibutan nakabatyag sang maamligon nga kamot sang ila Dios sa sining dimalig-on kag makatalagam nga mga tion. Nagabatyag sila subong sang salmista: “Sa kalinong magahigda ako kag magatulog, kay ikaw lamang, O Jehova, ang nagapapuyo sa akon sa kalig-unan.” (Salmo 4:8) Sing masinaligon, ginatuon nila ang ila igtalupangod sa karon nga hilikuton: “Iwali ining maayong balita sang ginharian sa bug-os napuy-an nga duta subong panaksi sa tanan nga kapungsuran kag ugaling magaabot ang katapusan.” (Mateo 24:14) Kag may kapat-uran nga mapaabot nila ang katumanan sang ginsaad ni Jehova nga isa ka mahidaiton kag matarong nga bag-ong kalibutan, nga sa sini indi na sila makaeksperiensia sing bisan ano nga sahi sang mga kalamidad, hinimo-sang-tawo man ukon kinaugali.—Miqueas 4:4.
[Mga piktyur sa pahina 12]
Ang mga Saksi gikan sa malayo kag malapit nagabulig sa mga biktima sang baha