Malinong nga Panghunahuna sa Isa ka Mapaindis-indison nga Katilingban

“KON ang bisan sin-o luyag mangin una,” laygay ni Jesucristo sa iya mga apostoles, “dapat sia maulihi sa tanan kag mangin alagad sang tanan.” Nagbaisay ang mga apostoles kon sin-o ang labing daku sa ila. Nahibaluan nila nga ginakangil-aran ni Jesus yadto nga sahi sang espiritu. Wala gid niya ginpaindis-indis ang iya mga disipulo batok sa isa kag isa subong paagi sa pagpalig-on sing espirituwal nga pag-uswag.​—⁠Marcos 9:​33-37.

Antes magkari sa duta, nag-ambit si Jesucristo sa pagtuga sa una nga tawhanon nga mag-asawa kag nahibaluan niya kon paano sila ginhimo. (Colosas 1:​15, 16) Ang una nga mga tawo gintuga nga may ikasarang sa pag-uswag nga indi kinahanglan ang mapintas nga pagpaindis-indis batok sa iban. Indi kinahanglan nga mag-ilinaway ang mga tawo agod mahibaluan kon sin-o ang ila ulo, ukon makig-indis-indis sila batok sa mga sapat agod mabuhi.​—⁠Genesis 1:26; 2:​20-24; 1 Corinto 11:⁠3.

Ang Ginhalinan sang Mapaindis-indison nga Espiritu

Paano, nian, ang mapintas nga mapaindis-indison nga espiritu nangin mabaskog nga puwersa sa tawhanon nga katilingban? Ang una nga kaso sang pagpatay sa maragtas sang tawo nagahatag sing ideya. Ang mapaindis-indison nga espiritu ni Cain, kamagulangan nga anak sang una nga tawhanon nga mag-asawa, nagdul-ong sa trahedya. Ginpatay ni Cain ang iya utod nga si Abel bangod ang halad ni Abel nagpahamuot sa Dios, samtang ang kay Cain wala. Kag nagasiling ang Biblia nga si Cain “naghalin sa isa nga malauton kag nagpatay sang iya utod.”​—⁠1 Juan 3:12; Genesis 4:​4-8.

Huo, ang isa nga malauton, si Satanas nga Yawa, amo ang ginhalinan kag promotor sang mapaindis-indison nga espiritu. Bisan pa isa sia ka angheliko nga anak sang Dios nga may mataas nga mga pribilehiyo, naghandum sia sing dugang pa. (Ipaanggid ang Ezequiel 28:​14, 15.) Sang ginhaylo niya si Eva, ginbuyagyag niya ang iya kaugalingon nga handum. Nagsiling sia nga paagi sa pagkaon sa ginadumilian nga bunga, si Eva “mangin kaangay sang Dios.” (Genesis 3:​4, 5) Ang matuod, si Satanas ang luyag mangin kaangay sang Dios, sa pagribal kay Jehova. Ang isa ka espiritu sang pagpaindis-indis batok sa Dios nagtiklod sa iya sa pagrebelde.​—⁠Santiago 1:​14, 15.

Makalalaton ini nga espiritu. Sa idalom sang impluwensia ni Satanas, ang hinatag sang Dios nga kalinong sang orihinal nga pamilya nga kahimusan nadula. (Genesis 3:​6, 16) Kutob sang iya pagrebelde sa Dios, ginagamhan ni Satanas nga Yawa ang katawhan, ginapalig-on ang espiritu sang pagpaindis-indis, ginadayaan pa gani ang mga lalaki kag mga babayi sa pagpati nga ang mapintas nga pagpaindisanay amo ang yabi sa kadalag-an. Apang, ang Biblia nagapaathag: “Kon diin ang kaimon kag pinuyas, didto ang kagamo kag tagsa ka malaut nga buhat.” (Santiago 3:​14-16) Sa amo ginkawatan ni Satanas ang tawo sang iya kalipay kag malinong nga panghunahuna.

Kadalag-an nga Wala sing Pagpaindis-indis

Tuhay sa paghaylo ni Satanas, ang Biblia nagahatag sing mga halimbawa sang kadalag-an nga wala sing pagpaindis-indis. Ang nagapanguna amo ang iya ni Jesucristo. Bisan pa nagluntad sa dagway sang Dios, wala gid sia maghunahuna nga mangin tupong sa Dios kundi nagsuklob sia sing dagway sang ulipon kag nagkari sa duta. Kapin pa sa sina, ginpaubos niya ang iya kaugalingon kag nangin matinumanon tubtob sa kamatayon sa isa ka usok sang pag-antos. Ining matinumanon nga panimuot, nga wala gid sing espiritu sang pagpaindis-indis, nagdul-ong sa iya pagtigayon sang kahamuot sang Dios. “Bangod man sini ginbayaw sia sang Dios sa isa ka superyor nga posisyon kag malulo nga ginhatagan sing ngalan nga labaw sa tanan nga iban nga ngalan.” (Filipos 2:​5-9) Anong daku pa nga kadalag-an ang matigayon sang bisan sin-o nga tinuga? Napahamut-an niya ang iya Amay sa kasangkaron nga wala sing iban nga tinuga ang makahimo, kag ginhimo niya ini nga wala sing espiritu sang pagpakigribal ukon pagpaindis-indis.​—⁠Hulubaton 27:⁠11.

Ang madamo nga matutom nga mga anghel sa langit nagapakita sing amo man nga panimuot. Bisan pa si Jesus, nga ulo sang mga anghel, nangin manubo pa sa ila sang magkari sia sa duta, kinabubut-on nga nag-alagad sila para sa iya mga kinahanglanon. Sing maathag, wala nila ginbinagbinag ang panghunahuna nga himuslan ang kahimtangan agod buslan sia subong Arkanghel.​—⁠Mateo 4:11; 1 Tesalonica 4:16; Hebreo 2:⁠7.

Ang ila pagkangil-ad sa mapaindis-indison nga mga panimuot kapin pa gani ka hayag kon binagbinagon naton ang ila reaksion sa katuyuan sang Dios nga bayawon ang iban sang dihimpit nga mga tawo sa dimamalatyon nga kabuhi subong mga espiritu, nga sa amo nga kahimtangan sila ‘magahukom sa mga anghel.’ (1 Corinto 6:⁠3) Ang mga anghel may madamo nga eksperiensia sa pag-alagad kay Jehova kag may kapin nga abilidad sa paghimo sing maayo sangsa dihimpit nga mga tawo. Sa gihapon, ang mga anghel malipayon nga nagaalagad sa mga hinaplas sa duta, wala gid nagakahisa sa ila pagabatunon. (Hebreo 1:14) Ang ila maayo, indi mapaindis-indison nga espiritu nagabulig sa ila nga magpadayon sa pag-alagad sa atubangan sang trono sang Soberanong Ginuong Jehova.

Nian, hunahunaa ang dumaan nga matutom nga mga alagad sang Dios nga banhawon sa duta. Si Abraham isa ka talalupangdon nga halimbawa sang pagtuo kag gintawag nga “amay sang tanan nga may pagtuo.” (Roma 4:​9, 11) Si Job nagpahamtang sing ekselente nga huwaran sa pagbatas. (Santiago 5:11) Si Moises nga, “tama gid kahagop labi pa sa tanan nga tawo nga yara sa kadaygan sang duta,” nanguna sa pungsod sang Israel padulong sa kahilwayan. (Numeros 12:⁠3) Sin-o sa tunga sang dihimpit nga mga tawo ang nakapahamtang sing mas maayo nga huwaran sa pagtuo, pagbatas, kag pagkahagop sangsa sini nga mga tawo? Walay sapayan, panublion nila ang dutan-on nga bahin sang Ginharian sang Dios. (Mateo 25:34; Hebreo 11:​13-16) Sila, kaangay ni Juan Bautista, kabigon nga manubo pa sa “isa ka persona nga labing diutay sa ginharian sang mga langit.” (Mateo 11:11) Magahunahuna pa ayhan sila sa pagreklamo, nagainsister nga ang ila pagtuo, pagbatas, ukon pagkahagop tupong ukon sa pila ka mga kaso labaw pa sangsa ila nga ginhatagan sing kabuhi sa langit? Sa pagkamatuod indi! Sila mangin malipayon nga dutan-on nga mga sakop sang Ginharian sang Dios.

Sa karon man, maayo nga makaupod ang mga tawo nga wala sing mapaindis-indison nga panimuot. Si Yasuo, nga ginsambit sa una nga artikulo, nalubong sa utang bangod sang pagnegosyo sing bulawan kag nadula niya ang iya tanan nga propiedad. Ginbiyaan sia sang iya “mga abyan.” Bangod ang iya asawa nagsugod sa pagtuon sa Biblia upod sa mga Saksi ni Jehova, nagkadto sia sa ila mga miting bangod ginabasol niya ang iya kaugalingon sa pag-antos nga gintuga niya sa iya pamilya. Sang ulihi, ginsikway niya ang pagkamapaindis-indison kag nangin isa sang mga Saksi ni Jehova. Malipayon sia karon nga ginalibutan sia sang Cristianong mga abyan, ang sahi nga handa sa pagbulig sa iya sa mga tion sang kasisit-an.

Kon Paano Mahuptan ang Malinong nga Panghunahuna

Indi pirme mahapos huptan ang malinong nga panghunahuna sa isa ka walay kaluoy, mapaindis-indison nga katilingban. Maayo nga talupangdon naton nga ginapakamalaut sang Biblia ang “kaawayon, pagpinuyas, kaimon, kasingkal, pagbinahinbahin, katuhaytuhayan, mga sekta, pagkahisa,” subong “mga buhat sang unod” nga nagaupang sa mga tawo sa pagpanubli sa Ginharian sang Dios. Ini tanan nga mga buhat nagaupdanay nga may mapaindis-indison nga espiritu. Indi katingalahan nga ginpalig-on ni apostol Pablo ang mga taga-Galacia: “Dili kita mangin maiyaiyahon, nga nagahangkatanay, nga nagahinisaay.”​—⁠Galacia 5:​19-21, 26.

Sa sining konteksto, ginpakita sang sulat ni Pablo ang yabi sa paglandas sa maiyaiyahon nga pagpaindisanay. Sia nagsiling: “Ang bunga sang espiritu amo ang gugma, kalipay, paghidait, pagbatas, pagkalulo, pagkaayo, pagkatutom, pagkamapainubuson, pagpugong sang kaugalingon. Batok sa amo nga mga butang wala sing kasuguan.” (Galacia 5:​22, 23) Ang bunga sang espiritu nagabulig sa aton nga dulaon sa aton hunahuna ang pagpakigribal. Binagbinaga, halimbawa, ang kinaiya nga gugma. “Ang gugma wala nagakahisa,” paathag ni Pablo. “Wala ini nagapabugal, wala ini nagapahabok, ukon nagagawi sing dinagakaigo, wala nagapangita sang iya kaugalingon nga mga kaayuhan, indi ini mainakigon.” (1 Corinto 13:​4-7) Paagi sa pagpalambo sing gugma, malandas naton ang kahisa, nga amo ang puwersa nga nagadabok sa espiritu sang pagpaindisanay. Ang iban pa nga mga bunga sang espiritu nagabulig man sa aton nga hugasan gikan sa aton tagipusuon kag painuino ang bisan anong nabilin nga mga agi sang mapintas, mapaindis-indison nga espiritu. Ti, upod ang pagpugong sang kaugalingon ang mag-utwas nga bisan anong sugyot nga makig-indis-indis sa iban agod magdaug bisan ano man ang matabo sarang masumpo sa indi madugay!​—⁠Hulubaton 17:⁠27.

Apang, agod mapalambo ining mga kinaiya, dapat naton tugutan ang espiritu sang Dios nga manghikot sa aton. Mapalig-on naton ining mapuslanon nga pagpanghikot sang balaan nga espiritu paagi sa padayon nga pagpangamuyo kag pagpangabay sa espiritu sang Dios nga buligan kita. (Lucas 11:13) Bilang sabat sa aton pangamuyo, ano ang ihatag sa aton sang Dios? Ang Biblia nagasabat: “Dili kamo magkabalaka sa bisan ano, kundi sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay; kag ang paghidait sang Dios nga nagalabaw sa tanan nga painuino magatipig sa inyo mga tagipusuon kag inyo mga ikasarang sa pagpanghunahuna paagi kay Cristo Jesus.”​—⁠Filipos 4:​6, 7.

Maathag ini sa kaso sang mga apostoles ni Jesus. Bisan pa nasugdan na ni Jesus ang Panihapon sang Ginuo sang iya katapusan nga gab-i upod sa mga apostoles, nagkinamog gihapon sila kon sin-o sa ila ang daw labing daku. (Lucas 22:​24-27) Sa nanuhaytuhay nga mga okasyon gintinguhaan ni Jesus nga buligan sila sa pagtadlong sang ila panghunahuna, apang ining mapaindis-indison nga panimuot madalom nga naturok sa ila. (Marcos 9:​34-37; 10:​35-45; Juan 13:​12-17) Apang, sang mabaton nila ang balaan nga espiritu mga 50 ka adlaw pagkatapos sadtong pagsinuay, ang ila panimuot nagbag-o. Wala sila magbinaisay kon sin-o ang magatiglawas sa ila sa pagpakighambal sa nagakatingala nga kadam-an nga nagtipon sadtong adlaw sang Pentecostes.​—⁠Binuhatan 2:​14-21.

Wala sing duog para sa pagpaharihari sang bisan sin-o nga tawo sa ibabaw sang Cristianong kongregasyon. Sang may problema tuhoy sa pagpatuli nga dapat lubaron, si Santiago, nga indi pa gani isa ka disipulo sang mapatay si Jesus, amo ang nagdumala sa sadtong importante nga miting. Wala sing palatandaan nga may pagsinuay nga natabo sa kon sin-o ang manguna sa sadto nga miting sang nagadumala nga hubon sang Cristianong kongregasyon. Daw ano nga pagbag-o gikan sa tion sang ang mga apostoles may mapaindis-indison pa nga espiritu! Sa bulig sang balaan nga espiritu, gindumdom nila ang mga panudlo ni Jesus kag nahangpan ang kahulugan sang iya mga leksion.​—⁠Juan 14:⁠26.

Mahimo man ini mangin matuod sa aton. Sa bulig sang balaan nga espiritu, sarang naton malandas ang bisan anong nabilin pa nga sugyot nga makig-indis-indis sa iban agod mag-uswag sa ila kahalitan. Sa baylo, matigayon naton ang malinong nga painuino nga nagalabaw sa tanan nga panghunahuna. Ang Biblia nagapasalig sa aton nga ang tuburan sang mapintas nga pagpaindisanay, si Satanas nga Yawa, itagbong sa kadadalman sa indi madugay, indi na aktibo. (Bugna 20:​1-3) Indi na magribalay ang mga magkaingod. Magaresulta ayhan ini sa isa ka katilingban nga wala sing bisan anong pag-uswag? Indi gid! Ang katawhan mangin himpit, indi paagi sa pagpaindisanay sa tunga nila, kundi paagi sa halad gawad ni Jesus nga iaplikar sa ila.​—⁠1 Juan 2:​1, 2.

Si Keinosuke, nga ginsambit kaina, nga sang una nakaeksperiensia sing himaya sang kalibutanon nga kadalag-an paagi sa pagbaligya sing madamo nga awto, nagpalangluya sa mental kag pisikal, apang ginbiyaan niya sang ulihi ang iya trabaho. “Karon, ang kabuhi ko puno sing matuod nga kalipay,” siling niya. Nahangpan niya kon ngaa ang kabuhi ni Jesus may matuod nga kadalag-an. Nagasapo sia karon sing kapagsik sa bisan ano nga mahimo niya sa bug-os kalibutan nga kongregasyon sang Dios. Sa amo ginahanda sia para sa bag-ong kalibutan, nga sa diin wala na sing pagpaindisanay. Ikaw man makakita sing pauna nga laragway sining bag-ong kalibutan nga katilingban paagi sa pagduaw sa isa sang mga Kingdom Hall sa inyo duog kag sa pagpakig-upod sa mga Saksi ini Jehova.

[Piktyur sa pahina 7]

Ang tawhanon nga katilingban mangin malinong kag nagabuligay sa bag-ong kalibutan sang Dios