Paindisanay Bala ang Yabi sa Kadalag-an?
“WALA na sing importante pa sangsa pagdaug.” Madamo karon ang nagakabuhi nahisuno sa sining mga pulong, nga masami ginapadungog sa isa ka Amerikano nga coach sa football, nga si Vince Lombardi. Sa karon, ang anay Komunista nga mga pungsod nagbuylog sa pagdayaw sa prinsipio sang pagpaindisanay. Ang pagpasulod sing paindisanay sa ila mga negosyo amo kono ang tiket sa pagmanggad. Sa Sidlangan madamo nga mga ginikanan ang nagapaindis-indis sang ila mga anak batok sa iban kag nagapaeskwela sa ila sa pribado nga mga eskwelahan agod tudluan sila kon paano makapasar sa entrance exams. Ang mga ginikanan nga tuman ka interesado sa sini nga butang kombinsido nga ang pagsulod sa isa ka kilala nga eskwelahan amo ang yabi sa palaabuton nga kabuganaan.
Malig-on nga nagapati ang madamo nga ang paindisanay amo ang yabi sa kadalag-an. Suno sa ila pagpati, ang mga tawo nag-uswag paagi sa pagpaindisanay. “Ang pagpaindisanay para sa promosyon amo ang tuburan sang kapagsik sang Hapones nga mga korporasyon,” siling sang 65.9 porsiento sang mga ehekutibo sang dalagku nga mga korporasyon nga ginsurbe sang Federation of Economic Organizations sang Japan. Kag daw madugaydugay na nga madinalag-on ang Hapones nga mga kompanya. Apang, paindisanay gid bala ang yabi sa kadalag-an?
Makapaladya Gid Bala?
Ang mga tawo nga nagapaindisanay nagapakita sing makagod, ako anay nga panimuot. Malipayon sila kon ang iban nagakapierdi, kay ginahanduraw nila nga magapauswag ini sang ila nahimuan. Para sa ila makagod nga daug, mahimo nga magagamit sila sing mga taktika nga makasamad sa iban. Sa ano magadul-ong ina nga pagtinguha sa kadalag-an paagi sa paindisanay? Si Yasuo, nga naghugod sang iya bug-os nga igtalupangod sa palumba agod mangin importante sia nga tawo sa iya kompanya, naghinumdom sang iya nagligad kag nagsiling: “Puno sing mapaindis-indison nga espiritu kag sing panghunahuna nga interesado sa promosyon, ginpaanggid ko ang akon kaugalingon sa iban kag nagbatyag nga superyor ako sa ila. Kon yadto nga mga tawo ginabutang sa posisyon nga labaw sa akon, ginareklamo ko kada adlaw ang pagdumalahan sang kompanya tuhoy sa mga mamumugon. Wala ako sing mga abyan sa matuod nga kahulugan sang tinaga.”
Ang isa ka mapaindis-indison nga espiritu makadul-ong man sa isa ka hilaw nga kamatayon. Paano? Gin-angot sang Mainichi Daily News sang Japan ang karoshi, ukon kamatayon bangod sang sobra nga pagtrabaho, sa type-A nga paggawi. Ang type A nagalaragway sa isa ka sahi sang paggawi nga pirme nagalagas sa tion, mapaindis-indison, kag agresibo. Ginaangot sang Amerikano nga kardiologo nga sanday Friedman kag Rosenman ang type-A nga paggawi sa isa ka balatian sa tagipusuon diin nagadiutay ang kadamuon sang dugo nga nagailig pasulod sa tagipusuon paagi sa coronary nga arterya. Huo, ang mapaindis-indison nga espiritu mahimo nga makamamatay.
Ang paindisanay sa trabaho makadul-ong man sa iban pa nga balatian sa pisikal kag mental. Ang isa ka halimbawa amo si Keinosuke, nagapanguna nga ahente sang isa sang dalagku nga manugbaligya sing awto sang Japan. Nakahimo sia sing rekord paagi sa pagbaligya sing kabilugan nga 1,250 ka awto. Ang iya laragway ginpakuwadro kag ginpakabit sa hulot nga ginagamit sang hubon sang mga direktor sa ulong-talatapan sang kompanya. Bisan pa ginakangil-aran niya nga gamiton ang iya mga kaupod subong bato nga tulungtungan para sa mga promosyon, ginduso sia sang kompanya sa pagpakig-indis-indis. Subong resulta, sa sulod sang isa ka tuig nagmasakit sia sing gastric kag duodenal ulcer. Sang amo man nga tuig, 15 ka ehekutibo sa iya kompanya ang naospital, kag isa ang naghikog.
Sa puluy-an, ang pag-ilog-ilog sa kaingod nga panimuot nagatiklod sa mga tawo sa pagpakitakita sang ila palangabuhian sa walay katapusan nga pagribalay. (1 Juan 2:16) Nagapauswag lamang ini sa komersialismo, ginabutang ang kuwarta sa mga kamot sang mga negosyante sang duta.—Ipaanggid ang Bugna 18:11.
Bisan pa ang pagribalay kag ang mapaindis-indison nga espiritu mahimo magpatubas sing pagkasampaton sa trabaho, indi katingalahan nga si Hari Solomon nagsiling: “Nakita ko mismo ang tanan nga lakas nga pagpangabudlay kag ang tanan nga pagkasampaton sa trabaho, nga nagakahulugan ini sing pagribalay sang isa batok sa isa, nga ini man walay pulos kag pagpanikasog sa hangin.” (Manugwali 4:4) Gani paano kita makahupot sing malinong nga panghunahuna samtang nagakabuhi sa isa ka mapaindis-indison nga katilingban? Agod mahibaluan ini, tan-awon anay naton kon sa diin nagsugod ang ideya sang pagpaindis-indis.