Pagpangawat Gid Bala Ini?

SI Abiodun isa ka senyor nga serbidor sa daku nga otel sa Nigeria. Samtang ginasiraduhan ang banquet hall isa ka gab-i, nakakita sia sing isa ka bag sang kuwarta nga katumbas sa $1,827, U.S. Dalidali niya nga ginhatag ang kuwarta, nga ginkuha sang ulihi sang tag-iya sini, nga isa ka bisita sang otel. Ginpadyaan si Abiodun sang tagdumalahan sang otel sing doble nga promosyon kag ginpadunggan subong ang ila “pinakamaayo nga empleyado sang tuig.” Ginpadyaan man sia sang tag-iya sang kuwarta.

Ginsugid sang Quality, isa ka lokal nga magasin nga nagabalita, ang natabo, nga nagtawag kay Abiodun nga “Maayo nga Samaritano.” Sang ginpamangkot sang Quality kon nasulay sia nga taguon ang kuwarta para sa iya kaugalingon, si Abiodun nagsabat: ‘Isa ako sang mga Saksi ni Jehova. Gani kon may nakita ako nga indi akon, ginauli ko ini sa tag-iya.’

Nakibot ang madamo sa komunidad sa ginpakita nga pagkabunayag ni Abiodun. Nalipay sa natabo ang kaupod nga mga Saksi ni Abiodun, apang wala sila makibot. Sa bug-os nga duta ang mga Saksi ni Jehova kilala bangod sang ila mataas nga mga prinsipio. Sa tunga nila ang pagkabunayag indi eksepsion; isa ini ka pagsulundan, isa ka kinahanglanon nga bahin sang matuod nga Cristianismo.

Sa pulupanag-on, walay sapayan, may mga sirkunstansia nga ayhan mabudlay hibaluon kon ano ang bunayag kag kon ano ang indi. Binagbinaga ini nga kahimtangan. Si Festus, nga nagauyat sang mga kontribusyon kag mga kwenta sa isa ka kongregasyon sang mga Saksi ni Jehova sa West Africa, nagakinahanglan gid sing kuwarta.⁠a Ang iya asawa nagakinahanglan sing operasyon nga indi dapat palantangon siling sang doktor niya. Ang ospital nangayo sing katunga sang balayran nga kuwarta.

Wala sing kuwarta si Festus. Sang ginpalapitan niya ang pila ka tawo agod manghulam, wala sia pagpahulama. Nian nahunahuna niya ang kuwarta nga ginauyatan niya kag nangatarungan, ‘Husto bala para sa akon nga ibutang sa katalagman ang kabuhi sang akon asawa nga may mahimo man ako agod mapunggan ini? Ngaa indi “manghulam” sa kuwarta sang kongregasyon? Mahimo ko ini mabalik kon mabayaran na ako sang mga tawo nga nakahulam sa akon.’

Gingamit ni Festus ang kuwarta nga indi iya agod ibayad sa ospital. Husto bala ang iya pangatarungan? Makatarunganon bala ang iya ginhimo bangod sang gin-atubang niya nga emerhensia nga kahimtangan?

Kay Sin-o Ini Kuwarta?

Sa pag-analisar sini nga mga pamangkot, binagbinagon naton sa malip-ot ang pila ka punto nahanungod sa ginhalinan kag katuyuan sang kuwarta kaangay sang ginkuha ni Festus. Ang kuwarta naghalin sa boluntaryo nga mga kontribusyon sang mga katapo sang kongrega­syon nga maluyag magpauswag sang putli nga pagsimba ni Jehova. (2 Corinto 9:⁠7) Wala ini ginagamit sa pagsuweldo, kay wala sing isa nga ginabayaran sa ila ginahimo sa kongregasyon. Sa kabaliskaran, ang gin-amot nga kuwarta ginagamit lamang sa pagtigayon kag sa pag-atipan sa duog tilipunan, nga sa kinaandan isa ka Kingdom Hall. Nagahatag ini sing kombeniente kag komportable nga lugar diin ang mga tawo​—⁠bata kag tigulang, manggaranon kag imol​—⁠makatipon sa pagtuon sa Biblia.

Kay sin-o ini kuwarta? Iya ini sang kongregasyon sa kabilugan. Wala sing indibiduwal nga katapo ang nagapat-od kon paano gastuhon ang kuwarta. Bisan ang hubon sang mga gulang ang nagatuytoy sang pagbayad sa rutina nga mga kagastuhan sang kongregasyon, kon ang dikinaandan nga balayran ginakinahanglan, gina­presentar ini sang mga gulang sa bug-os nga kongregasyon agod aprobahan.

Paghulam Ukon Pagpangawat?

Bangod sang plano niya nga bayaran ang kuwarta sa gilayon kon mahimo, ginkabig ni Festus ang iya ginhimo subong paghulam. Apang, ang Webster’s New Dictionary of Synonyms nagagamit sang iban nga mga tinaga nahanungod sa “pagkuha kag pagsaylo sang propiedad sang iban sing tago ukon nga wala sia sing hinalung-ong kag pirme nga wala sia makahibalo.” Ang mga tinaga amo ang “pangawat” ukon “kawatan.” Sing walay pahanugot ukon awtorisasyon, ginkuha ni Festus ang kuwarta nga iya sang kongregasyon. Gani, huo, nakasala sia sing pangawat. Kawatan sia.

Sa pagkamatuod, may mga kadakuon sang pagkabalasulon sa motibo sa likod sang pagpangawat. Makita naton ina gikan sa halimbawa ni Judas Iscariote, nga ginsaligan sa pagtatap sa kuwarta nga ginauyatan ni Jesus kag sang matutom nga mga apostoles. Ang Biblia nagasiling: “[Si Judas] makawat kag ginauyatan niya ang kahon sang kuwarta kag ginakuha niya anay ang kuwarta nga ginabutang sa sini.” (Juan 12:⁠6) Ginpahulag sang malain nga tagipusuon kag hayag nga kakagod, si Judas labi nga naglain. Sang ulihi ginluiban niya ang Anak sang Dios​—⁠sa 30 ka bilog nga pilak.​—⁠Mateo 26:​14-16.

Apang, si Festus ginpahulag bangod sang kabalaka sa iya nagamasakit nga asawa. Nagakahulugan bala ini nga wala sia sing sala? Indi. Binagbinaga ang ginasiling sang Dios nahanungod sa makawat sa isa pa ka daw emerhensia nga kahimtangan: “Ang mga tawo wala nagatamay sa makawat bangod nagpangawat sia sa pagbusog sang iya kalag kon gutom sia. Apang, kon madakpan, magauli sia sing pito ka pilo; ihatag niya ang tanan nga pagkabutang sang iya balay.” (Hulubaton 6:​30, 31) Sa iban nga hambal, kon madakpan, ang makawat dapat mag-atubang sang bug-os nga silot sang kasuguan. Suno sa Mosaikong Kasuguan, dapat bayaran sang makawat ang iya sala. Gani sa baylo nga palig-unon ukon pakamatarungon ang pagpangawat, ang Biblia nagapaandam nga bisan sa emerhensia nga mga kahimtangan, ang pagpangawat nagaresulta sa kadulaan sang pangabuhi, kahuya, kag sing labi pa, sa pagkawasi sang kahamuot sang Dios.

Subong mga Saksi ni Jehova, ang tanan nga matuod nga mga Cristiano, ilabi na yadtong ginsaligan sing mga salabton sa sulod sang kongregasyon dapat mangin huwaran, “hilway sa panumbungon.” (1 Timoteo 3:10) Wala mabaton ni Festus ang kuwarta nga ginpaabot niya, kag sa amo wala niya mailisi ang kuwarta nga ginkuha niya. Naburuka ang ginhimo niya. Ano ang natabo sa iya? Kon sia isa ka dimahinulsulon nga kawatan, kuntani ginsikway sia gikan sa matinlo nga Cristianong kongregasyon. (1 Pedro 4:15) Apang nagkasubo sia kag naghinulsol. Gani, nagpabilin sia sa kongregasyon, bisan pa nga nawasi niya ang iya mga pribilehiyo sa pag-alagad.

Pagsalig sa Dios

Si apostol Pablo nagpaandam nga ang pagpangawat sang isa ka tawo nga nagapangangkon nga nagaalagad kay Jehova makadala sing pasipala sa ngalan sang Dios kag sa Iya katawhan sa ngalan. Si Pablo nagsulat: “Ikaw bala, . . . ang isa nga nagatudlo sa iban, wala nagatudlo sang imo kaugalingon? Ikaw, ang isa nga nagabantala nga ‘Dili magpangawat,’ nagapangawat ka bala? Kay ‘ang ngalan sang Dios ginapasipalahan bangod sa inyo nga katawhan.’ ”​—⁠Roma 2:​21, 24.

Si Agur, nga isa ka maalamon nga tawo sang una nga panahon, naghimo sing amo man nga punto. Sa iya pangamuyo nangabay sia nga kuntani sia “indi mag-imol kag . . . magpangawat kag pasipalahan ang ngalan sang [iya] Dios.” (Hulubaton 30:⁠9) Talupangda nga ginbaton sang maalamon nga tawo nga ang kaimulon makapahanabo sang mga sirkunstansia nga mahimo magsulay bisan sa matarong nga tawo nga mangawat. Huo, ang mabudlay nga mga tion mahimo nga magtilaw sang pagtuo sang isa ka Cristiano sa ikasarang ni Jehova sa pag-atipan sa mga kinahanglanon sang iya katawhan.

Apang, ang matutom nga mga Saksi ni Jehova, lakip yadtong mga imol, nagatuo nga ang Dios “nangin manugpadya sa mga hanuot nga nagapangita sa iya.” (Hebreo 11:⁠6) Nahibaluan nila nga ginapadyaan ni Jehova ang iya mga matutom paagi sa pagbulig sa ila nga maatipan ang ila mga kinahanglanon. Gin-athag ina ni Jesus sa iya Sermon sa Bukid, nga nagasiling: “Dili kamo magkabalaka kag magsiling, ‘Ano bala ang aton kaunon?’ ukon, ‘Ano ang aton imnon?’ ukon, ‘Ano ang aton ipanapot?’ . . . Kay nahibaluan sang inyo langitnon nga Amay nga kinahanglan ninyo ining tanan nga mga butang. Padayon, nian, nga pangitaa anay ang ginharian kag ang iya pagkamatarong, kag ining tanan iban pa nga mga butang idugang sa inyo.”​—⁠Mateo 6:​31-33.

Paano ang Dios nagaaman para sa mga imol sa Cristianong kongregasyon? Sa madamong paagi. Ang isa amo ang paagi sa mga masigkatumuluo. Ang katawhan sang Dios nagapakita sing matuod nga gugma sa isa kag isa. Ginatuman nila sing hanuot ang laygay sang Biblia: “Ang bisan sin-o nga may paagi sa pagsakdag sang kabuhi kag nagatan-aw sa iya utod nga yara sa kakulangan apang nagasira sang ganhaan sang iya mapinalanggaon nga kaluoy sa iya, sa anong paagi nagapabilin ang gugma sang Dios sa iya? Mga magagmay nga kabataan, maghigugmaanay kita, indi sa pulong ni sa dila, kundi sa buhat kag kamatuoran.”​—⁠1 Juan 3:​17, 18.

Sa bug-os nga kalibutan, sa kapin sa 73,000 ka kongregasyon, kapin sa apat kag tunga ka milyon ka mga Saksi ni Jehova ang makugi nga nagapanikasog sa pag-alagad sa Dios suno sa iya matarong nga mga prinsipio. Nahibaluan nila nga indi gid pagbayaan sang Dios ang iya mga matutom. Ang mga nag-alagad kay Jehova sa madamong tinuig nagabayaw sang ila mga tingog sa pag-ugyon kay Hari David, nga nagsulat: “Nangin pamatan-on ako, kag karon tigulang na, apang wala ako makakita nga ang matarong ginpabayaan sing bug-os, ukon ang iya kaliwat nga nagapakilimos sing tinapay.”​—⁠Salmo 37:⁠25.

Daw ano pa kaayo nga magtuo sa Dios nga nag-inspirar sadto nga mga pinamulong, sa baylo nga tugutan ang kaugalingon nga masulay sa pagpangawat kag ayhan mawasi ang kahamuot sang Dios sing dayon!​—⁠1 Corinto 6:​9, 10.

[Footnote]