Ang mga Gradwado sang Gilead Nakasapo sing “Kapin nga Kalipay sa Paghatag”

SANG Domingo, Marso 6, 1994, ang bug-os kalibutan nga ulong-talatapan sang pamilya Bethel sang mga Saksi ni Jehova kag ang mga bisita nagtipon para sa isa ka makalilipay nga okasyon​—⁠ang gradwasyon sang ika-96 nga klase sang Watch­tower Bi­ble ­School of Gil­ead. Sa iya nagabukas nga mga komento, ang tsirman sang programa nga si Karl F. Klein, nga nagaalagad sa Nagadumala nga Hubon sang mga Saksi ni Jehova sing halos duha ka pulo ka tuig na, nagsiling sa 46 ka estudyante: “Nagsiling si Jesus nga may kapin nga kalipay sa paghatag sangsa pagbaton. Gani mangin amo sini sa inyo asaynment subong mga misyonero​—⁠sa dugang nga paghatag ninyo, dugang pa nga mangin malipayon kamo.”​—⁠Binuhatan 20:⁠35.

Nagapaalam nga mga Laygay

Nagsunod ang paagisod nga mga pamulongpulong sa mga estudyante. Ginpasangkad ni Leon ­Weaver, isa ka katapo sang Serv­ice De­part­ment Com­mit­tee, ang tema nga “Ang Pagbatas Nagahimaya kay Jehova.” Kita tanan nagaatubang sing mga pagtilaw. (2 Corinto 6:​3-5) “Kon yara kita sa idalom sang pag-ipit,” siling ni Utod ­Weaver, “tuman kahapos nga magsandig kita sa aton kaugalingon.” Apang, ginpahanumdom niya ang mga estudyante: “Bisan ano man nga pagtilaw nga kinaandan sa mga tawo ang maatubang ninyo, interesado si Jehova sa sini. Indi gid niya pagtugutan nga sulayon kamo labaw sa inyo masarangan.”​—⁠1 Corinto 10:⁠13.

“Pakabahandia Pirme ang Inyo Asaynment” amo ang titulo sang masunod nga pamulongpulong, nga ginhatag ni ­Lyman ­Swingle sang Nagadumala nga Hubon. Ang mga Israelinhon sadto wala magpili pirme kon sa diin sila mapuyo kag kon ano ang ila himuon. Ang tagsa ka tribo ginhatagan sing isa ka bahin sang duta, kag ang mga Levinhon gintangduan sing espesipiko nga mga katungdanan. Sing kaanggid, madamo sang yara sa pinasahi nga bug-os-tion nga pag-alagad karon​—⁠subong sang mga misyonero kag mga katapo sang pamilya Bethel​—⁠ang wala nagadesisyon para sa ila kaugalingon kon sa diin sila mapuyo kag kon ano nga hilikuton ang ila himuon. Ano kon ang isa wala nagabatyag sing kalig-unan nahanungod sa iya asaynment? “Kon nagatulok kamo sing maayo sa Pangulo nga Ahente sang aton pagtuo, nga si Jesus, kag nagabinagbinag sang iya huwaran sing mabinantayon, indi kamo magauntat,” siling ni Utod Swingle.​—⁠Hebreo 12:​2, 3.

Si Leonard Pearson, sang Watchtower ­Farms Com­mit­tee, nagsunod sa tema nga “Magpabilin nga Napokus ang Imo mga Mata.” Sia nagsiling: “Bisan pa pinakamaayo ang imo kamera, pinakamatahom ang imo ginalitratuhan, matahom ang palibot, mahimo gihapon nga indi mangin maayo ang resulta​—⁠kon wala napokus ang imo kamera.” Kaangay sang masangkad-sing-sakop nga mga lente, ang aton pagtamod dapat maglakip sa bug-os kalibutan nga pagbantala nga ginahimo. Indi gid naton dapat kalipatan ang kabilugan nga laragway. “Ang mga nagatulok lamang sa ila kaugalingon mangin dimalipayon sa ila mga asaynment,” siling ni Utod Pearson. “Ang mga nagatulok kay Jehova kag sa hilikuton nga iya ginpahimo sa ila magamadinalag-on.”

“Tuman Kadamo nga Pasalamatan” amo ang titulo sang masunod nga pamulongpulong, nga ginhatag ni John E. Barr, isa pa ka katapo sang Nagadumala nga Hubon. “Indi gid pagkalimti ang pagpasalamat kay Jehova,” laygay ni Utod Barr sa mga estudyante. “Isa ini sang labing daku nga mga tuburan sang pagkakontento, bisan ano man ang inyo asaynment.” Ang isa ka mapinasalamaton nga panimuot nagtiklod kay David sa pagsulat: “Ang mga latid nahulog sa akon sa mga duog nga mahamungayaon. Sa pagkamatuod, ang akon kaugalingon nga pagkabutang nangin kalahamut-an sa akon.” (Salmo 16:⁠6) “May yara kamo isa ka bahandi nga kamo nagabatyag nga malapit kay Jehova sa inyo adlaw-adlaw nga pagkabuhi,” siling ni Utod Barr. “Indi gid pagkuhaon ni Jehova ina nga kaangtanan sa inyo tubtob ginatamod ninyo ini subong butang nga kalahamut-an gid nga inyo ginapasalamatan.”

Ang instruktor sa Gilead nga si Jack Redford amo ang masunod nga naghambal, sa tema nga “Paano Ninyo Gamiton ang Inyo Dila?” Daw ano nga kagulub-an ang sarang matuga sang walay pasunaid nga mga pulong! (Hulubaton 18:21) Paano makontrol ang dila? “Dapat ninyo anay hanason ang inyo hunahuna,” sabat ni Utod Redford, “kay ang dila nagapabanaag sang hunahuna kag tagipusuon.” (Mateo 12:​34-37) Naghatag si Jesus sing ekselente nga huwaran; gingamit niya ang iya dila sa pagpakadaku sa ngalan ni Jehova. “May tiggulutom karon sa pagpamati sa mga pulong ni Jehova,” siling ni Utod Redford sa klase. “Nahibaluan ninyo yadto nga mga pulong. May yara kamo ‘dila sang mga tinudluan.’ Gani tuguti pirme ang inyo dila nga tuytuyan sang isa ka hunahuna kag isa ka tagipusuon nga nadedikar sing bug-os kay Jehova.​—⁠Isaias 50:⁠4.

Ang pagkaimportante sang pangamuyo ginpadaku sa pamulongpulong nga “Nagalakat Bala Kamo nga Subong Yara sa Presensia ni Jehova?” Si Ulys­ses ­Glass, rehistrador sang eskwelahan, nagsiling: “Kon ang isa ka amay nagapangabudlay sing lakas agod sakdagon ang iya pamilya apang wala gid nagapakighambal sa ila kag wala gid magpabutyag sing mga pulong sang pagpalangga, mahimo nga magahinakop ang iya pamilya nga ang motibo sang iya lakas nga pagpangabudlay amo ang dimakalilipay nga katungdanan sa baylo sang gugma. Gani amo man sa aton. Mahimo nga masako kita sa pag-alagad sa Dios. Apang kon wala kita nagapangamuyo, nian nadedikar lamang kita sa isa ka hilikuton sa baylo nga sa isa ka mahigugmaon nga langitnon nga Amay.”

Si Theodore Jaracz, sang Nagadumala nga Hubon, naghambal sa tema nga “Kon Ngaa Kadam-an ang Nagapakig-upod sa Katawhan sang Dios.” Kada tuig ginatos ka libo ang nagapanong sa organisasyon ni Jehova. (Zacarias 8:23) Ano ang nagapakilala sa mga Saksi ni Jehova subong katawhan sang Dios? Una, ginabaton nila ang bug-os nga Biblia subong Pulong sang Dios. (2 Timoteo 3:16) Ikaduha, neutral sila sa politika. (Juan 17:16) Ikatlo, nagapanaksi sila sa ngalan sang Dios. (Juan 17:26) Ikap-at, nagapakita sila sing nagasakripisyo sang kaugalingon nga gugma. (Juan 13:35; 15:13) Upod ining mga pamatuod, masidla naton nga ‘mabantala sing lapnag ang mga pagkahalangdon sang isa nga nagtawag sa aton gikan sa kadudulman padulong sa iya kalatingalahan nga kapawa.’​—⁠1 Pedro 2:⁠9.

Pagkatapos sining makapulukaw nga mga pamulongpulong, nakabaton ang 46 tanan ka estudyante sing mga diploma. Gin-asayn sila sa 16 ka kadutaan sa bilog nga globo.

Isa ka Nanuhaytuhay nga Programa sang Hapon

Sang hapon, gindumalahan ni ­Donald Krebs sang Beth­el Com­mit­tee ang isa ka pinalip-ot nga Pagtinuon sa Lalantawan. Nian nagpresentar ang mga gradwado sing isa ka programa nga natig-uluhan “Ang Kaalam Nagapadayon sa Pagsinggit sing Mabaskog sa Dalan Gid.” (Hulubaton 1:20) Gindrama nila ang ila makapaladya nga mga eksperiensia sa pagpanaksi sa mga dalan kag sa mga kumbuyahan. Sa pagkamatuod, ginapakamaayo ni Jehova ang mga nagatipon sing kaisog sa pagbantala sing dipormal. “Luyag ko hunahunaon kami subong mga galab sa mga kamot sang mga anghel nga mangangani,” siling sang isa ka gradwado nga utod nga lalaki. “Kon mas matalom ang aton mga ikasarang, mas kapin nga hilikuton ang mahimo sang mga anghel paagi sa aton.” (Ipaanggid ang Bugna 14:⁠6.) Ang programa sang mga estudyante naglakip man sing isa ka presentasyon sang mga ­slide nga nagdala sa tumalambong sa isa ka edukasyonal nga paglibot sa Bo­livia, Malta, kag Taiwan​—⁠tatlo sang kadutaan nga kaladtuan sang mga gradwado gikan sa sining klase.

Masunod, sanday Wallace kag Jane Liverance​—⁠mga misyonero sa 17 ka tuig​—⁠gin-interbyu. Sang Oktubre 1993 gin-agda sila sa Watch­tower Farms, diin si Utod Liverance nagaalagad karon subong isa sang mga instruktor sang Gil­ead.

Nagsunod ang apat-ka-danyag nga presentasyon, nga natig-uluhan sing “Pagpadungog sa mga Takus sa Ila Katigulangon.” Samtang nagatigulang ang mga tawo, ang kahadlok nga sila indi na magamit kag pabay-an na nagapahuyang sang ila pagsalig sa kaugalingon. (Salmo 71:⁠9) Ginpakita sining makatalandog nga presentasyon kon paano ang tanan sa kongregasyon makasakdag sa sinang matutom nga mga tigulang.

Pagkatapos sang nagahinakop nga ambahanon kag pangamuyo, ang tanan nga 6,220 nga nagtambong sa Jer­sey City As­sem­bly Hall kag sa mga tilipunan nga gin-angot sa sini nakabatyag sing bag-o nga kapagsik. Ginapangamuyo naton ang mga gradwado sa ila bag-o nga mga asaynment. Kabay nga padayon nga makaeksperiensia sila sing daku pa nga kalipay nga nagagikan sa paghatag.

[Kahon sa pahina 26]

Estadistika sang Klase

Kadamuon sang mga pungsod nga gintiglawasan: 9

Kadamuon sang mga pungsod nga ginpadalhan: 16

Kadamuon sang mga estudyante: 46

Promedyo nga edad: 33.85

Promedyo nga katuigon sa kamatuoran: 16.6

Promedyo nga katuigon sa bug-os tion nga ministeryo: 12.2

[Kahon sa pahina 27]

Pinasahi nga Igtalupangod sa Malta

GINBUSALAN sang Cristiandad ang kamatuoran sang Biblia sa ­Malta sa sulod sang madamo nga tinuig. Ang katapusan nga mga misyonero gikan sa Gilead nga ginpadala didto, sanday Fred­erick ­Smedley kag Peter ­Bridle, naggradwar gikan sa ikawalo nga klase sang 1947. Apang, gindakop sila kag gintabog gikan sa Malta wala magdugay sang mag-abot sila. Ang 1948 Yearbook of Jehovah’s Witnesses nagareport: “Ang kadamuon sang tion nga ginhinguyang sining duha ka misyonero sa mga korte kag sa mga opisyales sang pungsod pareho lang sa ila ginhinguyang sa paghimo sang ila ministeryal nga mga katungdanan, bangod lamang sang pagpamatok sang Romanong Katoliko nga Hirarkiya. Ang mga pari nagasiling nga ang Malta ila sang mga Katoliko kag ang mga wala sing labot dapat maghalin.” Karon, mga 45 ka tuig sang ulihi, apat ka misyonero gikan sa ika-96 nga klase sang Gilead ang ginpadala sa ­Malta.

[Piktyur sa pahina 26]

Ika-96 nga Naggradwar nga Klase sang Watchtower Bible School of Gilead

Sa listahan sa ubos, ang mga idas nanumeruhan halin sa atubang pa likod, kag ang mga ngalan nalista halin sa wala pa tuo sa tagsa ka idas.

In the list below, rows are numbered from front to back, and names are listed from left to right in each row.

(1) Ehlers, P.; Giese, M.; Sellman, S.; Zusperregui, J.; Rowe, S.; Jackson, K.; Scott, T. (2) Liehr, T.; Garcia, I.; Garcia, J.; Fernández, A.; Davidson, L.; Liidemann, P.; Gibson, L.; Juárez, C. (3) Fouts, C.; Pastrana, G.; Claeson, D.; Fernández, L.; Walls, M.; Dressen, M.; Pastrana, F.; Burks, J. (4) Burks, D.; Scott, S.; Jackson, M.; Mauray, H.; Juárez, L.; Zusperregui, A.; Brorsson, C.; Rowe, C. (5) Sellman, K.; Liidemann, P.; Davidson, C.; Mauray, S.; Walls, D.; Dressen, D.; Schaafsma, G.; Liehr, S. (6) Claeson, T.; Gibson, T.; Giese, C.; Ehlers, D.; Fouts, R.; Schaafsma, S.; Brorsson, L.