Pagpakita sing Cristianong Gugma sa mga Tigulang

SI Samuel Johnson, isa ka awtor sang ika-18 nga siglo, nagsugid sang isa ka istorya tuhoy sa isa ka pamatan-on nga lalaki, nga sang nagaduaw sa mga abyan, nalipat kon diin niya ginbutang ang iya nga kalo. Ang iya pagkamalipaton indi salapakon. “Apang kon ang pareho nga pagkamalipaton masapwan sa isa ka tigulang nga tawo,” padayon ni Johnson, “ang mga tawo magalungolungo kag magasiling, ‘nagamalipaton na sia.’ ”

Ginapakita sang istorya ni Johnson nga ang mga tigulang, ayhan kaangay sang iban nga grupo sang mga menor de edad, napaidalom sa dimakatarunganon nga pagtratar. Bisan nga ang pag-atipan sa mga kinahanglanon sang mga tigulang isa ka mabudlay nga hilikuton, nagadala ini sing mga benepisyo sa tanan nga nadalahig. Ano ang mga kabudlayan kag mga padya, kag ngaa ini nga topiko nagaapektar sa madamo nga tawo?

Suno sa mga estadistika, 6 porsiento sang populasyon sang kalibutan ang nagaedad sing 65 anyos ukon tigulang pa, kag sa manggaranon nga mga pungsod ang porsiento nagataas sing duha ka pilo. Sa European Community, nga nagkilala sa 1993 subong ang “Europeanhon nga Tuig sang mga Tigulang kag Paghiusa sa Ulot sang mga Kaliwatan,” 1 sa 3 ka persona ang nagaedad sing 50 anyos. Didto, kaangay sa kalabanan nga industriyalisado nga mga kadutaan, bangod sang pagnubo sang kadasigon sing pagpamata kag sang nagauswag nga kalawigon sang kabuhi ang kalabanan nga bahin sang populasyon medyo mga gulang-gulang na. Ang pag-atipan sa mga tigulang sa idalom sinang mga kahimtangan isa gid ka daku nga hilikuton. Daw ano ka tuhay sangsa mga kahimtangan sadto sa Nasidlangan!

“Mga Talaguan sing Kaalam”

Ginapakita sang Hand­wör­ter­buch des Bi­bli­schen Al­ter­tums für ge­bil­de­te Bi­bel­le­ser (Dinumaan nga Libro sang Biblia Para sa Edukado nga mga Bumalasa sang Biblia) nga sa dumaan nga tion sang Nasidlangan “ang mga tigulang ginatamod subong manughupot sang pinalatunlaton nga mga kabilihanan sang kaalam kag sing mas mataas nga ihibalo, nga sa amo nga rason ang mga pamatan-on ginalaygayan nga makig-upod sa ila kag magtuon gikan sa ila.” Ang Smith’s Bible Dictionary nagapaathag: “Sa pribado nga kabuhi [ang mga tigulang] ginatamod subong mga talaguan sang ihibalo . . . Ginatugutan sila sang mga [pamatan-on] nga maghatag una sang ila opinyon.”

Ang pagtahod sa mga tigulang makit-an sa Mosaikong Kasuguan sa Levitico 19:32: “Magtindog ka sa atubangan sang ulo nga ubanon, kag tahura ang nawong sang tigulang nga tawo.” Busa ang mga tigulang may yara isa ka pinasahi nga posisyon sa sulod sang katilingban kag ginatamod subong malahalon nga mga pagkabutang. Mahimo nga amo gid sini ang pagtamod sang Moabita nga si Rut sa iya ugangan nga babayi, nga si Noemi.

Malig-on nga namat-od si Rut nga updan si Noemi halin sa Moab padulong sa Israel, kag sang ulihi namati sing maayo sa laygay ni Noemi. Sang didto na sila sa Jerusalem, nakita ni Noemi nga si Jehova ang nagatuytoy sa mga butang kag nian gintudluan niya si Rut kon paano sia maggawi. (Rut 2:20; 3:​3, 4, 18) Ang kabuhi ni Rut nadihon sa teokratiko nga paagi bangod nakatuon sia gikan sa eksperiensiado nga si Noemi. Ang iya ugangan nga babayi isa gid ka talaguan sing kaalam.

Sa kaanggid nga paagi, ang pamatan-on nga Cristianong mga babayi sa karon makabenepisyo paagi sa pagpakig-upod sa tigulang nga mga babayi sa kongregasyon. Ayhan ang isa ka utod nga babayi nagaplano nga mamana ukon nagaatubang sing mabug-at nga problema. Daw ano ka maalamon nga pangayuon ang laygay kag bulig sang isa ka hamtong tigulang nga utod nga babayi nga eksperiensiado sa amo nga butang!

Dugang pa, ang hubon sang mga gulang makabenepisyo kon panginpuslan nila ang eksperiensia sang mga tigulang sa tunga nila. May matun-an kita gikan sa kapaslawan ni Lot sa paghimo sini. Ang inaway sa ulot sang mga manugbantay sang kahayupan nanday Abraham kag Lot nagkinahanglan sing desisyon nga nag-apektar sa tanan. Nakahimo si Lot sing dimaalamon nga pagpili. Daw ano kaayo kuntani kon ginpangayo niya anay ang laygay ni Abraham! Mahimo kuntani nga nakabaton si Lot sing hamtong nga panuytoy kag naluwas ang iya pamilya sa kalisdanan nga nangin resulta sang iya pahinali nga desisyon. (Genesis 13:​7-13; 14:12; 19:​4, 5, 9, 26, 29) Ginapamatian mo bala sing mahalungon ang ginasiling sang hamtong nga mga gulang antes maghimo sang imo kaugalingon nga desisyon sa isa ka problema?

Madamo nga mga tigulang ang may mapinadayunon nga kakugi sa hilikuton ni Jehova, subong nanday Simon kag Ana sang una nga siglo. (Lucas 2:​25, 36, 37) Isa ka tanda sang pagtahod kag larawan sang mainulikdon nga panimuot sa mga tigulang nga ilakip sila sa mga hilikuton sang kongregasyon suno sa ila masarangan, bisan tigulang na sila. Mahimo nga nagakinahanglan ang isa ka pamatan-on sing bulig sa paghanda sing isa ka asaynment sa Teokratikong Eskwelahan sa Pagministro. Ang isa ka maalamon nga gulang mahimo maghinakop nga ang nagakaigo nga magtudlo sa iya amo ang isa ka tigulang nga katapo sang kongregasyon, isa nga may malum-ok nga kaalam, talahuron nga panimuot, kag may daku nga tion.

Apang, ang pag-atipan sa pinasahi nga mga kinahanglanon sang mga tigulang nagadalahig sing kapin pa. Madamo ang ginatublag sing kasubo, kahadlok sa krimen, kag pinansial nga mga kabudlayan. Dugang pa, sa tion nga magluya na ang isa ka tigulang, ini nga mga problema ginaupdan sing nagaluya nga panglawas kag kalisod bangod sang ila nagakadula nga kapagros. Nagakinahanglan sila nian sing dugang nga igtalupangod. Paano dapat maghulag sing bug-os ang mga indibiduwal kag ang kongregasyon?

“Magpakita sing Diosnon nga Debosyon”

Sadtong unang siglo, inspirado nga nagsulat si Pablo sa 1 Timoteo 5:​4, 16: “Kon ang balong babayi may mga kabataan ukon mga apo, patun-a sila sing una sang ila diosnon nga katungdanan ayon sa ila kaugalingon nga panimalay kag sa pagbalos sa ila mga ginikanan, kay ini kalahamut-an sa itululok sang Dios. Kon ang bisan sin-o nga babayi nga matinuuhon may mga himata nga balong babayi, ipasakdag sila sa iya, kag dili pagpabug-atan ang kongregasyon, agod nga masakdag sini ang matuod nga balong mga babayi.” Ang pag-atipan sa tigulang isa ka salabton sang pamilya. Kon ang isa ka katapo sang kongregasyon nagakinahanglan sing bulig pagkatapos nga nahimo na sang pamilya ang tanan nga bulig sa iya, may responsabilidad sa sini ang kongregasyon. Ini nga mga prinsipio wala magbag-o.

Ano ang nakabulig sa mga Cristiano sa pagpakita sing Cristianong gugma sa mga tigulang paagi sa pagpakita sing diosnon nga debosyon sa ila kaugalingon nga mga puluy-an? Talupangda ang masunod nga mga komento sang pila ka mga Saksi nga nakaeksperiensia sing pag-atipan sa mga tigulang.

Regular nga Pagtalupangod sa Espirituwal nga mga Kinahanglanon

“Ang pagbinagbinag sang pang-adlaw-adlaw nga teksto sing tingob isa gid ka mapuslanon nga bulig,” hinumdom ni Felix, nga nagbulig sa iya asawa sa pag-atipan sa iya mga ginikanan. Ang “personal nga mga eksperiensia kag ang mga pagtinguha naangot sa mga prinsipio ni Jehova.” Sa pagkamatuod, sa pag-uyat sa hilikuton nga pag-atipan sa tigulang nga mga himata, ang isa ka panguna nga bahin amo ang paghatag sing ginakinahanglan nga igtalupangod sa ila espirituwal nga kalig-unan. Makatarunganon ini suno sa pinamulong ni Jesus sa Mateo 5:3: “Malipayon ang mga imol sa espiritu.” Ang pang-adlaw-adlaw nga teksto sarang madugangan sang isa ka programa sa pagbasa sang Biblia, paagi sa paghinun-anon sa pasad sa Biblia nga mga publikasyon, kag paagi sa pagpangamuyo. “Daw naluyagan sang mga tigulang ang isa ka sahi sang rutina,” siling ni Peter.

Huo, ang pagkaregular importante sa espirituwal nga mga butang. Indi lamang ang rutina sa espirituwal nga mga butang ang ginaapresyar sang mga tigulang kundi subong man ang rutina sa pang-adlaw-adlaw nga kabuhi. Bisan yadtong may diutay nga kasablagan sarang mapalig-on sing mapinalanggaon nga “magbangon kag magpanapot sing nagakaigo kada adlaw,” siling ni Ursula. Siempre pa, luyag naton likawan ang impresyon nga ginadiktahan naton ang mga tigulang. Ginaako ni Doris nga ang iya maayo sing tuyo nga mga panikasog sing masubo pirme nga nagasayop. “Sayop gid ang tanan ko nga nahimo. Isa ka adlaw ginpangabay ko ang akon amay nga mag-ilis sing bayo adlaw-adlaw. Nian ginpahanumdom ako sang akon iloy: ‘Bana ko gihapon sia!’ ”

Ang mga tigulang nangin mga pamatan-on man sang una, apang isa gid ka mabudlay nga hilikuton para sa mga pamatan-on nga magpakita sing kahanuklog kag pagkamabinatyagon sa mga tigulang. Apang, amo ina ang sekreto agod mahangpan ang ila pinasahi nga mga kinahanglanon. Ang pagtinigulang nagadala sing kapaslawan. Si Gerhard nagapaathag: “Naugot sa iya kaugalingon ang akon ugangan nga lalaki bangod indi na niya mahimo ang tanan nga ginahimo niya anay. Tuman gid kasakit para sa iya nga batunon ang kahimtangan. Nagbag-o ang iya personalidad.”

Bangod sang nagabag-o nga mga kahimtangan, kinaandan para sa mga tigulang nga ipabutyag ang ila mga kapaslawan nga ginabatyag paagi sa pagmulay sa iban, ilabi na yadtong nagaatipan sa iya. Simple lang ang kabangdanan. Ang ila mahigugmaon nga atension nagapahanumdom sa iya sang iya nagakadula nga kapagros. Ano dapat ang imo reaksion sa sining dimakatarunganon nga pagmulay ukon reklamo?

Dumduma, inang negatibo nga mga balatyagon wala nagapabanaag sang pagtamod ni Jehova sa imo mga panikasog. Padayuna ang paghimo sing maayo, kag hupti ang isa ka matinlo nga konsiensia, bisan nga makabaton ka kon kaisa sing indi maayo nga mga komento. (Ipaanggid ang 1 Pedro 2:19.) Ang lokal nga kongregasyon makahatag sing daku nga bulig.

Kon Ano ang Mahimo sang Kongregasyon

Madamong kongregasyon ang may rason nga mangin mapinasalamaton sing tudok sa nagligad nga mga panikasog sang aton pinalangga nga mga tigulang nga mga utod nga lalaki kag babayi. Mahimo nga sila ang nagpasad sing pundasyon para sa kongregasyon, nagtukod sini halin sa pila lamang ka mga manugbantala mga dekada na ang nakaligad. Diin karon ang kongregasyon kon wala ang ila makugi nga mga pagpanghikot sang nagligad kag ayhan, ang pinansial nga bulig sa karon?

Kon ang dugang nga pag-atipan kinahanglanon sa kaso sang isa ka tigulang nga manugbantala, indi kinahanglan nga ipaako lamang sa mga paryente ang responsabilidad. Ang iban makabulig paagi sa pagduludalagan para sa ila, pagluto, pagpaninlo, pagpalakatlakat sa tigulang, pagtanyag sing transportasyon padulong sa Cristianong mga miting, ukon bisan sa pagpakigsugilanon lamang sa ila sa Kingdom Hall. Ang tanan makapakigbahin, apang ang pagkaepisyente kag ang rutina matigayon sing maayo kon ginahilituhog ang mga panikasog.

Ang paghilituhog amo ang isa ka butang nga dapat dumdumon sang mga gulang kon nagaorganisar sing pagbantay nga mga pagduaw. Ang iban nga kongregasyon dalayawon gid sa sini nga bahin, ginapat-od sang mga gulang nga may yara regular nga pagduaw sa mga tigulang kag mga maluya, bisan yadtong ginaatipan sing maayo sang ila mga pamilya. Apang, ginapakita nga ang iban nga mga kongregasyon kinahanglan nga mangin labi ka mabinantayon sang ila obligasyon sa mga tigulang.

Sa iya kapin sa 80 anyos nga edad, ang isa ka matutom nga utod nga lalaki, ginaatipan sang iya anak nga babayi kag umagad nga lalaki, nga nagguwa sa Bethel agod atipanon sia. Apang, ang mga pagduaw sang iban nga mga katapo sang kongregasyon importante gihapon para sa iya. “Sadtong tion nga ginaduaw ko ang nagamasakit,” panalabiton sang utod, “nagapangamuyo ako upod sa ila. Apang wala gid sing isa ang nangamuyo upod sa akon.” Ang mahigugmaon nga pag-atipan sang mga himata wala nagahilway sa mga gulang gikan sa obligasyon nga ‘bantayan ang panong sang Dios nga yara sa ila pag-atipan.’ (1 Pedro 5:⁠2) Dugang pa, yadtong nagaatipan sa mga tigulang nagakinahanglan nga pabakuron kag palig-unon nga padayunon ang ila maayo nga ginahimo.

“Tigulang kag Naayawan”

Si Alexander von Humboldt, isa ka Aleman nga sientipiko sang ika-19 nga siglo, nagaedad sing 89 anyos sang ginpamangkot sia sang isa ka lin-ay kon bala nasapwan niya ang pagtigulang subong makatalaka. “Husto ka,” sabat sang maalamon nga tawo. “Apang amo lamang ini ang paagi agod mabuhi sing malawig.” Sing kaanggid, madamong kauturan nga lalaki kag babayi karon ang nagahimo sing maayo nga halimbawa sa pagbaton sa mga kabudlayan sang pagtigulang subong resulta sang kadungganan sang malawig nga pagkabuhi. Ginapabanaag nila ang panimuot nga ginpakita nanday Abraham, Isaac, David, kag Job, nga nangin mga “tigulang kag naayawan.”​—⁠Genesis 25:8; 35:29; 1 Cronica 23:1; Job 42:⁠17.

Ang pagtigulang nagadala sing hangkat nga batunon ang bulig sing kalahamut-an kag magpabutyag sing sinsero nga pagpasalamat. Maalamon nga kilalahon sang kada isa ang mga limitasyon sang iya kusog. Apang, wala sini ginapunggan ang tigulang nga persona sa pagpanghikot. Si Maria nagaedad na sing kapin sa 90 anyos, apang nagatambong gihapon sia sa mga miting sang kongregasyon kag nagakomento. Paano niya ginahimo ini? “Indi na ako makabasa, apang ginapamatian ko ang The Watchtower sa cassette. Madamo ako sing malipatan, apang nahimo ko nga makahatag pirme sing komento.” Kaangay ni Maria, ang padayon nga pagkamasako sa mga butang nga makapalig-on makabulig sa isa ka tawo nga makapabilin nga aktibo kag mahuptan ang Cristianong personalidad.

Sa idalom sang Ginharian sang Dios, ang pagtigulang madula na. Sa sadto nga tion yadtong mga nagtigulang sa sini nga sistema kag ayhan napatay malipayon nga makahinumdom sang pag-atipan kag igtalupangod nga ginpakita sa ila. Sa tion nga inang mga tigulang makatigayon liwat sing kabuhi kag kapagros, pat-od gid nga magabatyag sila sing mainit nga paghigugma kay Jehova kag sing madalom nga pagpasalamat sa sadtong nag-unong sa ila sa tion sang mga pagtilaw sa ila sa sining daan nga sistema.​—⁠Ipaanggid ang Lucas 22:⁠28.

Kamusta yadtong nagaatipan karon sa mga tigulang? Sa dili madugay, kon ang Ginharian magagahom na sing bug-os sa duta, magabalikid sila nga may kalipay kag kaumpawan nga wala nila ginpahigad ang ila obligasyon apang nagpakita sing diosnon nga debosyon paagi sa pagpakita sing Cristianong gugma sa mga tigulang.​—⁠1 Timoteo 5:⁠4.

[Kahon sa pahina 30]

Pagapasalamatan sang mga Tigulang ang Inyo mga Pagduaw

Daku nga kaaayuhan ang mahimo paagi sa pagplano sing isa ka pagduaw, ayhan sa sulod sang 15 minutos, sa isa ka tigulang pagkatapos sang pagbantala nga hilikuton. Apang mas maayo nga indi lamang pagpalagpatan ang amo nga pagduaw, subong sang ginapakita sang masunod nga eksperiensia.

Sanday Brigitte kag Hannelore magkaupod nga nagabantala, nagpakigsugilanon sa isa ka tigulang nga lalaki sa puwertahan sang iya puluy-an. Nakigsugilanon sa iya ang mga kauturan nga babayi sa lima ka minuto antes madiskobrehan nga isa man gali sia ka Saksi ni Jehova, isa ka katapo sang pareho nga kongregasyon. Daw ano ka makahuluya! Apang ang eksperiensisa natapos sa isa ka positibo nga paagi. Gilayon nga naghimo sing mga plano si Hannelore nga duawon ang utod nga lalaki kag agod buligan sia nga makatambong sa mga miting sang kongregasyon.

Nahibaluan bala ninyo ang ngalan kag direksion sang tagsa ka tigulang nga manugbantala nga nagapuyo sa teritoryo nga inyo ginabantalaan? Sarang bala ninyo mahimos ang isa ka pagduaw? Mahimo nga pagaapresyahon gid ina sing daku.