Ngaa ang mga Saksi Nagapadayon sa Pagduaw?

‘YARI na naman sila! Apang nagduaw na sila pila pa lamang ka semana ang nakaligad!’ Nagalabay bala ina sa imo hunahuna kon ang isa sa mga Saksi ni Jehova magaduaw sa imo? Minilyon sa karon ang tayuyon nga ginaduaw sang mga Saksi ni Jehova. Mahimo ipamangkot mo, Ngaa nagapadayon sila samtang nahibaluan na gid nila nga ang kalabanan nga mga tawo may ila kaugalingon nga relihion kag indi interesado? Ina nga pamangkot nagakabagay sing sabat.

Salabton sa Atubangan sang Dios

Natun-an sang mga Saksi ni Jehova gikan sa Kasulatan nga kutob sang 1914, ang tuig nga ang Inaway Kalibutanon I nagsugod, ginatuman sang mga hitabo sa kalibutan ang mga tagna sa Biblia nahanungod sa katapusan sang karon nga sistema sang kalibutan kag sa nagapakari nga paggahom sang Ginharian sang Dios sa ibabaw sining duta. Ang halos isa ka siglo sang kasingki, pagpatulo sing dugo, kag dumot daw nagpahilayo pa gid sa katawhan gikan sa politikal nga solusyon sang ila mga problema. Ang mga inaway kag terorismo nga nagapalisud gihapon sa tawhanon nga panimalay nagapamatuod nga ang tawhanon nga pagginahom napaslawan sa pagbalhin sang tagipusuon, hunahuna, kag panimuot sang mga tawo. Ang natanom sing tudok nga pagkaakig bangod sa mga hitabo sang nagligad sa maragtas nagahalit gihapon sang mga kaangtanan sa ulot sang etniko, rasa, kag relihioso nga mga grupo. Matuod ina sa nagahilayuay nga mga lugar subong sang Afghanistan, India, Natungang Sidlangan, Naaminhan nga Ireland, Nabagatnan nga Aprika, kag sang anay Yugoslavia. Ano, nian, ang lamang mapinadayunon nga solusyon?

Ano ang Nagapahulag sa mga Saksi?

Nahantop sang mga Saksi ni Jehova nga ang solusyon sang Dios​—⁠ang iya ginsaad nga pagginahom sang Ginharian paagi kay Cristo Jesus⁠—​amo lamang ang makatarunganon nga solusyon. Ginlakip gani ni Jesus ang pagpangabay para sa sinang pagginahom sang Ginharian sa iya bantog nga modelo nga pangamuyo: “Nian, pangamuyo kamo sa sining paagi: ‘Amay namon nga yara sa langit, pakabalaanon ang imo ngalan. Magkari ang imo ginharian. Paghimuon ang imo kabubut-on, kon paano sa langit, amo man sa duta.’ ” Nagapati ang mga Saksi nga ini nga pangamuyo nagapangabay gid sang pagpasilabot sang Dios sa mga hilikuton sang katawhan.​—⁠Mateo 6:​9, 10.

Gani ngaa nagabatyag ang mga Saksi ni Jehova sang kinahanglanon nga magpadayon sa pagpamalaybalay sa panikasog nga mapaalinton ina nga mensahe? Bangod sang duha ka sugo nga ginpatalupangod ni Jesus: “ ‘Dapat mo higugmaon si Jehova nga imo Dios sa bug-os mong tagipusuon kag sa bug-os mong kalag kag sa bug-os mong hunahuna.’ Ini amo ang labing daku kag nahaunang sugo. Ang ikaduha, kaangay sini, amo ini, ‘Dapat mo higugmaon ang imo isigkatawo subong sang imo kaugalingon.’ ”​—⁠Mateo 22:​37-39.

Luyag sang mga Saksi ang pagpakamaayo sang Dios para sa ila kaugalingon, kag bangod ginahigugma nila ang ila mga isigkatawo, luyag nila ina man nga pagpakamaayo para sa ila. Sa amo, nagasunod sang halimbawa ni Jesus, ang dimakagod nga gugma nagatiklod sa ila sa pagduaw sa ila mga isigkatawo. Sa dimagkubos luyag nila sila hatagan sing kahigayunan nga makilala ang “malipayon nga Dios” nga nagsaad sa matinumanon nga katawhan sing isa ka natinluan nga duta.​—⁠1 Timoteo 1:11; 2 Pedro 3:⁠13.

Ang Cristianong misyonero nga si Pablo nagpati sa mga saad sang Dios kag busa nakasulat sia: “Si Pablo, isa ka ulipon sang Dios kag isa ka apostol ni Jesucristo nahisuno sa pagtuo sang mga pinili sang Dios kag sa sibu nga ihibalo sa kamatuoran nga suno sa diosnon nga debosyon pasad sa paglaum nga kabuhi nga walay katapusan nga ginsaad sang Dios, nga indi makabutig, sa wala pa ang tuman kalawig nga panahon.” Huo, ang Dios, “nga indi makabutig,” ‘nagsaad’ sing kabuhi nga walay katapusan sa sadtong mapainubuson nga nagapanikasog nga makilala kag maalagad sia.​—⁠Tito 1:​1, 2; Sofonias 2:⁠3.

Ginabayaran Bala ang mga Saksi?

Kon kaisa ang iban nagasiling nga ang mga Saksi ginabayaran tungod sa ila ministeryo. Sayop gid ini! Hanuot nila nga ginasunod ang pinamulong ni Pablo sa kongregasyon sa Corinto: “Indi kita mga manuglibod sang pulong sang Dios subong sang madamo, kundi bangod sa pagkahanuot, huo, subong sang ginpadala halin sa Dios, sa idalom sang itululok sang Dios, kaupod ni Cristo, kita nagapamulong.”​—⁠2 Corinto 2:⁠17.

Ang iban nga mga lider sang relihion nagawali matuod para sa kuwarta, bayad man ini para sa relihioso nga mga serbisyo ukon pagpasayod sang komersial nga mga negosyo sa ila mga ministeryo sa TV. Ang kalabanan nga mga relihion may ginabayaran nga mga klero.

Sa kabaliskaran, ang mga Saksi wala sing ginabayaran nga mga klero, kag sa masami ang ila mga literatura sa Biblia ginatanyag nga wala sing bili sa hanuot nga mga nagapangita sang kamatuoran, walay sapayan nga madamo sa ila ang napahulag sa paghatag sing boluntaryo nga mga amot. Ini ginagamit sa pagtabon sa mga galastuhan sining bug-os kalibutan nga pagbantala nga hilikuton. Nahisuno sa laygay ni Jesus: “Ginbaton ninyo sa walay bayad, ihatag ninyo sa walay bayad,” ang mga Saksi hilway nga nagagamit sang ila mga manggad, lakip ang ila tion kag enerhiya, sa paghinguyang sing minilyon ka oras kada tuig sa pag-alagad sa Dios. Busa, nagatudlo sila sa mga interesado sa balay-balay kag paagi sa mga pagtuon sa Biblia sa puluy-an.⁠—⁠Mateo 10:8; 28:​19, 20; Binuhatan 20:​19, 20.

Ang mga katunayan nagapamatuod nga wala sing motibo sa kuwarta para sa mga Saksi ni Jehova subong mga indibiduwal, para sa ila lokal nga mga kongregasyon, ukon para sa Watch Tower Society. Wala sing isa ang ginabayaran para magpamalaybalay. Nian paano ginagastuhan ang hilikuton? Paagi sa boluntaryo nga mga amot halin sa mainapresyahon nga mga tawo sa bug-os nga kalibutan. Wala sing ginakolekta nga kuwarta.

Ang Epekto sang Ila Pagpanaksi

Natalupangdan bala sang publiko ang balay-balay nga ministeryo kag dipormal nga pagpanaksi sang mga Saksi? Ang pamatuod sa media nagahatag sing nagalanog nga huo sa sina nga pamangkot. Ang mga Saksi ni Jehova ginasambit sa mga programa sa TV kag mga sine kon may isa nga makita nga nagapanuktok sa ganhaan. Ginasambit sang mga cartoon ang mga Saksi. Ang ila makugi nga hilikuton kilala katama sa bagay nga ginlakip sang mga kartonista sa bug-os nga kalibutan ang pagsambit sa mga Saksi ni Jehova. Daw nagapangyaguta ini, apang masunson ini ginbasi sa isa ka positibo nga sadsaran nga kamatuoran​—⁠nga ang mga Saksi kilala tungod sang ila mapinadayunon nga pagbantala sa balay-balay.​—⁠Binuhatan 20:⁠20.

Ang isa ka cartoon kasan-o lang naglaragway sa isa ka tawo nga nagataklad sa bukid agod magkonsulta sa “guru.” Sia nagsiling: “Sugiri ako sang makatilingala nga mga butang nga mahanabo!” Ano ang ginsabat sang “guru”? “Tan-awon naton . . . May mga tiggulutom, kamatay, kag linog. Ang adlaw magabaylo sa kadudulman, kag ang bulan sa dugo.” Ang tawo namangkot: “Ano bala ang maayong balita?” Sa sini ang “guru” nagsabat: “Pahiran sang Dios ang tagsa ka luha . . . kag wala na sing kamatayon ukon kalisud ukon kasakit!” Ang bisita namangkot: “Paano mo nahibaluan ina nga mga butang?” Ang sabat: “Wala sing tawo nga makalikaw sa mga Saksi ni Jehova!” Kag mahimo nga matuod man ina sa kartonista mismo!

Ang tumalagsahon nga bahin sini nga cartoon kag sang iban pa nga kaangay sini amo nga ginasugid sini indi lamang ang masunson nga pagduaw sang mga Saksi kundi ang paghilisanto man sang ila mensahe. Sa pila lamang ka tinaga, ginhatag sang kartonista ang panguna nga bahin sang ila balay-balay nga pagpanaksi kag ginbalikwat ang mga kasulatan.​—⁠Ipaanggid ang Mateo 24:​7, 29; Bugna 21:​3, 4.

Ang katunayan nga ginasikway sang kalabanan nga mga tawo ang ila mensahe wala nagapaluya sa mga Saksi ukon nagapaugdaw sang ila kakugi. Si apostol Pedro nagpaandam: “Sa katapusan nga mga adlaw ang mga mayubiton magaabot nga may pagyubit, nga nagalakat suno sa ila kaugalingon nga mga kailigbon, kag nagasiling: ‘Diin bala ining ginasaad nga presensia niya? Ti, kutob sang adlaw nga nagtulog sa kamatayon ang aton mga ginikanan, ang tanan nagapadayon subong nga amo sila kutob sa ginsuguran sang pagpanuga.’ ” Walay sapayan sini, ginapahulag sang gugma, ang mga Saksi nagapadayon sa pagduaw sa ila mga isigkatawo kag magapadayon sa paghimo sini tubtob tapuson sang Dios ang karon malaut nga sistema.​—⁠2 Pedro 3:​3, 4.

Si Jesus nagsiling nga sa katapusan nga mga adlaw, ang maayong balita kinahanglan ibantala anay. Para sa dugang nga pag-usisa kon ngaa kag kon paano ibantala ang maayong balita, tan-awa ang duha ka artikulo nga nagasunod.​—⁠Marcos 13:⁠10.

[Mga piktyur sa pahina 9]

Ang mga Saksi ni Jehova wala sing ginaswelduhan nga mga klero nga klase​—⁠ang tanan boluntaryo nga mga ministro