Ang Biblia—Ano ang Matuod nga Kapuslanan Sini?

“ANG Biblia isa ka tanhaga, isa ka libro nga wala gintuyo nga mahangpan,” siling sang isa ka tagbalay. Ang isa pa nagkomento: “Nahibaluan ko nga ang Biblia isa ka importante nga libro, apang diutay lang ang nahibaluan ko nahanungod sini. Mabudlay ini hangpon.”

“Madamo nga Cristiano . . . ang may diutay lamang nga nahibaluan sa Biblia,” siling sang The Toronto Star. Ang isa ka Katoliko nga babayi nagkomento: “Ang paghupot sing Biblia nagapaayo sang akon pamatyag. Nagahatag ini sa akon sing nasulod nga paghidait.” “Ang Biblia kaangay sang isa ka kompas nga nagatuytoy sa isa sa mabalod, maunos nga dagat sang kabuhi padulong sa isa ka duog nga may kalig-unan,” siling sang isa ka mangingisda. Suno sa isa anay ka Hindu, “ang Biblia amo ang Pulong sang Dios kag isa ka dulot sa katawhan kag bulong para sa espirituwal nga mga pag-antos.”

Nanuhaytuhay ang mga opinyon tuhoy sa matuod nga kapuslanan sang Biblia. Apang, ano gid ang matuod nga kapuslanan sini?

Ang Biblia amo ang labing importante kag labing lapnag nga libro. Sa sulod sang mga pahina sini yara ang mga sabat sa makalilibog gid nga mga problema nga naeksperiensiahan na ukon pagaatubangon pa sang tawo. Wala sing tupong ang pagkapraktikal sang laygay sini. Indi malabawan ang mga talaksan sa moral nga ginasakdag sini. Ang mensahe sini gamhanan kag mapuslanon. Ini nga libro nga wala sing kaanggid sa pagkamapuslanon takus gid nga kuhaon sa aton mga bulutangan kag basahon kag usisaon sing maayo.

Sarang naton mabuksan ang Biblia upod ang bug-os nga pagsalig nga ini sibu gid, masaligan, kag matuod. Ginapamatud-an sang sekular nga maragtas ang maragtason nga mga hitabo nga narekord sa sini. Makapila na nga ang mga natukiban sang arkeolohiya nagapamatuod nga ang Biblia may mga katunayan kag maminatud-on. Ang pagkaprangka sang mga 40 ka manunulat sang Biblia nagapakilala sa ila subong mga tawo nga bunayag kag may integridad. Ang nasulod nga paghisantuanay sang Biblia nagapakita nga wala ini maghalin sa tawo. Matuod gid ang mga hitabo nga narekord sa sini. Ang mga tawo nga ginahambal sini matuod gid. Ang mga duog kag mga lokasyon nga ginapatuhuyan sini matuod. Dugang pa, nagaunod ang Biblia sing talalupangdon nga mga tagna nga dimapanghiwala nga nagapakilala kay Jehova nga Dios subong amo ang Awtor sang Biblia.​—⁠2 Pedro 1:⁠21.

Ginpat-od sang aton Dungganon nga Instruktor nga ang ihibalo tuhoy sa iya kabubut-on kag mga katuyuan matigayon sang mga luyag makahibalo sini. Sa kamatuoran, maathag nga ginasugiran kita ni Jehova nga ang kabubut-on niya amo nga ang tanan nga sahi sang tawo magtuon sang iya Pulong kag “makadangat sa sibu nga ihibalo sa kamatuoran.” (1 Timoteo 2:​3, 4; Hulubaton 1:​5, 20-33) Isa ini sang labing importante nga mga butang nga mahimo naton sa aton kabuhi. Isa ini ka hangkat nga obligado kita nga atubangon. Nahangpan ini sang unang mga Cristiano. Ang isa sa ila napahulag sa pagsiling: “Amo ini ang padayon ko nga ginapangamuyo, nga ang inyo gugma magbugana sing labi kag labi pa gid nga may sibu nga ihibalo kag bug-os nga paghantop; agod mapat-od ninyo ang mga butang nga kapin ka importante.”​—⁠Filipos 1:⁠9, 10; Colosas 1:​9, 10.

Ang Biblia amo ang panguna nga paagi sang Manunuga sa pagpaalinton sang iya kabubut-on kag katuyuan sa tawhanon nga pamilya, kag ginapaathag sini kon paano kita sing indibiduwal nagakabagay sa sina nga katuyuan. Narekord sa sini ang nagligad nga mga hitabo, kag nagahatag ini sing maathag nga laragway sang palaabuton. Ginabalay sang Biblia ang husto nga doktrina kag ginatadlong kita sa kon ano ang dapat ukon indi dapat naton tuuhan. (Binuhatan 17:11; 2 Timoteo 3:​16, 17) Nagaaman ini sing mga talaksan sang paggawi nga dapat sundon sang tawo, kag nagatuytoy ini sa mga tawo sa dalanon sang kadalag-an kag kalipay. (Mateo, kapitulo 5 tubtob 7) Ginapadaku sini ang Ginharian sang Dios subong ang lamang nga paglaum para sa tanan nga katawhan kag nagapakita kon paano ang iya panguluhan amo ang instrumento sa pagpakabalaan sang iya ngalan kag pagbindikar sang iya pagkasoberano. Ginapaathag sang Biblia ang dalanon nga dapat naton sundon agod makatigayon sing isa ka suod, mahigugmaon nga kaangtanan sa aton Manughatag-Kabuhi, si Jehova.

Dugang pa, ang Biblia amo lamang ang libro nga magadul-ong sa imo sa pinakadaku nga padya nga mabaton sang katawhan​—⁠ang kabuhi nga walay katapusan sa isa ka paraiso nga duta subong himpit nga mga tawo. (Roma 6:23) Ang bugtong nga Anak ni Jehova nagsiling sa aton: “Nagakahulugan ini sing kabuhi nga walay katapusan, ang ila pagkuha sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:⁠3) Sa pagkamatuod ang isa ka libro nga may subong sina ka daku nga kapuslanan dapat magpahulag sa aton nga magtuon kon ano ang dapat naton himuon agod matigayon ang padya nga kabuhi nga walay katapusan. Ang Biblia isa ka libro nga gintuyo nga mahangpan, subong ipakita sang masunod nga artikulo.