Ang Bug-os nga Kasulatan Mapuslanon sa Pagpanudlo
1 Ang kaalam sang laygay sang Biblia dimatupungan. Ang mga talaksan sa moral nga ginatib-ong sini indi malabawan. Ang mensahe sini gamhanan, “nagahantop sang mga hunahuna kag mga tinutuyo sang tagipusuon.” (Heb. 4:12) Paano. naton mabuligan ang iban nga makita ang kinahanglanon nga usisaon sing maayo ining libro? Ayhan luyag mo. tilawan ang masunod nga mga panugda kon nagatanyag sing New World Translation upod sa libro nga The Bible—Gods Word or Mans? sa Nobiembre.
2 Sanglit madamong tawo ang nagapalibog sa ila sadsaran nga mga kinahanglanon, ayhan ining pagpalapit makakuha sang ila igtalupangod:
◼ “Madamong tawo nga nasugilanon ko sining mga adlaw ang nagapalibog tuhoy sa ila pinansial nga mga balayran. Sin-o sa banta mo ang makahatag sa aton sang labing maayo nga laygay sa sinang mga butang? [Pasabta sia.] Natukiban ko nga ang Biblia nagahatag sing praktikal nga laygay nga makabulig sa aton sa paglikaw sa dikinahanglanon nga mga problema. Ipakita ko sa imo ang isa ka halimbawa.” Buksi ang pahina 163 sang libro nga The Bible—Gods Word or Mans? kag basaha ang 1 Timoteo 6:9, 10, nga ginbalikwat sa parapo 3.
3 Yari ang isa pa ka panugda nga mahimo mo mabinagbinag:
◼ “Sa kada pagbasa naton sing pamantalaan ukon pagpamati sa mga balita makabati kita sing isa pa ka problema nga nagapabalaka sa aton. [Sambita ang pila ka makatulublag nga hitabo nga ginbalita sining karon lang.] Paano naton malandas ang kaangay sini nga mga problema? [Pasabta sia.] Sadto anay sang 1983, ang presidente sang Estados Unidos nagsiling nga ang Biblia may labing halangdon nga mensahe nga nasulat kag nga ‘sa sulod sang mga pahina sini makita ang tanan nga sabat sa tanan nga problema nga naagihan sang tawo.’ Nagapahanumdom ini sa aton sang ginasiling sang Biblia. [Basaha ang 2 Timoteo 3:16, 17.] Ipakita ko sa imo kon ngaa makasalig kita sa Biblia.” Ipakita ang pila ka punto gikan sa Kapitulo 1 sang libro kag itanyag ini.
4 Kon may madamong di-relihioso nga mga tawo sa inyo teritoryo, mahimo nimo tilawan ining pagpalapit:
◼ “Madamong tawo sa sining lugar ang nagatamod sa Biblia subong nagasumpakilay kag subong isa lamang ka mito. Nakita nila ang madamo katama nga malain nga mga butang nga ginahimo sa ngalan sang relihion amo kon ngaa wala na sila nagasalig sa Biblia. Sa katunayan, dugang kag dugang nga mga tawo ang nagapalibog kon bala ang Biblia Pulong sang Dios ukon sang tawo. Ano ang opinyon mo?” Pasabta sia. Depende sa sabat sang tagbalay, buksi ang isa ka bahin sa libro nga The Bible—Gods Word or Mans? nga nagahinun-anon sang mga pagpamatok ukon pagtamod sang tagbalay, kag ipaathag ang isa ukon duha ka punto. Ayhan may higayon ka nga magamit ang mga parapo 27-9, sugod sa pahina 66 sa ubos sang subtitulo nga “Jesus—A Real Person.”
5 Ang pagbulig sa iban nga maapresyar ang matuod nga balor sang Biblia isa sang labing maayong mga butang nga mahimo naton sa pagbulig sa ila; mahimo ini magluwas salig ila kabuhi.—Hul. 1:32, 33.