Ang Pag-antos sang Tawo—Matapos Ayhan Ini?

MAKAKULUGMAT nga mga esena sa tapos maglupok ang isa ka bomba sa isa ka gutok nga tiendahan sa Sarajevo; mga pagpamatay kag kinagubot sa Rwanda; nagutuman nga kabataan nga nagapangayo sing kalan-on sa Somalia; daw nagasalasala nga mga pamilya nga nagaisip sang ila kapierdihan sa tapos sang isa ka linog sa Los An­ge­les; walay mahimo nga mga biktima sang baha sa Ban­gla­desh. Ina nga mga esena sang pag-antos sang tawo nagaatubang sa aton sa adlaw-adlaw sa TV ukon sa mga magasin kag mga pamantalaan.

Ang isa ka masubo nga epekto sang pag-antos sang tawo amo nga bangod sini ang iban nga mga tawo nadulaan sing pagtuo sa Dios. “Ang pagluntad sang malaut amo pirme ang labing daku nga sablag sa pagtuo,” suno sa isa ka pinamulong nga ginbalhag sang isa ka Judiyong komunidad sa Estados Unidos. Ginapatuhuyan sang mga manunulat ang kamatay sa mga kampo konsentrasyon sang mga Nazi sa Ausch­witz kag sa mga bomba subong sang isa nga naglupok sa Hiroshima. “Ang pamangkot kon paano natugutan sang isa ka matarong kag gamhanan nga Dios ang pagpapas sa tuman kadamo nga inosente nga mga kabuhi nagatublag sa konsiensia sang isa ka relihioso nga tawo kag indi gid mahangpan,” siling sang mga awtor.

Sing makapasubo, ang masunson nga mga report tuhoy sa mga trahedya mahimo nga makapakunol sa mga emosyon sang tawo. Basta indi nila mga abyan kag mga himata ang nadalahig, madamo ang halos wala matandog sang pag-antos sang iban.

Apang, ang kamatuoran nga kita may ikasarang sa pagbatyag sing kaluoy, sa dimagkubos para sa aton mga hinigugma, dapat magsugid sa aton sing butang nahanungod sa aton Magbubuhat. Ang Biblia nagasiling nga ang tawo gintuga “sa dagway sang Dios” kag “suno sa kaangay [niya].” (Genesis 1:​26, 27) Wala ini nagakahulugan nga ang mga tawo kaangay sang Dios sa panagway. Wala, kay si Jesucristo nagpaathag nga ang “Dios Espiritu,” kag ang “espiritu wala sing unod kag mga tul-an.” (Juan 4:24; Lucas 24:39) Ang paghimo sa aton sa kaangay sang Dios nagapatuhoy sa aton potensial sa pagpasundayag sing tulad-dios nga mga kinaiya. Busa, sanglit ang normal nga mga tawo nagabatyag sing kaawa sa mga nagaantos, dapat naton ihinakop nga ang Manunuga sang tawo, nga si Jehova nga Dios, mainawaon kag may kahanuklog sa nagaantos nga mga tawo nga iya gintuga.​—⁠Ipaanggid ang Lucas 11:⁠13.

Ang isa ka paagi nga ginpakita sang Dios ang iya kaawa amo ang pag-aman sa katawhan sing isa ka nasulat nga paathag tuhoy sa kabangdanan sang pag-antos. Nahimo niya ini sa iya Pulong, ang Biblia. Maathag nga ginapakita sang Biblia nga gintuga sang Dios ang tawo agod magkalipay sa kabuhi, indi agod mag-antos. (Genesis 2:​7-9) Ginapahayag man sini nga ang una nga mga tawo nagdala sing pag-antos sa ila kaugalingon paagi sa pagsikway sa matarong nga paggahom sang Dios.​—⁠Deuteronomio 32:​4, 5; Roma 5:⁠12.

Walay sapayan sini, naawa gihapon ang Dios sa nagaantos nga katawhan. Maathag ini nga ginpakita sa iya saad nga tapuson ang pag-antos sang tawo. “Yari karon! Ang kayangkayang sang Dios upod sa katawhan, kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”​—⁠Bugna 21:​3, 4; tan-awa man ang Isaias 25:8; 65:​17-25; Roma 8:​19-21.

Nagapamatuod ining matahom nga mga saad nga nahibaluan gid sang Dios ang pag-antos sang tawo kag nga determinado sia nga tapuson ini. Apang, ano gid, una sa tanan, ang ginbangdan sang pag-antos sang tawo, kag ngaa gintugutan sang Dios nga magpadayon ini tubtob sa aton adlaw?

[Credit Line sa pahina 2]

Cover and page 32: Alexandra Boulat/Sipa Press

[Credit Line sa pahina 3]

Kevin Frayer/Sipa Press