Report sang mga Manugbantala sang Ginharian
Ang mga Pamatan-on Nagabantala sang Maayong Balita sa Aprika
WALA madugay pagkatapos sang pagkabanhaw ni Jesus, isa ka Aprikano ang nagduaw sa Jerusalem. Wala ginsiling sang Biblia kon ano ang iya ngalan. Kilala lamang sia subong “isa ka tawo nga may daku nga pagbulut-an sa idalom ni Candace nga hara sang mga Etiopianhon, nga tulugyanan sang tanan niya nga bahandi.” Ngaa ginsambit sia sa Biblia? Bangod gintuytuyan sang isa ka anghel ang Cristianong ebanghelisador nga si Felipe nga ibantala sa iya “ang maayong balita tuhoy kay Jesus.” Ining Etiopianhon nga lalaki amo ang unang Aprikano nga narekord nga nangin katapo sang Cristianong kongregasyon—Binuhatan 8:26-39.
Sa karon, may ginatos ka libo ka mga Saksi ni Jehova sa Aprika. Ginagamit nila ang tagsa ka kahigayunan sa pagpaambit sa iban sang maayong balita tuhoy kay Jesus. Ginapakita sang masunod nga mga eksperiensia nga bisan ang mga pamatan-on sa Aprika nagapakigbahin sa pagbantala sini.
◻Sanday Sandy kag Priya, duha ka 11 anyos nga kabataan nga babayi nga magkaingod sa Nairobi, Kenya. Nalipay sila sa paghampang nga magkaupod kag sa pagbayluhanay sang ila mga libro sang mga sugilanon. Ang mga ginikanan ni Priya nagtuon sang Biblia upod sa mga Saksi ni Jehova. Karon si Priya may pinili nga bag-o nga mga libro nga madugang sa iya koleksion, lakip sang isa nga nangin paborito gid niya, ang Pagpamati sa Dakung Manunudlo, nga ginbalhag sang Watchtower Bible and Tract Society. Ginpaambit niya ang iya Dakung Manunudlo nga libro sa iya abyan nga si Sandy, kag ginsugdan sang duha ka bata nga babayi nga tun-an ini sing tayuyon.
Apang, ang iloy ni Sandy, si Una, nagatambong sa Anglikano nga Simbahan kag indi niya luyag nga magbasa ang iya bata sang mga libro gikan sa mga Saksi ni Jehova. Walay sapayan sing pagpamatok sang iloy, nagpadayon ang pagtuon. Isa ka adlaw ginpangabay ni Sandy ang iya iloy nga magpamati sa ila paghinun-anon bisan kaisa lang. Ang kapitulo nga ginbasa sang mga bata sadto nga adlaw natig-uluhan sing “Duha Ka Lalaki nga Nagsaulog sang Kaadlawan.” Namati si Una kag nakadayaw sing daku. Gilayon niya nga ginpalapitan ang iloy ni Priya upod sa madamo nga pamangkot sa Biblia.
Ginpatigayon sang iloy ni Priya nga may isa ka Saksi nga magtuon sang Biblia kay Una. Wala madugay ginpaambit man ni Una ang iya natun-an sa iya kaupod sa trabaho nga si Dolly. Samtang, ang 11 anyos nga si Priya nagpadayon sa pag-uswag kag namat-od nga simbuluhan ang iya pagdedikar kay Jehova nga Dios paagi sa pagpabawtismo sa isa ka distrito nga kombension sang mga Saksi ni Jehova. Sa amo man nga kombension, sa daku gid nga kalipay ni Priya, ginbawtismuhan man sanday Una kag Dolly!
◻ May pila ka pungsod sa Aprika nga wala marehistro ang hilikuton sang mga Saksi ni Jehova. Sa isa sinang mga pungsod, may kabilugan nga huyog sing pagpahanugot sa relihiosong mga hilikuton kag mga pagtuluuhan sang mga Saksi. Sa isa ka eskwelahan sa amo nga pungsod, ang isa ka pito ka tuig nga bata nga lalaki kag ang iya anom ka tuig nga manghod nga lalaki—mga kabataan sang mga Saksi—gintugutan sa pagpalya sa klase sa tion sang relihiosong mga pagpangamuyo.
Isa ka adlaw ginsugo sang isa ka bag-uhan nga manunudlo ang kabataan nga lalaki sa pagpangamuyo upod sa iban nga kabataan. Namalibad ang magulang nga bata nga lalaki kag ginbakol sia sang manunudlo. Ang iya manghod nga lalaki, ang anom ka tuig nga si Shadrack, namilit nga makigkita sa prinsipal sa iya opisina. Ginpamangkot sia sang prinsipal kag sang bag-uhan nga manunudlo kon ngaa indi niya luyag magbuylog sa iban. Ginpamangkot nila sia kon nahadlok sia nga bakulon sang iya mga ginikanan. Nagsabat sia sa maayo gid nga Arabiko: “Indi, ang Dios nga akon ginasimba indi isa ka Dios sang kagamo kundi sing kahim-ong. Indi ako puwede nga mangin isa sang mga Saksi ni Jehova sa puluy-an kag magbaylo sing relihion kon sa eskwelahan!” Subong resulta, ginhatagan sia sing kahilwayan.
Pagkatapos mabawtismuhan, ang Etiopianhon nga lalaki nga ginsambit sa tulun-an sang Binuhatan “nagpadayon nga malipayon sa iya dalanon.” (Binuhatan 8:39) Amo man sa karon, ang mga manugbantala sang Ginharian sa malapad nga kontinente sang Aprika malipayon sa ila pribilehiyo sang ‘pagbantala sang maayong balita tuhoy kay Jesus.’—Binuhatan 8:35.