Kon San-o Nila Ginabasa Ini kag Kon Paano Sila Nakabenepisyo

Sa Kaagahon:

Ang isa ka magtiayon nga lunsay nagatrabaho, namat-od nga agahan sing dies minutos ang ila pagmata kada aga agod basahon sing dungan ang Biblia antes magdalidali sa paghalin sa balay. Ang ila nabasa nagpahamtang sing basihan para sa maayo nga paghambalanay antes sila maghalin sa balay.

Isa ka gulang sa Ni­ge­ria ang nagagamit sing programa nga nabalay para sa Eskwelahan Teo­kratiko sa Pagministro subong basihan para sa pamilya nga pagbasa sing Biblia sa iya puluy-an. Ginabasa nila ang isa ka bahin sini kada adlaw pagkatapos nila mabinagbinag ang teksto sa sina nga adlaw, ginahimo ini sa masami kon aga. Ginapabulosbulos ang mga kabataan sa pagbasa sa gintangdo nga bahin sa Biblia. Nian ginaagda sila sa pagpautwas sing mga pamangkot sa mga bersikulo nga ginbasa.

Isa ka ginang sang puluy-an sa Japan ang nakabasa sing bug-os nga Biblia isa ka bes kada tuig kutob sang 1985. Ang iya programa amo ang pagbasa sing 20 tubtob 30 minutos sugod sa alas 5:​00 s.a. kada adlaw. Tuhoy sa mga benepisyo, sia nagasiling: “Napalig-on ang akon pagtuo. Nakabulig ini sa akon nga malipatan ang akon balatian kag mahugod ang akon hunahuna sa paglaum nga Paraiso.”

Ang isa ka utod nga babayi nga nangin payunir sa sulod sang 30 ka tuig apang ang iya bana indi isa ka Saksi nagabangon sa alas singko kada aga agod himuon ang iya pagbasa sing Biblia. Ang iya programa nagapangayo sing pagbasa sing halos apat ka pahina gikan sa Hebreong Kasulatan, isa ka kapitulo gikan sa Griegong Kasulatan, kag isa ka bersikulo gikan sa Hulubaton. Nabasa niya ang bug-os nga Biblia kada tuig kutob sang 1959. Sia nagasiling: “Subong resulta sang akon pagbasa, nabatyagan ko nga ginahigugma ako ni Jehova . . . nakatigayon ako sing pagpalig-on, lugpay, kag pagsabdong.” Nagdugang sia: “Ang pagbasa sing Biblia kaangay nga ginapabaskog ni Jehova ang akon kabuhi kada adlaw.”

Isa ka utod nga babayi ang nakatuon sing kamatuoran sa isa ka pungsod diin ginadumilian ang mga Saksi ni Jehova may bana man nga nagapamatok sa iya mga pagtuluuhan. Ginahimo niya ang iya pagbasa sing Biblia halin sa Lunes tubtob sa Biernes, sa ulot sang alas 6:​00 kag alas 7:​00 s.a. Nakahatag ini sa iya sing nasulod nga kusog. Ginabinagbinag kon paano nakabulig sa iya ang iya pagbasa, sia nagasiling: “Matun-an naton nga higugmaon si Jehova kag si Jesus kag magkabuhi sing malipayon, bisan nga may mga problema kag kabudlayan, bangod nakahibalo nga ang mga saad ni Jehova wala nagakapaslawan.”

Isa ka utod nga babayi nga nakatambong sa Pioneer Service School determinado sa pagsunod sa ginhatag nga laygay nga himuon ang pagbasa sing Biblia nga isa ka adlaw-adlaw nga buluhaton. Sang primero, ginahimo niya ini sa ulot sang alas 5:​00 kag alas 6:​00 s.a. Sang nasablagan ini bangod sang bag-o nga trabaho, nagsaylo sia sa alas 9:​00 kag alas 10:​00 s.g. Kon nagautwas ang iban pa makahalangkat nga mga kahimtangan, sia nagasiling, “padayon ko nga ginabulubag-o ang akon iskedyul suno sa mga kahimtangan.”

Sa Hapon:

Duha ka mag-utod sa unod nga mga katapo sang pamilya Bethel sa Bra­zil ang may batasan sa pagbasa sing Biblia sing dungan sa sulod sang mga 20 minutos kada adlaw pagkatapos panyaga. Nabasa na nila ang bug-os nga Biblia sing halos 25 ka beses; apang nagasulat gihapon sila: “Pirme kami may makit-an nga bag-o, gani ang pagbasa sing Biblia indi nangin makatalaka.”

Ang isa ka dalaga nga utod sa Japan naka­realisar nga walay sapayan nga ginpadaku subong isa ka Saksi, indi niya sunado sing maayo ang mga Kasulatan; sang nagpayunir sia, determinado sia nga basahon ang Biblia sing regular. Ginahimo niya karon ang iya pagbasa para sa Eskwelahan Teokratiko sa Pagministro samtang nagabiyahe padulong sa ospital agod magpabulong sing isa ka adlaw kada semana. Sa iya pagpauli, ginapasundan niya ini sing pagpanalawsaw. Sa hingapusan sang semana, nagabasa pa gid sia sing Biblia sing dugang, nagapili sing mga tulun-an suno sa pasunod nga pagkasulat sini.

Ang isa ka 13-anyos nga nakabasa na sing bug-os nga Biblia sing tatlo ka beses nagabasa gihapon sing isa ka kapitulo kada adlaw sa pagpauli niya halin sa eskwelahan. Ini, siling niya, nakabulig sa iya “nga magbatyag sing dugang nga paghigugma kay Jehova.”

Ang isa ka Saksi nga masako gid ang iskedyul subong nagatrabaho, isa ka gulang, isa ka bana, kag isa ka amay nagapamati sa mga audio­cassette sang Biblia samtang nagasakay sa tren padulong sa trabaho. Nian sa puluy-an nagabasa sia sing personal sa amo man nga materyal.

Dugang sa iya personal nga pagbasa, ang isa ka payunir sa Pransia nagapamati sa mga audio­cassette samtang nagahanda sing pagkaon, kon nagamaneho, kon nagabatas sing mabudlay nga mga tion, ukon kon nagalingawlingaw lamang.

Ang isa ka 21-anyos nga payunir sa Japan nagahinumdom nga ginpilit sia sang iya iloy nga magkaon sing espirituwal nga pagkaon kada adlaw, busa ginabasa niya ang Biblia sa adlaw-adlaw, bisan pa nga indi pirme sa pareho nga tion, kutob sang tatlo pa lamang sia ka tuig. Pagkatapos niya mabasa ang bahin nga iya ginpili para sa sina nga adlaw, ginapat-od niya nga mabasa liwat ang yabi nga mga bersikulo, kag nian nagahinguyang sia sing pila ka minuto agod repasuhon sa hunahuna ang iya nabasa.

Ang isa pa ka Saksi, isa ka payunir, nakabasa na sing bug-os nga Biblia sing mga napulo ka beses sang nagligad nga 12 ka tuig. Ang iya bana indi tumuluo, gani ginaiskedyul niya ang iya pagbasa sa hapon.

Sa Gab-i:

Ang isa ka gulang kag regular payunir sa Japan nga nagabasa sang iya Biblia kada gab-i antes magtulog nagahimo sini sa sulod sang walo na ka tuig. Sia nagasiling: “Nanamian gid ako sang mga kasulatan nga nagapakita kon ano ang ginahunahuna ni Jehova, kon ano ang iya ginabatyag sa mga butang, kag kon paano niya ginaatubang ang mga kahimtangan. Paagi sa pagpamalandong sa sining mga kasulatan, nabuligan ako sa paghimo sang hunahuna ni Jehova nga mangin akon kag sa pagbulig sa akon Cristianong mga kauturan nga lalaki kag mga babayi kag mga katapo sang akon pamilya.”

Ang isa ka gulang sa Pransia nagabasa sing Biblia sa sulod sang isa ka oras kada gab-i kutob pa sang 1979. Masami nga may lima ukon anom ka mga badbad ang yara sa iya atubangan agod iya mapaanggiran. Nagsiling sia nga ang iya mahalungon nga pagbasa nakabulig sa iya nga mahangpan “kon paano iaplikar ang ihibalo sa Biblia sa adlaw-adlaw nga mga kahimtangan.” Nakabulig man ini sa iya nga mangin mas epektibo kon nagahatag sing laygay gikan sa Kasulatan.

Sa sulod sang 28 ka tuig, isa ka utod nga lalaki sa Ni­ge­ria ang naghimo nga kinabatasan nga basahon kon gab-i ang teksto sa Kasulatan nga ginaaman sing Pag-usisa sa Kasulatan sa Adlaw-adlaw para sa pagbinagbinag sini sa masunod nga aga. Upod sina, ginabasa niya ang bug-os nga kapitulo sa Biblia nga ginkuhaan sang teksto. Pagkatapos nga nakapangasawa sia, ginpadayon niya ini nga batasan, ginabasa kag ginabinagbinag ang materyal upod sa iya asawa.

Ang isa ka tin-edyer nga ang iya mga ginikanan indi mga Saksi naghimo sing batasan nga magbasa sing lima tubtob napulo ka minuto kada gab-i antes magtulog. Hamili ini nga mga minuto sa iya, kag nagapangamuyo sia antes kag pagkatapos basa. Ang iya tulumuron amo ang paghibalo sing mensahe nga ginpasulat ni Jehova sa mga manunulat sang Biblia.

Ang isa ka minyo nga utod nga lalaki, nga nagaalagad sa Bethel, nagasiling nga nabasa niya ang Biblia isa ka bes kada tuig sa sulod sang nagligad nga walo ka tuig. Nagabasa sia sing 20 tubtob 30 minutos sa gab-i antes magtulog. Bisan pa kon tuman sa iya kalapyo, nasapwan niya nga kon magtulog sia nga wala makabasa, indi sia matulugan. Nagabangon sia kag ginahimo inang espirituwal nga pagkinahanglan.