Ang mga Saksi ni Jehova sa Bug-os nga Kalibutan—Brazil

ANG Brazil isa ka higante nga pungsod sa madamo nga bahin. Sa kadakuon kag populasyon, amo ini ang ikalimang pinakadaku nga pungsod sa kalibutan. Sakop sini ang halos katunga nga kalaparon sang Bagatnan nga Amerika kag ginapuy-an sang mas madamo nga tawo sangsa tanan iban pa nga pungsod sa sinang kontinente kon tingubon. Ang Brazil man ang may pinakadaku nga ­rain for­est sa kalibutan. Nagailig paagi sa sinang kagulangan ang pinakamasulog nga suba sa duta​—⁠ang Amazon.

Ang Brazil higante man sa isa pa ka kahulugan. Ang kadamuon sang mga manugbantala sini sang maayong balita sang Ginharian sang Dios halos 400,000 na, kag sang nagligad nga tuig kapin sa 1,000,000 ang nagtambong sa Memoryal sang kamatayon ni Cristo. Busa ining pungsod tumalagsahon gid kon tuhoy sa pagbantala sang Ginharian nga hilikuton. Ginailustrar ini sang ulihi nga mga eksperiensia.

Nagaalagad Kon Diin Daku Pa ang Kinahanglanon

Si Antonio kag ang iya asawa naghimo sing mabudlay nga desisyon nga bayaan ang ila mga himata kag ang malig-on, daku sing suweldo nga trabaho sa São Paulo agod mag-alagad sa kon diin daku pa ang kinahanglanon para sa mga manugbantala sang Ginharian sa estado sang Minas Gerais. Ang ila teritoryo naglakip sa isa ka hubon sang mga mamumugon sa repinarya sang kalamay. Sa nahaunang adlaw nga nagpanaksi sila didto, siam ka pagtuon sa Biblia ang nasugdan nila. Sa sulod sang 18 ka bulan, nagdumala sila sing kapin sa 40 ka pag­tuon!

Sang primero, ang mga miting ginhiwat didto mismo sa repinarya. Apang, luyag makita sang bag-ong mga manugbantala ang isa ka matuod nga Kingdom Hall. Hanti, isa ka bus ang gin-arkilahan agod dalhon ang 75 ka tawo sa pinakamalapit nga kongregasyon. Nian may kombension; 45 sang bag-ong mga estudyante sang Biblia ang nagtambong kag gin-interbyu. Napulog-lima sa ila ang ginbawtismuhan sadto nga okasyon. Sa pagkama­tuod, nag-alagay ang luha sang ka­lipay!

Amo gihapon nga kompanya sang bus ang gingamit para sa kaanggid nga mga paglakbay, kag mas manubo ang ginsukot sang mga opisyales. Bilang pagpasalamat, ginhatagan ni Antonio sing isa ka bulig sa pagtuon sa Biblia ang tag-iya sang kompanya sang bus. Nagpasugot sia sa pagtuon sa Biblia sadto gid nga gab-i kag ginbawtismuhan pagligad sang pila ka bulan sang makugi nga pagtuon. Sang primero, ang iya asawa namatok sa pagtuon, apang sang ulihi, naghumok ang iya panimuot. Karon isa naman sia ka bawtismado nga Saksi ni Jehova.

Sang Pebrero 1992 naporma ang isa ka kongregasyon nga may 22 ka aktibo nga mga manugbantala. Sang 1994 ining kadamuon nangin 42, nga may 4 ka regular payunir, ukon bug-os tion nga mga manugbantala sang maayong balita. Subong resulta, si Antonio naghinakop: “Nakita namon nga mag-asawa nga kon aton ‘tilawan si Jehova,’ subong sang ginasiling sang Malaquias 3:​10, ‘iula niya sa aton ang mga pagpakamaayo sa bagay nga wala na sing masudlan.’ ”

Pagtanyag sing Literatura sa Biblia

Ayhan ang isa pa ka rason kon ngaa ang pagbantala nga hilikuton madasig nga nagauswag sa Brazil amo nga ang mga Saksi nagatanyag sing literatura sa Biblia sa tanan nga kahigayunan. Halimbawa, ang isa ka kongregasyon nagsulat sa sanga talatapan sang Watch Tower Society nga nagapangabay sing 250 ka kopya sang libro nga Questions Young People Ask​—⁠Answers That Work. Ngaa may amo sina kadamo nga order?

Ang sulat nagapaathag: ‘Ang isa sang mga eskwelahan sa banwa namat-od nga gamiton ining libro subong materyal nga inugtudlo sa isa sang mga klase. Nagdesisyon ang mga awtoridad sang eskwelahan bangod sang dipormal nga pagpanaksi nga ginahimo sang mga ginikanan sang mga estudyante nga mga Saksi ni Jehova kag sang isa sang mga superbisor sang eskwelahan. Kabay nga padayon nga pakamaayuhon ni Jehova ang iya mga alagad samtang nagaaman sila sing maayo nga panudlo paagi sining libro.’ Huo, kag kabay nga padayon nga pakamaayuhon ni Jehova ang maayo nga pag-uswag sang pagbantala sang Ginharian nga hilikuton sa higante nga pungsod sang Brazil.

[Kahon sa pahina 8]

LARAGWAY SANG PUNGSOD

1994 nga Tuig sang Pag-alagad

KATAASON SANG KADAMUON NGA NAGAPANAKSI: 385,099

RATIO: 1 ka Saksi sa 404

TUMALAMBONG SA MEMORYAL: 1,018,210

PROMEDYO NGA PAYUNIR NGA MGA MANUGBANTALA: 38,348

PROMEDYO NGA PAGTUON SA BIBLIA: 461,343

KADAMUON NGA NABAWTISMUHAN: 24,634

KADAMUON SANG KONGREGASYON: 5,928

SANGA TALATAPAN: CESÁRIO LANGE

[Retrato sa pahina 9]

Isa ka sound car nga gingamit sa São Paulo sang mga 1940

[Retrato sa pahina 9]

Pagpanaksi sa Botanical Garden sa Rio de Janeiro

[Retrato sa pahina 9]

Sanga talatapan sa Cesário Lange