Ginalandas sang Gugma ang Dinagakaigo nga Kaimon

“Ang gugma indi maimon.”​—⁠1 CORINTO 13:⁠4.

1, 2. (a) Ano ang ginsiling ni Jesus sa iya mga disipulo nahanungod sa gugma? (b) Posible bala nga mangin mahigugmaon kag maimon, kag ngaa amo sina ang sabat mo?

ANG gugma amo ang tanda nga nagapakilala sa matuod nga Cristianismo. “Sa sini ang tanan makahibalo nga kamo mga disipulo ko, kon maghigugmaanay kamo,” siling ni Jesucristo. (Juan 13:35) Si apostol Pablo gin-inspirar sa pagpaathag kon paano dapat maapektuhan sang gugma ang Cristianong mga kaangtanan. Lakip sa iban nga mga butang, sia nagsulat: “Ang gugma indi maimon.”​—⁠1 Corinto 13:⁠4.

² Sang ginsulat ni Pablo yadtong mga pinamulong, ginapatuhuyan niya ang dinagakaigo nga kaimon. Kon indi kuntani wala sia magsiling sa amo man nga kongregasyon: “Nagakaimon ako sa inyo sa diosnon nga kaimon.” (2 Corinto 11:⁠2) Ang iya “diosnon nga kaimon” napukaw bangod sang mga tawo nga nagaimpluwensia sing malain sa kongregasyon. Nagpahulag ini kay Pablo nga sulatan ang mga Cristiano sa Corinto sang ikaduhang sulat nga nagaunod sing mahigugmaon katama nga laygay.​—⁠2 Corinto 11:​3-5.

Kaimon sa Tunga sang mga Cristiano

3. Paano ang problema may kaangtanan sa kaimon nagluntad sa tunga sang mga Cristiano sa Corinto?

³ Sa iya nahaunang sulat sa mga taga-Corinto, dapat husayon ni Pablo ang problema nga nagaupang sa sining bag-ong mga Cristiano sa paghangpanay sa isa kag isa. Ginapakataas nila ang pila ka tawo, ‘nagpahabok tungod sa isa batok sa iban.’ Nagdul-ong ini sa mga pagbinahinbahin sa sulod sang kongregasyon, nga ang tagsatagsa nagasiling: “Ako kay Pablo,” “Apang ako kay Apolos,” “Apang ako kay Cefas.” (1 Corinto 1:12; 4:⁠6) Sa idalom sang panuytoy sang balaan nga espiritu, nahibaluan ni apostol Pablo ang gamot sang problema. Ang mga taga-Corinto naghulag kaangay sang mahunahunaon sa unod nga katawhan, indi kaangay sang “espirituwal nga mga tawo.” Sa amo, si Pablo nagsulat: “Mga undanon pa kamo. Kay tubtob may kaimon kag pinuyasay sa tunga ninyo, indi bala nga kamo mga undanon kag nagalakat kamo kaangay sang mga tawo?”​—⁠1 Corinto 3:​1-3.

4. Anong ilustrasyon ang gingamit ni Pablo agod buligan ang iya mga kauturan nga mahangpan ang husto nga pagtamod sa isa kag isa, kag anong leksion ang matun-an naton gikan sini?

⁴ Ginbuligan ni Pablo ang mga taga-Corinto nga mahangpan ang husto nga pagtamod sa mga kinaadman kag mga ikasarang sang tagsatagsa sa kongregasyon. Namangkot sia: “Sin-o ang nagahimo sa imo nga tuhay sa iban? Sa pagkamatuod, ano bala ang imo nga wala mo mabaton? Nian, kon imo nabaton ini, ngaa bala nga nagapabugal ka subong nga daw wala mo mabaton?” (1 Corinto 4:⁠7) Sa 1 Corinto kapitulo 12, ginpaathag ni Pablo nga yadtong bahin sang kongregasyon kaangay sang lainlain nga mga bahin sang lawas sang isa ka tawo, subong sang kamot, mata, kag dulunggan. Ginpakita niya nga ginhimo sang Dios ang mga bahin sang lawas sa paagi nga nagaamlig ini sa isa kag isa. Si Pablo nagsulat man: “Kon ang isa ka bahin ginapadunggan, ang tanan nga bahin nagakalipay upod sa iya.” (1 Corinto 12:26) Dapat iaplikar sang tanan nga alagad sang Dios karon ining prinsipio sa ila kaangtanan sa isa kag isa. Sa baylo nga maimon sa iban bangod sang iya asaynment ukon mga hinimuan sa pag-alagad sa Dios, dapat kita magkasadya upod sa iya.

5. Ano ang ginapakita sang Santiago 4:​5, kag paano ginapatalupangod sang Kasulatan ang kamatuoran sining pinamulong?

⁵ Matuod, mas mahapos ini ihambal sangsa himuon. Ang manunulat sang Biblia nga si Santiago nagapahanumdom sa aton nga ang ‘huyog sa pagkahisa’ nagapuyo sa tagsa ka makasasala nga tawo. (Santiago 4:⁠5) Ang nahaunang pagpatay sa tawo natabo bangod nagpadala si Cain sa iya dinagakaigo nga kaimon. Ginhingabot sang mga Filistinhon si Isaac bangod nahisa sila sa iya padayon nga pagbugana. Si Raquel naimon sa pagkamabungahon sa pagpanganak sang iya utod nga babayi. Ang mga anak nga lalaki ni Jacob nahisa sa kahamuot nga ginpakita sa ila manghod nga lalaki nga si Jose. Si Miriam maathag nga naimon sa iya di-Israelinhon nga bayaw nga babayi. Sanday Core, Datan, kag Abiram maimunon nga naghimbon batok kay Moises kag kay Aaron. Si Hari Saul nangimon sa militar nga mga kadalag-an ni David. Walay duhaduha nga kaimon man ang rason sang pirme nga pagbaisay sang mga disipulo ni Jesus sa kon sin-o ang pinakadaku sa tunga nila. Ang katunayan amo nga wala sing dihimpit nga tawo ang hilway sing bug-os sa malaut nga ‘huyog sa pagkahisa.’​—⁠Genesis 4:​4-8; 26:14; 30:1; 37:11; Numeros 12:​1, 2; 16:​1-3; Salmo 106:16; 1 Samuel 18:​7-9; Mateo 20:​21, 24; Marcos 9:​33, 34; Lucas 22:⁠24.

Sa Kongregasyon

6. Paano mapunggan sang mga gulang ang huyog sa pagkahisa?

⁶ Ang tanan nga Cristiano kinahanglan magbantay batok sa kahisa kag dinagakaigo nga kaimon. Nagalakip ini sa mga hubon sang mga gulang nga gintangdo sa pag-atipan sa mga kongregasyon sang katawhan sang Dios. Kon ang isa ka gulang mapainubuson sing hunahuna, indi sia mahinandumon nga magatinguha nga labawan ang iban. Sa pihak nga bahin, kon ang isa ka gulang may tumalagsahon nga mga ikasarang subong organisador ukon publiko nga humalambal, ang iban magakasadya sa sini, nagatamod sini subong isa ka pagpakamaayo sa kongregasyon. (Roma 12:​15, 16) Ang isa ka utod nga lalaki mahimo nga may maayong pag-uswag, nagahatag sing pamatuod nga ginapatubas niya ang bunga sang espiritu sang Dios sa iya kabuhi. Kon nagabinagbinag sang iya mga kalipikasyon, ang mga gulang dapat maghalong nga wala nila ginapadaku ang magagmay nga kakulangan agod may rason nga indi sia marekomendar subong ministeryal nga alagad ukon gulang. Nagapakita ina sing kakulang sang gugma kag pagkamakatarunganon.

7. Anong problema ang mahimo nga magaluntad kon ang isa ka Cristiano makatigayon sing pila ka teokratikong mga asaynment?

⁷ Kon ang isa nagabaton sing teokratikong asaynment ukon espirituwal nga pagpakamaayo, ang iban sa kongregasyon dapat magbantay batok sa pagkahisa. Halimbawa, ang isa ka sangkol nga utod nga babayi mahimo ginagamit sing mas masunson sangsa iban sa paghatag sing mga demonstrasyon sa Cristianong mga miting. Mahimo ini magatuga sing kaimon sa bahin sang pila ka mga utod nga babayi. Ang kaanggid nga problema mahimo nga nagluntad sa tunga nanday Eudias kag Sintique sang kongregasyon sang Filipos. Ang subong sina karon nga mga babayi mahimo nagakinahanglan sing malulo nga pagpalig-on gikan sa mga gulang agod mangin mapainubuson kag mangin ‘kaangay sing hunahuna sa Ginuo.’​—⁠Filipos 2:​2, 3; 4:​2, 3.

8. Sa anong malain nga mga buhat nagadul-ong ang kaimon?

⁸ Ang isa ka Cristiano mahimo nakahibalo sang nagligad nga kakulangan sang isa nga ginapakamaayo karon sing mga pribilehiyo sa kongregasyon. (Santiago 3:⁠2) Bangod sang kaimon, mahimo sia masulay nga ipanugid ini sa iban kag duhaduhaan ang iya katungdanan sa kongregasyon. Supak ini sa gugma, nga “nagatabon sang kadam-an nga mga sala.” (1 Pedro 4:⁠8) Ang maimunon nga hambalanon mahimo makatublag sang paghidait sang kongregasyon. “Kon kamo may mapait nga kaimon kag pagkamabaison sa inyo tagipusuon,” paandam ni disipulo Santiago, “dili kamo magpabugal kag magbutig batok sa kamatuoran. Indi ini ang kaalam nga naghalin sa hitaas, kundi dutan-on, sapatsapaton, yawan-on.”​—⁠Santiago 3:​14, 15.

Sa Inyo Pamilya

9. Paano mapunggan sang mga magtiayon ang mga balatyagon sang kaimon?

⁹ Madamong pag-asawahay ang nagakapaslawan bangod sang dinagakaigo nga kaimon. Ang kulang nga pagsalig sa tiayon indi mahigugmaon. (1 Corinto 13:⁠7) Sa pihak nga bahin, mahimo nga wala makasat-om ang isa sa pagpangimon sang iya tiayon. Halimbawa, ang asawa mahimo mangimon bangod sang pag-ulikid nga ginapakita sang iya bana sa iban nga babayi. Ukon ang bana mahimo mangimon bangod sang madamo nga tion nga ginahinguyang sang iya asawa sa pag-atipan sa imol nga himata. Bangod nahuya sa sinang mga balatyagon, ang mga magtiayon mahimo nga maghipos na lang kag ginapakita ang ila kabang-awan sa mga paagi nga nagapagumon sang problema. Sa baylo, ang maimon nga tiayon kinahanglan magsugid kag magtampad sang iya balatyagon. Nian, kinahanglan nga pakitaan sia sang iya tiayon sing paghangop kag hatagan sing liwat nga pagpasalig sang iya gugma. (Efeso 5:​28, 29) Lunsay nila kinahanglan pahaganhaganon ang ila pagpangimon paagi sa paglikaw sang mga sitwasyon nga nagapaimon. Kon kaisa mahimo buligan sang isa ka Cristianong manugtatap ang iya asawa sa paghangop nga nagahatag sia sing limitado, nagakaigo nga pag-ulikid sa mga katapo sang tuhay nga sekso agod matuman ang iya responsabilidad subong manugbantay sang panong sang Dios. (Isaias 32:⁠2) Sa pagkamatuod, ang gulang dapat maghalong nga wala gid sia nagahatag sing bisan anong nagakaigo nga rason nga kaimunan. Nagakinahanglan ini sing pagkatimbang, nagapat-od nga nagahinguyang sia sing tion sa pagpabakod sang iya kaugalingon nga kaangtanan sa pag-asawahay.​—⁠1 Timoteo 3:5; 5:​1, 2.

10. Paano mabuligan sang mga ginikanan ang ila kabataan sa paglandas sang mga balatyagon sang kaimon?

¹⁰ Dapat man buligan sang mga ginikanan ang ila mga kabataan nga mahangpan ang dinagakaigo nga kaimon. Ang mga kabataan masunson nadalahig sa mga pagsinuay nga nagadul-ong sa mga inaway. Sa masami ang gamot nga kabangdanan amo ang kaimon. Bangod ang mga kinahanglanon sang tagsa ka bata pinasahi, ang mga kabataan indi mahimo pakig-angutan sing alalangay. Dugang pa, dapat mahangpan sang mga kabataan nga ang kada isa sa ila may lainlain nga mga kabakod kag mga kaluyahon. Kon ang isa ka bata pirme ginapalig-on nga himuon ang kaangay sang ginahimo sang iban, mahimo ini magpalambo sing kahisa sa isa kag sing bugal sa isa pa. Hanti, dapat hanason sang mga ginikanan ang ila mga kabataan nga takson ang ila pag-uswag paagi sa pagbinagbinag sa mga halimbawa sa Pulong sang Dios, indi paagi sa pagpaindisanay. Ang Biblia nagasiling: “Indi kita magmangin bugalon, nga nagasulsol sang pagpaindisanay, nga nagahinisaay.” Sa baylo, “pamatud-an sang kada isa kon ano ang iya kaugalingon nga binuhatan, kag nian ang kabangdanan niya sa pagpabugal mangin sa iya kaugalingon lamang kag indi sa pagpaanggid sa iban.” (Galacia 5:26; 6:⁠4) Sing labing importante, dapat buligan sang Cristianong mga ginikanan ang ila mga kabataan sa kalalangan sang regular nga pagtuon sa Biblia, nga nagapatalupangod sang maayo kag sang malain nga mga halimbawa nga mabasa sa Pulong sang Dios.​—⁠2 Timoteo 3:⁠15.

Mga Halimbawa sang Paglandas sa Kaimon

11. Paano si Moises isa ka maayong halimbawa sang paghusay sa kaimon?

¹¹ Indi kaangay sang gutom-sa-gahom nga mga lider sining kalibutan, “karon si Moises amo ang labing mahagop sa tanan nga tawo nga yara sa kadaygan sang duta.” (Numeros 12:⁠3) Sang ang pagpanguna sa mga Israelinhon nangin mabug-at para kay Moises nga himuon sing isahanon, gintugutan ni Jehova ang Iya espiritu nga magpanghikot sa 70 pa ka Israelinhon, naghatag sa ila sing gahom sa pagbulig kay Moises. Sang ang duha sa sining mga lalaki nagsugod sa paghulag kaangay sang mga manalagna, si Josue nagbatyag nga ginabuhinan sini sing dinagakaigo ang pagpanguna ni Moises. Luyag punggan ni Josue ang mga lalaki, apang si Moises mapainubuson nga nangatarungan: “Naimon ka bala tungod sa akon? Indi, kabay kuntani nga ang bug-os nga katawhan ni Jehova mga manalagna, agod nga ibutang ni Jehova ang iya espiritu sa ila!” (Numeros 11:29) Huo, si Moises nalipay sang ang iban nakabaton sing mga pribilehiyo sa pag-alagad. Indi niya maimunon nga luyag ang himaya para sa iya kaugalingon.

12. Ano ang nakabulig kay Jonatan nga likawan ang mga balatyagon sang kaimon?

¹² Ang isa ka maayong halimbawa kon paano ginadaug sang gugma ang posible nga dinagakaigo nga mga balatyagon sang kaimon ginhatag ni Jonatan, ang anak sang Israelinhon nga si Hari Saul. Si Jonatan amo ang masunod sa linya nga magapanubli sang trono sang iya amay, apang ginpili ni Jehova si David, nga anak ni Jesse, agod mangin masunod nga hari. Madamo sang yara sa kahimtangan ni Jonatan ang mahimo nga maimon kay David, nagakabig sa iya subong isa ka karibal. Apang, ang gugma ni Jonatan para kay David nag-upang agod ina nga balatyagon mangibabaw gid sa iya. Sang mabalitaan ang pagkapatay ni Jonatan, si David nakasiling: “Nagakalisod ako tungod sa imo, utod ko nga Jonatan, manayanaya ka gid sa akon. Ang imo gugma sa akon makatilingala, nagalabaw sa gugma sang mga babayi.”​—⁠2 Samuel 1:⁠26.

Ang Labing Talalupangdon nga mga Halimbawa

13. Sin-o ang labing maayo nga halimbawa nahanungod sa kaimon, kag ngaa?

¹³ Si Jehova nga Dios amo ang labing talalupangdon nga halimbawa sang isa nga naglandas bisan sang nagakaigo nga kaimon. Pirme niya ginapunggan sing himpit inang mga balatyagon. Ang bisan anong gamhanan nga pagpasundayag sing balaan nga kaimon pirme nagahisanto sa gugma, katarungan, kag kaalam sang Dios.​—⁠Isaias 42:​13, 14.

14. Anong halimbawa ang ginhatag ni Jesus kabaliskaran kay Satanas?

¹⁴ Ang ikaduhang talalupangdon nga halimbawa sang isa nga nagapakita sing paglandas sa kaimon amo ang hinigugma nga Anak sang Dios, si Jesucristo. “Bisan sa dagway sia sang Dios, wala pagbilanga [ni Jesus] ang pagpakigtupong sa Dios nga butang nga pag-agawon.” (Filipos 2:⁠6) Tuhay gid sa dalanon nga ginhimo sang ambisyuso nga anghel nga nangin si Satanas nga Yawa! Kaangay sang “hari sang Babilonia,” si Satanas maimunon nga naghandum nga “magapakaangay sa Labing Mataas” paagi sa paghimo sang iya kaugalingon subong isa ka kaaway nga dios nga nagapakigsumpong kay Jehova. (Isaias 14:​4, 14; 2 Corinto 4:⁠4) Gintilawan pa gani ni Satanas nga “magyaub [si Jesus] kag maghimo sing isa ka buhat sang pagsimba” sa iya. (Mateo 4:⁠9) Apang wala gid sing mahimo makahaylo kay Jesus gikan sa iya mapainubuson nga dalanon sang pagpasakop sa pagkasoberano ni Jehova. Kabaliskaran kay Satanas, “gin-ula [ni Jesus] ang iya kaugalingon kag nangin dagway sang ulipon kag natawo sa kaanggid sang mga tawo. Labaw pa sa sina, sang nakita niya ang iya kaugalingon sa bayhon sang tawo, nagpaubos sia kag nangin masinulundon tubtob sa kamatayon, huo, sa kamatayon sa usok sang pag-antos.” Ginsakdag ni Jesus ang pagkamatarong sang pagginahom sang iya Amay, nagsikway sing bug-os sang dalanon sang bugal kag kaimon sang Yawa. Tungod sang katutom ni Jesus, “ginbayaw sia sang Dios sa mataas gid nga posisyon kag ginhatagan sia sing ngalan nga labaw sa tanan nga ngalan, agod nga sa ngalan ni Jesus ang tagsa ka tuhod magpilo sa langit kag sa duta kag sa idalom sang duta, kag ang tagsa ka dila magtu-ad nga si Jesucristo Ginuo sa himaya sang Dios nga Amay.”​—⁠Filipos 2:​7-11.

Paglandas sa Imo Kaimon

15. Ngaa dapat kita maghalong sa pagpugong sang mga balatyagon sang kaimon?

¹⁵ Indi kaangay sang Dios kag ni Cristo, ang mga Cristiano indi himpit. Bangod makasasala, kon kaisa mahimo sila magapanghikot bangod sang dimatarong nga kaimon. Sa baylo nga tugutan ang kaimon nga magapahulag sa aton nga mulayon ang isa ka masigkatumuluo nahanungod sa pila ka magagmay nga kakulangan ukon ginahunahuna nga sala, busa, importante nga pamalandungan naton ining inspirado nga mga pulong: “Dili ka maglakas katarong, kag dili ka maglakas kaalam. Ngaa bala laglagon mo ang imo kaugalingon?”​—⁠Manugwali 7:⁠16.

16. Anong maayong laygay tuhoy sa kaimon ang ginhatag sa nagligad nga guwa sining magasin?

¹⁶ Tuhoy sa topiko sang kaimon, ang The Watch Tower sang Marso 15, 1911, nagpaandam: “Bisan pa dapat kita mangin makugi katama, maimon katama sa kausa sang Ginuo, dapat gid naton pat-uron nga indi ini isa ka pribado nga butang; kag dapat binagbinagon kon bala kita ‘mga mahilabtanon’ ukon indi. Nian, dapat man naton binagbinagon kon bala nagakaigo nga butang para sa mga gulang nga talupangdon ini kag kon bala katungdanan naton ukon indi ang magkadto sa mga gulang. Kita tanan dapat nga may daku nga pagkaimon para sa kausa sang Ginuo kag sa hilikuton sang Ginuo, apang maghalong gid nga indi ini ang mapait nga sahi . . . sa iban nga hambal, dapat gid naton pat-uron nga indi ini ang pagkaimon sa iban, kundi pagkaimon para sa iban, para sa iya interes kag labi gid nga kaayuhan.”​—⁠1 Pedro 4:⁠15.

17. Paano naton malikawan ang malain nga mga buhat sang kaimon?

¹⁷ Paano naton malikawan subong mga Cristiano ang bugal, kaimon, kag kahisa? Ang solusyon nasandig sa pagtugot nga mag-ilig sing hilway ang balaan nga espiritu sang Dios sa aton kabuhi. Halimbawa, dapat kita mangamuyo para sa espiritu sang Dios kag para sa bulig nga mapakita ang maayong bunga sini. (Lucas 11:13) Dapat kita magtambong sa Cristianong mga miting, nga ginabuksan sing pangamuyo kag may espiritu kag pagpakamaayo sang Dios sa sini. Dugang pa, dapat naton tun-an ang Biblia, nga ginbugnaan sang Dios. (2 Timoteo 3:16) Kag dapat kita makigbahin sa hilikuton nga pagbantala sang Ginharian nga ginahimo paagi sa gahom sang balaan nga espiritu ni Jehova. (Binuhatan 1:⁠8) Ang pagbulig sa mga masigka-Cristiano nga ginlisdan sang masubo nga eksperiensia isa pa ka paagi sang pagpasakop sa maayong impluwensia sang espiritu sang Dios. (Isaias 57:15; 1 Juan 3:​15-17) Ang makugi nga pagtuman sining tanan nga Cristianong mga obligasyon magabulig sa pag-amlig sa aton gikan sa malaut nga mga buhat sang kaimon, kay ang Pulong sang Dios nagasiling: “Padayon sa paglakat sa espiritu kag indi gid kamo makahimo sing kailigbon sang unod.”​—⁠Galacia 5:⁠16.

18. Ngaa indi kita dapat makigsumpong sing dalayon batok sa dinakagaigo nga mga balatyagon sang kaimon?

¹⁸ Ang gugma amo ang una nga ginlista sa mga bunga sang balaan nga espiritu sang Dios. (Galacia 5:​22, 23) Ang pagpakita sing gugma magabulig sa aton sa pagpugong sang malain nga mga huyog karon. Apang kamusta sa palaabuton? Minilyon ka alagad ni Jehova ang nagalaum nga magkabuhi sa palaabuton nga dutan-on nga Paraiso, diin nagapaabot sila nga pagabayawon sa tawhanon nga kahimpitan. Sa sinang bag-ong kalibutan, ang gugma magapangibabaw kag wala sing isa ang magapadala sa dinagakaigo nga mga balatyagon sang kaimon, kay “ang tinuga gid hilway sa kahiulipnan sang pagkamadinulunton kag makaagom sang mahimayaon nga kahilwayan sang mga anak sang Dios.”​—⁠Roma 8:⁠21.

Mga Punto nga Pamalandungan

◻ Anong ilustrasyon ang gingamit ni Pablo sa pagbulig nga malandas ang kaimon?

◻ Paano matublag sang kaimon ang paghidait sang isa ka kongregasyon?

◻ Paano mahanas sang mga ginikanan ang ila mga kabataan sa pag-atubang sang kaimon?

◻ Paano naton malikawan ang malain nga buhat sang kaimon?

[Retrato sa pahina 16]

Indi pagtuguti ang kaimon sa pagtublag sang paghidait sang isa ka kongregasyon

[Retrato sa pahina 17]

Sarang mahanas sang mga ginikanan ang ila kabataan sa pag-atubang sang mga balatyagon sang kaimon