Kon Paano ang Cristianong mga Manugbantay Nagaalagad sa Inyo

SA MADAMONG lugar posible makita kon paano ginabantayan sang mga manugbantay ang panong. Ginatuytuyan, ginaamligan, kag ginapakaon nila ang mga karnero. Amo ini ang interes sang Cristianong mga gulang, kay ang ila hilikuton nagalakip sang mga hilikuton sa pagbantay. Sa pagkamatuod, responsabilidad nila nga ‘bantayan ang kongregasyon sang Dios’ kag ‘hatagan sing igtalupangod ang bug-os nga panong.’​—⁠Binuhatan 20:⁠28.

Kon ikaw isa ka katapo sang Cristianong kongregasyon, paano ang espirituwal nga mga manugbantay nagaalagad sa imo? Kag paano ikaw magahulag sa ila mga panikasog tungod sa imo? Ngaa ang kongregasyon nagakinahanglan sang ila bulig?

Pangamlig Batok sa Ano?

Sang una nga panahon ang mga leon kag iban pa ilahas nga mga sapat nagabutang sa katalagman sang panong kag nagatukob sang indibiduwal nga karnero. Ang mga manugbantay dapat maghatag sing proteksion. (1 Samuel 17:​34, 35) Ti, si Satanas nga Yawa “nagaluyong kaangay sang nagangurob nga leon, nga nagapangita sang iya tulukbon.” (1 Pedro 5:⁠8) Maakigon sia nga nagapakig-away indi lamang batok sa dutan-on nga organisasyon ni Jehova subong kabilugan kundi subong man batok sa tagsa ka indibiduwal nga alagad sang Dios. Ano ang tulumuron ni Satanas? Luyag niya palas-ayon ang katawhan ni Jehova kag punggan pa gani sila sa ‘pagtuman sa mga sugo sang Dios’ kag sa paghimo “sang hilikuton sa pagpanaksi kay Jesus.”​—⁠Bugna 12:⁠17.

Ginsumbong ni Jehova ang mga manugbantay sang panguluhan sa dumaan nga Israel sing pagpatumbaya bangod ang iya mga karnero nangin “kalan-on sa tanan nga ilahas nga sapat sang latagon.” (Ezequiel 34:⁠8) Apang, ang Cristianong mga gulang may tinagipusuon nga handum sa pag-amlig sa sadtong yara sa sulod sang kongregasyon agod wala sing isa ang madula paagi sa pagpatumbaya ukon bangod sang impluwensia ni Satanas, sang kalibutan, ukon sang apostata nga “mga lobo.” (Binuhatan 20:​29, 30) Paano ginabuligan sang mga manugbantay ang tanan nga katapo sang panong sa paghupot sang ila kaligdong kag magmabinantayon? Ang isa ka paagi amo ang paghatag sing nahanda sing maayo nga Makasulatanhon nga mga pamulongpulong sa plataporma sang Kingdom Hall. Ang isa pa amo ang paagi sa positibo, makapalig-on nga mga pagpakigsugilanon sa wala pa kag pagkatapos sang mga miting. Ang isa pa ka epektibo nga paagi amo ang personal nga pagduaw sa “mga karnero” sa puluy-an. (Ipaanggid ang Salmo 95:⁠7.) Apang ano ang isa ka pagduaw sa pagbantay? Paano dapat himuon ini nga pagduaw? Kag sin-o ang dapat duawon?

Ano ang Pagduaw sa Pagbantay?

Ang pagduaw sa pagbantay indi lamang isa ka sosyal nga pagduaw sa pagpakigsugilanon sa witiwiti nga mga butang. Ang isa ka gulang nagkomento: “Ang kalabanan nga mga manugbantala nalipay gid sa pagbasa sang isa ka kasulatan ukon sa paghinun-anon sang isa ka partikular nga karakter sa Biblia. Sa pagkamatuod, indi lamang ang gulang ang pirme nagahambal. Ang manugbantala sang Ginharian nga ginaduaw kinaandan na nga nalipay sa pagpabutyag sang iya mga panghunahuna sa Biblia, kag nagapabakod ini sang iya kaugalingon nga pagtuo. Ang gulang mahimo magdala sing isa ka magasin nga Lalantawan ukon Magmata! agod hambalan ang isa ka makapalig-on nga artikulo. Ayhan ining espirituwal nga paghinun-anon amo ang nagapakita sa isa ka pagduaw sa pagbantay nga tuhay gikan sa isa ka sosyal nga pagduaw.”

Ang isa pa ka eksperiensiado nga gulang nagkomento: “Antes sang pagduaw, ginahunahuna sang gulang ang kinahanglanon sang manugbantala nga pagaduawon niya. Ano bala ang makapalig-on sa manugbantala? Ang sinsero nga komendasyon importante nga bahin sang pagduaw sa pagbantay, kay nagapabakod ini sa isa ka tawo sa pagbatas.” Huo, ang pagduaw sa pagbantay indi lamang mainabyanon nga pagduaw nga mahimo himuon sang bisan sin-o sa kongregasyon.

Ngaa Ginaduaw Ka sang Manugbantay?

Kon ang isa ka gulang nagaduaw sa isa ka puluy-an, nakahanda sia sa pagpalig-on sa mga masigkatumuluo kag sa pagbulig sa ila nga maglig-on sa pagtuo. (Roma 1:⁠11) Gani kon ginaduaw ka sang isa ukon duha ka gulang, ano ang reaksion mo? Ang isa ka nagalakbay nga manugtatap nagsiling: “Kon ang mga pagduaw sa pagbantay ginahimo lamang kon may problema, ang una nga reaksion sa ginabuko nga pagduaw mahimo amo ang, ‘Ano bala ang nahimo ko nga sala?’ ” Ginailog sang mahigugmaon nga espirituwal nga mga manugbantala si Jehova, nga nagtatap sa salmista kag pirme ‘nagrepresko sang iya kalag,’ labi na sa mga tion sang kalisud kag pinasahi nga kinahanglanon.​—⁠Salmo 23:​1-4.

Ang tulumuron sang isa ka pagduaw sa pagbantay amo ‘ang pagpabakod, indi ang paglumpag.’ (2 Corinto 13:10) Makapalig-on, sa pagkamatuod, ang mga pulong sang apresasyon tungod sa pagbatas, kakugi, kag matutom nga binuhatan sang isa nga ginaduaw. Ang isa ka gulang nagkomento: “Sa pagduaw sa pagbantay, indi maayo ang paghatag sing impresyon nga ang isa nagkari sa tuyo nga tukibon kag hambalan ang mga problema. Sa pagkamatuod, mahimo nga luyag mismo sang manugbantala maghambal tuhoy sa pila ka partikular nga kabudlayan. Kag kon ang karnero nagakiangkiang ukon nagapahilayo sang iya kaugalingon sa iban sa panong, ang gulang dapat maghimo sing pila ka butang sa pagbulig.”

Ang Cristianong mga manugbantay wala sing duhaduha nga magahatag sing pinasahi nga pagtatap kay bisan sin-o nga kaangay sadtong ginlaragway sa sining mga pulong: “Pangitaon ko [Jehova] ang nadula, kag pabalikon ko ang gintabog sa malayo, kag bugkusan ang nabali kag pabakuron ang masakiton.” (Ezequiel 34:16) Huo, ang karnero mahimo nga dapat pangitaon, pabalikon, bugkusan, ukon pabakuron. Ginpatumbayaan sang mga manugbantay sang Israel ining mga responsabilidad. Ang paghimo sina nga hilikuton nagakinahanglan nga ang isa ka manugbantay magapalapit sa isa ka karnero kag magaatipan sang iya mga kinahanglanon. Isa gid ini ka nagapakilala nga bahin sang pagduaw sa pagbantay karon.

Ang Mapagros nga mga Karnero Nagakinahanglan sing Pag-atipan

Magahinakop bala kita nga ang espirituwal nga mga manugbantay karon indi dapat magpakita sing partikular nga pag-atipan sa mapagros nga mga karnero? Ti, kon ang isa ka literal nga karnero may problema, mas mahapos ang pagbulig kon may pagsalig ini sa manugbantay. Ang isa ka libro nagasiling nga “ang mga karnero kinaugali nga nagapalayo sa mga tawo, kag indi pirme mahapos ang pagkuha sang ila pagsalig.” Lakip sa iban nga butang, ang amo man nga libro nagapanugda sining sadsaran nga giya sa pagkuha sang pagsalig sang mga karnero: “Makighambal sa mga sapat sing tayuyon. Maanad sila sa tingog, nga nagapasalig sa ila. Duawa pirme ang mga karnero sa halalban.”​—⁠Alles für das Schaf. Handbuch für die artgerechte Haltung (Every­thing for the ­Sheep. Hand­book on How to Keep Them Pro­perly).

Busa ang personal nga kaangtanan kinahanglanon agod ang isa ka masaligon nga kaangtanan magaluntad sa tunga sang manugbantay kag sang mga karnero. Matuod man ini sa Cristianong kongregasyon. Ang isa ka gulang nagsiling: “Ang makilal-an sa kongregasyon subong isa ka gulang nga nagaduaw sing regular sa mga karnero labi nga nagapahapos sang pagduaw sa isa nga may mga problema.” Hanti, ang espirituwal nga mga manugbantay indi dapat magtinguha sa pagpakaon kag sa pag-atipan sa mga karnero sa Kingdom Hall lamang. Tubtob ginatugot sang mga sirkunstansia, dapat makilala sang mga gulang ang mga karnero paagi sa mga pagduaw sa pagbantay sa ila puluy-an. Ang isa ka Cristiano nagahinumdom nga sang bag-o pa lang sia gintangdo nga gulang, ang nagadumala nga manugtatap nagtelepono kag nangabay sa iya nga duawon kag lugpayan ang isa ka utod nga bag-o lang namatyan sing anak nga babayi sa isa ka makangilidlis nga aksidente sa salakyan. Ang gulang nagabaton: “Kinulbaan gid ako, kay wala pa gid ako makaduaw sa utod kag wala gani ako makatultol kon diin sia nagaistar! Daw ano nga paumpaw sang ang isa ka hamtong nga gulang nagtanyag sa pag-upod sa akon.” Huo, ang mga gulang nagabuligay sa isa kag isa sa mga pagduaw sa pag­bantay.

Sa paghanda kag sa pagpat-od sang mga pagduaw sa pagbantay, ang isa ka gulang mahimo nga pagaupdan sang isa ka ministeryal nga alagad nga nagahimud-os sang “maayo nga buhat” sang isa ka manugtatap. (1 Timoteo 3:​1, 13) Ginapabilihan gid sang isa ka ministeryal nga alagad nga makita kon paano nagaalagad ang isa ka gulang sa mga pagduaw sa pagbantay! Sa amo ang mga gulang kag ministeryal nga mga alagad labi nga nagasuod sa tanan sa kongregasyon, nagapabakod sang higot sang Cristianong gugma kag paghiusa.​—⁠Colosas 3:⁠14.

Pagplano sang Tion Para sa mga Pagduaw sa Pagbantay

Sang gintugyan sang isa ka hubon sang mga gulang ang mga pagduaw sa pagbantay sa pagmatumato sang mga konduktor sa Pagtinuon sa Libro sang Kongregasyon, ang tanan nga manugbantala sa pila ka grupo naduaw sa sulod sang anom ka bulan, samtang wala sing isa ang naduaw sa iban nga mga grupo. Nagpahulag ini sa isa ka gulang sa pagsiling: “Daw subong bala nga ang pila ka gulang nagamatumato kag nagahimo sing madamong hilikuton sa pagbantay, apang ang iban nga mga gulang kinahanglan nga palig-unon sang ila mga masigkagulang sa paghimo sini.” Gani ang iban nga hubon sang mga gulang nagahimo sing mga kahimusan nga maduaw sang mga manugbantay ang tanan nga manugbantala sa sulod sang isa ka gintalana nga tion.

Siempre, mahimo maduaw sang gulang ukon sang bisan sin-o pa nga manugbantala ang isa nga wala na nagahulat para sa himuon nga pinasahi nga mga kahimusan. Antes magduaw sa pagbantay, ang isa ka gulang nagatelepono kag nagasiling, ‘Ginaduaw ko ang isa ka pamilya kada bulan. Mahimo ko bala ikaw maduaw sa sulod sang isa ukon kapin ka oras sa masunod nga bulan? San-o ayhan ini kombeniente para sa imo?”

Mga Pagpakamaayo sang mga Pagduaw sa Pagbantay

Samtang ang mga pag-ipit sining malaut nga sistema padayon nga nagadugang, ang makapalig-on nga mga pagduaw sang mahinangpanon nga mga manugbantay labi pa gid nga mapuslanon. Kon ang tanan sa panong ginahatagan sing pagpalig-on kag bulig paagi sa mga pagduaw sa pagbantay, ang tagsa ka karnero magabatyag nga ginaamligan kag malig-on.

Nahanungod sa isa ka kongregasyon nga ang tanan nga manugbantala sang Ginharian ginaduaw sang mga manugbantay sing regular, ini ginreport: “Ang mga manugbantala nangin tuman ka positibo tuhoy sa mga pagduaw sa pagbantay. Kinaandan na para sa isa ka manugbantala ang magpalapit sa isa sang mga gulang sa pagpamangkot kon san-o sia liwat magaduaw, kay ang manugbantala nalipay sa makapalig-on nga paghambalanay sang nagligad nga pagduaw. Ang mga pagduaw sa pagbantay isa ka butang nga nakabulig sa pagpauswag sang espiritu sang kongregasyon.” Ginapakita sang iban nga mga report nga kon ang mga manugbantay mahigugmaon nga nagaalagad sa sining paagi, ang kongregasyon nagatubo sa gugma, paghiusa, kag kainit. Daw ano nga pagpakamaayo!

Ang Cristianong mga manugbantay nagaduaw agod pauswagon ang espirituwal nga kaayuhan sang mga karnero. Luyag sang mga gulang palig-unon kag pabakuron ang ila mga masigkatumuluo. Kon magabangon ang isa ka mabug-at nga problema nga nagakinahanglan sing laygay sa tion sang pagduaw, ayhan labing maayo nga maghimos para sa paghambalanay sa lain nga tion, labi na kon ang gulang ginaupdan sang isa ka ministeryal nga alagad. Ano man ang matabo, ang pangamuyo sa paghinakop sang pagduaw sa pagbantay naga­kaigo.

Luyag bala sang isa ka espirituwal nga manugbantay magduaw sa inyo puluy-an sa malapit nga palaabuton? Kon amo sina, paabuta sing malipayon ang pagpalig-on nga nagahulat sa imo. Magakari sia sa pag-alagad kag sa pagpabakod sa imo sa imo pamat-od sa pagpabilin sa dalan nga nagadul-ong sa kabuhi nga walay katapusan.​—⁠Mateo 7:​13, 14.

[Kahon sa pahina 26]

Mga Panugda Para sa mga Pagduaw sa Pagbantay

◻ Maghimo sing iskedyul: Maayo ang maghimo sing iskedyul. Kon ang gulang nagaplano sa pag-uyat sing mabug-at nga problema, nagakaigo nga pahibaluon sini sing abanse ang manugbantala.

◻ Paghanda: Binagbinaga ang personalidad kag kahimtangan sang isa. Maghatag sing tinagipusuon nga komendasyon. Himua nga tulumuron ang pagpaambit sing makapalig-on, makapabakod-sing-pagtuo nga “espirituwal nga dulot.”​—⁠Roma 1:​11, 12.

◻ Kon sin-o ang updon: Isa pa ka gulang ukon isa ka kalipikado nga ministeryal nga alagad.

◻ Sa tion sang pagduaw: Ang gulang dapat mangin relaks, mahigugmaon, positibo, kag mapasibusibuon. Kamustaha ang pamilya, ang kahimtangan sini, kag iban pa. Mamati sing maayo. Kon magabangon ang mabug-at nga problema, ayhan labing maayo nga maghimos sing isa ka pinasahi nga pagduaw sa pagbantay.

◻ Kadugayon sang pagduaw: Sunda ang gin-ugyunan nga tion, kag maglakat samtang nalipay pa ang imo tagbalay sa pagduaw.

◻ Paghinakop sa pagduaw: Ang isa ka pangamuyo nagakaigo kag tunay nga ginaapresyar.​—⁠Filipos 4:​6, 7.

[Retrato sa pahina 24]

Ang Cristianong mga manugbantay nagahatag man sing espirituwal nga pangamlig

[Retrato sa pahina 26]

Ang mga pagduaw sa pagbantay nagahatag sing maayong mga kahigayunan para sa espirituwal nga pagpalig-on