Cristianong mga Manugbantay, ‘Pasangkara ang Inyo Tagipusuon’!

SI Jehova amo ang akon Manugbantay. Wala sing makulang sa akon.” Paagi sa sina nga mga pulong, ginpabutyag ni David ang iya bug-os nga pagsalig sa iya Dios. Gintuytuyan sia ni Jehova, sa espirituwal nga paghambal, sa “matambok nga mga halalban” kag sa “natubigan sing maayo nga mga duog-palahuwayan,” nagatuytoy sa iya sa “mga dalanon sang pagkamatarong.” Sang ginlikupan sang mga manugpamatok, nakabaton sing suporta kag pagpalig-on si David, nga nagpahulag sa iya nga magsiling kay Jehova: “Wala ako sing ginkahadlukan nga malaut, kay kaupod ko ikaw.” Bangod may subong sini nga Supremo nga Manugbantay, determinado si David nga “magpuyo sa balay ni Jehova sa kalawigon sang mga adlaw.”​—⁠Salmo 23:​1-6.

Ang bugtong nga Anak sang Dios nakaeksperiensia man sang mahigugmaon nga pag-atipan ni Jehova, kag himpit nga ginpabanaag niya ini nga pag-atipan sa mga pagpakig-angot niya sa iya mga disipulo sang yari sia sa duta. Busa ginpatuhuyan sia sang Kasulatan subong “maayong manugbantay,” “dakung manugbantay,” kag “pangulong manugbantay.”​—⁠Juan 10:​11; Hebreo 13:​20; 1 Pedro 5:​2-4.

Padayon nga ginabantayan ni Jehova kag ni Jesucristo yadtong nagahigugma sa ila. Ang ila pagbantay ginapabutyag, sing bahin, sa mahigugmaon nga aman sang kabulig nga mga manugbantay sa kongregasyon. Ginpatuhuyan ni apostol Pablo ini nga kabulig nga mga manugbantay sang sia nagsiling: “Tatapa ninyo ang inyo kaugalingon kag ang bug-os nga panong, nga sa ila gintangdo kamo sang balaan nga espiritu nga mga manugtatap, agod bantayan ang kongregasyon sang Dios, nga ginbakal niya sang dugo sang iya kaugalingon nga Anak.”​—⁠Binuhatan 20:⁠28.

Ang pagbantay sa panong suno sa kahimusan nga ginpahamtang ni Jehova kag ni Cristo Jesus indi mahapos nga hilikuton, apang labi pa gid ini nga importante sa karon. Hunahunaa ang kapin sa isa ka milyon nga Saksi nga ginbawtismuhan sa sulod sang nagligad nga tatlo ka tuig! Ining mga bag-uhan wala sing espirituwal nga eksperiensia sang tinuig nga pagpanghikot. Hunahunaa, man, ang mga Saksi nga mga bata ukon mga pamatan-on pa. Nagakinahanglan sila sing igtalupangod indi lamang gikan sa ila mga ginikanan kundi gikan man sa kabulig nga mga manugbantay sang kongregasyon.

Sa pagkamatuod, ang tagsa ka Cristiano napaidalom sa mga pag-ipit sa guwa, lakip ang pag-ipit sang katubotubo. Ang tanan dapat manikasog nga batuan ang makusog nga ganyat nga sundon ang dalanon sang kalibutan nga nagapatuyang sa kaugalingon. Sa pila ka pungsod, ang mga manugbantala sang Ginharian mahimo maluyahan sang buot bangod sang indi pagbaton sa ila mensahe. Madamo nga manugbantala ang may malubha nga mga balatian. Ang mga problema sa pinansial mahimo nga magkuha sa iban sang ila kapagsik nga pangitaon sing una ang Ginharian. Ang matuod, tanan kita​—⁠lakip yadtong madugay na sa kamatuoran​—⁠nagakinahanglan kag nagakabagay buligan sang mahigugmaon nga mga manugbantay.

Nagakaigo nga Pangpapagsik

Ang unang-siglo nga mga Cristiano ginlaygayan: ‘Pasangkara ang inyo tagipusuon’! (2 Corinto 6:​11-13) Maayo nga sundon sang Cristianong mga gulang ini nga laygay sa pag-atipan sang ila mga hilikuton sa pagbantay. Paano nila ini himuon? Kag kamusta naman ang ministeryal nga mga alagad, diin ang madamo sa ila posible nga mangin mga manugbantay sa ulihi?

Agod ang Cristianong mga gulang mangin pagpakamaayo sa panong, indi lamang ang pagbatyag sing katungdanan ang dapat magpahulag sa ila. Ginlaygayan sila: “Tatapa ninyo ang panong sang Dios nga yara sa inyo pag-atipan, indi sa pilit, kundi sing kinabubut-on; indi tungod sa di-bunayag nga daug, kundi sing malangkagon.” (1 Pedro 5:2) Busa, ang epektibo nga pagbantay nagalakip sang kahanda kag kalangkag nga alagaran ang iban. (Juan 21:​15-17) Nagakahulugan ini sang paghibalo sa mga kinahanglanon sang mga karnero kag kaabtik sa paghulag. Nagakahulugan ini sang pagpakita sing maayong Cristianong mga kinaiya nga nakilal-an subong bunga sang espiritu sang Dios samtang nagapakig-angot sa iban.​—⁠Galacia 5:​22, 23.

Ang pagbantay kon kaisa nagalakip sang pagduaw sa mga kauturan sa ila mga puluy-an.⁠a Apang ang mga manugbantay nga ‘nagapasangkad sang ila tagipusuon’ nagagamit sa ila kaugalingon. Buot silingon, wala lamang sila nagahimo sing panalagsa nga mga pagduaw sa pagbantay. Ginahimuslan nila ang tanan nga kahigayunan agod bantayan ang iban sa panong.

Paghanas sa Iban nga Mangin mga Manugbantay

Ang bisan sin-o nga utod nga lalaki, walay sapayan sang edad, nga “nagatinguha sa talatapan sang manugtatap . . . nagahandum sang maayong hilikuton.” (1 Timoteo 3:1) Madamo nga ministeryal nga mga alagad ang nagpakita sing kahanda sa pagtinguha sing dugang nga mga pribilehiyo. Busa, ang mga gulang malipayon nga nagabulig sa sining handa nga mga utod nga maghimo sining importante nga tikang sa ‘pagtinguha sa talatapan sang manugtatap.’ Nagakahulugan ini sang paghanas sa ila nga mangin epektibo nga mga manugbantay.

Bangod sang pagsunod sing suod sa mataas nga mga talaksan sang Dios, ang Cristianong kongregasyon ni Jehova wala mapaluya sang butig nga mga manugbantay kaangay sang isa nga ginlaragway sa Ezequiel 34:​2-6. Ini sila talamayon sa panan-aw ni Jehova kag nagakaigo gid ini. Sa baylo nga pakaunon ang panong, ginapakaon nila ang ila kaugalingon. Napaslawan sila sa pagpalig-on sa nagabalatian, sa pag-ayo sa nagamasakit, sa pagbugkos sa nabali, ukon sa pagtipon sa naglinapta ukon sa nadula. Sa pagpanghikot nga mas kaangay sang mga lobo sangsa mga manugbantay, ginpigos nila ang mga karnero. Ang ginpabay-an nga mga karnero naglinapta, nagdalangdalang nga wala sing isa nga magaatipan sa ila.​—⁠Jeremias 23:​1, 2; Nahum 3:​18; Mateo 9:⁠36.

Indi kaangay sadtong di-matutom nga mga manugbantay, ang Cristianong mga manugbantay nagasunod sang halimbawa ni Jehova. Nagabulig sila sa pagtuytoy sa mga karnero sa espirituwal nga “matambok nga mga halalban” kag sa “natubigan sing maayo nga mga duog-palahuwayan.” Nagapanikasog sila nga tuytuyan sila sa “dalanon sang pagkamatarong” paagi sa pagbulig sa ila nga mahangpan ang Pulong ni Jehova sing nagakaigo kag maaplikar ini sing personal. Mahimo nila ini sing epektibo bangod “kalipikado [sila] sa pagtudlo.”​—⁠1 Timoteo 3:⁠2.

Ang kalabanan sang panudlo sang mga gulang ginahimo gikan sa plataporma sa tion sang mga miting sang kongregasyon. Apang, ang mga gulang nagatudlo man sa personal nga paagi. Sa pagkamatuod, ang iban mas maayo sa pagtudlo sa isa ka indibiduwal, samtang ang iban naman mas maayo sa paghatag sing mga pamulongpulong. Apang ang kubos nga ikasarang sa isa ka bahin sang pagtudlo wala gid man nagahimo sa isa nga di-kalipikado subong isa ka manunudlo. Ang mga gulang nagatudlo, nga nagagamit sang tanan nga paagi nga bukas sa ila, lakip ang pagbantay. Ang iban nga pagbantay ginahimo sa pormal nga paagi, halimbawa, sa organisado nga mga pagduaw. Apang ang kalabanan nga pagbantay mahimo himuon sa mas di-pormal nga paagi, nga may daku man nga benepisyo.

Mga Manugbantay kag mga Manunudlo sa Tanan nga Tion

Ang isa ka doktor nagakinahanglan sing ihibalo kag eksperiensia agod mahimo ang iya hilikuton. Apang ginaapresyar sang iya mga pasyente kon magpakita sia sing kaayo, kaawa, kabalaka, kag sinsero nga interes. Ini nga mga kinaiya dapat mangin bahin sang iya personalidad. Ang kaanggid nga mga kinaiya dapat man mangin bahin sang personalidad sang isa ka maayo nga manunudlo kag manugbantay, bahin sang iya adlaw-adlaw nga pagkabuhi. Ang isa ka matuod nga manunudlo handa nga tudluan yadtong sa palibot niya kon kinahanglanon. “Ang pulong sa nagakaigo nga tion O daw ano kaayo!” siling sang Hulubaton 15:⁠23. Ang “nagakaigo nga tion” mahimo nga kon nagahambal sia sa plataporma, kon nagabantala sia sa mga pamalay, ukon kon nagapakighambal sia sa Kingdom Hall ukon sa telepono. Subong man, ang isa ka maayo nga manugbantay nagatinguha nga ipakita ang maayo, mainulikdon nga mga kinaiya sa tanan nga tion, indi lamang kon nagahimo sia sing nagabantay nga mga pagduaw. Bangod ‘ginpasangkad niya ang iya tagipusuon,’ himuslan niya ang tanan nga kahigayunan nga bantayan ang mga karnero, nagahatag sa ila sang pag-atipan nga kinahanglanon nila sa nagakaigo nga tion. Amo ini ang nagahimo sa iya nga hiligugmaon sa mga mata sang mga karnero.​—⁠Marcos 10:⁠43.

Si Wolfgang, nga karon isa na ka gulang, nagahinumdom sang isa ka mainabyanon nga pagduaw nga ginhimo sa iya pamilya sang isa ka ministeryal nga alagad kag sang iya asawa. Sia nagsiling: “Nalipay gid ang kabataan sa natigayon nila nga atension kag sa amon makalilipay nga tion. Ginahambalan pa gihapon nila ini.” Huo, ining ministeryal nga alagad nagpakita nga sia nag-ulikid; ‘ginapasangkad niya ang iya tagipusuon.’

Ang isa pa ka kahigayunan nga ‘mapasangkad sang isa ang iya tagipusuon’ amo ang pagduaw sa nagabalatian, pagpadala sa ila sing malip-ot nga sulat sang pagpalig-on, ukon pagtawag sa ila sa telepono​—⁠bisan ano man nga butang sa pagpahibalo sa ila nga ikaw nagaulikid! Magtanyag sang bulig kon kinahanglanon. Kon luyag nila maghambal, mamati sing maayo. Maghambal tuhoy sa positibo, makalilipay nga teokratikong mga hilikuton sa lokal nga kongregasyon kag bisan diin. Buligi sila nga magkonsentrar sa matahom nga palaabuton nga gintigana para sa mga nagahigugma kay Jehova.​—⁠2 Corinto 4:​16-18.

Dugang sa Nagabantay nga mga Pagduaw

Nagadumdom pirme sang katuyuan sang pagbantay, maathag nga ang paghimo sing pormal nga nagabantay nga mga pagduaw sa puluy-an sang mga kauturan, bisan pa nga importante, bahin lamang sang kon ano ang nadalahig. Ang isa ka mahigugmaon nga manugbantay ‘nagapasangkad sang iya tagipusuon’ paagi sa paghimo sa kaugalingon nga madali palapitan sa idalom sang tanan nga kahimtangan kag sa tanan nga tion. Ang mahigugmaon nga kaangtanan nga ginpalambo niya sa iya mga kauturan nagapasalig sa ila nga sa ital-ital nga mga tion, wala sila sing dapat kahadlukan nga malain, sa pagkahibalo nga ang ila mahigugmaon nga utod, ang Cristianong manugbantay, nagaulikid sa ila.​—⁠Salmo 23:⁠4.

Huo, ‘pasangkara ang inyo tagipusuon,’ kamo tanan nga Cristianong manugbantay. Ipakita ang sinsero nga gugma sa inyo mga kauturan​—⁠palig-una sila, papagsika sila, pabakura sila sa espirituwal sa tanan nga paagi nga masarangan ninyo. Buligi sila nga mangin malig-on sa pagtuo. (Colosas 1:23) Bangod ginpakamaayo sang Cristianong mga manugbantay nga ‘nagpasangkad sang ila tagipusuon,’ ang mga karnero indi makulangan. Mangin determinado sila, subong ni David, nga magpuyo sa balay ni Jehova sa kalawigon sang mga adlaw. (Salmo 23:​1, 6) Ano pa ang pangitaon sang isa ka mahigugmaon nga manugbantay?

[Nota]

[Kahon sa pahina 30]

Ang Cristianong mga Manugbantay

• Nagaalagad sing malangkagon kag kinabubut-on

• Nagapakaon kag nagaatipan sang panong

• Nagabulig sa iban nga mangin mga manugbantay

• Nagaduaw sa masakiton kag nagaatipan sa ila

• Alisto sa pagbulig sa ila mga kauturan sa tanan nga tion

[Mga retrato sa pahina 31]

Nagaalagad man sa latagon, sa mga miting, ukon sa sosyal nga mga okasyon, ang mga gulang pirme mga manugbantay