Maayong Balita sa Unahan!
KITA tanan nahanusbo kon makabati kita sing malain nga balita nga personal nga nagaapektar sa aton. Sa pihak nga bahin, nagakasadya kita kon nagaabot ang maayong balita—balita nga nagapahalipay sa aton ukon sa aton mga hinigugma. Apang kon ang malain nga balita nagaapektar sa iban kag indi sa aton, sa masami ang mga tawo nagapangusyuso; ang pila nalipay pa gani makabalita tuhoy sa kapahamakan sang iban. Nagapaathag ini sing bahin kon ngaa ang malain nga balita mabakal gid!
Sadtong maaga nga bahin sang Inaway Kalibutanon II, may isa ka maathag nga halimbawa sang makasiligni nga pagkawili sa kalamidad sang iban nga tawo. Ang 10,000-tonelada nga armado kag madasig nga bapor-de-gera, ang Graf Spee, ginpabugal sang Aleman nga panong sang mga bapor sang 1939. Senemana nga ginlaglag sining bapor-de-gera ang pangnegosyo nga mga bapor sang mga Alyado sa South Atlantic kag Indian nga kadagatan. Sang ulihi, ginpangita kag ginsalakay sang tatlo ka bapor sang Britanya ang Graf Spee, nga ginbangdan sang pagkawasi sang kabuhi kag ang bapor napilitan sa pagdungka sa pantalan sang Montevideo sa Uruguay agod kaayuhon. Ginpabalik gilayon sang gobierno sang Uruguay ang bapor sa dagat, kay kon indi kuhaon nila ini. Gani ginpaabot ang isa ka inaway nga Britanya ang mahimo nga magadaug.
Pagkabati sini, ang isa ka grupo sang manggaranon nga mga negosyante sa Estados Unidos nag-arkila sing isa ka eroplano, sa bili nga mga $2,500 ang kada tawo, pakadto sa Uruguay agod saksihan ang maduguon nga inaway. Sa ila kabang-awan, ang inaway wala gid matabo. Ginmando ni Adolf Hitler nga lunuron ang Graf Spee paagi sa pagbuho sa sini. Sa baylo, nakita kag nabatian sang linibo ka tumalan-aw nga nagdugok sa pantalan sang Montevideo nga nagapaabot nga makasaksi sang isa ka mapintas nga inaway sa dagat ang isa ka makabulungol nga paglupok nga naglunod sa Graf Spee, nga ginlunod mismo sang mga tripulante sini. Ang kapitan naghikog paagi sa pagtiro sang iya ulo.
Walay sapayan sang daw makasiligni nga samay sa pila ka tawo, ang kalabanan nagaugyon nga mas naluyagan nila ang maayong balita sangsa malain nga balita. Amo man bala sina ang imo balatyagon? Nian, ngaa tuman kadamo nga malain nga balita kag tuman ka diutay nga maayong balita ang ginarekord sang maragtas? Mahimo pa bala mabalhin ang kahimtangan?
Mga Kabangdanan sang Tanan nga Malain nga Balita
Ginasugid sang Biblia ang panahon nga may yara lamang maayong balita. Ang malain nga balita wala pa sadto mahibalui, wala pa mabatii. Sang natapos ni Jehova nga Dios ang iya mga buhat sa pagpanuga, ang planeta nga Duta ginhanda agod puy-an sang tawo kag sapat. Ang rekord sang Genesis nagasugid sa aton: “Nakita sang Dios ang tagsa ka butang nga nahimo niya kag, yari karon! tama gid kaayo.”—Genesis 1:31.
Wala lamang madugay sa tapos gintuga ang tawo kag ang malain nga balita nabatian. Sa wala pa makapanganak sanday Adan kag Eva, ang malain nga balita tuhoy sa pagrebelde batok sa Dios kag sa iya maayo nga kahimusan kag mahim-ong nga uniberso ginreport. Ang mataas sing ranggo nga espirituhanon nga anak nangin maluib sa iya ginasaligan nga posisyon kag madinalag-on nga nahaylo ang nahaunang mag-asawa nga buylugan sia sa iya rebelyuso, maluibon nga dalanon.—Genesis 3:1-6.
Ang bugana nga malain nga balita nga nasaksihan sang katawhan nagsugod sadto nga tion. Indi katingalahan nga ang intriga, limbong, kabutigan, mga walay kamatuoran, kag mga daya makita sing maathag sa malain nga mga balita nga nagbaha sa kalibutan kutob sadto. Ginbasol gid ni Jesucristo si Satanas nga Yawa subong ang manughimuno sang malain nga balita, nagsiling sa relihiosong mga lider sang Iya adlaw: “Kamo iya sang inyo amay nga Yawa, kag buot ninyo himuon ang mga kailigbon sang inyo amay. Sia manugpatay kutob sa ginsuguran, kag wala nagatindog sa kamatuoran, bangod nga walay kamatuoran sa iya. Kon nagabutig sia, nagapamulong sia suno sa iya kinaugali, kay butigon sia kag amay sang kabutigan.”—Juan 8:44.
Samtang ang populasyon sang tawo nagadamo, ang malain nga balita nagadamo man. Sa pagkamatuod, wala ini nagakahulugan nga wala na sing tion sang kasadya kag kalipay, kay madamong butang sa kabuhi ang ginbangdan sang kalipay. Apang, ang panganod sang kasisit-an kag kasubo makita gid sa sulod sang tanan nga kaliwatan sang katawhan tubtob karon.
May isa pa ka sadsaran nga kabangdanan sining masubo nga kahimtangan. Amo ina ang aton napanubli nga huyog sa sala kag kalamidad. Ginapakilala mismo ni Jehova ining dimalikawan nga kabangdanan sang malain nga balita paagi sa pagsiling: “Ang tinutuyo sang tagipusuon sang tawo malaut kutob sa iya pagkapamatan-on.”—Genesis 8:21.
Ngaa Labi nga Nagadugang ang Malain nga Balita?
Apang, may rason kon ngaa ang malain nga balita labi nga nagdugang sa sining ika-20 nga siglo. Ining rason ginhatag sing maathag sa Biblia, nga nagtagna nga ang katawhan sa ika-20 nga siglo magasulod sa isa ka pinasahi nga panag-on sang tion nga nakilal-an subong “ang katapusan nga mga adlaw” ukon “ang tion sang katapusan.” (2 Timoteo 3:1; Daniel 12:4) Ginapakilala sang tagna sang Biblia kag sang kronolohiya sang Biblia ining “panag-on sang katapusan,” nga nagsugod sang 1914. Para sa tul-id Makasulatanhon nga pamatuod sini, tan-awa palihug ang kapitulo 11 sang libro nga Ang Ihibalo nga Nagadul-ong sa Kabuhi nga Walay Katapusan, nga ginbalhag sang Watchtower Bible and Tract Society of New York, Inc.
Ang katapusan nga mga adlaw magasugod paagi sa isa ka hitabo nga awtomatiko nga magapadugang sing labi sang malain nga balita sa duta. Ano ina? Ini amo ang pagtagbong gikan sa langit kay Satanas nga Yawa kag sa iya demonyo nga mga kabon. Mahimo nimo mabasa ining maathag nga paglaragway sa dimalikawan nga pagdugang sang malain nga balita sa Bugna 12:9, 12: “Gintagbong ang dakung dragon, ang orihinal nga man-ug, ang isa nga ginatawag nga Yawa kag Satanas, nga nagadaya sang bug-os napuy-an nga duta; gintagbong sia sa duta, kag ang iya mga anghel gintagbong kaupod niya. . . . ‘Kailo sa duta kag sa dagat, kay ang Yawa nagpanaug sa inyo, nga may dakung kasingkal, sa pagkahibalo nga may malip-ot na lamang sia nga tion.’ ”
Gani sa bisan anong tion nga nabilin pa tubtob ang katapusan nga mga adlaw magadangat sa hingapusan sini, makapaabot kita nga magapadayon ang malain nga balita kag labi pa ini nga magadugang kag magadamo.
Indi Ini Pirme Magaluntad
Sing makalilipay para sa mga pumuluyo sang duta, ang masubo nga kahimtangan nga nagaresulta sa karon nga epidemia sang malain nga balita indi pirme magaluntad. Sa katunayan, makasiling kita sing masinaligon nga ilisipon na lang ang mga adlaw sang dalayon nga malain nga balita. Ang kahimtangan indi wala sing paglaum, walay sapayan kon daw ano man ang kahimtangan. Ang katapusan sang tanan nga malain nga balita malapit na kag pat-od gid nga magaabot sa gintalana nga tion sang Dios.
Makapat-od kita sa sini bangod ang katapusan nga mga adlaw ginatagna nga matapos ukon magahinakop paagi sa paglaglag kag sa pagdula sang Dios sa tanan nga kabangdanan sang malain nga balita. Dulaon niya ang malauton nga mga tawo nga nagasugyot sang pinuyas nga nagadumili sa pagbag-o kag sa pagtalikod gikan sa ila makasasala nga dalanon. Magahingapos ini sa inaway sang dakung adlaw sang Dios nga Labing Gamhanan, nga nakilal-an sing kinaandan subong ang inaway sang Armagedon. (Bugna 16:16) Sa gilayon pagkatapos sina, si Satanas nga Yawa kag ang iya panong sang yawan-on nga mga puwersa pauntaton sa pagpanghikot. Ang Bugna 20:1-3 nagalaragway sang paggapos kay Satanas, ang manughimuno sang tanan malain nga balita. “Nakita ko ang anghel nga nagakunsad gikan sa langit nga may yabi sang kadadalman kag dakung talikala sa iya kamot. Kag gindakop niya ang dragon, ang orihinal nga man-ug, nga amo ang Yawa kag Satanas, kag gingapos sia sing isa ka libo ka tuig. Kag gintagbong sia sa kadadalman kag gintakpan ini kag ginpat-inan sa ibabaw niya, agod nga indi na niya pagdayaan ang mga pungsod.”
Pagkatapos sining dramatiko nga mga hitabo, ang tion sang dimatupungan nga maayong balita magaabot para sa duta kag sa mga pumuluyo sini. Ining mga pumuluyo magalakip sa minilyon nga makalampuwas sa katapusan nga inaway sang Armagedon kag sa binilyon nga pagabanhawon gikan sa ila pagtulog sa kamatayon sa mga lulubngan. Ining maayo nga balita sa tanan ginalaragway sang katapusan nga tulun-an sa Biblia: “Ang kayangkayang sang Dios upod sa mga tawo kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisud ukon paghibi ukon kasakit pa. Ang nagligad nga mga butang nagtaliwan.”—Bugna 21:3, 4.
Mahanduraw mo bala inang makalilipay nga tion? Isa gid ka mahimayaon nga palaabuton diin wala na sing malain nga mga balita. Huo, ang tanan nga malain nga balita madula kag indi na liwat mabatian. Ang maayong balita magapangibabaw nian, kag magabugana sa walay katubtuban.