Ginhimo Nila ang Kabubut-on ni Jehova
Isa ka Diutay nga Lin-ay nga Nagpamulong sing Maisugon
SADTONG ikanapulo nga siglo B.C.E., ang kaangtanan sa ulot sang Israel kag Siria mahuol. Ang hinali nga pagsilabo sang mga inaway kinaandan katama nga sang ang tatlo ka tuig nagligad nga wala sing kasingki, nangin isa ini ka maragtason nga rekord.—1 Hari 22:1.
Makatalagam ilabi na sadto nga mga tion amo ang mga guban sang Sirianhon nga mga buyong, nga ang iban nagadamo sing ginatos ka soldado. Ginasalakay kag ginaati sining mga hangaway ang mga Israelinhon, ginadala sing pakusog kag ginaulipon ang madamo—bisan ang mga kabataan.
Sadtong isa ka tion sang pagpanalakay, “isa ka diutay nga lin-ay” ang walay kaluoy nga ginkuha gikan sa iya mahinadlukon sa Dios nga panimalay. (2 Hari 5:2) Gindala sa Siria, napilitan sia sa pagkabuhi sa tunga sang mga ginakahadlukan niya kag sang mga indi niya kilala—mga tawo nga nagasimba sa adlaw, bulan, bituon, kahoy, tanom, kag bisan sa mga bato. Tuhay gid sila sa iya panimalay kag mga abyan, nga nagasimba sa isa ka matuod nga Dios, si Jehova! Apang, bisan sa sining dumuluong nga palibot, ining lin-ay nagpakita sing tumalagsahon nga kaisog nahanungod sa pagsimba kay Jehova. Subong resulta, ginpabag-o niya ang kabuhi sang isa ka kilala nga opisyal nga nagapangalagad sa idalom sang hari sang Siria. Tan-awon naton kon paano.
Ang Kaisog sa Paghambal
Wala ginhingadlan ang diutay nga lin-ay sa rekord sang Biblia. Nangin kabulig sia sang asawa ni Naaman, ang isganan nga pangulo sang hangaway sa idalom ni Hari Ben-hadad II. (2 Hari 5:1) Walay sapayan nga ginatahod sia sing daku, si Naaman may makangilil-ad nga balatian nga aro.
Ayhan bangod sang matinahuron nga pagginawi sang lin-ay nga ang asawa ni Naaman napahulag sa pagtu-ad sa iya. Mahimo nga ginpamangkot niya ang lin-ay, ‘Ano bala ang ginahimo sa mga aruon sa Israel?’ Ining Israelinhon nga lin-ay wala mahuya sa paghambal sing maisog: “Kabay kuntani nga ang akon ginuo makaatubang sa manalagna nga yara sa Samaria! Ayuhon niya sia sang iya aro.”—2 Hari 5:3.
Ang pinamulong sining lin-ay wala pagkabiga subong binatabata nga sugilanon. Sa kabaliskaran, ginsugid ini kay Hari Ben-hadad, nga nagpalakat kay Naaman kag sa iban pa agod maglakbay sing 150 kilometros padulong sa Samaria sa pagpangita sa sining manalagna.—2 Hari 5:4, 5.
Ang Pag-ayo ni Naaman
Si Naaman kag ang iya tinawo nagkadto kay Hari Jehoram sang Israel, dala ang isa ka sulat sa pagpakilala halin kay Ben-hadad kag ang maarang-arang nga dulot nga kuwarta. Sing dimakapakibot, ang nagasimba sa baka nga si Hari Jehoram wala magpakita sing pagtuo sa manalagna sang Dios kaangay sang ginpakita sang kabulig nga lin-ay. Sa baylo, naghunahuna sia nga nagkari si Naaman agod mangita sing away. Sang mabatian ni Eliseo nga manalagna sang Dios ang pagpangalag-ag ni Jehoram, nagpadala sia gilayon sing mensahe nga nagapangabay nga ipadala sang hari si Naaman sa iya balay.—2 Hari 5:6-8.
Sang mag-abot si Naaman sa balay ni Eliseo, ang manalagna nagpadala sing isa ka mensahero nga nagsiling sa iya: “Magpaligo ka sing makapito sa Jordan kag ang imo unod mauli sa imo; kag mangin matinlo ka.” (2 Hari 5:9, 10) Nagsingkal si Naaman. Nagpaabot sing isa ka milagruso kag madayaw nga pagpakitakita, namangkot sia: “Indi bala ang Abana kag ang Farfar, ang mga suba sang Damasco, maayo pa sa tanan nga tubig sang Israel? Indi bala ako makapaligo sa ila kag magmatinlo?” Nagtalikod si Naaman sa balay ni Eliseo sa kaalipungot. Apang sang nangatarungan ang mga alagad ni Naaman sa iya, nagpasugot sia sang ulihi. Sa tapos makapaligo sing makapito sa Suba sang Jordan, “ang iya unod nag-uli kaangay sa unod sang diutay nga bata, kag nagtinlo sia.”—2 Hari 5:11-14.
Nagbalik kay Eliseo, si Naaman nagsiling: “Yari karon, ginakilala ko nga walay Dios sa bug-os nga duta kundi sa Israel.” Nanumpa si Naaman nga “indi na [sia] magdulot sing halad-nga-sinunog ukon halad sa iban nga mga dios kundi kay Jehova.”—2 Hari 5:15-17.
Leksion Para sa Aton
Wala kuntani magkadto si Naaman kay manalagna Eliseo kon wala mangisog sa paghambal ang isa ka diutay nga kabulig nga lin-ay. Karon, madamong pamatan-on ang nagahimo sing kaanggid. Sa eskwelahan, mahimo ginapalibutan sila sang mga estudyante nga wala sing interes sa pag-alagad sa Dios. Walay sapayan sina, nagahambal sila nahanungod sa ila ginapatihan. Ang pila sa ila nagsugod sa paghimo sini sa tuman pa ka lamharon nga edad.
Binagbinaga si Alexandra, ang singko-anyos nga bata nga babayi sa Australia. Sang nagsugod sia sa pag-eskwela, ang iya iloy naghimo sing iskedyul nga ipaathag ang pagtuluuhan sang mga Saksi ni Jehova sa manunudlo. Apang nakibot ang iloy ni Alexandra. “Madamo na ako sing nahibaluan nahanungod sang inyo pagtuluuhan, subong man sang kon ano ang pagahimuon kag indi pagahimuon ni Alexandra sa eskwelahan,” siling sang manunudlo. Natingala ang iloy ni Alexandra, kay wala pa sing iban nga Saksi nga kabataan sa eskwelahan. “Ginsugiran kami ni Alexandra nahanungod sang iya pagtuluuhan,” paathag sang manunudlo. Huo, ining diutay nga bata nakighambal na sing mataktika sa iya manunudlo.
Ang subong sina nga mga kabataan nagahambal sing maisugon. Busa nagapanghikot sila nahisuno sa Salmo 148:12, 13: “Mga pamatan-on nga lalaki kag mga ulay, mga tigulang nga lalaki kag mga bata. Magdayaw sila sang ngalan ni Jehova, kay ang iya ngalan lamang amo ang ginapakataas. Ang iya himaya yara sa ibabaw sang duta kag sang mga langit.”