Report sang mga Manugbantala sang Ginharian

“Ang Tanan Mo nga Kasuguan Matuod”

WALA madugay antes sang iya kamatayon, ginsugo ni Moises ang katawhan sang Israel nga sundon ang tanan nga kasuguan ni Jehova. Sia nagsiling: “Ituhoy ang inyo tagipusuon sa tanan nga pulong nga ginapamatuod ko sa inyo sining adlaw, nga isugo ninyo sa inyo mga anak sa pagbantay sa paghimo sang tanan nga pulong sini nga kasuguan. Kay ini indi butang nga walay pulos sa inyo, kundi nagakahulugan ini sang inyo kabuhi.”​—⁠Deuteronomio 32:​46, 47.

Ginatos ka tuig sang ulihi, ginpadaku sang salmista ang importansia sang tanan nga panudlo sang Dios sang magsiling sia: “Malapit ka, O Jehova, kag ang tanan mong sugo kamatuoran.” (Salmo 119:​151) Sang una nga siglo, ginpatuhuyan mismo ni Jesus ang kabilihanan sang “tagsa ka pulong nga nagaguwa sa bibig ni Jehova.” (Mateo 4:4) Kag sa idalom sang panuytoy sang Dios si apostol Pablo nagsulat nga “ang bug-os nga Kasulatan ginbugna sang Dios kag mapuslanon.”​—⁠2 Timoteo 3:⁠16.

Sing maathag, ginapaabot ni Jehova nga Dios nga binagbinagon sing serioso sang iya mga alagad ang bug-os nga mensahe nga ginpaalinton sa aton paagi sa mga pahina sang iya Pulong. Wala sing isa ka dinalan sa Biblia nga indi importante. Amo sina ang ginabatyag sang mga Saksi ni Jehova tuhoy sa Pulong sang Dios, subong ginapakita sang masunod nga mga eksperiensia gikan sa Mau­ri­ti­us.

Si G. D​—⁠nagapuyo sa isa ka nabaw-ing nga minuro, diin isa sia ka bantay kon gab-i. Sa sulod sang malawig nga tion, hanuot niya nga ginpangita ang husto nga paagi sang pagsimba sa Dios. Sa kagab-ihon samtang nagabantay sia, ginbasa niya ang Biblia. Sang ulihi nabasa niya ini sing bug-os. Natun-an niya nga ang ngalan sang Dios amo si Jehova​—⁠ang ngalan nga makit-an sing madamo nga beses sa iya Hindi nga Biblia. Nasapwan niya nga ang tulun-an sang Bugna tuman ka makawiwili.

Nian ginpamangkot niya ang iya kaugalingon kon bala may isa ka relihion nga nagatuman sing bug-os sa Biblia. Natalupangdan niya nga ang mga relihion nga iya nakilal-an, nagasunod lamang sa mga bahin sang Biblia. Ginabaton sang iban nga relihion ang Hebreong Kasulatan kag ginasikway ang Cristianong Griegong Kasulatan. Ginasikway sang iban nga relihion ang Hebreong Kasulatan, nga nagahatag lamang sing praktikal nga kabilihanan sa Cristianong Griegong Kasulatan.

Isa ka adlaw si G. D​—⁠nakakita sing magtiayon nga nabasa sang ulan kag gin-agda niya sila nga magpasilong sa iya puluy-an. Mga Saksi ni Jehova sila. Ang asawa nagauyat sing libro nga Revelation​—⁠Its Grand Climax At Hand!⁠a Sa gilayon si G. D​—⁠nangabay sa ila sing libro. Ginhunahuna sang mga Saksi nga ang materyal sa tagna sang Bugna tuman kadalom para sa iya, gani gintanyagan nila sia sing lain nga publikasyon. Apang si G. D​—⁠namilit nga matigayon ang Revelation nga libro.

Sang matigayon niya ang iya kopya, gilayon niya nga ginbasa ang libro. Nian ginbaton niya ang isa ka pagtuon sa Biblia upod sa mga Saksi ni Jehova. Wala madugay nakumbinsi sia sang katunayan nga ginatahod sing daku sang mga Saksi ni Jehova ang Biblia. Nagsugod sia sa pagtambong sa mga miting sing regular sa Kingdom Hall sang mga Saksi ni Jehova, diin ang Hebreo kag Cristianong Griegong Kasulatan pareho nga ginatun-an sing mahalungon. Isa na sia karon ka manugbantala sang Ginharian kag isa ka bawtismado nga katapo sang Cristianong kongregasyon.

[Footnote]