Indi Mo Luyag Wasihon Ini!

WASIHON ang ano? Ang nagahilapit nga “Mga Mensahero sang Diosnon nga Paghidait” nga Distrito nga Kombension sang mga Saksi ni Jehova! Sa kalabanan nga duog ang kombension magasugod sa alas 8:30 sa Biernes sang aga paagi sa isa ka ambahanon. Sa tapos makapamati sa makapalig-on-pagtuo nga mga interbyu sa bahin nga “Pagpamati Gikan sa Makugi nga mga Manugbantala sang Paghidait,” mabatian ninyo ang makapalig-on nga pamulongpulong “Ano ang Ginapatuman sang Dios sa Aton?”

Ang isa ka daku nga bahin sang programa sa Biernes sang hapon amo ang makakulunyag nga key­note ad­dress “Ang Aton Katungdanan Subong mga Mensahero sang Diosnon nga Paghidait.” Nian ang bahin nga “Pagbulig sa Iban nga Matun-an ang mga Ginapatuman sang Dios” magahatag sing mga panugda kon paano tudluan ang mga bag-uhan. Pagasundan ini sing sibu sa tion nga simposium “Mag-andam sa Natago nga mga Siod sang Ka­lingawan.” Ang programa sa Biernes magahinakop paagi sa mga pamulongpulong “Sumpunga ang Yawa​—⁠Indi Pagtuguti nga May Kaagaw” kag “Matutom nga Pagsakdag sa Integridad sang Pulong sang Dios.”

Ipadaku sang programa sa Sabado sang aga ang pagkaimportante sang paghimo-disipulo nga hilikuton paagi sa tatlo ka bahin nga simposium “Mga Mensahero nga Nagadala sing Maayong Balita sang Paghidait.” Ang sesyon magahinakop paagi sa mga diskurso “Malipayon nga Paghatag sa Sulod sang Organisasyon ni Jehova” kag “Ang Kabuhi kag Paghidait Paagi sa Dedikasyon kag Bawtismo,” nga sa tapos sini may kahigayunan ang mga bag-uhan nga disipulo nga mabawtismuhan.

Sa Sabado sang hapon, pagasabton sang presentasyon “Binagbinaga ang mga Panghunahuna ni Jehova sa mga Butang” ang mga pamangkot subong sang ‘Nagapakigbahin bala ang mga Cristiano sa pagpain nga hilikuton karon?’ kag ‘Ano ang pagtamod sang Dios sa pamatbat nga kamatayon?’ Mabatian man ninyo ang makapulukaw duha ka bahin nga simposium “Ang Dios sang Pag­hidait Nagaulikid sa Imo.” kag ilabi na gid ang nagahinakop nga pamulongpulong “Tinguhai ang Diosnon nga Paghidait sa Pamilya.”

Ang programa sa Domingo sang aga magalakip sang tatlo ka bahin nga simposium “Pagkilala sa Husto nga Sahi sang mga Mensahero” kag sang pamulongpulong “Pamatii kag Tumana ang Pulong sang Dios.” Ang programa sa aga magahinakop paagi sa isa ka ­full-­costume nga drama nga magapakita sing malahalon nga mga leksion gikan sa rekord sang Biblia nahanungod kay Hukom Gideon.

Ang hingapusan nga sesyon sa Domingo sang hapon magapadaku sang diskurso publiko, nga natig-uluhan “Matuod nga Paghidait sa Ulihi!​—⁠Gikan Diin?” Sa katapusan, ang makapahulag nga pamulongpulong “Mag-uswag Subong mga Mensahero sang Diosnon nga Pag­hidait” magatapos sang kombension.

Maghimo na karon sing mga plano sa pagtambong. Agod makit-an ang duog nga malapit sa inyo ginapuy-an, makig-angot sa lokal nga Kingdom Hall sang mga Saksi ni Jehova ukon magsulat sa mga manugbalhag si­ning magasin. Ang Disiembre 8 nga guwa sang Magmata! magalista sang mga direksion sang tanan nga duog sang kombension sa Pilipinas.