Madumduman Mo Bala?
Ginpabilihan mo bala ang pagbasa sang ulihi nga mga guwa sang Ang Lalantawan? Ti, tan-awa kon masabat mo ang masunod nga mga pamangkot:
◻ Ang mga pinamulong bala ni Jesus, “Kon patawaron ninyo ang mga sala sang bisan sin-o nga tawo, patawaron ini sa ila,” nagakahulugan nga ang mga Cristiano mahimo makapatawad sang mga sala? (Juan 20:23)
Wala sing Makasulatanhon nga sadsaran sa paghinakop nga ang mga Cristiano sa kabilugan, ukon bisan ang gintangdo nga mga gulang sa kongregasyon, may balaan nga awtoridad sa pagpatawad sang mga sala. Ang konteksto sang pinamulong ni Jesus daw nagapakita nga ang mga apostoles naghatag sa ila paagi sa pagpanghikot sang espiritu sing pinasahi nga awtoridad sa pagpatawad ukon sa pagpabilin sang mga sala. (Tan-awa ang Binuhatan 5:1-11; 2 Corinto 12:12.)—4/15, pahina 28.
◻ Ano ang talalupangdon nahanungod sa pagbadbad ni J. J. Stewart Perowne sang libro sang Mga Salmo, nga ginbalhag primero sang 1864?
Sa iya badbad ginpanikasugan ni Perowne nga sundon “sing suod ang porma sang Hebreo, sa katinagaan sini kag sa gramatiko nga pagkahuman sang mga bahin.” Paagi sa paghimo sini ginpaboran niya ang pagpasag-uli sang balaan nga ngalan sa porma nga “Jehova.”—4/15, pahina 31.
◻ Anong panuytoy ang ginhatag ni Jesus sa iya mga sumulunod tuhoy sa ila mga pagpakig-angot sa mga panguluhan sang kalibutan?
Si Jesus nagsiling: “Ibayad, busa, kay Cesar ang mga butang nga iya ni Cesar, apang sa Dios ang mga butang nga iya sang Dios.” (Mateo 22:21) Nagsiling man sia: “Kon ang bisan sin-o magpilit sa inyo sa paglakat sing isa ka milya, updi sia sa duha ka milya.” (Mateo 5:41) Ginailustrar diri ni Jesus ang prinsipio sang kinabubut-on nga pagpasakop sa matarong nga mga sugo, sa tawhanon man nga mga kaangtanan ukon sa mga ginapatuman sang panguluhan nga nahisanto sa kasuguan sang Dios. (Lucas 6:27-31; Juan 17:14, 15)—5/1, pahina 12.
◻ Ano ang kahulugan sang ‘paglakat sa kamatuoran’? (Salmo 86:11) Nagalakip ini sang pagtuman sa iya mga sugo kag sa pag-alagad sa iya sing matutom kag hanuot. (Salmo 25:4, 5; Juan 4:23, 24)—5/15, pahina 18.
◻ Ano ang resulta sang pagpadala ni Jehova kay Jonas sa Ninive? Subong resulta, ginpakita sang pagbantala nga hilikuton ni Jonas sa Ninive ang kinatuhayan sa ulot sang mahinulsulon nga mga taga-Ninive kag sang tingkuyan nga mga Israelinhon, nga kulang gid sing pagtuo kag pagpaubos. (Ipaanggid ang Deuteronomio 9:6, 13; Jonas 3:4-10.)—5/15, pahina 28.
◻ Sin-o ang Man-ug kag sin-o ang “babayi” nga ginapatuhuyan sa Genesis 3:15?
Ang Man-ug indi ang kubos nga man-ug kundi ang isa nga naggamit sini, si Satanas nga Yawa. (Bugna 12:9) Ang “babayi” indi si Eva kundi ang langitnon nga organisasyon ni Jehova, ang iloy sang iya hinaplas sing espiritu nga mga alagad sa duta. (Galacia 4:26)—6/1, pahina 9.
◻ Paano ang isa makaguwa gikan sa Babilonia nga Daku kag makakita sing kaluwasan? (Bugna 18:4)
Dapat niya painon sing bug-os ang iya kaugalingon indi lamang gikan sa butig relihiosong mga organisasyon kundi subong man gikan sa ila mga kinabatasan kag panimuot nga ila ginapakita, kag nian magpalagyo sia padulong sa duog sang kaluwasan sa sulod sang teokratikong organisasyon ni Jehova. (Efeso 5:7-11)—6/1, pahina 18.
◻ Ngaa ang agila masunson nga ginahinambitan sa Kasulatan? Ginapatungdan sang mga manunulat sang Biblia ang mga karakteristiko sang agila sa pagsimbulo sa mga butang subong sang kaalam, balaan nga pangamlig, kag kadasig.—6/15, pahina 8.
◻ Ang mga alagad sang Dios bala karon nga may dutan-on nga paglaum may espiritu sang Dios nga subong kadaku sa hinaplas sang espiritu nga mga Cristiano?
Sa katunayan, ang sabat amo ang huo. Ang espiritu sang Dios matigayon sing palareho sa duha ka klase, kag ang ihibalo kag paghangop ginahatag sing palareho sa duha, nga may palareho nga mga kahigayunan sa pagbaton sini.—6/15, pahina 31.
◻ Ngaa mapuslanon para sa aton nga usisaon ang balaan nga pag-alagad nga ginhimo sang mga saserdote sang Israel sa templo sa Jerusalem?
Paagi sa pag-usisa sa sini maapresyar naton sing labi ang maluluy-on nga kahimusan nga paagi sini ang makasasala nga katawhan sa karon sarang makapasag-uli sa Dios. (Hebreo 10:1-7)—7/1, pahina 8.
◻ Paano ang gintukod nga ikaduhang templo sa Jerusalem nakatigayon sing daku pa nga himaya sangsa templo nga gintukod ni Solomon?
Ang ikaduhang templo nagdugay pa sing 164 ka tuig sangsa templo ni Solomon. Mas madamo nga sumilimba gikan sa mas madamo nga kadutaan ang nagdugok sa mga luwang sini. Sing importante pa, ining ikaduhang templo nakilal-an sing daku bangod ang Anak sang Dios, nga si Jesucristo, nakapanudlo sa sulod sang mga luwang sini.—7/1, pahina 12, 13.
◻ San-o gintukod sang Dios ang iya espirituwal nga templo? Gintukod ini sang 29 C.E. sang ginkahamut-an sang Dios ang pangamuyo ni Jesus sa bawtismo. (Mateo 3:16, 17) Ang kahamuot sang Dios sa pagdulot sang lawas ni Jesus nagakahulugan nga, sa espirituwal nga kahulugan, nagpanghikot na ang isa ka halaran nga daku pa sangsa didto sa templo sang Jerusalem.—7/1, pahina 14, 15.
◻ Ngaa dapat kita magmapinatawaron?
Ang pagpatawad sa isa nga nakasala nga nangayo sing pasaylo kinahanglanon agod mahuptan naton ang Cristianong paghiusa. Ang kaakig kag ang pagtanom sing malain nga buot magakuha sa aton sing kalinong sa hunahuna. Kon indi kita mapinatawaron, may katalagman nga sa pila ka adlaw si Jehova nga Dios indi na magapatawad sang aton mga sala. (Mateo 6:14, 15)—7/15, pahina 18.
◻ Paano mangin balaan ang mga Israelinhon?
Matigayon lamang ang pagkabalaan paagi sa ila suod nga kaangtanan kay Jehova, ang balaan nga Dios, kag paagi sa ila putli nga pagsimba sa iya. Kinahanglan nila ang sibu nga ihibalo tuhoy sa “Labing Balaan nga Isa” agod masimba sia sa pagkabalaan, sa pisikal kag espirituwal nga katinlo. (Hulubaton 2:1-6; 9:10)—8/1, pahina 11.