Isa ka “Saksi nga Tinumpok” sa Duta sang “Bukid sang Dios”

SA ISA ka mapa sang kontinente, kon imo sundan ang higad-baybay sang Katundan nga Aprika kag magpasidlangan sa Gulf of Gui­nea, sa lugar diin ang baybayon nagapabagatnan, imo makita ang Cam­er­oon. Kon magpadayon ka pakadto sa bagatnan sa baybayon, magadangat ikaw sa malapad kag maitom sing balas nga hunasan. Ang maitom nga balas resulta sang bulkan nga ­Mount Cam­er­oon.

Ining korte-apa, 4,070 metros nga putukputukan sang bukid bug-os nga nagapangibabaw sa lugar. Kon ginatabunan sang silak sang nagahinunod nga adlaw ang mga banglid sang ­Mount Cam­er­oon, nagahatag ini sing makawiwili nga talan-awon sang masili nga mga duag​—⁠asul-asulon nga kapula, duag-kahil, duag-bulawan, kag pula. Ginapabanaag sang dagat kag sang kaiping nga mga katunggan ining tanan nga duag kaangay sang isa ka salaming, nga daw halos indi mo makilala ang langit sa duta. Mahapos hangpon kon ngaa ginhingadlan sang mga tribo sa rehiyon nga nagapati sa pagluntad sang mga espiritu nga nagabulag sa lawas ang bukid nga Mongo Ma Loba, nga ginabadbad sing “Kangga sang mga dios,” ukon sing mas kinaandan sing, “Bukid sang Dios.”

Sa bagatnan pa ayon, may minilya sang maputi sing balas nga mga hunasan, nga ginakubayan sang mga lubi. Luwas sa matahom nga higad-baybay, ang kalabanan nga bahin sang pungsod ginatabunan sang madabong nga kagulangan, nagalab-ot sa dulunan sang Con­go kag Central Af­rican Repub­lic kag sa aminhan sang Ni­ge­ria kag sub-Saharan ­Chad. Ang nakatundan nga bahin sang pungsod bulubukid, nga nagapahanumdom sa manlalakbay sang mga bahin sang Europa. Apang, ang mainit nga klima indi makapalimot sa imo nga tuman gid sa imo kalapit sa ekwador. Bangod sang pagkananuhaytuhay sang kaumhan sini, ginalaragway sang madamong giya sang mga turista ang Cam­er­oon subong magamay nga kopya sang Aprika. Ining impresyon ginapabakod sang lainlain etnikong mga grupo kag sang kapin sa 220 ka rehistrado nga mga hambal kag mga dialekto.

Sa imo pagduaw sa Cam­er­oon, mahimo nga magadayon ka sa isa sang dalagkung mga otel sa malapit sa pantalan nga banwa sang ­Douala, ukon sa kabisera nga siudad, ang ­Yaoundé. Apang mahimo mo mawasi ang maayong kahigayunan nga mahibaluan ang nahanungod sa kabuhi sang mga tawo, ilabi na sang kapin sa 24,000 ka Saksi ni Jehova, nga masako sa pagtipon sing “saksi nga tinumpok” sa sining bug-os nga duta sang “Bukid sang Dios.”⁠a Ngaa indi ka maglakbay sa bug-os nga pungsod agod makilala ang pila sa ila? Ang imo paglagulad sa sining duta sa Katundan nga Aprika pagapadyaan sing daku.

Paagi sa Baroto, Bush Taxi, ukon Bisikleta?

Kon diin ang Sanaga, ang pinakamalawig nga suba sa Cam­er­oon, nagatabo sa dagat, nagaporma ini sing daku nga gibwangan. Agod malab-ot ang tanan nga pumuluyo sining malapad nga rehiyon, ang mga Saksi ni Jehova masunson nga nagalakbay sa mga baroto. Amo sini ang ginahimo sang siam ka manugbantala sang Ginharian sa diutay nga grupo sa Mbia­ko. Ang duha sa ila nagapuyo 25 kilometros ang kalayuon, sa minuro sang Yoyo. Para makalab-ot sila sa Mbia­ko dapat sila magbugsay sing lakas, apang pirme sila nagatambong sa Cristianong mga miting. Samtang ginaduaw ining grupo, ang nagalakbay nga manugtatap nagpanugda nga ipasalida ang vid­eo nga Jehovah’s Witnesses​—⁠The Organization Behind the Name. Apang indi ini mahapos himuon. Sa sinang nabaw-ing nga minuro, diin sia makakita sing video­cas­sette re­corder, telebisyon, kag elektrisidad nga mapasalidahan sini?

Sa tion sang semana sang pagduaw, ginduaw sang pila ka manugbantala ang pastor sang isa ka lokal nga simbahan. Sa ila kakibot mainit sila nga gin-abiabi sang pastor, kag mapagsik sila nga naghambalanay sa Biblia. Sang nakita nila nga indi lamang VCR ang ginapanag-iyahan sang pastor kundi gene­rator man sa elektrisidad, nangisog ang mga kauturan sa pagpangabay kon mahimo nila mahulam ang iya kagamitan. Bangod sang naunang masadya nga paghambalanay sa Biblia, ang pastor nagpasugot sa pagbulig. Sang Sabado sang gab-i 102 ka tawo ang nagtan-aw, lakip na ang pastor kag ang kalabanan nga mga miembro sang iya simbahan. Ang duha ka Saksi halin sa Yoyo nagdala sing pila ka interesado sa duha ka baroto. Wala nila ginhunahuna ang mabudlay nga pagbugsay sa masulog nga taub. Pagkatapos makatan-aw sing vid­eo, napahulag kag napalig-on gid sila, kag ginapabugal nila ang mangin katapo sining daku nga organisasyon nga ang katuyuan amo ang pagpadungog kay Jehova.

Agod makakadto sa mga lugar nga indi malab-ot sang mga baroto, sarang magamit sang isa ang bush taxi. Ang mga lugar nga ginapunduhan sining mga taksi nga nagahulat sing mga pasahero pirme masako. Ginapalibutan sang mga manugbaligya sang mabugnaw nga tubig, mga manugbaligya sing saging, kag mga kargador, madali ka maligban. Ang trabaho sang mga kargador amo ang pagdul-ong sa mga pasahero sa nagahulat nga taksi, nga ang tanan, suno sa ila, “manuglakat na.” Apang ang “manuglakat na” indi gid dapat hangpon sing amo gid. Ang mga manlalakbay dapat maghulat sing inoras, kon kaisa bisan sing inadlaw. Sa tion nga ang tanan nga pasahero nagaginutok na sa sulod kag nakarga na sang tsuper ang bagahe, mga sako sang produkto, kag kon kaisa bisan buhi nga mga manok kag mga kanding, sa atop, ang taksi nagalakbay sa batsihon kag yab-ukon nga dalan.

Ang isa ka nagalakbay nga ministro, nga natak-an sa sining porma sang transportasyon, namat-od nga magkinaugalingon. Nagalakbay sia karon paagi sa bisikleta. Sia nagasiling: “Sugod sang namat-od ako nga maglakbay paagi sa bisikleta pakadto sa mga kongregasyon, nagaabot ako pirme sing husto sa tion para sa pagduaw. Matuod, ang paglakbay nagakinahanglan sing pila ka oras, apang indi na kinahanglan nga maghulat pa ako sing isa ukon duha ka adlaw para sa mga bush taxi. Kon tingulan, ang iban nga mga dalan halos indi makita bangod sang pagbaha. Dapat mo ubahon ang imo mga sapatos agod makatabok sa sining lunang kag tubig. Isa ka adlaw ang akon isa ka sapatos nahulog sa sapa kag nabalik lamang pagligad sang pila ka semana, sang di-hungod ini nga nabunit sang anak nga babayi sang isa ka Saksi samtang nagapamunit sing isda! Nalipay ako nga masuksok liwat ining paris sang sapatos, pagkatapos nga ang isa sini nahuluman sa tubig. Kon kaisa nagakadto ako sa mga lugar nga wala pa mabantalai sang nagligad sang mga Saksi ni Jehova. Pirme ako ginapamangkot sang mga tagaminuro kon ano ang dala ko. Gani pirme ako nagadala sing mga magasin kag mga brosyur. Kada magdulog ako, ginatanyag ko ining napasad-sa-Biblia nga mga publikasyon kag nagahatag sing malip-ot nga panaksi. Nagapati ako nga patubuon ni Jehova ining mga binhi sang kamatuoran.”

Didto Gid sa Suludlon

Ginapanikasugan sang mga Saksi ni Jehova nga mapaambit ang maayong balita sang Ginharian sa iban bisan didto gid sa alibutod sang Cam­er­oon, sa mga minuro nga natago sa tunga sang mga kagulangan. Nagakinahanglan ini sing daku nga panikasog, apang ang mga resulta makalilipay.

Si Marie, isa ka bug-os tion nga ministro, nagsugod sa pagtuon sa Biblia upod sa isa ka lamharon nga babayi nga si Ar­lette. Pagkatapos sang nahauna nga pagtuon, ginpangabay ni Marie si Ar­lette nga updan sia sa ganhaan sa paglakat niya, kay amo ini ang kinabatasan sa sining bahin sang Aprika. Apang, ginpaathag sang lamharon nga babayi nga haluson sia makalakat bangod masakit ang iya mga tiil. Ang mga tiil ni Ar­lette naimpeksion sang isa ka sahi sang bitik nga ang babayi sini nagaut-ot sang unod, nga ginabangdan sang pagnana. Maisog nga ginpanguha ni Marie ang mga bitik sing isa-isa. Sang ulihi, nahibal-an man niya nga ginatublag sang mga demonyo ining lamharon nga babayi sa ­gab-i. Mapailubon nga ginpaathag ni Marie kon paano magsalig kay Jehova, sing talalupangdon paagi sa pagsinggit sing mabaskog sang iya ngalan sa pangamuyo.​—⁠Hulubaton 18:⁠10.

Madasig nga nag-uswag si Ar­lette. Sang primero wala lang pagsapaka sang iya pamilya ang pagtuon bangod sang iya tumalagsahon nga pag-uswag sa pisikal kag ihibalo. Apang sang nahibal-an nila nga luyag niya mangin isa sang mga Saksi ni Jehova, gindumilian nila sia sa pagpadayon sang pagtuon. Tatlo ka semana sang ulihi, sang nakita kon daw ano ka masinulub-on ang iya anak, ginsugilanon sang iloy ni Ar­lette si Marie kag ginpangabay sia nga padayunon ang pagtuon.

Sang nag-abot ang tion sa pagtambong sa isa ka sirkito nga asambleya, ginbayaran ni Marie ang isa ka tsuper sang taksi agod idul-ong si Ar­lette sa asambleya sa duha ka adlaw. Apang, namalibad ang tsuper sa pagkadto tubtob sa balay ni Ar­lette, kay ang alagyan halin sa iya balay pakadto sa dalan indi maagihan. Gani ginpanikasugan ni Marie nga madala ang lamharon nga babayi tubtob sa dalan. Ginpakamaayo gid ni Jehova ining mga panikasog. Sa karon nagatambong na si Ar­lette sa tanan nga miting sa kongregasyon. Agod buligan sia nga makatambong, wala kakapoy nga ginasugat sia ni Marie. Magkaupod sila nga nagalakat sing 75 minutos pakadto kag sing amo kadugay pauli. Sanglit ang miting kon Domingo nagasugod sing alas 8:​30 s.a., si Marie nagahalin sa balay sing alas 6:​30; apang nagaabot sila sing husto sa oras. Ginalauman ni Ar­lette nga masimbuluhan niya ang iya dedikasyon paagi sa bawtismo sa tubig sa dili madugay. Si Marie nagasiling: “Ang bisan sin-o nga wala makakita sa iya sang nagsugod sia sa pagtuon indi makahunahuna kon daw ano ka daku ang pagbag-o niya. Nagapasalamat gid ako kay Jehova sa kon paano niya sia ginapakamaayo.” Si Marie isa gid ka maayong halimbawa sang nagasakripisyo sa kaugalingon nga gugma.

Tubtob sa Aminhan

Ang Naaminhan nga Cam­er­oon puno sing mga kinatuhayan kag mga sorpresa. Kon tingulan, nangin isa ini ka daku kag madabong nga hardin. Apang kon magbulos ang nagatagiti nga init, ang hilamon nagakalaya. Kon udto, kon ang adlaw nagatagiti sa kainit kag mabudlay makakita sing pasilungan, ang mga karnero nagapunsok sa mapula-nga-lunang nga mga dingding sang kabalayan. Sa tunga sang balas kag mamala nga hilamon, ang lamang nga berde amo ang pila ka dahon sang kahoy nga baobab. Walay sapayan nga indi subong ka dalagku sang ila sahi sa kagulangan sa ekwador, mabakod man ini. Ang ikasarang sini sa pagbatas sa indi maayo nga kahimtangan nagailustrar sa kakugi kag kaisog sang pila ka Saksi nga nagsaylo sa pagpuyo sa sining rehiyon agod mapaiwag ang kapawa sang kamatuoran.

Ang pila ka kongregasyon sa sining lugar may kalayuon nga 500 tubtob 800 kilometros, kag ang balatyagon nga naligwin tunay gid. Apang makawiwili gid ini. Ang mga Saksi halin sa iban nga mga lugar nagsaylo diri sa pagbulig. Agod mangin epektibo sa ministeryo, dapat sila magtuon sing Fou­fouldé, isa ka lokal nga dialekto.

Ang isa ka Saksi halin sa Garoua namat-od sa paghinguyang sing pila ka adlaw sa pagbantala sa iya tumandok nga minuro, mga 160 kilometros ang kalayuon. Nakakita sia sing pila ka interes, apang bangod sang mahal nga transportasyon, indi sia mahimo makabalik sing tayuyon. Mga pila ka semana sang ulihi, nakabaton ang Saksi sing sulat halin sa isa sang mga interesado nga nagapakiluoy sa iya nga magkari kag magduaw liwat. Apang bangod kulang gihapon ang iya inugplete, wala sia makalakat. Handurawa ang kakibot sang Saksi sang ginduaw sia sang tawo sa iya balay sa Garoua sa pagsugid sa iya nga napulo ka tawo sa minuro ang nagahulat sang iya pagduaw!

Sa isa pa ka minuro, malapit sa dulunan sang Chad, isa ka grupo sang 50 ka interesado nga mga tawo ang nag-organisar sang ila kaugalingon nga pagtuon sa Biblia. Ginhimos nila nga tatlo sa ila ang magtambong sa mga miting sa pinakamalapit nga kongregasyon sa Chad. Nian, sa pagpauli, dumalahan nila ang pagtuon sa Biblia upod sa bug-os nga grupo. Sa pagkamatuod, ang pinamulong ni Jesus maaplikar gid diri: “Ang alanyon daku, apang ang mamumugon diutay lamang. Busa, pangamuyo kamo sa Agalon sang alanyon agod nga magpadala sia sing mga mangangani sa iya alanyon.”​—⁠Mateo 9:​37, 38.

Pagpanaksi sa mga Siudad

Pagkatapos sang madamong tinuig nga kulang sing literatura, sang nagligad nga mga duha ka tuig, ang Lalantawan kag Magmata! nga mga magasin matigayon na sing hilway sa Cam­er­oon. May daku gid nga kalangkag kag interes sa sining mga magasin kay madamo nga tawo ang nagabasa sini sa nahaunang tion. Isa ka lamharon nga espesyal payunir nga mag-asawa ang gintangdo sa isa sang mga siudad ang nakapahamtang sing 86 ka magasin sa ila nahaunang pagbantala sa aga sa ila bag-ong teritoryo. Ang pila ka manugbantala nakapahamtang sing tubtob sa 250 ka magasin sa isa ka bulan! Ano ang sekreto sang ila kadalag-an? Itanyag ang mga magasin sa tanan.

Isa ka Saksi nga nagatrabaho sa isa ka opisina nga bukas sa publiko ang pirme nagaladlad sang mga magasin. Isa ka babayi ang nagtan-aw sa mga magasin apang wala sing ginkuha. Nahantop sang Saksi ang iya interes kag gintanyagan sia sing isa ka kopya, nga ginkuha niya. Nakibot sia nga makita sia nga nagbalik pagkadason nga adlaw. Indi lamang nga luyag niya mag-amot para sa mga magasin nga nakuha niya kundi nangabay sia sing dugang pa. Ngaa? Bangod nabiktima sang lugos, ginpili niya ang magasin tuhoy sa sina nga topiko. Liwat-liwat niya nga ginbasa sa bug-os nga gab-i ang laygay nga ginhatag. Napaumpawan sing daku, luyag niya makahibalo sing dugang pa nahanungod sa mga Saksi ni Jehova.

Bisan ang magagmay nga kabataan mahimo makapakigbahin sa pagpalapnag sang mensahe sang paglaum sang Biblia. Sang ang anom ka tuig nga bata nga babayi nga Saksi ginpangabay sang iya maestro sa pag-amba sing isa ka Katolikong himno, namalibad sia, nagsiling nga isa sia sang mga Saksi ni Jehova. Nian ginpangabay sia sang iya maestro nga ambahon ang isa sang mga ambahanon sang iya kaugalingon nga relihion agod mahatagan sia sing grado sa sini. Ginpili niya ang ambahanon nga natig-uluhan sing “God’s Pro­mise of Para­dise” kag gin-amba ini sing saulado. Pinamangkot sia sang maestro, nga nagasiling: “Ginhinambitan mo ang isa ka paraiso sa imo ambahanon. Diin ining paraiso?” Ginpaathag sang bata nga katuyuan sang Dios nga tukuron ang Paraiso sa duta sa dili madugay. Nakibot sa sabat niya, ginpamangkot niya ang mga ginikanan sang bata tuhoy sa libro nga ginatun-an niya. Handa sia nga hatagan sing grado ang bata pasad sa sini sa baylo sang ginatudlo sa iya sa tion sang pagtuon tuhoy sa relihion. Ginpanugda sang mga ginikanan sa maestro nga kon luyag niya nga graduhan ang bata sing husto, dapat anay sia mismo magtuon. Isa ka pagtuon sa Biblia ang nasugdan upod sa iya.

Nagaplano sa Pagduaw?

Sa madamong bahin sang kalibutan karon, madamo ang wala nagasapak sa maayong balita sang Ginharian. Indi sila interesado sa Dios ukon sa Biblia. Ang iban nagakahadlok sing daku kag wala nila ginabuksan sing ganhaan ang bisan sin-o nga estranghero. Ini tanan isa ka hangkat sa mga Saksi ni Jehova sa ila ministeryo. Apang tuhay gid sa Cam­er­oon!

Ang pagbantala sa balay-balay makalilipay diri. Sa baylo nga manuktok, kinaandan na ang manawag sing, “Kong, kong, kong.” Nian ang tingog halin sa sulod nagasabat, “Sin-o ina?” nga pagkatapos sini ginapakilala namon ang amon kaugalingon subong mga Saksi ni Jehova. Sa kinaandan, ginapangabay sang mga ginikanan ang ila kabataan nga magkuha sing bangko kag dalhon ini sa idalom sang kahoy, ayhan sa kahoy nga paho. Nian ginahinguyang ang makalilipay nga tion sa pagpaathag kon ano ang Ginharian sang Dios kag kon ano ang himuon sini sa pagdula sa makaluluoy nga kahimtangan sang katawhan.

Pagkatapos sini lang nga paghambalanay, ang babayi nagpabutyag sing hilway sang iya balatyagon, nga nagasiling, “Nasubuan gid ako nga indi ko makita ang kamatuoran nga madugay ko na ginapangita sa relihion nga namat-an ko kag nga sa sini nanigulang na ako. Nagapasalamat ako sa Dios nga ginpakita niya sa akon ang kamatuoran. Isa ako ka deakonesa sa akon simbahan. Ang estatwa ni Birhen Maria nagatener sing isa ka semana sa balay sang tagsa ka deakono agod ang tagsa makapangabay sa iya. Apang ako, pirme ko ginapangabay kay Maria nga buligan niya ako nga mahibaluan ang kamatuoran. Karon ginpakita sang Dios sa akon nga ang kamatuoran wala gali sa iya. Nagapasalamat ako kay Jehova.”

Gani kon mabatyagan mo sa pila ka adlaw ang kinahanglanon nga maagom ang daku nga kalipay sa pagbantala sang maayong balita sang Ginharian sang Dios, ngaa indi magduaw sa sining bahin sang Katundan nga Aprika? Luwas nga matukiban mo ang “magamay nga Aprika,” ayhan paagi sa baroto, bush taxi, ukon bisikleta, makaamot man ikaw sa “saksi nga tinumpok” nga ginatipon sa duta sang “Bukid sang Dios.”

[Footnote]

[Credit Line sa pahina 22]

Mapa: Mountain High Maps® Copyright © 1995 Digital Wisdom, Inc.