Report sang mga Manugbantala sang Ginharian
Bulig Para sa mga “Ginauhaw” sa Rusya
“MALIPAYON ang mga ginagutom kag ginauhaw sa pagkamatarong, kay pagabusgon sila,” siling ni Jesus. (Mateo 5:6) Ginailustrar sang masunod nga mga eksperiensia kon paano nagabulig ang mga Saksi ni Jehova sa pagpaumpaw sa espirituwal nga kauhaw sang madamo sa Rusya, diin ang kahilwayan sang relihion gindumilian sa kapin sa 70 ka tuig.
▪ Ang isa ka babayi nga si Valentina may serioso nga mga pamangkot sa Biblia nga wala masabat sa madamo nga tinuig. Halimbawa, nagpalibog sia: ‘Kay sin-o nagapangamuyo si Jesus?’ Nagsiling sia nga mahimo nga nagapangamuyo si Jesus sa isa nga mas mataas sa iya kag ginpaligban ang ngalan sining Isa.
Nagkadto sia sa Ortodokso nga Iglesia sang Rusya. Apang, wala niya masapwan sa sining relihion ang mga sabat sa iya mga pamangkot. Wala maayawi, nagkadto sia sa simbahan sang mga Protestante kag sa liwat wala sia sing nasapwan nga maathag nga mga sabat. Wala makahibalo kon diin pa makadto, ginbasa ni Valentina ang Biblia, nagatinguha nga pangitaon ang mga sabat sing kinaugalingon—sa wala sing resulta. Nangamuyo sia nga may magbulig sa iya.
Wala madugay sang ulihi nanuktok sa iya ganhaan ang mga Saksi ni Jehova. Ginpakita nila sa iya gikan sa Biblia nga ang ngalan sang Dios amo si Jehova. Sa katapusan, natun-an niya kon kay sin-o nagapangamuyo si Jesus! Nagtuon sia sing Biblia upod sa mga Saksi ni Jehova sing regular. Sa masami bug-os gab-i nga ginabasa niya ang literatura nga ginbalhag sang Watch Tower Society kag ginabasa ang mga teksto. Wala madugay nagsiling si Valentina nga nakit-an niya ang kamatuoran. Sa sulod sang tatlo ka bulan nag-upod na sia sa pagbantala nga hilikuton, kag duha ka bulan pagkatapos sadto, nabawtismuhan sia. Ang iya mapinangamuyuon nga pagpangita sa kamatuoran ginpadyaan.
▪ Isa ka Saksi ang nagsakay sa bus sa pagbantala sa isa ka nabaw-ing nga duog. Sa tion sang biyahe ginsugiran niya ang isa ka pamatan-on nga babayi tuhoy sa mga saad sang Biblia, apang indi interesado ang pamatan-on nga babayi. Duha ka bulan sang ulihi nagbalik ang Saksi sa amo gihapon nga duog sa paghatag sing pamulongpulong publiko. Sa tapos sang pamulongpulong ginpalapitan niya ang isa ka bisita kag ginpamangkot sia: “May nakasugid na bala sa imo tuhoy sa maayong balita gikan sa Biblia?” Ang lalaki nagsabat, “Huo, ikaw.” Naghunahuna ang Saksi nga nagalahog sia. Apang ginpaathag sang pamatan-on nga lalaki nga duha ka bulan na ang nagligad nabatian niya ang pagsugilanunay sang Saksi kag sang pamatan-on nga babayi, samtang nagabiyahe sa bus. “Luyag ko pa makahibalo sing dugang, apang nanaug na ikaw sa bus, kag abi ko indi na ako liwat makakita sang mga Saksi ni Jehova. Nian sa akon ginatrabahuan, may nakilala ako nga lalaki nga nagatuon sang Biblia upod sa mga Saksi. Amo nga yari ako!”
Ang lalaki kag ang iya asawa nagtuon sa Biblia. Sa sulod sang malip-ot lamang nga tion, nasapwan niya nga ang iya trabaho nagasumpakil sa mga prinsipio sang Biblia. Luyag mahuptan ang isa ka maayong konsiensia sa atubangan sang Dios, gin-ilisan niya ang iya trabaho. Karon ginasugiran niya ang iban tuhoy sa Ginharian sang Dios sa tagsa ka kahigayunan. Ang iya asawa nagauswag man sa iya pagtuon sa Biblia.
Ang mga Saksi ni Jehova sa malapad nga teritoryo sang Rusya nahamuot sa pag-ambit sa pagsiling sa tanan sinsero nga mga tawo: “ ‘Kari!’ Kag ang bisan sin-o nga ginauhaw magkari; kag ang bisan sin-o nga maluyag sa pagkuha sing tubig sang kabuhi sa walay bayad.”—Bugna 22:17.