Ano ang Ginapatuman sang Dios sa Aton?
“Amo ini ang kahulugan sang gugma sang Dios, nga sundon naton ang iya mga sugo; apang ang iya mga sugo indi makapabug-at.”—1 JUAN 5:3.
1, 2. Ngaa indi makapakibot nga ang Dios may mga ginapatuman sa mga maluyag magsimba sa iya sing kalahamut-an?
“KONTENTO na ako sa akon relihion!” Indi bala nga amo sina ang masami nga ginasiling sang mga tawo? Apang, sa pagkamatuod, ang pamangkot amo: “Ang akon bala relihion kalahamut-an sa Dios?” Huo, may mga ginapatuman ang Dios sa mga maluyag magsimba sa iya sing kalahamut-an. Dapat bala kita makibot sa sina? Indi gid. Pananglitan may matahom ka nga balay, isa nga bag-o lang nimo mapakay-o sing mahal. Bisan sin-o lang bala ang papuy-on mo didto? Aba indi! Dapat sundon sang mahimo nga magapuyo didto ang imo mga ginapatuman.
2 Sa kaanggid, gin-aman ni Jehova nga Dios ining dutan-on nga puluy-an para sa tawhanon nga pamilya. Sa idalom sang iya Ginharian, ang duta “kay-uhon” sa dili madugay—pagahimuon nga isa ka matahom nga paraiso. Himuon ini ni Jehova. Sa dakung bili para sa iya kaugalingon, ginhatag niya ang iya bugtong nga Anak agod mangin posible ini. Sing pat-od, ang Dios may mga ginapatuman para sa mga magapuyo didto!—Salmo 115:16; Mateo 6:9, 10; Juan 3:16.
3. Paano ginsumaryo ni Solomon kon ano ang ginapaabot sang Dios sa aton?
3 Paano naton mahibaluan ang mga ginapatuman sang Dios? Gin-inspirar ni Jehova ang maalamon nga si Hari Solomon agod sumaryuhon ang ginapaabot Niya sa aton. Sa tapos mabinagbinag ang tanan niya nga ginpanikasugan—lakip ang manggad, mga tinukod, musika, kag romantiko nga gugma—si Solomon nakadangat sa sining konklusion: “Ang katapusan sang butang, sang nabatian na ang tanan, amo: Magkahadlok sa matuod nga Dios kag magtuman sa iya mga sugo. Kay amo ini ang bug-os nga katungdanan sang tawo.”—Manugwali 12:13.
“Ang Iya mga Sugo Indi Makapabug-at”
4-6. (a) Ano ang literal nga kahulugan sang Griegong tinaga nga ginbadbad sing “makapabug-at”? (b) Ngaa makasiling kita nga ang mga sugo sang Dios indi makapabug-at?
4 “Magtuman sa iya mga sugo.” Amo sina ang ginapaabot sang Dios sa aton. Sobra bala ang iya ginapangayo? Indi gid. Si apostol Juan nagasugid sa aton sing tuman ka makalulugpay nga butang nahanungod sa mga sugo, ukon mga ginapatuman, sang Dios. Sia nagsulat: “Amo ini ang kahulugan sang gugma sang Dios, nga sundon naton ang iya mga sugo; apang ang iya mga sugo indi makapabug-at.”—1 Juan 5:3.
5 Ang Griegong tinaga nga ginbadbad diri nga “makapabug-at” literal nga nagakahulugan sing “mabug-at.” Mahimo ini magapatuhoy sa butang nga mabudlay tumanon ukon himuon. Sa Mateo 23:4, ginagamit ini sa paglaragway sa “mabug-at nga mga lulan,” sa himo-tawo nga mga pagsulundan kag mga tradisyon, nga ginpatuman sang mga escriba kag mga Fariseo sa mga tawo. Nahangpan bala ninyo kon ano ang ginhinakop sang tigulang nga apostol nga si Juan? Ang kasuguan sang Dios indi mabug-at nga lulan, ukon tuman ini kabudlay para sundon naton. (Ipaanggid ang Deuteronomio 30:11.) Sa kabaliskaran, kon ginahigugma naton ang Dios, ang pagsunod sa iya mga sugo nagapahalipay sa aton. Nagahatag ini sa aton sing hamili nga kahigayunan nga mapakita ang aton gugma kay Jehova.
6 Agod mapakita ang aton gugma sa Dios, dapat naton mahibaluan sing espisipiko kon ano ang mga ginapaabot niya sa aton. Binagbinagon naton karon ang lima sa mga ginapatuman sang Dios. Samtang ginabinagbinag naton ini, hupti sa hunahuna ang ginsulat ni Juan: ‘Ang mga sugo sang Dios indi makapabug-at.’
Magkuha sing Ihibalo Tuhoy sa Dios
7. Sa ano nasandig ang aton kaluwasan?
7 Ang una nga ginapatuman amo ang pagkuha sing ihibalo tuhoy sa Dios. Binagbinaga ang pinamulong ni Jesus nga narekord sa Juan kapitulo 17. Katapusan sadto nga gab-i sang kabuhi ni Jesus subong tawo. Ginhinguyang ni Jesus ang halos bug-os nga gab-i agod ihanda ang iya mga apostoles sa iya pagtaliwan. Nabalaka sia sa ila palaabuton, sa ila walay katapusan nga palaabuton. Nagatangla sa langit, nangamuyo sia para sa ila. Sa bersikulo 3, aton mabasa: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” Huo, ang ila kaluwasan nasandig sa ila “pagkuha sing ihibalo” tuhoy sa Dios kag kay Cristo. Naaplikar man ina sa aton. Agod maluwas, dapat kita magkuha sini nga ihibalo.
8. Ano ang buot silingon sang ‘pagkuha sing ihibalo’ tuhoy sa Dios?
8 Ano ang buot silingon sing ‘pagkuha sing ihibalo’ tuhoy sa Dios? Ang Griegong tinaga nga ginbadbad diri nga “pagkuha sing ihibalo” nagakahulugan sing “paghibalo, pagkilala,” ukon “paghangop sing bug-os.” Talupangda, man, nga ang badbad nga “pagkuha sing ihibalo” nagapahangop nga isa ini ka nagapadayon nga proseso. Busa ang pagkuha sing ihibalo tuhoy sa Dios nagakahulugan sing pagkilala sa iya indi sing hapaw lamang kundi sing suod, nagapalambo sing mahinangpanon nga pagpakig-abyan sa iya. Ang nagapadayon nga kaangtanan sa Dios nagadul-ong sa mauswagon nga ihibalo tuhoy sa iya. Ini nga proseso mahimo magpadayon sing dayon, kay indi gid naton matun-an ang tanan nga dapat mahibaluan tuhoy kay Jehova.—Roma 11:33.
9. Ano ang matun-an naton tuhoy kay Jehova gikan sa tulun-an sang pagpanuga?
9 Paano kita nagakuha sing ihibalo tuhoy sa Dios? May duha ka tulun-an nga makabulig sa aton. Ang una amo ang tulun-an sang pagpanuga. Ang mga butang nga gintuga ni Jehova—may kabuhi kag walay kabuhi—nagahatag sa aton sing ihibalo kon ano sia nga sahi sing persona. (Roma 1:20) Binagbinaga ang pila ka halimbawa. Ang paghuganas sang matahom nga busay, ang mabaskog nga paghampas sang balod sa tion sang bagyo, ang mabituunon nga kalangitan sa matin-aw nga kagab-ihon—wala bala ini nagatudlo sa aton nga si Jehova isa ka Dios nga may “makusog nga gahom”? (Isaias 40:26) Ang bata nga nagaudyak sa kasadya samtang ginatan-aw niya ang totoy nga nagalagaslagas sang iya ikog ukon ang diutay nga kuring nga nagaduludugsing sang lino nga bola—wala bala ina nagapakita nga si Jehova, “ang malipayon nga Dios,” may ikasarang sa pagpakadlaw? (1 Timoteo 1:11) Ang manamit nga lalim sang pagkaon, ang mahumot nga mga bulak sa kapatagan, ang masili nga mga duag sang diutay nga alibangbang, ang huni sang mga pispis nga nagaamba sa tigpamulak, ang mainit nga hakos sang isa ka hinigugma—wala bala naton mahantop sa sining mga butang nga ang aton Manunuga isa ka Dios sang gugma, nga maluyag nga magkalipay kita sa kabuhi?—1 Juan 4:8.
10, 11. (a) Anong mga butang tuhoy kay Jehova kag sa iya mga katuyuan ang indi naton matun-an gikan sa tulun-an sang pagpanuga? (b) Ang mga sabat sa anong mga pamangkot ang masapwan lamang sa Biblia?
10 Apang, limitado lamang ang aton matun-an tuhoy kay Jehova gikan sa tulun-an sang pagpanuga. Sa pag-ilustrar: Ano ang ngalan sang Dios? Ngaa gintuga niya ang duta kag ginbutang diri ang tawo? Ngaa ginatugutan sang Dios ang kalautan? Ano ang nagahulat sa aton sa palaabuton? Agod masabat ining mga pamangkot, dapat naton tan-awon ang isa pa ka tulun-an nga nagahatag sa aton sing ihibalo tuhoy sa Dios—ang Biblia. Sa mga pahina sini, ginsugid ni Jehova ang mga butang tuhoy sa iya kaugalingon, lakip ang iya ngalan, personalidad, kag mga katuyuan—mga impormasyon nga indi naton matun-an gikan sa bisan anong iban pa nga tulun-an.—Exodo 34:6, 7; Salmo 83:18; Amos 3:7.
11 Sa Kasulatan, ginasugid man ni Jehova ang importante nga ihibalo nahanungod sa iban pa nga mga persona nga dapat naton makilala. Halimbawa, sin-o si Jesucristo, kag ano ang iya papel sa katumanan sang mga katuyuan ni Jehova? (Binuhatan 4:12) Sin-o si Satanas nga Yawa? Sa anong mga paagi ginapatalang niya ang mga tawo? Paano naton malikawan nga mapatalang niya? (1 Pedro 5:8) Ang nagaluwas-kabuhi nga mga sabat sa sining mga pamangkot masapwan lamang sa Biblia.
12. Paano mo ipaathag kon ngaa indi mabug-at ang magkuha sing ihibalo tuhoy sa Dios kag sa iya mga katuyuan?
12 Mabug-at bala ang pagkuha sini nga ihibalo tuhoy sa Dios kag sa mga katuyuan niya? Indi gid! Madumduman pa bala ninyo kon ano ang inyo nabatyagan sang una ninyo nga nahibaluan nga ang ngalan sang Dios amo si Jehova, nga ipasag-uli sang iya Ginharian ang Paraiso sa sini nga duta, nga ginhatag niya ang iya hinigugma nga Anak subong gawad para sa aton mga sala, subong man ang iban pa hamili nga mga kamatuoran? Indi bala nga kaangay ini sang paghukas sa lambong sing pagkawalayhinalung-ong kag pagtan-aw sing maathag sang mga butang sa nahauna nga tion? Ang pagkuha sang ihibalo tuhoy sa Dios indi mabug-at. Ini makalilipay!—Salmo 1:1-3; 119:97.
Pagsunod sa mga Talaksan sang Dios
13, 14. (a) Samtang nagakuha kita sing ihibalo tuhoy sa Dios, anong mga pagbalhin ang dapat naton himuon sa aton kabuhi? (b) Ginapatuman sang Dios nga untatan naton ang anong dimatinlo nga mga bisyo?
13 Samtang nagakuha kita sing ihibalo tuhoy sa Dios, mahangpan naton nga dapat naton bag-uhon ang aton kabuhi. Ginadala kita sini sa ikaduha nga tulumanon. Dapat naton sundon ang mga talaksan sang Dios para sa husto nga pagginawi kag batunon ang iya kamatuoran. Ano ang kamatuoran? Importante gid bala sa Dios kon ano ang aton ginatuuhan kag ginahimo? Madamong tawo karon ang wala nagahunahuna nga importante pa ina. Ang report nga ginbalhag sang Church of England sang 1995 nagsiling nga ang pag-upod nga wala makasal indi dapat tamdon nga sala. “Ang dinalan nga ‘nagakabuhi sa sala’ makahuluya kag indi mabuligon,” siling sang isa ka obispo sang simbahan.
14 Kon amo, ang ‘pagkabuhi sa sala’ indi na bala isa ka sala? Maathag nga ginasugid ni Jehova sa aton ang iya balatyagon sa sinang pagginawi. Ang Iya pulong, ang Biblia, nagasiling: “Huptan nga dungganon ang pag-asawahay sa tunga sang tanan, kag ang higdaan sang pag-asawahay mangin walay dagta, kay hukman sang Dios ang mga makihilawason kag mga makihilahion.” (Hebreo 13:4) Ang paghulid antes sang kasal mahimo nga indi sala sa pagtamod sang liberal nga mga klerigo kag mga sumilimba, apang isa ini ka daku nga sala sa mata sang Dios! Kag amo man ang panghilahi, incesto, kag homoseksuwalidad. (Levitico 18:6; 1 Corinto 6:9, 10) Ginapatuman sang Dios nga likawan naton ining mga buhat, nga ginatamod niya subong mahigko.
15. Paano ang mga ginapatuman sang Dios nagadalahig sa kon paano naton ginatratar ang iban kag kon ano ang aton ginatuuhan?
15 Apang, indi lamang bastante nga likawan ang mga buhat nga ginatamod sang Dios nga makasasala. Ang mga ginapatuman sang Dios nagalakip man sa kon paano naton ginatratar ang iban. Sa pamilya, ginapaabot niya nga ang bana kag asawa maghigugmaanay kag magtahuray. Ginasugo sang Dios nga atipanon sang mga ginikanan ang materyal, espirituwal, kag emosyonal nga mga kinahanglanon sang ila kabataan. Ginasugo niya ang mga kabataan nga tumanon ang ila mga ginikanan. (Hulubaton 22:6; Colosas 3:18-21) Kag kamusta ang aton mga ginatuuhan? Luyag ni Jehova nga likawan naton ang mga pagtuluuhan kag mga kinabatasan nga halin sa butig nga pagsimba ukon nagasumpakil sa putli nga kamatuoran nga ginatudlo sang Biblia.—Deuteronomio 18:9-13; 2 Corinto 6:14-17.
16. Ipaathag kon ngaa indi mabug-at nga sundon ang mga talaksan sang Dios para sa husto nga paggawi kag batunon ang iya kamatuoran.
16 Mabug-at bala para sa aton nga sundon ang mga talaksan sang Dios para sa husto nga pagginawi kag batunon ang iya kamatuoran? Indi kon ginabinagbinag naton ang mga kaayuhan—mga pag-asawahay diin ang bana kag asawa nagahigugmaanay kag nagasaligay sa baylo sang mga pag-asawahay nga nagakawasdak bangod sang pagluib; mga puluy-an diin ang mga kabataan nagabatyag nga ginahigugma kag ginapalangga sang ila mga ginikanan sa baylo sang mga pamilya nga ang mga kabataan nagabatyag nga wala ginahigugma, ginapatumbayaan, ukon wala maluyagan; matinlo nga konsiensia kag maayong panglawas sa baylo sang balatyagon nga nakasala kag lawas nga ginguba sang AIDS ukon sang iban pa ginaliton sang sekso nga balatian. Sing pat-od, ang mga ginapatuman ni Jehova wala nagadingot sa aton sing bisan ano nga butang nga ginakinahanglan naton agod magkalipay sa kabuhi!—Deuteronomio 10:12, 13.
Magpakita sing Pagtahod sa Kabuhi kag Dugo
17. Paano ginatamod ni Jehova ang kabuhi kag dugo?
17 Samtang ginapahisuno ninyo ang inyo kabuhi sa mga talaksan sang Dios, maapresyar ninyo kon daw ano gid ka hamili ang kabuhi. Binagbinagon naton karon ang ikatlo nga ginapatuman sang Dios. Dapat kita magpakita sing pagtahod sa kabuhi kag dugo. Ang kabuhi sagrado kay Jehova. Nagakaigo gid ini, kay sia ang Tuburan sang kabuhi. (Salmo 36:9) Ti, bisan gani ang kabuhi sang wala pa matawo nga lapsag sa tiyan sang iloy sini hamili kay Jehova! (Exodo 21:22, 23) Ang dugo nagarepresentar sa kabuhi. Busa, ang dugo sagrado man sa mata sang Dios. (Levitico 17:14) Kon amo, indi makapakibot nga ginapaabot sang Dios sa aton nga tamdon naton ang kabuhi kag dugo subong sang pagtamod niya.
18. Ano ang ginapatuman sa aton sang pagtamod ni Jehova sa kabuhi kag dugo?
18 Ano ang ginapatuman sa aton sang pagtahod sa kabuhi kag dugo? Subong mga Cristiano, wala naton ginabutang sing dikinahanglanon sa peligro ang aton kabuhi para makunyag lamang. Mahunahunaon kita sa kaluwasan kag gani ginapat-od naton nga maayo ang kahimtangan sang aton mga salakyan kag mga puluy-an. (Deuteronomio 22:8) Wala kita nagapanabako, nagamama, ukon nagagamit sing makapagiyan ukon makapatiko-sing-hunahuna nga mga droga agod maglipaylipay. (2 Corinto 7:1) Bangod nagapamati kita sa Dios sang magsiling sia nga ‘maglihi sa dugo,’ wala naton ginatugutan nga tayunan sing dugo ang aton lawas. (Binuhatan 15:28, 29) Bisan pa mahal naton ang kabuhi, wala naton ginatinguhaan nga luwason ang aton karon nga kabuhi paagi sa paglapas sa kasuguan sang Dios kag busa ginabutang sa katalagman ang aton paglaum nga mabuhi sing walay katapusan!—Mateo 16:25.
19. Ipaathag kon paano kita makabenepisyo gikan sa pagpakita sing pagtahod sa kabuhi kag dugo.
19 Mabug-at bala para sa aton nga tamdon ang kabuhi kag dugo subong sagrado? Indi gid! Hunahunaa lamang. Mabug-at bala nga mahilway sa kanser sa baga nga tuga sang pagpanabako? Mabug-at bala likawan ang mental kag pisikal nga pagkagiyan sa makahalalit nga mga droga? Mabug-at bala nga indi matapikan sing AIDS, hepatitis, ukon sing iban pa nga balatian bangod sang pagpatayon sing dugo? Sing maathag, para gid sa aton kaayuhan nga likawan naton ang makahalalit nga mga buhat kag mga bisyo.—Isaias 48:17.
20. Paano nakabenepisyo ang isa ka pamilya gikan sa pagtigayon sing pagtamod sang Dios sa kabuhi?
20 Binagbinaga ini nga eksperiensia. Pila ka tuig na ang nagligad, isa ka Saksi nga babayi nga nagamabdos sing mga tatlo ka bulan kag tunga ang gindugo sang isa ka gab-i kag gindalidali sa ospital. Sa tapos sia maeksamin sang doktor, nabatian niya ang doktor nga nagsiling sa isa sang mga nars nga dapat nila tapuson ang iya pagmabdos. Nakahibalo sang pagtamod ni Jehova sa kabuhi sang lapsag nga wala pa mabun-ag, malig-on sia nga nagdumili nga magpaaborsion, nga nagasiling sa doktor: “Kon buhi ini, pabayai lang ini!” Gindugo gihapon sia kon kaisa, apang pila ka bulan sang ulihi nagbun-ag sia nga wala pa sa tion sing mapagros nga bata nga lalaki nga nagaedad na karon sing 17 anyos. Sia nagpaathag: “Ginsugiran namon ang amon anak sining tanan, kag nagsiling sia nga nalipay sia nga wala sia ginhulog. Nakahibalo sia nga ang amon pag-alagad kay Jehova amo ang lamang nga rason nga buhi sia!” Sa pagkamatuod, ang pagtigayon sing pagtamod sang Dios sa kabuhi indi mabug-at sa sini nga pamilya!
Pag-alagad Upod sa Organisado nga Katawhan ni Jehova
21, 22. (a) Upod ni sin-o ginapaabot kita ni Jehova nga mag-alagad sa iya? (b) Paano makilala ang organisado nga katawhan sang Dios?
21 Wala kita nagaisahanon sa paghimo sing mga pagbag-o nga ginakinahanglan agod ipahisuno ang aton kabuhi sa mga talaksan sang Dios. Si Jehova may katawhan diri sa duta, kag ginapaabot niya nga alagaron naton sia upod sa ila. Nagadul-ong ini sa aton sa ikaapat nga tulumanon. Dapat kita mag-alagad kay Jehova upod sang iya ginatuytuyan sing espiritu nga organisasyon.
22 Apang, paano makilala ang organisado nga katawhan sang Dios? Suno sa mga talaksan nga napahamtang sa Kasulatan, may matuod sila nga gugma sa tunga nila, may tudok sila nga pagtahod sa Biblia, ginapadunggan nila ang ngalan sang Dios, ginabantala nila ang iya Ginharian, kag indi sila bahin sining malauton nga kalibutan. (Mateo 6:9; 24:14; Juan 13:34, 35; 17:16, 17) Isa lamang ka relihiosong organisasyon sa sining duta ang may tanan sining tanda sang matuod nga Cristianismo—mga Saksi ni Jehova!
23, 24. Paano naton mailustrar nga indi mabug-at ang mag-alagad kay Jehova upod sa iya organisado nga katawhan?
23 Mabug-at bala ang mag-alagad kay Jehova upod sa iya organisado nga katawhan? Indi gid! Sa kabaliskaran, isa ka hamili nga pribilehiyo nga higugmaon kag sakdagon ang bug-os kalibutan nga panimalay sang Cristianong mga kauturan nga lalaki kag babayi. (1 Pedro 2:17) Handurawa nga naluwas ikaw sa pagkalunod sang barko kag nasapwan mo ang imo kaugalingon sa tubig, nga nagapanikasog nga makapabilin nga nagautaw-utaw. Sang daw indi na ikaw makapadugay, isa ka kamot ang nagdawat sa imo gikan sa isa ka lifeboat. Huo, may iban pa gali nga nakaluwas! Sa lifeboat, nagbulosbulos kamo sa pagbugsay pahigad, nga ginapasakay ang iban pa nga nakaluwas nga inyo naagihan.
24 Indi bala nga yara kita sa kaanggid nga sitwasyon? Ginbutong kita gikan sa makatalagam nga “mga tubig” sining malauton nga kalibutan pakadto sa “lifeboat” sang dutan-on nga organisasyon ni Jehova. Sa sulod sini, nagaalagad kita sing magkaupod samtang nagapadulong kita sa “baybayon” sang matarong nga bag-ong kalibutan. Kon ang mga pag-ipit sang kabuhi nagapalapyo sa aton samtang nagalakbay, daku gid ang aton pasalamat sa bulig kag lugpay sang matuod Cristianong mga kaupdanan!—Hulubaton 17:17.
25. (a) Ano ang aton obligasyon sa mga yara pa sa “tubig” sining malauton nga kalibutan? (b) Anong ginapatuman sang Dios ang pagabinagbinagon sa masunod nga artikulo?
25 Kamusta ang iban—ang bunayag sing tagipusuon nga mga tawo nga yara pa sa “tubig”? Obligasyon naton nga buligan sila sa pagsulod sa organisasyon ni Jehova, indi bala? (1 Timoteo 2:3, 4) Dapat sila buligan agod matun-an ang mga ginapatuman sang Dios. Nagadul-ong ini sa aton sa ikalima nga ginapatuman sang Dios. Dapat kita mangin matutom nga mga manugbantala sang Ginharian sang Dios. Kon ano ang nalakip sa sini amo ang pagabinagbinagon sa masunod nga artikulo.
Madumduman Mo Bala?
◻ Ngaa ang mga sugo sang Dios indi makapabug-at?
◻ Paano kita makakuha sing ihibalo tuhoy sa Dios?
◻ Ngaa indi mabug-at nga sundon ang mga talaksan sang Dios para sa husto nga pagginawi kag batunon ang iya kamatuoran?
◻ Ano ang ginapatuman sa aton sang pagtamod sang Dios sa kabuhi kag dugo?
◻ Upod ni sin-o kita ginapaabot sang Dios nga mag-alagad sa iya, kag paano sila makilala?
[Kapsion sa pahina 18]
Makatuon kita tuhoy kay Jehova gikan sa tulun-an sang pagpanuga kag gikan sa Biblia
[Credit Lines]
Buaya: Sa maayong kabubut-on sang Australian International Public Relations; oso: Safari-Zoo sang Ramat-Gan, Tel Aviv