Isa ka Bag-ong Galamiton sa Pagbulig sa mga Tawo nga Matun-an ang mga Ginapatuman sang Dios

“ANG simple, direkta, kag mabuligon nga paagi sini magapatubas sing mga bunga nga labaw sa mga ginapaabot. Ang mga topiko ginhatag sa dimasibod kag matahom nga paagi nga ang bisan sin-o nga sinsero, nagapangusisa nga tawo mapahulag sa pagsiling, ‘Ang Dios yara gid sa tunga ninyo.’ ” (1 Corinto 14:25) Amo ina ang ginsiling sang isa sang mga Saksi ni Jehova sa Thailand sa paglaragway sa bag-ong brosyur nga Ano ang Ginapatuman sang Dios sa Aton? Ginpaguwa ini sang Watch Tower Society sa “Mga Mensahero sang Diosnon nga Paghidait” nga Distrito nga mga Kombension sang 1996/97.

Ining 32-pahina, de-kolor nga brosyur gindesinyo subong isa ka kurso sang pagtuon sa Biblia. Ginatuptupan sini ang sadsaran nga mga panudlo sang Biblia. Ang mga tinaga simple kag malip-ot, nagapaathag sing maayo kon ano ang ginapatuman sang Dios sa aton. Ang mga bumalasa indi mabudlayan sa paghangop sini. Paano kamo makadumala sing pagtuon sa Biblia sa sining bag-ong brosyur?

Gamita ang mga pamangkot. May mga pamangkot sa pamuno sang tagsa ka leksion. Sa parentesis pagkatapos sang tagsa ka pamangkot, makita ninyo ang numero sang mga parapo diin makita ang mga sabat. Ining mga pamangkot mahimo gamiton subong introduksion kag subong nagarepaso nga bulig sa pagtudlo. Halimbawa, sa umpisa sang isa ka pagtuon sang Biblia sa puluy-an, mahimo ninyo ipakiana sa estudyante ang mga pamangkot agod makuha ang iya mga komento. Sa baylo nga tadlungon dayon ang sala nga mga sabat, mahimo ninyo padayunon ang pagtuon. Pagkatapos sang pagtuon, mahimo ninyo balikan ang mga pamangkot agod tan-awon kon masabat na ini karon sang estudyante nahisuno sa Biblia.

Pangitaa ang mga kasulatan. Sa kada leksion, ang malip-ot nga mga dinalan sang mga kamatuoran sang Biblia ginaupdan sang nagasakdag nga mga kasulatan. Sanglit ang kalabanan nga mga kasulatan ginahinambitan lamang kag wala ginabalikwat, importante nga palig-unon ang estudyante nga pangitaon ining mga teksto sa iya kaugalingon nga Biblia. Dapat niya mabasa kag mapamalandungan ang Pulong sang Dios antes niya ini maaplikar sa kabuhi.​—⁠Josue 1:⁠8.

Ipatalupangod ang mga laragway. Ang brosyur madamo sing retrato kag painting​—⁠kapin sa 50 ka laragway sa kabilugan. Gin-aman ini indi lamang agod matahom tan-awon kundi subong dugang nga mga bulig sa pagtudlo. Halimbawa, ang katapusan nga duha ka leksion (tig-isa ka pahina, sa nagaatubangay nga pahina) ginatig-uluhan sing “Pagbulig sa Iban sa Paghimo sang Kabubut-on sang Dios” kag “Ang Inyo Desisyon nga Mag-alagad sa Dios.” Ang mga retrato sa duha ka pahina nagalaragway sang espirituwal nga pag-uswag sang isa ka tawo, nagapakita sa iya nga nagapanaksi sing dipormal, nagapakigbahin sa pamalaybalay nga hilikuton, nagahimo sang iya dedikasyon, kag sa ulihi nagapabawtismo. Paagi sa pagpatalupangod sa estudyante sini nga mga laragway, mabuligan ninyo sia nga mahangpan ang mga tikang nga ginapatuman agod maalagad ang Dios.

Kamusta kon ang interesado indi maayo magbasa ukon indi gid makahibalo magbasa? Ginahimo sang Sosiedad ining bag-ong brosyur nga matigayon sa audiocassette sa madamong hambal. Ang cassette nagaunod sang kaundan sang brosyur subong man sang madamong ginhinambitan nga kasulatan. Ginarekord ini subong sang masunod: Ang nahaunang pamangkot ginabasa, ginasundan sang parapo (ukon mga parapo) nga nagasabat sini, upod sang pila ka ginhinambitan nga mga kasulatan. Nian ang masunod nga pamangkot ginabasa, ginasundan sing materyal kag kasulatan nga nagasabat sini, kag padayon. Mapamatian sang estudyante ang rekord samtang nagahanda sia para sa pagtuon. Ang cassette mahimo man magamit sa pagdumala sing pagtuon.

Ang mga nagtambong sa kombension nalangkag sa paggamit sining bag-ong brosyur sa ila ministeryo sa latagon. Halimbawa, mga pila lamang ka adlaw sa tapos mabaton ang brosyur, ang duha ka payunir (bug-os tion nga mga ebanghelisador) sa Estados Unidos nagpahamtang sini sa isa ka lamharon nga mag-asawa nga ginaduaw nila. Sang ginbuksan sang mag-asawa ang kaundan, naganyat sila sa leksion nga “Mga Buhat nga Ginadumtan sang Dios.” “Nagahunahuna gid ako nga ang Dios wala gid nagadumot​—⁠puno sia sing gugma,” siling sang lamharon nga babayi. “Amo ini ang akon una nga basahon.” Sang nagbalik ang duha ka payunir sang masunod nga semana, ang lamharon nga babayi nagsiling: “Ginbasa ko ang bag-ong brosyur. Kabudlay gid himuon sang tanan nga butang nga dapat namon himuon. Si Jehova wala mahamuot sa amon​—⁠indi kami kasal. Apang nakadesisyon na kami. Mapakasal kami sa masunod nga Biernes.” Ginhakos ang duha ka payunir, nagsiling pa sila: “Ginakasubo namon nga wala kami nagatuon sing tayuyon, apang daku gid ini nga kahaw-asan sa amon.”

Sa tanan nga paagi, gamita ining bag-ong Ginapatuman nga brosyur. Isa ini ka maayo nga galamiton sa pagbulig sa iban nga matun-an ang mga ginapatuman sang Dios.

[Kapsion sa pahina 17]

Paano ninyo gamiton ang bag-ong brosyur?