Nahadlok Ka Bala Magsalig sa Iban?

‘WALA ako sing masugiran. Indi ako mahangpan sang tanan. Masako gid sila sa ila kaugalingon nga mga problema. Wala sila sing tion para sa akon problema.’ Amo sina ang ginabatyag sang madamo, amo nga ginasolo na lang nila ang ila problema. Kon ginakamusta sila sang iban, luyag nila magsugid, apang wala nila ginadayon. Indi nila mapautwas ang ila ginabatyag.

Huo, may mga tawo nga indi luyag buligan sang iban. Apang, madamo ang luyag magpabulig apang nahadlok magtu-ad sang ila personal nga mga ginahunahuna, ginabatyag, kag mga inagihan. Isa ka bala sa ila? Wala gid bala ikaw sing isa nga masaligan?

Paghangop sa Kahadlok

Lapnag karon ang dipagsalig. Ang mga pamatan-on wala nagapakighambal sa ila mga ginikanan. Ang mga ginikanan wala nagahambalanay sa isa kag isa. Pila lamang ang nagapakighambal sa mga may awtoridad. Bangod indi makasalig sa iban nga tawo, ang iban nagpatupling sa alkohol, droga, ukon sa magaris nga estilo sang kabuhi agod mapalagyuhan ang ila mga problema.​—⁠Hulubaton 23:​29-35; Isaias 56:⁠12.

Ang pagsalig sa mga tawo nga may awtoridad, subong sang mga klero, doktor, terapista, manunudlo, gintay-ug sang padayon nga pagbuyagyag sa pagkadibunayag kag imoralidad. Halimbawa, ginasiling sang isa ka pagbulubanta nga kapin sa 10 porsiento sang mga klero ang nadalahig sa seksuwal nga imoralidad. Ining “manugguba sing pagsalig,” siling sang isa ka manunulat, “nagatuga sing daku nga kal-ang sa tawhanon nga mga kaangtanan.” Paano ini nakaapektar sa ila mga sinakpan? Ginaguba sini ang pagsalig.

Ang lapnag nga pagkaguba sang moralidad nagdul-ong man sa krisis sa pamilya, amo nga ang mga guba nga pamilya nangin kinaandan, indi talagsahon. Ang puluy-an sadto anay isa ka duog sa paghanas. Sa karon nangin kaangay ini sang isa ka gasolinahan sa tion sang pagkaon. Kon ang isa ka bata magdaku sa isa ka pamilya nga wala sing “kinaugali nga gugma,” ang kinaandan nga resulta amo nga wala sia sing ikasarang sa pagsalig sa iban kon hamtong na sia.​—⁠2 Timoteo 3:⁠3.

Dugang pa, samtang nagalain ang kahimtangan sa kalibutan, dugang kita nga ginapadayag sa makahaladlok nga mga eksperiensia. Sa amo nga kahimtangan, ang manalagna nga si Miqueas nagsulat: “Indi pagsaligi ang suod nga abyan.” (Miqueas 7:5) Mahimo mabatyagan mo ang subong sini pagkatapos sang diutay nga paglain sang buot, pagkadula sing pagsalig, ukon sang isa ka makatalagam gid nga hitabo. Nabudlayan ka na magsalig liwat sa iban kag nagatig-a ang imo balatyagon, nga daw napaderan ang imo emosyon sa adlaw-adlaw. (Ipaanggid ang Salmo 102:​1-7.) Matuod, ini nga panimuot mahimo makabulig sa imo nga makapanghikot, apang ang imo ‘kasakit sa tagipusuon’ nagakuha sang imo matuod nga kalipay sa kabuhi. (Hulubaton 15:13) Ang matuod amo, agod mangin mapagros ikaw sa espirituwal, sa emosyon, sa hunahuna, kag sa pisikal, dapat marumpag ina nga pader kag dapat mo tun-an nga magsalig sa mga tawo. Posible bala ina? Huo.

Ngaa Dapat Rumpagon ang Pader?

Ang pagtu-ad sa iban nagapaumpaw sa naligban nga tagipusuon. Subong sini ang naeksperiensiahan ni Ana. Maayo ang iya pagpamana, may malig-on sia nga puluy-an, apang may daku sia nga kahuol. Bisan “may kapaitan sia sa kalag,” maalamon sia nga “nangamuyo kay Jehova” sing hanuot gid amo nga nagkutibkutib ang iya mga bibig. Huo, nagtu-ad sia kay Jehova. Nian ginbuksan niya ang iya tagipusuon sa tiglawas sang Dios nga si Eli. Ano ang resulta? “[Si Ana] naglakat kag nagkaon, kag ang iya nawong indi na masubo.”​—⁠1 Samuel 1:​1-18.

Nahibaluan sang kalabanan nga tawo ang kaayuhan sang kompidensial nga paghambalanay. Halimbawa, ang pagpaambitay sang mga panghunahuna kag mga inagihan sa sadtong nakaagi sing kaanggid nga mga kahimtangan makabulig. Ang mga mananalawsaw nagahinakop: “Ang pagtago sang emosyon nagatuga sing balatian​—⁠dapat kita magtu-ad agod makapabilin nga mapagros sa panghunahuna.” Ginapamatud-an sang nagadaku nga hubon sang sientipiko nga panalawsaw ang kamatuoran sang inspirado nga hulubaton nga nagasiling: “Ang nagapain sang iya kaugalingon nagapangita sang iya maiyaiyahon nga handum; nagapakig-away sia sa tanan maayo nga kaalam.”​—⁠Hulubaton 18:⁠1.

Kon indi ka magtu-ad sa iban, paano ka nila mabuligan? Walay sapayan nga si Jehova nga Dios makabasa sang mga tagipusuon, wala sing hinalung-ong ang imo mga pamilya kag mga abyan sang imo pinakamadalom nga ginahunahuna kag mga ginabatyag​—⁠luwas kon manugid ka. (1 Cronica 28:9) Kon ang problema nagadalahig sing paglapas sa kasuguan sang Dios, ang indi pagtu-ad sang problema magapalala lamang sini.​—⁠Hulubaton 28:⁠13.

Sa pagkamatuod, ang benepisyo sang pagtu-ad sing kahuol sa iban labaw pa sangsa risgo nga masaklaw. Sa pagkamatuod, wala ina nagakahulugan nga pataka naton nga isugid ang personal nga mga detalye. (Ipaanggid ang Hukom 16:​18; Jeremias 9:​4; Lucas 21:⁠16.) “May mga abyan nga nagahimo sini sa iya kaugalingon nga kalaglagan,” paandam sang Hulubaton 18:​24 apang nagadugang ini: “May abyan nga mahirop pa labi sa utod.” Diin mo masapwan ina nga sahi sang abyan?

Magsalig sa Inyo Pamilya

Kon may problema ka, natilawan mo na bala nga isugid ini sa imo tiayon ukon sa imo mga ginikanan? “Tuhoy sa madamo nga problema, ang hanuot nga pagsugilanon tuhoy sini amo lamang ang kinahanglanon,” pagbaton sang isa ka eksperiensiado nga manuglaygay. (Hulubaton 27:9) Ang Cristianong mga bana nga ‘nagahigugma sang ila asawa subong sang ila kaugalingon,’ ang mga asawa nga “nagapasakop sa ila mga bana,” kag ang mga ginikanan nga ginatamod sing serioso ang ila hatag-Dios nga salabton nga ‘padakuon ang ila kabataan sa panghunahuna ni Jehova’ magatinguha gid nga mangin mahinuklugon nga manugpamati kag mabuligon nga mga manuglaygay. (Efeso 5:​22, 33; 6:4) Bisan nga wala sia sing asawa ukon kabataan sa undanon nga paagi, daw ano ka dalayawon nga halimbawa ang ginpahamtang ni Jesus tuhoy sini!​—⁠Marcos 10:​13-16; Efeso 5:​25-27.

Ano kon ang problema indi masarangan atubangon sang mga katapo sang pamilya? Wala kita nagaisahanon sa Cristianong kongregasyon. “Sin-o ang maluya, kag indi ako maluya?” siling ni apostol Pablo. (2 Corinto 11:29) Sia naglaygay: “Dalha ninyo ang lulan sang isa kag isa.” (Galacia 6:​2; Roma 15:1) Sa tunga sang aton mga kauturan nga lalaki kag babayi, pat-od nga makakita kita sing madamo nga “utod nga natawo sa tion sang kabudlayan.”​—⁠Hulubaton 17:⁠17.

Pagsalig sa Kongregasyon

Sa kapin sa 80,000 ka kongregasyon sang mga Saksi ni Jehova sa bug-os nga kalibutan, may mga mapainubuson nga mga lalaki nga nagaalagad subong “masigkamanugpangabudlay sa inyo kalipay.” (2 Corinto 1:24) Ini amo ang mga gulang. “Ang tagsa,” siling ni Isaias, “subong sang palalipdan sa hangin kag palanaguan sa unos, subong sang mga ilig sang tubig sa duog nga kigas, subong sang landong sang daku nga igang sa duta nga makapalapyo.” Amo sina ang ginapanikasugan nga mahimo sang mga gulang.​—⁠Isaias 32:​2; 50:4; 1 Tesalonica 5:⁠14.

Ginatuman sang mga gulang ang Makasulatanhon nga mga kinahanglanon antes ‘itangdo sang balaan nga espiritu.’ Ang ihibalo tuhoy sini makapalig-on sang inyo pagsalig sa ila. (Binuhatan 20:​28; 1 Timoteo 3:​2-7; Tito 1:​5-9) Ang inyo itu-ad sa isa ka gulang magapabilin nga kompidensial. Ang pagkamasaligan isa sang iya mga kalipikasyon.​—⁠Ipaanggid ang Exodo 18:​21; Nehemias 7:⁠2.

Ang mga gulang sa kongregasyon “nagabantay sang inyo mga kalag subong nga sila ang magahatag sing husay.” (Hebreo 13:17) Wala bala ini nagapahulag sa inyo nga magsalig sa ila? Sing kinaugali, indi tanan nga gulang maayo gid sa pareho nga mga kinaiya. Ang iban mas madali palapitan, mabuot, ukon mahinangpanon sangsa iban. (2 Corinto 12:​15; 1 Tesalonica 2:​7, 8 11) Ngaa indi magtu-ad sa isa ka gulang nga malapit ang imo buot?

Ining mga lalaki indi ginabayaran nga mga propesyonal. Sa baylo, sila “dulot nga mga tawo,” nga gin-aman ni Jehova sa pagbulig sa imo. (Efeso 4:​8, 11-13; Galacia 6:1) Paano? Paagi sa malantipon nga paggamit sing Biblia, ginaaplikar nila ang nagabulong nga gahom sini sa imo personal nga kahimtangan. (Salmo 107:​20; Hulubaton 12:​18; Hebreo 4:​12, 13) Magapangamuyo sila upod sa imo kag para sa imo. (Filipos 1:​9; Santiago 5:​13-18) Ang bulig gikan sa sinang mahigugmaon nga mga manuglaygay makabulig sing daku agod bulngon ang isa ka naligban nga espiritu kag mapasag-uli ang kalinong sang panghunahuna.

Kon Paano Magtukod sing Masaligan nga mga Kaangtanan

Ang pagpangayo sing bulig, laygay, ukon sing isa nga nagapamati lamang indi tanda sang kaluyahon ukon kapaslawan. Isa lamang ini ka realistiko nga pagkilala nga indi kita himpit kag wala sang isa ang wala sing problema. Sa pagkamatuod, ang aton pinakadaku nga manuglaygay kag dalangpan amo ang aton langitnon nga Amay, si Jehova nga Dios. Nagaugyon kita sa salmista nga nagsulat: “Si Jehova ang akon kusog kag akon taming. Ang akon tagipusuon nagasalig sa iya, kag nabuligan ako.” (Salmo 28:7) Paagi sa pangamuyo hilway naton nga ‘mapabutyag sa iya ang aton tagipusuon’ sa tanan nga tion, may pagsalig nga nagapamati kag nagaulikid sia sa aton.​—⁠Salmo 62:​7, 8; 1 Pedro 5:⁠7.

Apang paano mo matun-an nga magsalig sa mga gulang kag sa iban pa sa kongregasyon? Una, usisaa ang imo kaugalingon. Nagakaigo bala ang imo mga ginakahadlukan? Ginaduhaduhaan mo bala ang motibo sang iban? (1 Corinto 13:​4, 7) May paagi bala nga mabuhinan ang risgo nga masaklaw ka? Huo. Paano? Tilawi nga kilalahon sing personal ang iban sa espirituwal nga paagi. Makigsugilanon sa ila sa mga miting sa kongregasyon. Mag-upod sa iya sa pamalaybalay nga hilikuton. Ang pagsalig, kaangay sang pagtahod, dapat pangabudlayan. Gani mangin mapailubon. Halimbawa, samtang amat-amat mo nga makilala ang isa ka espirituwal nga manugbantay, ang imo pagsalig sa iya magatubo. Amat-amat nga isugid ang imo mga problema. Kon nagahulag sia sa nagakaigo, mahinuklugon, kag maalamon nga paagi, ayhan luyag mo isugid sa iya ang dugang pa.

Ang mga masigkasumilimba ni Jehova, ilabi na ang Cristianong mga gulang, nagapangabudlay sing lakas nga mailog ang mahigugmaon nga mga kinaiya sang Dios sa ila pagpakig-angot sa isa kag isa. (Mateo 5:48) Nagaresulta ini sa pagsalig sang kongregasyon. Ang isa ka madugay na nga gulang nagasiling: “May isa ka butang nga dapat mahibaluan sang mga kauturan: Walay sapayan sang ginhimo sang isa ka tawo, wala nagakadula ang Cristiano nga gugma sang gulang sa iya. Mahimo nga wala niya naluyagan ang ginhimo, apang ginahigugma niya gihapon ang iya utod kag luyag nga buligan sia.”

Gani indi kinahanglan nga magbatyag nga nagaisahanon ka lang sa imo problema. Makighambal sa isa nga may “espirituwal nga mga kalipikasyon” nga makabulig sa imo sa pagpas-an sang imo problema. (Galacia 6:1) Dumduma nga ang “kabug-atan sa tagipusuon sang tawo nagapakuko sa sini,” apang “ang matahom nga pulong subong sang uludlan sang dugos, matam-is sa kalag kag nagapaayo sa mga tul-an.”​—⁠Hulubaton 12:​25; 16:⁠24.

[Kapsion sa pahina 26]

Ang bisan sin-ong Cristiano mahimo mapalapitan sa pagbulig sa isa ka paryente, abyan, ukon espirituwal nga utod nga may personal nga problema. Nahibaluan mo bala kon paano magbulig?

Ang Epektibo nga Manuglaygay

madali palapitan: Mateo 11:​28, 29; 1 Pedro 1:​22; 5:​2, 3

nagapili sing husto nga kahimtangan: Marcos 9:​33-37

nagatinguha nga mahangpan ang problema: Lucas 8:​18; Santiago 1:​19

wala nagakaakig: Colosas 3:​12-14

nagabulig sa isa nga ginabudlayan sa emosyon: 1 Tesalonica 5:​14; 1 Pedro 3:​8

nakahibalo sang iya mga limitasyon: Galacia 6:​3; 1 Pedro 5:​5

nagahatag sing espisipiko nga laygay: Salmo 19:​7-9; Hulubaton 24:​26

nakahibalo magtago sang kompidensial: Hulubaton 10:​19; 25:​9