“Isa Lamang sang Madamo nga Kabuhi nga Imo Natandog”
SANG Enero 1996, nagbalatian si Carol sing tumor sa utok. Sesentahon na sia apang antes sini, isa sia ka malipayon, mapagsik nga babayi nga may makapalig-on nga tinaga para sa tanan. Apang karon ginatinguhaan sang mga doktor nga maluwas sia sa kamatayon. Sa tion sang iya kabudlayan, nabaton ni Carol ang masunod nga sulat:
“Mahal nga Carol:
“Nasubuan gid ako bangod sang imo pagbalatian. Maayo lang, ginabuligan kita sang Biblia nga mahibaluan kag higugmaon ang matuod nga paglaum. Ini nga pag-laum amo ang paggahom sang Ginharian ni Jehova sa duta agod nga magkabuhi kita sa isa ka paraiso nga kahimtangan, ang tion nga ginapaabot naton tanan.
“Luyag ko mahibaluan mo nga ang imo personal nga hilikuton sa pagbantala nagluwas sang madamo nga tawo gikan sa walay katapusan nga kamatayon. Isa ako sa sining mga tawo. Ambot kon madumduman mo pa ang una naton nga pagkitaay. Beinte anyos ako sadto. Malaba ang akon buhok, nagabaligya sing mga droga, kag nagaistambay upod sa grupo sang mga buyong. Tanan kami may pusil kag wala sing matuod nga gugma kay bisan sin-o magluwas sa amon kaugalingon.
“Nanuktok ikaw sa akon ganhaan upod ang isa pa ka Saksi kag gintanyagan mo ako sing Ang Lalantawan kag Magmata! Ginhatagan ko ikaw sing isa ka dolyar kag nagsiling nga indi ko luyag ang mga magasin. Ginhambalan mo ako nga wala kamo nagabantala agod lamang mangayo sing mga donasyon. Ginsilingan mo ako nga nagahimo kamo sing hilikuton agod buligan ang mga tawo nga basahon ang Biblia. Indi ko na mapat-od kon bala ginkuha ko ang mga magasin ukon ginbasa ini. Apang, gintanom mo ang binhi sang kamatuoran sa akon kabuhi.
“Pila ka tuig sang ulihi ang isa pa ka Saksi nga si Gary, ang nagduaw sa balay sang akon iloy sang didto ako. Ginsugiran ko sia tuhoy sa imo pagduaw sang nagligad nga pila ka tuig. Nagtuon ako sing Biblia upod kay Gary sa sulod sang malawig nga tion tubtob nga nabawtismuhan ako sang ulihi sang 1984. Karon ginatudluan ko ang akon kabataan sing kamatuoran tuhoy sa Ginharian sang Dios.
“Napat-od ko nga isa lamang ako sang madamo nga kabuhi nga imo natandog sa sulod sang mga tinuig sang imo matutom nga pag-alagad. Apang, paagi sining mahigugmaon nga kalulo, ginbuligan mo kami sang akon pamilya nga makilala ang Dakung Dios nga si Jehova, kag ang iya Anak nga si Jesucristo. Ginapaabot ko ang adlaw nga makita ko ikaw sa bag-ong sistema sang mga butang diin pagapahiran ni Jehova ang tagsa ka luha sa aton mga mata, kag wala na ang kamatayon.—Bugna 21:4.
“Kon tuhoy sa amon sang akon pamilya, nalipay kami nga nakilala ka namon kag nangin bahin sang imo pagpanaksi nga hilikuton. Salamat gid.
“Upod ang utudnon nga gugma,
Peter”
Pagkatapos sang anom ka bulan nga pagbalatian, napatay si Carol sang Marso 1996, nga nakasab-ug sing madamo nga binhi sang kamatuoran sa sulod sang iya 35 ka tuig nga pag-alagad subong makugi nga ebanghelisador. Natun-an niya nga indi gid mahibaluan sang isa kon san-o magabunga ang binhi, bisan tinuig pa sa ulihi.—Mateo 13:23.