Nagapati Ka bala sa Reinkarnasyon?
“NADUMDUMAN mo bala ang aton kaingod nga babayi nga naluyagan mo anay sang diri ka pa sa India?” sulat ni Mukundbhai sa iya anak nga lalaki, nga isa ka estudyante sa unibersidad sa Estados Unidos. “Mamana na sia sa madason nga mga semana. Sa banta ko dapat mo ini mahibaluan.”
Ngaa ginsugid sang amay ini nga balita sa iya anak? Aba, pilit anay nga gintapos ni Mukundbhai yadto nga pagluyagay sang mga tin-edyer sang nagligad nga mga tuig. Isa pa, ang iya anak madugay na sa Amerika nga nagakuha sing mas mataas nga edukasyon sa sulod sang anom ka tuig. Wala na sia sing komunikasyon sa babayi sadto nga tion, kag nakahibalo sa sina si Mukundbhai.
Ngaa, nian, nabalaka gid sia sa sini? Ini bangod si Mukundbhai nagapati sa reinkarnasyon, ukon sa liwat nga pagkabun-ag.a Kon natabuan nga nagluyagay sila sadtong bata pa sila bangod mag-asawa na anay sila sang nagligad nga mga kabuhi, mapintas gid nga bulagon sila karon nga yara na sila sa edad nga mahimo magminyo. Luyag lamang pahibaluon ni Mukundbhai ang iya anak tuhoy sa kahimtangan antes mangin asawa sang iban ang babayi sa sining pagkabuhi.
Binagbinaga ang isa pa ka halimbawa. Isa ka kuatro anyos nga bata nga babayi ang nagaantos sing kasakit sa isa ka ospital sa Mumbai, India. May diperensia ang balbula sang iya tagipusuon. Indi mabatas sang iya manggaranon nga mga ginikanan ang pag-antos sang bata. Apang nangatarungan sila: “Dapat namon ini batunon. Basi may nahimo sia anay sa iya nagligad nga pagkabuhi nga takus sa sini.”
Ang pagpati sa reinkarnasyon may importante nga bahin sa kabuhi sang minilyon sa Hinduismo, Budhismo, Jainismo, Sikhismo, kag iban pa nga mga relihion nga naghalin sa India. Ang mga inagihan sa kabuhi—halin sa paghigugma tubtob sa daku nga pag-antos—ginakabig nga mga resulta sang mga buhat nga ginhimo sang nagligad nga pagkabuhi ukon mga pagkabuhi.
Madamo man sa mga kadutaan sa Nakatundan ang nawili sa doktrina sang reinkarnasyon. Ang Amerikana nga artista nga si Shirley Maclaine nagapati sa sini. Ang manunulat nga si Laurel Phelan sang Vancouver, British Columbia, Canada, nagapangangkon sing 50 ka nagligad nga pagkabuhi. Sa isa ka surbe sang Gallup sadtong 1994, nga ginhimo para sa CNN/USA Today, kapin sa 270 sang 1,016 ka hamtong ang nagsiling nga nagapati sa reinkarnasyon. Ang pagpati sa reinkarnasyon isa man ka bahin sang New Age nga hublag. Apang ano nga pamatuod ang nagasakdag sa sining pagpati?
“Ang mga handumanan sang nagligad nga pagkabuhi!” siling sang mga nagapati sa reinkarnasyon. Gani, sang ang tres-anyos nga si Ratana sa Bangkok may “mga handumanan sang iya nagligad nga pagkabuhi subong isa ka relihiosa nga babayi nga napatay sang sesentahon sia,” ginbaton sang kalabanan nga tagpanilag ang iya halimbawa subong isa ka mabakod nga pamatuod sang reinkarnasyon.
Apang, madamo sing duhaduha. Kag ang iban pa nga mga paathag tuhoy sa mga handumanan nga ginpatungod sa nagligad nga mga pagkabuhi posible.b Sa iya libro nga Hinduism: Its Meaning for the Liberation of the Spirit, ang Hindu nga pilosopo nga si Nikhilananda nagsiling nga ‘ang mga eksperiensia sa pihak sang kamatayon indi mapamatud-an paagi sa ikasarang sa pagpangatarungan.’ Apang nagasiling sia nga “ang doktrina sang liwat nga pagkabun-ag mas mapatihan sangsa indi mapatihan.”
Apang ginasakdag bala sang Biblia ini nga panudlo? Kag anong paglaum para sa minatay ang ginahatag sang inspirado nga Pulong sang Dios?
[Mga footnote]
a “Ang reinkarnasyon,” siling sang The New Encyclopædia Britannica, nagakahulugan sing “liwat nga pagkabun-ag sang kalag sa isa ukon kapin pa ka alagisod nga pagkabuhi, nga mahimo mangin tawo, sapat, ukon, sa pila ka higayon, tanom.” Ang tinaga nga “liwat nga pagkabun-ag” ginagamit man sa paglaragway sa sini nga katingalahan, apang ang tinaga nga “reinkarnasyon” kinaandan na nga ginabaton. Ginabulubaylo sang pila ka diksionaryo sang Indian nga pamulong ang mga tinaga.
b Tan-awa ang pahina 5-7 sang Hunyo 8, 1994, nga guwa sang Awake!
[Kapsion sa pahina 4]
Ginasilutan bala sia tungod sa ginhimo niya nga mga sala sang nagligad nga pagkabuhi?