Reinkarnasyon Bala ang Yabi sa mga Tanhaga sang Kabuhi?

Nabuhi ka na bala anay?

Mabuhi ka bala liwat sa pila ka porma sang kabuhi sa tapos ka mapatay?

Mahimo nga ipahanumdom sining mga pamangkot ang doktrina sang reinkarnasyon.

Ginapaathag sang The New Encyclopæedia Britannica ang “reinkarnasyon” sa masunod nga paagi: “Isa ka pagpati sa pagkabun-ag liwat sang kalag sa isa ukon dugang pa nga mga pagkabuhi, ayhan tawo, sapat, ukon, sa pila ka hitabo, utan.”

Ang reinkarnasyon may importante nga papel sa mga relihion sang Sidlangan, labi na sa mga naghalin sa India, subong sang Budhismo, Hinduismo, Jainismo, kag Sikhismo. Sa tunga sang mga Hindu sa India, halimbawa, ang kabuhi ginakabig subong isa ka dalayon nga siklo sang kamatayon kag pagkabun-ag liwat.

Apang, sining karon nga mga tinion, madamo sang nagapuyo sa Nakatundan nga Hemisperio, lakip ang pila ka pamatan-on, ang naganyat sa ideya sang reinkarnasyon. Suno sa isa ka kolumnista nga nagsulat sa Sunday Star sang Canada, ang rason sa sining daku nga interes “amo ang resulta sang epekto sang relihioso nga mga ideya sang Sidlangan sa aton Nakatundan nga katilingban, nga nagsugod sang katuigan 1960.”

Ang isa pa ka rason sa interes sa reinkarnasyon amo nga ang pila ka kilala nga mga tawo nagpabutyag sang ila kaugalingon sa publiko kag serioso nga nagsiling nga nabuhi na sila anay sing makaisa ukon kapin pa. Subong man, ang radyo, TV, mga magasin, kag iban pa nga alagyan sang balita nagpakita sing interes sa reinkarnasyon, subong man ang nanuhaytuhay nga mga propesyonal subong sang mga doktor kag mga manunudlo.

Ini tanan nagpukaw sing daku nga interes. Sa amo, suno sa pila ka surbe, mga ikap-at sang katawhan sa Canada kag Estados Unidos ang nagsiling nga ginabaton nila ang reinkarnasyon.

Ginapangangkon nga mga Eksperiensia sa Nagligad nga Kabuhi

Ang artista nga si Shirley MacLaine nagsiling sa pag-interbyu sa iya ni Phyllis Battelle sa Ladies’ Home Journal nga nakahimo na sia sing pila ka “paglakbay” sa nagligad nga lakat sang panahon. “Madumduman ko ang madamo sang akon nagligad nga mga kabuhi​—kon kaisa isa ako ka lalaki, sa iban nga mga tion isa ako ka babayi,” siling niya.

Sa libro nga Coming Back, ginlaragway ni Dr. Raymond Moody ang mga eksperimento nga ginhimo niya sa iya mga estudyante kag sa iban pa. Nagsiling sia nga paagi sa paglupay gindala niya sila pabalik sa tion antes sang ila pagkabun-ag, kag nagsiling sila nga may mga madumduman sila gikan sa ila nagligad nga mga pagkabuhi. Ang isa ka tawo nagsiling nga nagkabuhi sia anay subong isa ka Eskimo sa isa ka komunidad sang mga Eskimo. Ang isa pa gid nagsiling nga nagkabuhi na sia anay sang ‘panahon sang bato,’ linibo ka tuig ang nagligad.

Si Dr. Moody mismo nagsiling nga siam ka kabuhi na ang iya inagihan. Nanuhaytuhay ini nga pagkabuhi halin sa isa ka pagkabuhi sa ibabaw sang kahoy subong isa ka sahi sang “tawo sa wala pa masugdi ang pagrekord sa maragtas” tubtob sa isa ka pagkabuhi sang mga adlaw sang Romanong Emperyo, sang, siling niya, ginsalakay sia kag ginpatay sang isa ka leon sa sulod sang arena.

Ang paggamit sing paglupay agod dalhon ang nagapamangkot nga mga tawo pabalik sa isa kuno ka panahon antes sang ila pagkabun-ag ginlaragway man nga mapuslanon para sa iban. Nagamit na ini sang mga doktor sa pagbulong sang mga balatian sa emosyon. Ginapangangkon nga ang indi mahangpan nga mga kahadlok nadula sang gin-usoy ang problema pabalik sa isa ka hitabo sa nagligad nga kabuhi. Daw ano ka makatarunganon ini nga ideya?

Mga Eksperiensia Tuhoy sa Diutayan Lang nga Pagkapatay Ginsaysay

Ang mga eksperiensia tuhoy sa diutayan lang nga pagkapatay nga ginsaysay sang pila ka tawo nagpabantog sa ideya sang reinkarnasyon. Sa libro nga Life After Life, ginreport ni Dr. Moody ang iya mga natukiban tuhoy sa diutayan lang nga pagkapatay nga naeksperiensiahan sang mga 50 ka tawo.

Samtang wala nagapalareho ang ila mga eksperiensia, para kay Dr. Moody ining mga eksperiensia may isa ka bitula. Ining mga tawo nagbatyag nga nag-agi sila sa isa ka malaba kag madulom nga tanel. Ginbatyag nila nga daw ginpain sila gikan sa ila lawas, kag nagalutawlutaw sila. Nabatyagan nila nga madasig sila nagpaibabaw sa tanel paguwa sa isa ka tuman kasanag nga kapawa, kag sa punta sang tanel, nakita nila ang madugay na napatay nga mga katapo sang ila pamilya. Sang ulihi, nagmata sila sa ila kaugalingon nga mga lawas. Apang, wala maeksperiensiahan sang tanan ang tagsatagsa sining mga hugna.

Ginasiling nga ina nga mga eksperiensia may positibo nga epekto sa mga tawo nga nakaagi sini. Kon amo, dapat nga nakabulig ini sa ila nga madula ang ila kahadlok sa kamatayon kag dapat nakahatag ini sa ila sing pagsalig nga may katuyuan ang kabuhi. Apang indi amo sina pirme ang nagakatabo. Madamo ang nagakahadlok gihapon sa kamatayon kag kulang sing pagsalig nga ang kabuhi may matuod nga katuyuan.

Ang mga nagapati sa reinkarnasyon nagasiling nga nakakita sila sa sina nga mga eksperiensia sing suporta sa ideya nga ang tawhanon nga kalag nagakabun-ag sa nanuhaytuhay nga mga porma sang kabuhi. Apang mapatihan bala ini nga doktrina? Ginahatag gid bala sang reinkarnasyon ang yabi sa mga tanhaga sang kabuhi? May makita gid bala kita nga sabat sa mga pamangkot nga, Nabuhi ka na bala anay? Mabuhi ka bala liwat? Ang tanan bala nga tawo may kalag nga nagabiya sa lawas sa kamatayon? Ipaathag ining mga pamangkot sa masunod nga mga artikulo.

[Blurb sa pahina 4]

Nagapanguna ang reinkarnasyon sa mga relihion sang Sidlangan

[Retrato sa Pahina 4]

Ang rweda sang kabuhi sang mga Hindu