Epafras—“Isa ka Matutom nga Ministro ni Cristo”

SIN-O ang nagtukod sang Cristianong mga kongregasyon sa Corinto, Efeso, kag Filipos? Ayhan maabtik ka nga magasabat: ‘Si Pablo, ang “apostol sa mga pungsod.” ’ (Roma 11:13) Mahimo nga husto ka.

Apang, sin-o ang nagtukod sang mga kongregasyon sa Colosas, Hierapolis, kag Laodicea? Bisan pa indi kita sigurado, mahimo nga sia amo si Epafras. Ti, ayhan luyag mo mahibaluan ang dugang pa tuhoy sini nga ebanghelisador, kay ginatawag sia nga “isa ka matutom nga ministro ni Cristo.”​—⁠Colosas 1:⁠7.

Ebanghelisador sa Nalupyakan sang Lycus

Ang ngalan nga Epafras pinalip-ot sang Epafrodito. Apang si Epafras tuhay kay Epafrodito nga taga-Filipos. Si Epafras taga-Colosas, isa sang tatlo ka sentro sang mga kongregasyon sa nalupyakan sang Suba sang Lycus, sa Asia Minor. Ang Colosas mga 18 kilometros lamang halin sa Laodicea kag 19 kilometros halin sa Hierapolis, sa dumaan nga rehiyon sang Frigia.

Wala ginasugid sing maathag sang Biblia kon paano nakalab-ot sa Frigia ang maayong balita sang Ginharian sang Dios. Apang, ang mga taga-Frigia didto sa Jerusalem sang adlaw ang Pentecostes 33 C.⁠E., ayhan bangod ang pila sa ila mga taga-Colosas. (Binuhatan 2:​1, 5, 10) Sadto anay sang ministeryo ni Pablo sa Efeso (mga 52-55 C.⁠E.), ang panaksi nga ginhatag sa sadto nga lugar mapagsik kag epektibo katama nga indi lamang ang mga taga-Efeso kundi man “ang tanan nga nagapuyo sa distrito sang Asia nakabati sang pulong sang Ginuo, tingob mga Judiyo kag mga Griego.” (Binuhatan 19:10) Mahimo nga wala mabantala ni Pablo ang maayong balita sa bug-os nga Nalupyakan sang Lycus, kay madamo sang nangin Cristiano sa sinang rehiyon ang wala gid makakita sa iya.​—⁠Colosas 2:⁠1.

Suno kay Pablo, ang nagtudlo sa mga taga-Colosas tuhoy “sa di-bagay nga kaluoy sang Dios sa kamatuoran” amo si Epafras. Ang katunayan nga ginatawag ni Pablo ining kaupod nga manugpangabudlay nga “isa ka matutom nga ministro ni Cristo tungod sa amon” nagapakita nga si Epafras isa ka aktibo nga ebanghelisador sa sadto nga lugar.​—⁠Colosas 1:​6, 7.

Si apostol Pablo kag ang ebanghelisador nga si Epafras lunsay may daku nga kabalaka sa espirituwal nga kaayuhan sang ila mga masigkatumuluo sa Nalupyakan sang Lycus. Subong “apostol sa mga pungsod,” si Pablo nalipay gid nga makabalita tuhoy sa ila pag-uswag. Nabalitaan ni Pablo gikan mismo kay Epafras ang tuhoy sa espirituwal nga kahimtangan sang mga taga-Colosas.​—⁠Colosas 1:​4, 8.

Ang Report ni Epafras

Ang mga taga-Colosas may malubha nga mga problema sa bagay nga naghaylo ini kay Epafras nga maglakbay sing malayo pakadto sa Roma agod lamang nga ipakighambal ini kay Pablo. Ang detalyado nga report ni Epafras amo gid ang nagpahulag kay Pablo nga maghimo sing duha ka sulat sa sadtong mga kauturan nga kuntani wala niya makilala. Ang isa amo ang sulat sa mga taga-Colosas. Ang isa pa ka sulat, nga ayhan wala matipigan, ginpadala sa mga taga-Laodicea. (Colosas 4:16) Rasonable hunahunaon nga ang mga kaundan sadto nga mga sulat gintuyo nga makalubad sa mga kinahanglanon sadtong mga Cristiano subong sa pagkahantop ni Epafras. Anong mga kinahanglanon ang nakita niya? Kag ano ang ginasugid sini sa aton tuhoy sa iya personalidad?

Ang sulat sa mga taga-Colosas daw nagapakita nga si Epafras nabalaka nga ang mga Cristiano sa Colosas nabutang sa katalagman bangod sang paganong mga pilosopiya nga may kaangtanan sa pagdumili sa kaugalingon, espiritismo, kag idolatroso nga disparatis. Dugang pa, ang pila ka katapo sang kongregasyon mahimo nga naimpluwensiahan sang Judiyong panudlo tuhoy sa paglihi sa mga pagkaon kag sa pagsaulog sa pat-od nga mga adlaw.​—⁠Colosas 2:​4, 8, 16, 20-23.

Ang katunayan nga ginsulat ni Pablo ang tuhoy sini nga mga butang nagapakita sa aton kon daw ano ka alisto kag sensitibo si Epafras sa mga kinahanglanon sang iya mga masigka-Cristiano. Nagpakita sia sing mahigugmaon nga pag-ulikid sa ila espirituwal nga kaayuhan, nga nagahunahuna sang mga katalagman sang palibot nga ginapuy-an nila. Nangayo sing laygay si Epafras kay Pablo, kag nagapakita ini nga mapainubuson sia. Ayhan nakita niya ang kinahanglanon nga makabaton sing laygay gikan sa isa nga mas eksperiensiado. Sa bisan ano nga kahimtangan, si Epafras nagpanghikot sing maalamon.​—⁠Hulubaton 15:⁠22.

Isa ka Tawo nga Nagapakabahandi sang Pangamuyo

Sa hingapusan nga bahin sang sulat nga ginpadala niya sa mga Cristiano sa Colosas, si Pablo nagsiling: “Si Epafras, nga isa sa inyo, nga ulipon ni Cristo Jesus, nagapadala sa inyo sang iya panamyaw, nga hanuot nga nagadumdom pirme sa inyo sa iya mga pangamuyo, agod nga sa katapusan magtindog kamo nga hamtong kag may malig-on nga pagtuo sa tanan nga kabubut-on sang Dios. Ako gid nagasaksi nga nanikasog sia sing lakas tungod sa inyo kag sa mga sa Laodicea kag sa mga sa Hierapolis.”​—⁠Colosas 4:​12, 13.

Huo, bisan sang “masigkabilanggo” anay sia ni Pablo sa Roma, ginpanumdom ni Epafras ang iya hinigugma nga mga kauturan sa Colosas, Laodicea, kag Hierapolis kag nangamuyo para sa ila. (Filemon 23) Sing literal, ‘nakigsumpong sia’ para sa ila sa pangamuyo. Suno sa iskolar nga si D. Edmond Hiebert, ang Griegong termino nga gingamit diri nagakahulugan sing “lakas kag mabug-at nga hilikuton,” nga kaanggid sa “kasakit” sa hunahuna nga naeksperiensiahan ni Jesucristo samtang nagapangamuyo sa katamnan sang Getsemane. (Lucas 22:44) Handum gid ni Epafras nga ang iya espirituwal nga mga kauturan nga lalaki kag babayi makatigayon sing kalig-unan kag bug-os nga Cristianong pagkahamtong. Daw ano nga kabulahanan para sa mga kongregasyon ang subong sini ka mahunahunaon sa espirituwal nga utod nga lalaki!

Sanglit si Epafras gintawag nga “hinigugma nga masigkaulipon,” wala sing duhaduha nga palangga sia sang mga masigka-Cristiano. (Colosas 1:7) Kon nagakaigo, ang tanan nga katapo sang kongregasyon dapat mangin mainit kag mahigugmaon. Halimbawa, sarang mahatag ang igtalupangod sa pagbulig sa masakiton, tigulang, ukon iban pa nga may pinasahi nga mga kinahanglanon. Ayhan may lainlain nga mga responsabilidad nga atipanon sa kongregasyon, ukon ayhan posible nga makaamot sa teokratikong mga proyekto sa pagpatindog.

Ang pagpangamuyo para sa iban, subong sa ginhimo ni Epafras, isa ka dagway sang sagrado nga pag-alagad nga mahimo sang tanan. Ining mga pangamuyo mahimo nga maglakip sa mga ekspresyon sang pag-ulikid sa mga sumilimba ni Jehova nga yara sa nanuhaytuhay nga katalagman ukon kabudlayan sa espirituwal ukon pisikal man nga paagi. Paagi sa pagpanikasog sing lakas sa sining paagi, mangin kaangay kita ni Epafras. Ang tagsatagsa sa aton may pribilehiyo kag kalipay nga mapamatud-an subong “hinigugma nga masigkaulipon” sa panimalay sang matutom nga mga alagad ni Jehova.