“Ginasunod Nila ang Ila Relihioso nga Paghanas”

ISA ka babayi gikan sa Miami, Florida, E.⁠U.⁠A., ang nagpadala sing masunod nga sulat sa isa ka ­lokal nga pamantalaan. “Sang Dis. 10 ang kahita sang akon anak nga lalaki ginkawat sa iya bulsa sa isa ka tiendahan. Nagaunod ini sang iya lisensia sa pagmaneho, So­cial Se­cu­ri­ty ­card, kbp., subong man sang $260.

“Pagkatapos mareport sa manedyer ang tuhoy sa ginkawat sa iya, nagpauli sia. Sang maggulugab-i na nakabaton sia sing tawag sa telepono gikan sa babayi nga nagahambal sing Espanyol nga, paagi sa pagpatpat sang opereytor [sang telepono], nagsugid sa iya nga nakita niya ang iya kahita.

“Ginhatag niya ang iya direksion. . . . Gindaho niya sa iya ang kahita, nga yara gihapon ang tanan, lakip na ang $260.

“Nakita niya sang ginkawat sang makawat ang iya kahita, gani nagsinggit sia. Ginhulog sang makawat ang kahita kag nagdalagan. Sadto nga tion wala na niya makita ang akon anak, gani gindala niya pauli ang kahita kag nanawag.

“Sia kag ang iya pamilya mga Saksi ni Jehova. Maathag gid nga ginasunod nila ang ila relihioso nga paghanas.”

Wala ginapakita sang mga Saksi ni Jehova ang pagkabunayag agod lamang makabaton sing pagdayaw sa mga tawo. (Efeso 6:7) Sa baylo, hanuot gid nila nga luyag makahatag sing kadayawan sa ila langitnon nga Amay, si Jehova. (1 Corinto 10:31) Ang ila gugma sa Dios kag sa isigkatawo ang nagapahulag sa ila nga ibantala ang “maayong balita” tuhoy sa Ginharian sang Dios. (Mateo 24:14) Paagi sa Ginharian, ang Dios nagasaad nga himuon ang duta nga isa ka matahom nga paraiso. Nian ang duta mangin isa ka duog indi lamang nga may pisikal nga katahom kundi may labing maayo man nga moralidad diin magaluntad sing dayon ang pagkabunayag.​—⁠Hebreo 13:​18; 2 Pedro 3:⁠13.