Pagsekreto sa ngalan sang Ginuo

ANG pagbomba sing makahililo nga gas sa estasyon sang tren sa idalom sang duta, sa Tokyo, Japan sang Marso 1995 nagpatay sing 12 ka tawo, nagtuga sing balatian sa linibo pa, kag nagbulig nga mabuyagyag ang isa ka sekreto. Ang isa ka sekta sang relihion nga nakilal-an subong Aum Shinrikyo (Supremo nga Kamatuoran) sekreto nga nagtukod sing isa ka arsenal sang sarin gas, agod gamiton sa pagtigayon sang misteryoso nga mga tulumuron.

Isa ka bulan sang ulihi isa ka bomba ang nagpawasaag sa isa ka tinukod sang pederasyon sa Siudad sang Oklahoma, E.⁠U.⁠A., kag nagpatay sing 167 ka tawo. Ginpakita sang ebidensia nga ang pagbomba daw naangot sa pagsalakay sang gobierno sa relihioso nga kulto nga Branch Davidian sa Waco, Texas, eksakto duha ka tuig ang nagligad. Mga 80 ka katapo sang kulto ang napatay sadto nga tion. Ginbuyagyag man sang pagbomba ang isa ka sekreto sa kalabanan nga tawo: Madamong paramilitar nga mga grupo ang nagapanghikot karon sa Estados Unidos, ang iban sa sini ginasuspetsahan nga sekreto nga nagaplano sing pagrebelde sa gobierno.

Sang ulihi, sang nagahingapos na ang 1995, nasapwan ang sunog nga mga bangkay sang 16 ka tawo sa isa ka kagubatan malapit sa Grenoble, Pransia. Mga katapo sila sang Order of the Solar Temple, isa ka diutay relihioso nga kulto nga sang Oktubre 1994 nangin kaundan sang balita sa Switzerland kag Canada sang ang 53 sang ila mga katapo mahimo nga naghikog ukon ginpamatay. Apang bisan pagkatapos sining trahedya, ang sekta padayon nga nagpanghikot. Tubtob karon ang ila motibo kag mga tulumuron nagapabilin nga sekreto.

Ang mga Katalagman sang Relihioso nga Pagsekreto

Bangod sining mga hitabo, katingalahan bala nga madamo nga tawo ang nagasuspetsa sa relihiosong mga grupo? Sa pagkamatuod wala sing luyag magsuporta sa isa ka sekreto nga organisasyon​—⁠relihioso man ukon indi​—⁠nga nagaabuso sa iya pagsalig kag nagapahulag sa iya nga himud-usan ang mga tulumuron nga wala niya ginaugyunan. Apang, ano ang mahimo sang mga tawo, agod malikawan nga madalahig sa indi masaligan sekreto nga mga grupo?

Sing maathag, maayo nga usisaon anay sang isa nga luyag magsulod sa isa ka sekreto nga grupo ang matuod nga mga tulumuron sini. Dapat magbantay sa bisan anong pagpamilit sang mga abyan ukon mga kakilala, kag ang mga desisyon napasad indi sa emosyon kundi sa mga katunayan. Dumduma, nga ang indibiduwal mismo​—⁠indi ang iban​—⁠ang magaantos sang bisan anong posible nga mga resulta.

Ang pagsunod sa mga prinsipio sang Biblia amo ang sigurado gid nga paagi sa paglikaw sa makatalagam nga mga grupo nga wala sing dungganon nga mga motibo. (Isaias 30:​21) Nagalakip ini sang paghupot sing pagkawalay nadampigan sa politika, pagpakita sing gugma sa iban, bisan sa mga kaaway, paglikaw sa “mga buhat sang unod,” kag pagpalambo sing mga bunga sang espiritu sang Dios labaw sa tanan, ang matuod nga mga Cristiano indi dapat mangin bahin sang kalibutan, subong nga amo man si Jesus, kag ini nga dalanon nagalakip sa pagpakigbahin sa kalibutanon nga sekreto nga mga organisasyon.​—⁠Galacia 5:​19-23; Juan 17:​14, 16; 18:​36; Roma 12:​17-21; Santiago 4:⁠4.

Ang mga Saksi ni Jehova hanuot nga mga estudyante sang Biblia nga serioso sa ila pagtuo kag nagakabuhi sing dayag nahisuno sa sini. Sa bilog nga kalibutan, nakilal-an sila subong isa ka relihioso nga grupo nga ‘nagapangita sing paghidait kag nagatinguha sini.’ (1 Pedro 3:11) Ang ila libro nga Jehovah’s Witnesses​—⁠Proclaimers of God’s Kingdom husto nga nagasiling: “Ang mga Saksi ni Jehova indi gid isa ka sekreto nga grupo. Ang ila pasad sa Biblia nga mga pagtuluuhan matigayon sing bug-os sa mga publikasyon nga matigayon sang tanan. Dugang pa, ginatinguhaan gid nila nga maagda ang publiko sa pagtambong sa ila mga miting agod makita kag mabatian nila mismo ang nagakatabo sa tion sang miting.”

Ang matuod nga relihion wala nagasekreto. Ang mga sumilimba sang matuod nga Dios ginsugo nga indi pag-itago ang ila identidad ukon ang ila pagluntad subong mga Saksi ni Jehova. Ginpuno sang unang mga disipulo ni Jesus ang Jerusalem sang ila mga panudlo. Ginpahibalo nila sing dayag ang ila mga ginatuuhan kag mga hilikuton. Matuod man ini sa mga Saksi ni Jehova karon. Sa sini nga rason, kon sayop nga ginadumili sang diktador nga mga rehimen ang kahilwayan sa pagsimba, ang mga Cristiano dapat mahalungon kag maisugon nga magapadayon sa ila hilikuton, nagatuman sa “Dios subong manuggahom sa baylo sang mga tawo, isa ka kahimtangan nga ila nadangatan bangod sang ila maisugon nga pagpanaksi sing dayag.”​—⁠Binuhatan 5:​27-29; 8:​1; 12:​1-14; Mateo 10:​16, 26, 27.

Kon ginhunahuna mo nga ang mga Saksi ni Jehova isa ka sekreto nga kulto ukon sekta, ayhan bangod diutay lamang ang imo nahibaluan tuhoy sa ila. Amo man sina ang nangin kahimtangan sang madamo sadtong unang siglo.

Ang Binuhatan Kapitulo 28 nagasugid sa aton tuhoy sa pagpakigsapol ni apostol Pablo sa Roma upod sa “pangulong mga lalaki sang mga Judiyo.” Ginhambalan nila sia: “Ginahunahuna namon nga nagakaigo nga mabatian halin sa imo kon ano ang imo panghunahuna, bangod matuod nga kon tuhoy sa sini nga sekta nahibaluan namon nga sa tanan nga duog ginapakamalaut ini.” (Binuhatan 28:​16-22) Sa pagsabat, ‘ginpaathag [ni Pablo] ang mga butang sa ila paagi sa maid-id nga pagpanaksi nahanungod sa ginharian sang Dios,’ kag “ang iban nagtuo sang iya ginpamulong.” (Binuhatan 28:​23, 24) Nakabanepisyo gid sila paagi sa pagtigayon sing kamatuoran tuhoy sa matuod nga Cristianismo.

Bangod nadedikar sila sa paghimo sing dayag kag publiko nga pag-alagad sa Dios, nalipay ang mga Saksi ni Jehova nga isugid ang maathag nga mga kamatuoran sang ila hilikuton kag mga ginatuuhan sa kay bisan sin-o nga interesado nga makahibalo. Ngaa indi ikaw magpangusisa, agod makahimo ka sing isa ka nasanagan nga paghinakop?

[Kapsion sa pahina 6]

Ang mga Saksi ni Jehova nalipay sa pagsugid kon sin-o sila kag kon ano ang ila ginahimo