Report Sang Mga Manugbantala Sang Ginharian

Pagdangop sa Teokratikong Organisasyon ni Jehova

SANG dumaan nga mga tion si manalagna Isaias napahulag sa pagsiling: ‘Dapat nila himayaon si Jehova sa kapuluan sang dagat.’ (Isaias 24:15) Ginakabig sang mga Saksi ni Jehova ang mga kapuluan sang dagat subong bahin sang “napuy-an nga duta” nga tuhoy sini si Jesus nagsiling “ibantala ang maayong balita.”​—⁠Mateo 24:​14; Marcos 13:⁠10.

Ang Marquesas Islands nahamtang mga 1,400 kilometros sa naaminhan-nasidlangan sang Tahiti. Bahin sila sang nabaw-ing nga mga kapuluan sang South Pacific nga gintawag French Polynesia. Bangod sang matambok, bulkaniko nga duta kag mainit, basa-basaon nga klima, bugana ang mga utanon sa sini nga mga kapuluan. Apang, ang Marquesas nagapatubas man sing isa pa ka sahi sang bunga. Binagbinaga ang eksperiensia sang isa ka pamilya nga nagbaton sa mensahe sang Ginharian sa isla sang Hiva Oa.

Si Jean kag ang iya asawa, si Nadine, nalainan sa gintawag sibilisado nga katilingban sang Nakatundan nga Europa diin nagapuyo sila. Sa amo namat-od sila nga biyaan ining masako nga estilo sang kabuhi kag nagsaylo upod sa ila bata padulong sa Marquesas Islands. Ang ila bag-o nga balay, nga human sa kawayan, nahamtang sa isa ka nabaw-ing nga nalupyakan. Agod makakadto sa ila pinakamalapit nga mga kaingod, ginalatas nila ang mabudlay nga banas sa bukid sa sulod sang duha ka oras. Ang pinakamalapit nga minuro, nga may doktor, eskwelahan, kag tiendahan tatlo ka oras ang kalayuon sakay sa dyip.

Sanday Jean kag Nadine indi interesado sa relihion. Apang, nagaentra sila sa paghambalanay tuhoy sa ginhalinan sang kabuhi. Sa masami, ginapadaku nila ang masibod nga mga teoriya sang ebolusyon. Apang wala sining ila mga teoriya ang nakahatag sa ila sing kaayawan.

Pagkatapos makapuyo sa nabaw-ing nga duog sa sulod sang anom ka tuig, nakibot sila sang ginduaw sila sang duha sang mga Saksi ni Jehova. Nahibaluan sang mga Saksi ang ginapuy-an nanday Jean kag Nadine gikan sa malapit nga mga tagaminuro. Siempre pa, ang pagsugilanon nagdul-ong sa paghinun-anon tuhoy sa teoriya sang ebolusyon. Sa kalipay sang mag-asawa, ang mga Saksi may dala nga kopya sang libro nga Life​—⁠How Did It Get Here? By Evolution or by Creation?, nga ginbalhag sang mga Saksi ni Jehova. Nalipay sanday Jean kag Nadine nga nakatigayon sila sing isa ka libro nga nagaunod sing maid-id nga pag-usisa kon paano nagsugod ang kabuhi.

Pagligad sang pila ka tion, isa ka pagtuon sa Biblia ang nasugdan. Sa sulod sang mga tatlo ka tuig, sanday Jean kag Nadine padayon nga nag-uswag. Nakumbinsi sila nga sa indi madugay ang bug-os nga kalibutan mangin isa ka paraiso. Sang tatlo na ang ila kabataan, ang pagbiyahe sing apat ka oras agod magtambong sa Cristianong mga miting sa Kingdom Hall nangin mabudlay gid nga hangkat. Apang, wala ini magpugong sa ila sa pagtambong. Sang ulihi ginsimbolohan nanday Jean kag Nadine ang ila dedikasyon kay Jehova paagi sa bawtismo sa tubig. Ginhimo nila ini sa isa ka kombension sa mayor nga minuro, nga gintambungan sang 38 ka tawo!

Agod mabuligan ang diutay nga grupo sang mga manugbantala sang Ginharian, namat-od ang pamilya nga maghalin sa ila nabaw-ing nga puluy-an. Nagsaylo sila sa isa ka minuro nga may halos isa ka libo ka pumuluyo, diin nagaalagad karon si Jean subong isa ka ministeryal nga alagad sa lokal nga kongregasyon sang mga Saksi ni Jehova. Ining pamilya, nga nagsaylo anay sa mga kapuluan agod biyaan ang sibilisasyon, nagakabig karon nga isa ka pribilehiyo nga masapwan ang lamang matuod nga santuaryo, ang teokratikong organisasyon ni Jehova.